ଅର୍ଗସ ବ୍ୟୁରୋ: କୋରାପୁଟ ଜିଲ୍ଲା କୁନ୍ଦୁରା ବ୍ଲକର ଡଙ୍ଗର ଠାରୁ ବେଡାପାଉଁଶୀକୁ ସଂଯୋଗ କରୁଥିବା 5 କିଲୋମିଟର ରାସ୍ତାର ଦୂରାବସ୍ଥା । ଏହି ରାସ୍ତା ଉପରେ କୁନ୍ଦୁରା ଓ କୋଟପାଡ଼ ବ୍ଲକର ପ୍ରାୟ 30ରୁ ଉର୍ଦ୍ଧ ଗ୍ରାମବାସୀ ନିର୍ଭର କରିଥାନ୍ତି । କିନ୍ତୁ ରାସ୍ତାର ଅବସ୍ଥା ଅତି ଶୋଚନୀୟ ।ବର୍ଷା ଦିନେ କଥା ସରିଲା । ଅସରାଏ ବର୍ଷା ହେଲେ ଗାଁ ରାସ୍ତା କାଦୁଅରେ ବୁଡିଯାଏ ।ଭାରିଯାନ ଯିବା ବି ମୁସ୍କିଲ୍ ହୋଇପଡ଼େ । ଏ ରାସ୍ତାର ଦୂରାବସ୍ଥା ନେଇ ଦୂର୍ଘଟଣା ବି ଘଟୁଛି । କାଦୁଅ ସର ସର ରାସ୍ତା ଦେଇ ନିତି ଯାଆସ କରଥିବା ଲୋକ ଅଭିନବ ଢଙ୍ଗରେ ପ୍ରତିବାଦ କରିଛନ୍ତି । ବାରମ୍ୱବାର ଅଭିଯୋଗ ପରେ ଅତିଷ୍ଠ ହୋଇ ଶେଷରେ ରାସ୍ତା ଉପରେ ଧାନ ରୋଇଲେ ଲୋକେ । ସେପଟେ ମେଗା ପାନୀୟ ଜଳ ପ୍ରକଳ୍ପ ପାଇଁ ରାସ୍ତା ପାର୍ଶ୍ୱରେ ପାଇପ ବିଛାଯାଉଥିବାରୁ ରାସ୍ତା ସମ୍ପୂର୍ଣ୍ଣ ଖରାପ ହୋଇଯାଇଛି । ଠିକାଦାର ଓ ବିଭାଗୀୟ ଅଧିକାରୀଙ୍କ ମନମୁଖୀ କାର୍ଯ୍ଯକୁ ବିରୋଧ କରିଛନ୍ତି ପଞ୍ଚାୟତ ବାସୀ ।
ବର୍ଷା ଦିନ ଆସିବା ପୂର୍ବରୁ ଏହି ରାସ୍ତାର ମରାମତି କାର୍ଯ୍ୟ କରିବା ପାଇଁ ଠିକାଦାର, ବିଭାଗୀୟ ଅଧିକାରୀ, ବୁଦ୍ଧିଜୀବୀ, ଜନ ପ୍ରତିନିଧିଙ୍କ ମଧ୍ୟରେ ପଞ୍ଚାୟତ କାର୍ଯ୍ୟାଳୟରେ ଆଲୋଚନା ହୋଇଥିଲା l କିନ୍ତୁ ମାସେ ପରେ ମଧ୍ୟ କାମ ହୋଇନାହିଁ ।ଫଳରେ ଅଞ୍ଚଳବାସୀ ଅଭିନଵ ଢଙ୍ଗରେ ପ୍ରତିବାଦ କରି ଖୁବ ଶୀଘ୍ର ମରାମତି ପାଇଁ ଦାବି କରିଛନ୍ତି l ସେପଟେ ମେଗା ପ୍ରକଳ୍ପରେ କାର୍ଯ୍ୟ କରୁଥିବା ବିଭାଗୀୟ କର୍ମଚାରୀ ସୂଚନା ଦିଆଯାଇଛି, ଖୁବଶୀଘ୍ର ରାସ୍ତା ମରାମତି ହେବ ବୋଲି କହିଛନ୍ତି କୁନ୍ଦୁରା ବିଡ଼ିଓ । ଦେଖିବାକୁ ବାକି ରହିଲା ଖବର ପ୍ରସାରଣ ପରେ ରାସ୍ତାର ମରାମତି କେବେ ହେଉଛି ।
ଅଧିକ ପଢ଼ନ୍ତୁ ଓଡିଶା ଖବର: