Argus News - ପାକିସ୍ତାନ ଓ ଆଫଗାନିସ୍ତାନ ମଧ୍ୟରେ ଘମାଘୋଟ ଯୁଦ୍ଧ: ସେନା ଶକ୍ତିରେ କିଏ ଆଗରେ?

ପଡ଼ୋଶୀ ଦେଶ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଘମାଘୋଟ ଯୁଦ୍ଧ ଆରମ୍ଭ ହୋଇଛି । ପାକିସ୍ତାନ ଗୁରୁବାରଠାରୁ ତାଲିବାନ ସୈନ୍ୟ ଠିକଣା ଉପରେ ଏୟାରଷ୍ଟ୍ରାଇକ୍ କରିଛି । ଏହାପରେ ଏବେ ସବୁ ଆଡ଼େ ଗୋଟିଏ ପ୍ରଶ୍ନ ଯେ ତାଲିବାନ ନେତୃତ୍ଵାଧୀନ ଆଫଗାନିସ୍ତାନ ଏହାର ଜବାବରେ ଆକାଶ ମାର୍ଗରେ ଆକ୍ରମଣ କରିବାକୁ ସକ୍ଷମ ହେବ କି ନାହିଁ ? ଉଭୟ ଦେଶର ସୈନ୍ୟ ଶକ୍ତିକୁ ତୁଳନା କଲେ ପାକିସ୍ତାନ ବହୁ ଆଗରେ ଅଛି ।

ତଥାପି ଆଫଗାନିସ୍ତାନ ନିକଟରେ 'ଗରିଲା ଯୁଦ୍ଧ'ର ଅଭିଜ୍ଞତା ରହିଛି । ଆଫଗାନିସ୍ତାନ ସ୍ଥଳ ଭାଗରୁ ଡ୍ରୋନ ଏବଂ ଛୋଟ ଛୋଟ ଆକ୍ରମଣ ଜରିଆରେ ପାକିସ୍ତାନ ୧୯ଟି ପାକିସ୍ତାନୀ ପୋଷ୍ଟକୁ କବଜା କରିଥିବା ଦାବି କରିଛି । ଅନ୍ୟପଟେ ପାକିସ୍ତାନ ଆଫଗାନିସ୍ତାନ ଉପରେ ଏୟାର ଷ୍ଟ୍ରାଇକ୍ କରି ପ୍ରାୟ ୭୨ ଜଣ ତାଲିବାନୀଙ୍କୁ ମାରିଥିବା ଦାବି କରିଛି । ତେବେ ଏଠାରେ ଆସନ୍ତୁ ବିସ୍ତୃତ ଭାବରେ ଜାଣିବା ଉଭୟ ଦେଶର ସୈନ୍ୟ ଶକ୍ତି କେତେ ଏବଂ କିଏ କାହାଠୁ ଅଧିକ ଶକ୍ତିଶାଳୀ ।

ପଢନ୍ତୁ ଏହି ଖବର: କାହିଁକି ପାକିସ୍ତାନ ଓ ଆଫଗାନିସ୍ତାନ ମଧ୍ୟରେ ଲାଗିଛି ଯୁଦ୍ଧ ? ଜାଣନ୍ତୁ ଅସଲ କାରଣ...

• ପାକିସ୍ତାନ-ଆଫଗାନିସ୍ତାନ ମଧ୍ୟରେ କିଏ ଅଧିକ ଶକ୍ତିଶାଳୀ ?

ଭାରତର ଶତ୍ରୁ ରାଷ୍ଟ୍ର ତଥା ପଡ଼ୋଶୀ ଦେଶ ପାକିସ୍ତାନ ଏକ ପରମାଣୁ ଶକ୍ତି ସମ୍ପନ୍ନ ଦେଶ । ସେପଟେ ତାଲିବାନ ଏକ ବିଦ୍ରୋହୀ ପୃଷ୍ଠଭୂମିରୁ ବାହାରିଥିବା ଶାସନ । ଅର୍ଥାତ ତାଲିବାନ ଆଫଗାନିସ୍ତାନରେ ବଳପୂର୍ବକ ଆକ୍ରମଣ କରି ଶାସନ କ୍ଷମତାକୁ ହାତକୁ ନେଇଛି । ପାକିସ୍ତାନ ଦୁନିଆର ଟପ୍-୧୫ ସବୁଠୁ ଶକ୍ତିଶାଳୀ ସେନା ମଧ୍ୟରୁ ଗୋଟିଏ । ଦେଶ ନିକଟରେ ପ୍ରାୟ ୬.୫ ଲକ୍ଷ ସକ୍ରିୟ ସୈନ୍ୟ ଅଛନ୍ତି । ଏହାସହିତ ୧୭୦ରୁ ଅଧିକ ଯୁଦ୍ଧାସ୍ତ୍ର ଅଛି । ସେପଟେ ତାଲିବାନ ନିକଟରେ ପ୍ରାୟ ୧.୭ ଲକ୍ଷରୁ ୨ ଲକ୍ଷ ସୈନ୍ୟ ଅଛନ୍ତି । କିନ୍ତୁ ଏମାନଙ୍କର ତାଲିମ, ସଂଗଠନ, ପ୍ରଯୁକ୍ତିବିଦ୍ୟା ପାକିସ୍ତାନ ତୁଳନାରେ ବହୁ ପଛରେ ରହିଛି ।

