ଅର୍ଗସ ବ୍ୟୁରୋ : ଓଡ଼ିଶାର ଭାତ ହାଣ୍ଡି ବରଗଡ଼ରେ ଦାଉ ସାଧିଛି ପ୍ରାକୃତିକ ଦୁର୍ବିପାକ । ଧାନ ଅମଳ ପରେ ରାସ୍ତା ଉପରେ ଆର୍ଦ୍ରତା ଶୂନ୍ୟ ପାଇଁ ଶୁଖାଇଥିଲା ଚାଷୀ । ହେଲେ ଅଦିନିଆ ବର୍ଷା ସବୁ ଛାରଖାର୍ କରିଦେଇଛି । ରାସ୍ତା ଉପରେ ଧାନ ସବୁ ଭିଜି ନଷ୍ଟ ହେବାକୁ ବସିଛି । ଏ ଦୃଶ୍ୟ ହେଉଛି ଅତାବିରାର ।ଏପଟେ ଦେଖନ୍ତୁ କଳାପାଣି ଅଞ୍ଚଳରେ ବି ସମାନ ଅବସ୍ଥା । ଚାଷୀଙ୍କ ମୁହଁରୁ ହସ ଛଡାଇ ନେଇଛି ବର୍ଷା । ଅମଳ ଧାନ ସବୁ ଭିଜିଥିବା ବେଳେ ଚାଷ ଜମିରେ ପାଣି ପଶି ଧାନ ଗଛ ମାଟିରେ ଲୋଟି ପଡିଛି ।   

ଅଧିକ ପଢନ୍ତୁ ଓଡିଶା ଖବର

ଏ ଦେଖନ୍ତୁ ବୌଦ୍ଧ ଜିଲ୍ଲାର ଚିତ୍ର । ଆଉ ଦିନକ ମଧ୍ୟରେ କଟା ହୋଇଥାନ୍ତା ଧାନ । କିନ୍ତୁ ବର୍ଷା ସବୁ ଭିଜେଇ ଦେଲା । ବିଲରେ ଚାଲିଲା ପାଣି । ମେଘୁଆ ପାଗ ଯୋଗୁଁ ଏବେ ଧାନ ବିଲରୁ ବାହାରକୁ ଆଣି ହେଉଛି ନା ଧନ ବିଲରୁ ଧାନ କାଟି ହେଉଛି । ଖାଲି ଧାନ ନୁହେଁ ହେକ୍ଟର ହେକ୍ଟର ପରିବା ଫସଲ ବି ପଚିସଢି ନଷ୍ଟ ହୋଇଯାଇଛି । ଏପଟେ ମଣ୍ଡିରେ ଜରି ପାଲ ତଳେ ବି ସୁରକ୍ଷିତ ନାହିଁ ଧାନ । ପାଣି ସାଉଣ୍ଟିବାରେ ବ୍ୟସ୍ତ ଚାଷୀ ।କଳାହାଣ୍ଡି ଜିଲ୍ଲାରେ ବି ବର୍ଷା ପାଇଁ ବଢିଛି ଚାଷୀଙ୍କ ଦୁର୍ଦ୍ଦଶା । କ୍ଷେତରେ ପାଣି ପଶି ଧାନ ଫସଲ ସମ୍ପୂର୍ଣ୍ଣ ଭିଜିଯାଇଛି । ଶହ ଶହ ହେକ୍ଟର କ୍ଷେତରେ ଜମି ରହିଛି ବର୍ଷା ପାଣି । ବର୍ଷାଯାକ ପରିଶ୍ରମ କରି ସୁନାର ଫସଲ ଖେଳାଇଥିଲା ଚାଷୀ । ଏବେ ଅଦିନିଆ ବର୍ଷା ଯୋଗୁଁ ହଠାତ୍ ଫସଲ ନଷ୍ଟ ଦେଖି କେମିତି ଋଣ ପରିଶୋଧ କରିବ, ତାକୁ ନେଇ ଚିନ୍ତାରେ ପଡିଛି ।