ଅର୍ଗସ ବ୍ୟୁରୋ: ମୋଦି ସରକାରଙ୍କ ବଡ଼ ନିଷ୍ପତ୍ତି । ୨୦୨୮ ପର୍ଯ୍ୟନ୍ତ ଗରିବଙ୍କୁ ମିଳିବ ମାଗଣା ପୋଷଣ ଯୁକ୍ତ ଚାଉଳ । ଜୁଲାଇ ୨୦୨୪ରୁ ଡିସେମ୍ବର ୨୦୨୮ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଏବଂ ଅନ୍ୟାନ୍ୟ କଲ୍ୟାଣକାରୀ ଯୋଜନାରେ ମିଳିବ ମାଗଣା ଚାଉଳ । ପୋଷଣ ଯୁକ୍ତ ଚାଉଳ ଯୋଗାଣ ଜାରି ରଖିବାକୁ ମଞ୍ଜୁରୀ ଦେଇଛି କେନ୍ଦ୍ର କ୍ୟାବିନେଟରେ । ଏଥିପାଇଁ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର । ଗରିବ ଲୋକଙ୍କ ପାଇଁ ଏହା ନିହାତି ଆବଶ୍ୟକ । ରାଜ୍ୟ ସରକାରଙ୍କ ନିଜସ୍ଵ ଯୋଜନାରେ ମଧ୍ୟ ସେହି ଅନୁପାତରେ ମାଗଣାରେ ଚାଉଳ ଯୋଗାଣ ଅବଧି ବୃଦ୍ଧି କରାଯିବ ବୋଲି କହିଛନ୍ତି ଖାଦ୍ୟ ଯୋଗାଣ ମନ୍ତ୍ରୀ ।
ମାଗଣାରେ ପୋଷଣ ଯୁକ୍ତ ଚାଉଳ ଓଡିଶାରେ ଅପପୁଷ୍ଟି ଦୂର କରିବାରେ କେତେ ସହାୟକ ହେବ ? ଓଡିଶା ପାଇଁ ଅପପୁଷ୍ଟି ଏକ ବଡ ଆହ୍ଵାନ ହୋଇ ଛିଡା ହୋଇଛି । ୨୦୨୪ ଅଗଷ୍ଟ ସୁଦ୍ଧା ରାଜ୍ୟରେ ୯୮ ହଜାର ୬୨୦ ସଂଖ୍ୟକ ଶିଶୁ ଅପପୁଷ୍ଟିର ଶିକାର ହୋଇଛନ୍ତି । ପୂର୍ବରୁ ନ୍ୟାସନାଲ ଫ୍ୟାମିଲି ହେଲଥ ସର୍ଭେ ରିପୋର୍ଟ ବିଜେଡି ସରକାର ଅମଳରେ ଅପପୁଷ୍ଟିର ଅସଲ ଚିତ୍ରକୁ ଉଜାଗର କରିଥିଲା । ରାଜ୍ୟରେ ୧୦.୭ ଲକ୍ଷ ପିଲା ବୟସ ତୁଳନାରେ ଗେଡା ହୋଇଥିବା ବେଳେ ୫.୧୩ ଲକ୍ଷ ପିଲା ଉଚ୍ଚତା ତୁଳନାରେ ଅଧିକ ପତଳା । ୧୦.୮ ଲକ୍ଷ ଶିଶୁ ବୟସ ତୁଳନାରେ ବହୁତ କମ୍ ଓଜନର ହୋଇଥିବା ବେଳେ ୬୪ ପ୍ରତିଶତ ଶିଶୁ ରକ୍ତହୀନତାର ଶିକାର ହେଉଥିବା ରିପୋର୍ଟରେ କୁହାଯାଇଥିଲା । ତେବେ କେନ୍ଦ୍ର ଯୋଗାଉଥିବା ଫୋର୍ଟିଫାଏଡ ରାଇସ କର୍ନେଲ୍ସରେ ପୋଷଣ ଯୁକ୍ତ ଚାଉଳରେ ଆଇରନ, ଫଲିକ୍ ଏସିଡ, ଭିଟାମିନ B12 ଭଳି ମାଇକ୍ରୋନ୍ୟୁଟ୍ରିଏଣ୍ଟସ ବା ସୁକ୍ଷ୍ମ ପୋଷକ ତତ୍ଵ ମିଶିଛି । ଯାହାଦ୍ଵାରା ଶିଶୁ ମାନେ ବିଭିନ୍ନ ରୋଗରୁ ରକ୍ଷା ପାଇପାରିବେ । ଗର୍ଭବତୀ ମାଆ ମାନେ ମଧ୍ୟ ଏହି ପ୍ରକାର ଚାଉଳ ସେବନ କଲେ ଉଭୟ ମାଆ ଏବଂ ଶିଶୁ ସୁସ୍ଥ ସବଳ ହେବେ । ଏହାସହ ମାତୃ ମୃତ୍ୟୁହାର ଏବଂ ଶିଶୁ ମୃତ୍ୟହାର ଢେର ମାତ୍ରାରେ ହ୍ରାସ ପାଇବ ବୋଲି ସ୍ଵାସ୍ଥ୍ୟ ବିଶେଷଜ୍ଞ ମତ ରଖିଛନ୍ତି ।
ଅନ୍ୟପଟେ ୨୦୨୮ ପର୍ଯ୍ୟନ୍ତ ମୋଦି ସରକାର ଗରିବ କଲ୍ୟାଣ ଯୋଜନାରେ ମାଗାଣା ପୋଷଣ ଯୁକ୍ତ ଚାଉଳ ଯୋଗାଇବା ପାଇଁ ସରକାରଙ୍କୁ ଧନ୍ୟବାଦ ଦେଇଛନ୍ତି ରାଜ୍ୟବାସୀ। ଓଡିଶାରେ 3 କୋଟି 26 ଲକ୍ଷ ଲୋକଙ୍କୁ ମିଳୁଛି ପ୍ରଧାନ ମନ୍ତ୍ରୀ ଗରିବ କଲ୍ୟାଣ ଯୋଜନାରେ ମାଗଣା ଚାଉଳ। ରାଜ୍ୟ ଯୋଜନାରେ ବି 9 ଲକ୍ଷରୁ ଅଧିକ ପରିବାରକୁ ମିଳୁଛି ମାଗଣା ଚାଉଳ.. ଏବେ ସମସ୍ତଙ୍କୁ ମିଳିବ ପୋଷଣ ଯୁକ୍ତ ଚାଉଳ। ୨୦୩୬ ସୁଦ୍ଧା ସ୍ଵତନ୍ତ୍ର ଭାଷା ଭିତ୍ତିକ ରାଜ୍ୟ ଭାବେ ଓଡିଶା ପାଳନ କରିବ ଶତ ବାର୍ଷିକୀ । ଡବଲ ଇଞ୍ଜିନ ସରକାରରେ ସବୁ ଗରିବ ହିତାଧିକାରୀଙ୍କ ପାଖରେ କେନ୍ଦ୍ର ପଠାଉଥିବା ଚାଉଳ ପହଞ୍ଚିବ ବୋଲି ନୂଆ ଆଶା ସଞ୍ଚାର ହୋଇଛି।
ଅଧିକ ପଢ଼ନ୍ତୁ ଭାରତ ଖବର