ପୁରୀ: ବଙ୍ଗୋପସାଗରରେ ବାତ୍ୟା ଆସିବ । ଓଡ଼ିଶା, ଆନ୍ଧ୍ରପ୍ରଦେଶ ଉପକୂଳରେ ମାଡ଼ ହେବ । ପ୍ରାକୃତିକ ବିପର୍ଯ୍ୟୟ, ପବନ, ବନ୍ୟା, ବାତ୍ୟା ଦ୍ଵାରା କୃଷିହାନିର ଆଶଙ୍କା କରାଯାଇଥିଲା ପାଞ୍ଜିରେ । ଆଉ ଏବେ ପାଣିପାଗ ବିଭାଗ ସମାନ ପୂର୍ବାନୁମାନ କରିଥିବା ବେଳେ ବଙ୍ଗୋପସାଗରରେ ବାତ୍ୟା ଆସୁଛି । ଆଉ କିଛି ଘଣ୍ଟା ମଧ୍ୟରେ ଗଭୀର ଅବପାତ ବାତ୍ୟା "ମୋନ୍ଥା"ରେ ପରିଣତ ହେବ ।

ବାତ୍ୟା ନେଇ ପାଞ୍ଜି ଓ ଜୋତିର୍ବିଦ ବର୍ଷ ଆରମ୍ଭରୁ ଆକଳନ କରି ଲେଖି ଥିଲେ । ଅରୁଣଉଦୟ ପ୍ରେସର ନୂତନ ଖଡ଼ିରତ୍ନ ପଞ୍ଜିକାରେ ଉଲ୍ଲେଖ କରାଯାଇଛି ଯେ, "କାର୍ତ୍ତିକ ମାସ ବା ତୁଳା ମାସର ଜଳବିଷୁବ ଗର୍ଭଣା ସଂକ୍ରାନ୍ତି ସଞ୍ଚାର ଗଣନା ପ୍ରମାଣ ହୋଇଛି ମାସାଧପତି ରବି । ଫଳ ସ୍ୱରୂପ ସମୁଦ୍ର ସଞ୍ଚାର ଅଶ୍ଵବାହନେ ବହୁଜଳ ବୃଷ୍ଟି ।"

ଏଥିସହ ପଢ଼ନ୍ତୁ: ମାଲକାନଗିରିରୁ କେତେ ଦୂରରେ ଯିବ 'ମୋନ୍ଥା' ? କହିଦେଲେ ରାଜସ୍ଵ ମନ୍ତ୍ରୀ...

ପାଞ୍ଜିରେ ଲେଖା ଯାଇଛି, "ଅଷ୍ଟ୍ରେଲିଆ, ସୁମାତ୍ରା ଓ ପୂର୍ବଭାରତୀୟ ଦ୍ୱୀପପୁଞ୍ଜ, ଭାରତ ମଧ୍ୟରେ ପଶ୍ଚିମବଙ୍ଗ, କଲିକତା, ଗଙ୍ଗାନଦୀ ତଟବର୍ତ୍ତୀ ଅଞ୍ଚଳ ଓଡ଼ିଶା, ଆନ୍ଧ୍ର, କେରଳ, କର୍ଣାଟକ, ତାମିଲନାଡ଼ୁ, ଦକ୍ଷିଣ ଉପକୂଳ ଅଞ୍ଚଳମାନଙ୍କରେ ପ୍ରାକୃତିକ ବିପର୍ଯ୍ୟୟ ପବନ ଭୟ, ବନ୍ୟା, ବାତ୍ୟାଦ୍ଵାରା କୃଷିହାନି ଓ ଜନକ୍ଷୟର ଆଶଙ୍କା ରହିଛି । ମାସତତ୍ତ୍ଵ ଓ ପାଣିପାଗ ଆକଳନ ଅନୁସାରେ ଏ ମାସର ମଧ୍ୟଭାଗରେ ଆଞ୍ଚଳିକ ବହୁବୃଷ୍ଟି ଯୋଗ ।"

