ଅର୍ଗସ ବ୍ୟୁରୋ: ସୁନ୍ଦରଗଡ଼ ଗସ୍ତବେଳେ ପାଣି ସମସ୍ୟା ନେଇ ରାଜ୍ୟପାଳଙ୍କ ଉଦବେଗ। ଲୋକଙ୍କ ଅଭିଯୋଗ ପରେ ରାତି ଅଧରେ ଜବରଦସ୍ତପଡାରେ ପହଞ୍ଚି ପାନୀୟ ଜଳ ସମସ୍ୟା ସଂପର୍କରେ ବୁଝିଛନ୍ତି ଗର୍ଭର୍ଣ୍ଣର । ଏହି ଅଞ୍ଚଳରେ ଦୀର୍ଘ ଦିନ ହେଲା ଲାଗି ରହିଥିବା ପାଣି ଓ ଶୁଖିଲା ପଡିଥିବା ପୋଖରୀ ସମସ୍ୟା ବୁଲି ଦେଖିବା ସହ ଲୋକଙ୍କ ସହ ଆଲୋଚନା କରିଥିଲେ ରାଜ୍ୟପାଳ । ସୁନ୍ଦରଗଡ଼ ଗସ୍ତ ସମୟରେ ରାସ୍ତାକଡ଼ରେ ଜବରଦସ୍ତପଡାର ଶତାଧିକ ଗ୍ରାମବାସୀ ରାଜ୍ୟପାଳଙ୍କ ଗାଡିକୁ ଅଟକାଇଥିଲେ । ସେମାନଙ୍କ ଅଞ୍ଚଳରେ ଥିବା ପାଣି ସମସ୍ୟା ସଂପର୍କରେ ଅବଗତ କରାଇଥିଲେ । ଅଭିଯୋଗକୁ ଗୁରୁତର ସହ ନେଇ ରାଜ୍ୟପାଳ ରାତିରେ ଜବରଦସ୍ତପଡା ଯାଇ ସେମାନଙ୍କ ସମସ୍ୟା ବୁଲି ଦେଖିବା ସହ ଉଦବେଗ ପ୍ରକାଶ କରିଛନ୍ତି ।
ଏନେଇ ସେ ରାଜ୍ୟ ସରକାରଙ୍କୁ ସେ ଅବଗତ କରାଇବେ ବୋଲି ପ୍ରକାଶ କରିଛନ୍ତି । ରାଜ୍ୟପାଳ କହିଛନ୍ତି, କେନ୍ଦ୍ର ସରକାରଙ୍କ ଜଲ୍ ଜୀଭନ୍ ମିଶନ୍ ଯୋଜନା ଆମ ମା ଓ ଭଉଣୀଙ୍କ ଜୀବନକୁ ସହଜ କରିଛି । ସେମାନେ ସହଜରେ ନିଜ ଘରେ ପାଣି ପାଉଛନ୍ତି । କିନ୍ତୁ ଜବରଦସ୍ତାର ଲୋକଙ୍କ ସମସ୍ୟାକୁ ଦେଖି ଦୁଃଖ ଲାଗିଲା କହିଛନ୍ତି ରାଜ୍ୟପାଳ । ଏନେଇ ଜିଲ୍ଲା ପ୍ରଶାସନକୁ ଏକ ରିପୋର୍ଟ ପ୍ରସ୍ତୁତ କରି ସମସ୍ୟାର ସମାଧାନ ପାଇଁ ତାଗିଦ୍ କରିଛନ୍ତି ରାଜ୍ୟପାଳ ରଘୁବର ଦାସ । ଗତ କିଛି ଦିନ ତଳେ ସୁନ୍ଦରଗଡ଼ ଓ ରାଉରକେଲାରେ ଦୂଷିତ ପାଣି ଯୋଗୁଁ ହଇଜାରେ ଅନେକ ଲୋକଙ୍କ ଜୀବନ ଯାଇଛି । ଯାହାକି ରାଜ୍ୟ ସରକାରଙ୍କ ଡ୍ରିଙ୍କ୍ ଫ୍ରମ୍ ଟ୍ୟାପ୍ ଓ ବସୁଧା ଯୋଜନା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ଅଧିକ ପଢ଼ନ୍ତୁ ଓଡିଶା ଖବର: