ଭୁବନେଶ୍ୱର: ପୁଣି ଚର୍ଚ୍ଚାରେ ଭି. କାର୍ତ୍ତିକ । ଆସିଛି କର୍ମକ୍ଷେତ୍ରରେ ଯୌନ ଉତ୍ପୀଡ଼ନ ଅଭିଯୋଗ । ଏହି ଭି. କାର୍ତ୍ତିକ ହେଉଛନ୍ତି ଓଡ଼ିଶା କ୍ୟାଡରର IFS ବା ଭାରତୀୟ ବନ ସେବା ଅଧିକାରୀ । ଏବେ କୋଏମ୍ବାଟୋରସ୍ଥିତ ବନସେବା ଅଧିକାରୀ ପ୍ରଶିକ୍ଷଣ ପ୍ରତିଷ୍ଠାନ- CASFOSରେ ଲେକ୍ଚରର ଭାବେ କାର୍ଯ୍ୟରତ IFS ଭି. କାର୍ତ୍ତିକ ପ୍ରଶିକ୍ଷଣ କେନ୍ଦ୍ରରେ ମହିଳା ଟ୍ରେନି ଅଫିସରଙ୍କୁ ସୋସିଆଲ ମିଡିଆରେ ଅଶ୍ଳୀଳ ମେସେଜ ପଠାଇବା ସହ ତାଙ୍କ ଅଧୀନରେ କାମ କରୁଥିବା କର୍ମଚାରୀଙ୍କୁ ମାନସିକ ନିର୍ଯାତନା ଦେଉଥିବା ଅଭିଯୋଗ ହୋଇଛି ।
ଅଭିଯୋଗ ପରେ ପ୍ରତିଷ୍ଠାନ ପକ୍ଷରୁ ଏ ଘଟଣାର ତଦନ୍ତ କରାଯାଇଛି। ତାଙ୍କ ବିରୋଧରେ ଆସିଥିବା ଅଭିଯୋଗ ପ୍ରମାଣିତ ହେବା ପରେ ତାଙ୍କୁ ଜୁନ ୩୦ ପରେ ତତ୍କାଳ ଓଡ଼ିଶା ଫେରାଇ ନେବାକୁ ସୁପାରିଶ କରିଛି CASFOS । ଏହାସହ ଭି. କାର୍ତ୍ତିକଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ମଧ୍ୟ ପ୍ରତିଷ୍ଠାନ ସୁପାରିଶ କରିଛି । ଏମିତିକି ପ୍ରତିଷ୍ଠାନ ଏନେଇ ଓଡ଼ିଶାର ବନବିଭାଗ ମୁଖ୍ୟଙ୍କୁ ଅବଗତ କରାଇଛି। ତାଙ୍କୁ ଓଡ଼ିଶାରେ କୌଣସି ଟ୍ରେନିଂ ଇନଷ୍ଟିଚ୍ୟୁସନ୍ କିମ୍ବା ମହିଳା ଭିତ୍ତିକ ସଂସ୍ଥାରେ ନିଯୁକ୍ତ ନ କରିବାକୁ ସୁପାରିଶ କରିଛି ପ୍ରତିଷ୍ଠାନ ।
ଆହୁରି ପଢନ୍ତୁ ଓଡିଶା ଖବର...