କେବଳ ବାତ୍ୟା କଥା ନୁହେଁ ବରଂ ପାଞ୍ଜିରେ ସୁନା ମୂଲ୍ୟ ବୃଦ୍ଧି ହେବା କତା ପୂର୍ବରୁ ଆକଳନ କରାଯାଇଛି । ପାଞ୍ଜି ଅନୁସାରେ, "ସ୍ଵର୍ଣ୍ଣାଦି ଧାତୁଦ୍ରବ୍ୟର ମୂଲ୍ୟ ବଢ଼ିବ । ବସ୍ତ୍ର, କାର୍ପାସ ଓ ଜଙ୍ଗଲଜାତ ପଦାର୍ଥର ମୂଲ୍ୟ ସମ ରହିବ । ବିଳାସସାମଗ୍ରୀ ଓ ଲୌହାଦି ଧାତୁଦ୍ରବ୍ୟ, ଇନ୍ଧନର ମୂଲ୍ୟ ବଢ଼ି ଚାଲିବ ।"

ଏଥିସହ ପଢ଼ନ୍ତୁ: 'ଆମ ବସ୍‌'ରେ ସୃଷ୍ଟି କରୁଥିଲେ କୃତ୍ରିମ ଭିଡ଼, ଚାରିପଟେ ଘେରି ଲୁଟ୍ କରୁଥିଲେ ଟଙ୍କା ଓ ଅଳଙ୍କାର

ବାତ୍ୟା 'ମୋନ୍ଥା'କୁ ନେଇ ଓଡ଼ିଶା ସଜାଗ ରହିଥିବା ବେଳେ ରାଜସ୍ଵ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଜ ପୂଜାରୀ ଦେଇଛନ୍ତି ବଡ଼ ସୂଚନା । ସ୍ଵତନ୍ତ୍ର ରିଲିଫ୍ କମିଶନର (SRC)ଙ୍କ କାର୍ଯ୍ୟାଳୟରେ ସମ୍ଭାବ୍ୟ ବାତ୍ୟା 'ମୋନ୍ଥା'କୁ ନେଇ ବୈଠକ ପରେ ମନ୍ତ୍ରୀ ଦେଇଛନ୍ତି ବଡ଼ ଅପଡେଟ୍ । ରାଜସ୍ଵ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, "ରାଜ୍ୟର ୮ଟି ଜିଲ୍ଲା ରେଡ ଜୋନ୍‌ରେ ରହିଛି । ଏହି ଜିଲ୍ଲାରେ ବାତ୍ୟାର ପ୍ରତିଫଳନ ରହିବ ।"

ରାଜସ୍ଵ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ କହିଛନ୍ତି, "ମାଲକାନାଗିରି ଠାରୁ ୨୦୦ କିମି ଦୂରରେ ବାତ୍ୟା ଅତିକ୍ରମ କରିବ । ବାତ୍ୟାରେ କୋରାପୁଟ, ନବରଙ୍ଗପୁର, ରାୟଗଡ଼ା, ଗଜପତି, ଗଞ୍ଜାମ, କନ୍ଧମାଳ, କଳାହାଣ୍ଡି ଜିଲ୍ଲା ପ୍ରଭାବିତ ହେବାର ଆଶଙ୍କା ରହିଛି । ଅତି ଭାରି ବର୍ଷା ସହ ଭୂସ୍ଖଳନ, ଆକସ୍ମିକ ବନ୍ୟା ଆଶଙ୍କା କରାଯାଉଛି । ତେଣୁ ଏସବୁ ଜିଲ୍ଲାରେ ପ୍ରସ୍ତୁତି ସରିଛି, ସରକାର ଆଲୋଚନା କରିଛନ୍ତି । ଗତକାଲି ୧୫ ଜିଲ୍ଲାର ଜିଲ୍ଲାପାଳଙ୍କ ସହ କଥା ହୋଇଥିଲୁ । ଆଜି ୩୦ ଜିଲ୍ଲାର ଜିଲ୍ଲାପାଳଙ୍କ ସହ କଥା ହୋଇଛୁ।"