ଅର୍ଗସ ବ୍ୟୁରୋ : ଜଲୱା ଦେଖାଇବ ପ୍ୟାରିସ । କାରଣ ଏଥର ଅଲିମ୍ପିକ୍ସ କୌଣସି ଷ୍ଟାଡିୟମ ନୁହେଁ ବରଂ ନଈ ଭିତରେ ହିଁ ଉଦଘାଟନ ହେବ । ସିନ୍ ନଦୀରେ ଏହି ସମାରୋହର ଆୟୋଜନ କରାଯାଇଛି । ଯେଉଁଥିରେ ପାଖାପାଖି ୨୦୦ରୁ ଉର୍ଦ୍ଧ୍ଵ କ୍ରୀଡାବିତ୍ଙ୍କୁ ନେଇ ଏକାଧିକ ଡଙ୍ଗା ଚାଲିବ । ପ୍ୟାରିସ ସହର ଭିତରେ ଦେଇ ଯାଇଥିବା ଏହି ନଦୀର ଉଭୟ ପାର୍ଶ୍ଵରେ ବିଭିନ୍ନ ଦେଶର କ୍ରୀଡ଼ାବିତ୍ଙ୍କୁ ଉତ୍ସାହିତ କରିବାକୁ ଦର୍ଶକଙ୍କ ପାଇଁ ପୁରା ୱା କ୍ଲାସ ବ୍ୟବସ୍ଥା କରାଯାଇଛି ।
ଅଲମ୍ପିକ୍ସ ଗେମକୁ ନେଇ ଥମୁନି ଚର୍ଚ୍ଚା । କାରଣ ଏଥର ନୂଆ ଢଙ୍ଗରେ, ନୂଆ ଶୈଳୀରେ ଆରମ୍ଭ ହେବାକୁ ଯାଉଛି ଗେମ୍ । ଆୟୋଜକଙ୍କ ସୂଚନା ଅନୁସାରେ, କ୍ରୀଡ଼ାବିତ୍ଙ୍କୁ ନେଇ ଡଙ୍ଗାଗୁଡ଼ିକ ପଣ୍ଟ୍ ଡି’ ଅଷ୍ଟରଲିଜ୍ ବ୍ରିଜ୍ ନିକଟରୁ ବାହାରିବ । ଡଙ୍ଗା ଯାତ୍ରାର ଭବ୍ୟ ସିନ୍ ପାଖାପାଖି ୬ କିଲୋମିଟର ପର୍ଯ୍ୟନ୍ତ ଚାଲିବ । ଯାହା ମଧ୍ୟରେ ୧୮ ବ୍ରିଜ୍ ଓ ଅନେକ ଗୁରୁତ୍ଵପୂର୍ଣ୍ଣ ସ୍ଥାନକୁ ଅତିକ୍ରମ କରିବାକୁ ହେବ । ପ୍ୟାରିସର ସୂର୍ଯ୍ୟାସ୍ତ ହେବା ପୂର୍ବରୁ ଏହି ଯାତ୍ରା ପଣ୍ଟ ଡି’ ଲିନାଠାରେ ପହଞ୍ଚିବ । ଯାହାକି ଆଇଫେଲ୍ ଟାୱାରର ପୁରା ପାଖରେ ।
ଅନ୍ତର୍ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁସାରେ, ଏହି ସମାରୋହରେ ୮୦ରୁ ୧୦୦ ଡଙ୍ଗା ପ୍ରସ୍ତୁତ ଅଛି । ଡଙ୍ଗାଗୁଡ଼ିକରେ ୨୦୬ଟି ଜାତୀୟ ଅଲିମ୍ପିକ୍ସ କମିଟିର କ୍ରୀଡ଼ାବିତ୍ମାନେ ଉପସ୍ଥିତ ରହିବେ । ଦର୍ଶକମାନେ ନଦୀର ଉଭୟ ପାର୍ଶ୍ଵରେ ବସିବା ପାଇଁ ଅସ୍ଥାୟୀ ବ୍ୟବସ୍ଥା କରାଯାଇଛି । ଡଙ୍ଗା ପରେଡ୍ ଦେଖିବା ପାଇଁ ୩ ଲକ୍ଷ ୨୬ ହଜାର ଟିକେଟ୍ ସାଧାରଣ ଦର୍ଶକଙ୍କ ପାଇଁ ଉପଲବ୍ଧ ରହିଛି । ଯାହାମଧ୍ୟରୁ ୨ ଲକ୍ଷ ୨୨ ହଜାର ଟିକେଟ୍ ମାଗଣାରେ ବଣ୍ଟାଯିବାକୁ ଆୟୋଜକ ନିଷ୍ପତ୍ତି ନେଇଛନ୍ତି । ଖାଲି ଏତିକି ନୁହେଁ ବରଂ ପୁରା ସୋ'କୁ କେମିତି ସାଧାରଣ ଲୋକ ଭଲରେ ଦେଖିପାରିବେ ସେନେଇ ପୁରା ସହରରେ ଟିଭିର ବ୍ୟବସ୍ଥା ବି କରାଯାଇଛି ।
ପ୍ୟାରିସରେ ଆୟୋଜିତ ହେବାକୁଥିବା ଅଲମ୍ପିକ୍ସର ଉଦ୍ଘାଟନୀ ଭାଷଣ ପାଇଁ ଆଇଫେଲ୍ ଟାୱାରର ପାଖରେ ଥିବା ଟ୍ରକାଡେରୋ ସମ୍ମୁଖରେ ଏକ ଅସ୍ଥାୟୀ ଷ୍ଟାଡିୟମ୍ର ବି ନିର୍ମାଣ କରାଯାଇଛି । ଯେଉଁଥିରେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରନ୍ଙ୍କ ପ୍ରାରମ୍ଭିକ ଭାଷଣ ସହ ଅଲିମ୍ପିକ୍ସ ପ୍ରୋଟୋକଲ୍ ଅନୁସାରେ ଉଦ୍ଯାପନୀ କାର୍ଯ୍ୟକ୍ରମ ମଧ୍ୟ ଆୟୋଜିତ ହେବ । ଉଦ୍ଘାଟନୀ ଓ ଉଦ୍ଯାପନୀ କାର୍ଯ୍ୟକ୍ରମ ପାଇଁ ପାଖାପାଖି ୩ ହଜାର କଳାକାର ଭାଗ ନେଉଛନ୍ତି । ଖେଳାଳିଙ୍କୁ ଡଙ୍ଗାରେ ଆଣି ଆସୁଥିବା ବେଳେ ରାସ୍ତାରେ ପଡ଼ୁଥିବା ପ୍ରତ୍ୟେକ ବ୍ରିଜ୍ ଉପରେ ନୃତ୍ୟଶିଳ୍ପୀମାନେ ସେମାନଙ୍କ କଳା ପ୍ରଦର୍ଶନ କରିବେ । ଏହାସହ ବିଭିନ୍ନ ଦେଶରୁ ଆସୁଥିବା ଅତିଥିଙ୍କ ସୁରକ୍ଷା ବ୍ୟବସ୍ଥାକୁ ବି ଗୁରୁତ୍ଵ ଦିଆଯାଇଛି । ତେବେ ଏବେ ଅପେକ୍ଷା ସେହି ଶୁଭ ମୁହୂର୍ତ୍ତକୁ ।