ଅର୍ଗସ ବ୍ୟୁରୋ: ପବିତ୍ର କାର୍ତ୍ତିକ ପୂର୍ଣ୍ଣିମା ଉପଲକ୍ଷେ ବାବା ଧବଳେଶ୍ଵରଙ୍କ ଦର୍ଶନ କରି ଆଶୀର୍ବାଦ ନେଲେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ମନ୍ଦିରରେ ପହଞ୍ଚିବା ପରେ କେନ୍ଦ୍ରମନ୍ତ୍ରୀଙ୍କୁ ସ୍ଥାନୀୟ କର୍ମକର୍ତ୍ତା ଏବଂ ମନ୍ଦିର କର୍ତ୍ତୃପକ୍ଷଙ୍କ ତରଫରୁ ଭବ୍ୟ ସ୍ଵାଗତ ସମ୍ବର୍ଦ୍ଧନା ଦିଆଯାଇଥିଲା । ମହାଦେବଙ୍କୁ ଦର୍ଶନ କରି ପୂଜାର୍ଚ୍ଚନା କରିବା ସହ ରାଜ୍ୟ ତଥା ଦେଶର ମଙ୍ଗଳ କାମନା କରିଥିଲେ କେନ୍ଦ୍ରମନ୍ତ୍ରୀ।
ତେବେ ପୀଠର ଅବ୍ୟବସ୍ଥା ଦେଖି ଉଦବେଗ ପ୍ରକାଶ କରିଥିଲେ ଧର୍ମେନ୍ଦ୍ର। କହିଥିଲେ ଏ ଧାମ ପ୍ରତି ଓଡ଼ିଆଙ୍କର ଯେତିକି ଆସ୍ଥା ଅଛି, ସେହି ତୁଳନାରେ ଏଠାରେ ବ୍ୟବସ୍ଥା କମ୍ ଅଛି। ନିଜ କ୍ଷମତା ଓ ଦାୟିତ୍ଵ ଭିତରେ ଯାହା ସମ୍ଭବ କରିବି ବୋଲି କହିଛନ୍ତି ଧର୍ମେନ୍ଦ୍ର ।
କାର୍ତ୍ତିକ ପୂର୍ଣ୍ଣିମା ଅବସରରେ ଆମ ରାଜ୍ୟର ଏକ ପବିତ୍ର ପୀଠରେ ବାବା ଧବଳେଶ୍ଵରଙ୍କ ଦର୍ଶନ ମିଳିଥିବାରୁ ନିଜକୁ ଭାଗ୍ୟବାନ ବୋଲି କହିଲେ ଧର୍ମେନ୍ଦ୍ର । ପିଲା ଦିନରୁ ଏହି ରାସ୍ତା ଦେଇ ଯିବା ଆସିବା କରିବା ସତ୍ବେ ବାବାଙ୍କ ଦର୍ଶନ କରିପାରିନଥିଲି ବୋଲି ମନ୍ତ୍ରୀ କହିଛନ୍ତି । ତେଣୁ ଆଜି ସେହି ସୌଭାଗ୍ୟ ମିଳିଛି । ପ୍ରଥମ ଥର ପାଇଁ ବାବା ଧବଳେଶ୍ଵରଙ୍କ ଦର୍ଶନ କଲେ କେନ୍ଦ୍ର ଶିକ୍ଷା ମନ୍ତ୍ରୀ ।
ସ୍ଥାନୀୟ ନାଗରିକ, ପୂଜକ ଏବଂ ଗୁରୁଜନ ମାନଙ୍କ ପାଖରେ କୃତଜ୍ଞତା ଜ୍ଞାପନ କରିଛନ୍ତି ଧର୍ମେନ୍ଦ୍ର । ପ୍ରଶାସନିକ ଅଧିକାରୀ ମାନଙ୍କୁ ସୁବ୍ୟବସ୍ଥାରେ ଦର୍ଶନ ପାଇଁ ଧନ୍ୟବାଦ ଦେଲେ ମନ୍ତ୍ରୀ । ଆମ ଦେଶ ଭାରତ ଏବଂ ଆମ ରାଜ୍ୟ ଓଡ଼ିଶା ଉପରେ ବାବାଙ୍କର ଆଶୀର୍ବାଦ ରହୁ ବାବା ଧବଳେଶ୍ଵରଙ୍କ ନିକଟରେ ପ୍ରାର୍ଥନା କରିଛନ୍ତି କେନ୍ଦ୍ର ମନ୍ତ୍ରୀ ।
ଅଧିକ ପଢ଼ନ୍ତୁ ରାଜନୀତି ଖବର