କୋରାପୁଟ: ମିଗଜୋମ୍ ପ୍ରଭାବରେ ବଦଳିଯାଇଛି ପାଗର ମିଜାଜ୍ । ଉପକୂଳଠୁ ଉପାନ୍ତ ସବୁଠି କୋହଲା ପାଗ । କେତେବେଳେ ଝିପିଝିପି ବର୍ଷା ତ କେତେବେଳେ ଜୋର୍ ରେ ବର୍ଷା ହେଉଛି । ଦିନର ତାପମାତ୍ରା ଖସିଥିବାରୁ ପ୍ରବଳ ଥଣ୍ଡା ଅନୁଭୂତ ହେଉଛି । ରାଜଧାନୀରେ ରେକର୍ଡ କରିଛି ଶୀତ । ଦୁଇ ଦିନରେ ତାପମାତ୍ରା ୫ ଡିଗ୍ରୀ କମିଛି ।
ସେପଟେ ବର୍ଷା ଯୋଗୁଁ ଧସିଲା ମାଟି ଅତଡ଼ା । କୋରାପୁଟ ଜିଲ୍ଲା ନାରାୟଣପାଟଣା ତଳଗୁମାଣ୍ଡି ପଞ୍ଚାୟତ ବରିପୁଟରେ ମାଟି ଅତଡା ଖସି ରାସ୍ତା ଅବରୋଧ ହୋଇଛି । ଫଳରେ ଉଭୟ ପଟୁ ଅଟକିଛି ଗାଡ଼ିମୋଟର । ଯାତାୟାତ ବାଧାପ୍ରାପ୍ତ ହୋଇଛି ।
ଲଗାଣ ବର୍ଷାରେ ସ୍ଥିତି ବେହାଲ : ଧସିଲା ପାହାଡ଼, ରାସ୍ତା ଅବରୋଧ
ସେହିପରି କୋଟିୟା ପଂଚାୟତର ମାଡକାର ଗ୍ରାମକୁ ଯିବା ବାଟରେ ପ୍ରବଳ ବର୍ଷା ହେତୁ ଛୋଟ ଧରଣର ଲ୍ୟାଣ୍ଡ ସ୍ଲାଇଡ଼୍ ହେବା ଦେଖିବାକୁ ମିଳିଛି । ପାହାଡ଼ ଉପରୁ ବଡ଼ ଓ ଛୋଟ ପଥର ହଟାତ ଖସି ଆସିଥିଲା। ଫଳରେ ମୁଖ୍ୟ ରାସ୍ତାକୁ ଖସି ଆସିଥିଲେ ବି କାହାର କିଛି ହୋଇନଥିବା ଜଣାପଡ଼ିଛି । ଏହି ଖବର ପାଇବ ପରେ ପଟ୍ଟାଙ୍ଗି ତହସିଲଦାର ଦେବେନ୍ଦ୍ର ସିଂ ଧାରୁଆ, କୋଟିଆ ଆର, ଆଇ ଦୁର୍ଯ୍ୟୋଧନ ବାବୁ ସମେତ ପଟ୍ଟାଙ୍ଗି ଅଗ୍ନିଶମ ବିଭାଗୀୟ ଅଧିକାରୀ ଓ ଷ୍ଟାଫ ପହଂଚି ସଫେଇ କରି ଗମନାଗମନ ସୁବିଧା କରୁଥିବା ଜଣାପଡିଛି ।
ଗତକାଲି ଦାରିଙ୍ଗବାଡିରେ ସର୍ବୋଚ୍ଚ ଦିନ ତାପମାତ୍ରା ୧୭ ଡିଗ୍ରୀ ରହିଥିବାବେଳେ ଭୁବନେଶ୍ବରର ତାପମାତ୍ରା ରହିଥିଲା ୨୩ ଦଶମିକ ୬ ଡିଗ୍ରୀ । ରାତିରେ ଥଣ୍ଡା ଜାରି ରହିଥିବାରୁ ତାପମାତ୍ରା ଅହୁରି କମିବ ବୋଲି ଆଶା କରାଯାଉଛି । ଆସନ୍ତା ଦୁଇ ଦିନ ଜାରି ରହିବ ଶୀତର ଲହରୀ । ବାତ୍ୟା ପ୍ରଭାବରେ ଦକ୍ଷିଣ ଓଡ଼ିଶାରେ ଅଧିକ ବର୍ଷା ହୋଇଛି ।