• ପ୍ରତିରକ୍ଷା କ୍ଷେତ୍ରରେ କିଏ ଆଗରେ ?

ପାକିସ୍ତାନ ପାଖରେ ଆଧୁନିକ ଟ୍ୟାଙ୍କ, ଦୂରଗାମୀ ତୋପ, ବାଲିଷ୍ଟିକ୍, କ୍ରୁଜ୍ କ୍ଷେପଣାସ୍ତ୍ର ଅଛି । ତାଲିବାନ ନିକଟରେ ସେପରି କୌଣସି ବିଶ୍ୱସନୀୟ କ୍ଷେପଣାସ୍ତ୍ର ପ୍ରତିରକ୍ଷା କିମ୍ବା ଉନ୍ନତ ବାୟୁ ପ୍ରତିରକ୍ଷା ବ୍ୟବସ୍ଥା ନାହିଁ । ଦୂରଗାମୀ ଆକ୍ରମଣ କ୍ଷମତା ମଧ୍ୟ ତାଲିବାନ ସରକାର ନିକଟରେ ସୀମିତ । ତଥାପି, ତାଲିବାନ ଗରିଲା ରଣନୀତି, ହିଟ୍-ଏଣ୍ଡ-ରନ୍ ଆକ୍ରମଣ, ଆମ୍ବୁସ୍ ଏବଂ ଆତ୍ମଘାତୀ ଆକ୍ରମଣରେ ପାରଙ୍ଗମ । ଆଫଗାନିସ୍ତାନର ପାର୍ବତ୍ୟାଞ୍ଚଳ ଏହି ରଣନୀତିକୁ ଅଧିକ ପ୍ରଭାବଶାଳୀ କରିଥାଏ ।

• ଉଭୟ ଦେଶର ବାୟୁ ଶକ୍ତି କେତେ ?

ବାୟୁ ଶକ୍ତି କ୍ଷେତ୍ରରେ ମଧ୍ୟ ଉଭୟଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ପାର୍ଥକ୍ୟ ରହିଛି । ପାକିସ୍ତାନ ବାୟୁସେନା ପାଖରେ ୪୫୦ଟି ଯୁଦ୍ଧ ବିମାନ ଅଛି, ଯେଉଁଥିରେ F-୧୬ ଫାଇଟିଂ ଫାଲକନ୍, JF-୧୭ ଥଣ୍ଡର୍ ଏବଂ ଡାସଲ୍ଟ ମିରେଜ୍ ସାମିଲ । ଏହା ସୀମାପାର ଅପରେସନ୍, ସଠିକ୍ ବୋମାମାଡ଼ ଏବଂ ଗଭୀର ଆକ୍ରମଣ କରିବାରେ ପାକିସ୍ତାନକୁ ସହାୟ ହୁଏ । ସେପଟେ ତାଲିବାନର କୌଣସି ସକ୍ରିୟ ଯୁଦ୍ଧ ବିମାନ ନାହିଁ । ଆମେରିକୀୟ ସେନା ଚାଲିଯିବା ପରେ, ସେମାନେ UH-୬୦ ବ୍ଲାକ୍ ହକ୍ ଏବଂ Mi-୧୭ ଭଳି କିଛି ହେଲିକପ୍ଟର ହାସଲ କରିଥିଲେ, କିନ୍ତୁ ସ୍ପେୟାର ପାର୍ଟସ୍, ରକ୍ଷଣାବେକ୍ଷଣ ଅଭାବ ଯୋଗୁଁ ଏଗୁଡ଼ିକ ମୁଖ୍ୟତଃ ସେବାରୁ ବାହାରେ ଅଛି।

ପଢନ୍ତୁ ଏହି ଖବର: ଆମେରିକାର ଅସ୍ତ୍ର ନେଇ ରାତି ଅଧରେ ପାକିସ୍ତାନ ଉପରେ ଘମାସାନ ଆକ୍ରମଣ

• ଉଭୟ ଦେଶ ପାଖରେ କେତେ ଅସ୍ତ୍ରଶସ୍ତ୍ର ଅଛି ?

ଅସ୍ତ୍ରଶସ୍ତ୍ର କ୍ଷେତ୍ରରେ ମଧ୍ୟ ପାକିସ୍ତାନ ଆଫଗାନିସ୍ତାନଠାରୁ ବହୁ ଆଗରେ ଅଛି । ଆଫଗାନିସ୍ତାନ ନିକଟରେ ସୋଭିଏତ୍ ଏବଂ ଆମେରିକୀୟ ଅସ୍ତ୍ରଶସ୍ତ୍ରର ମିଶ୍ରଣ ରହିଛି । ଏଥିରେ M4 ଏବଂ M16 ରାଇଫଲ୍, ନାଇଟ୍ ଭିଜନ୍ ଡିଭାଇସ୍, ଆଧୁନିକ ଯୋଗାଯୋଗ ବ୍ୟବସ୍ଥା, ମାଇନ୍-ପ୍ରତିରୋଧୀ ଯାନ ଏବଂ ପୁରୁଣା ସୋଭିଏତ୍ ଯୁଗର ଟ୍ୟାଙ୍କର୍ ଏବଂ ତୋପ ଅଛି । ଏଗୁଡ଼ିକ ଆଫଗାନିସ୍ତାନର ଦୁର୍ଗମ ଭୂଖଣ୍ଡରେ ଗତିଶୀଳତା ବୃଦ୍ଧି କରେ, କିନ୍ତୁ ସେମାନେ ପାକିସ୍ତାନର ଉନ୍ନତ ପ୍ରଯୁକ୍ତିବିଦ୍ୟା ସହିତ ପ୍ରତିଯୋଗିତା କରିବାକୁ ଅସମର୍ଥ । ଏହି ସମୟରେ, ପାକିସ୍ତାନ ପାଖରେ ୬,୦୦୦ରୁ ଅଧିକ ଯୁଦ୍ଧ ଯାନ ଏବଂ ୪,୬୦୦ରୁ ଅଧିକ ତୋପ ଅଛି ।

• ସୀମା ଚ୍ୟାଲେଞ୍ଜ ଏବଂ ଗରିଲା ଯୁଦ୍ଧ

ପାକିସ୍ତାନର ସବୁଠାରୁ ବଡ଼ ଚ୍ୟାଲେଞ୍ଜ ହେଉଛି ସୀମାବର୍ତ୍ତୀ ଅଞ୍ଚଳ, ଯେଉଁଠାରେ ସାଧାରଣ ନାଗରିକ, ସଶସ୍ତ୍ର ଗୋଷ୍ଠୀ ଏବଂ ସ୍ଥାନୀୟ ଯୋଦ୍ଧାମାନେ ମିଶିଯାଆନ୍ତି । ବଡ଼ ଧରଣର ପାରମ୍ପରିକ ବାହିନୀ ମୁତୟନ କରିବା ମଧ୍ୟ ଦେଶ ପାଇଁ ବିପଦ ହୋଇପାରେ । ତାଲିବାନ ଏହି ପରିସ୍ଥିତିର ଫାଇଦା ଉଠାଇ ଗରିଲା ଶୈଳୀରେ ଆକ୍ରମଣ ଆରମ୍ଭ କରନ୍ତି । ମୂଳତଃ, ପାରମ୍ପରିକ ଏବଂ ପ୍ରଯୁକ୍ତିବିଦ୍ୟା ଯୁଦ୍ଧରେ ପାକିସ୍ତାନ ଶତ୍ରୁ ରାଷ୍ଟ୍ରଠାରୁ ଆଗରେ ରୁହେ, କିନ୍ତୁ ତାଲିବାନର ଗରିଲା କ୍ଷମତା ଆଗରେ ପଛରେ ପଡ଼ିଯାଏ ।

ଅଧିକ ଖବର ପଢନ୍ତୁ...