ନିଜ କଣ୍ଠର ଯାଦୁ କୋଟି କୋଟି ଲୋକଙ୍କ ହୃଦୟ ଜିତିଥିବା ବଲିଉଡର ଲୋକପ୍ରିୟ ଗାୟିକା ନେହା କକ୍କରଙ୍କୁ ପରିଚୟର ଆବଶ୍ୟକତା ନାହିଁ । ୪ ବର୍ଷ ବୟସରୁ ମଣ୍ଡପରୁ ଭଜନ ଗାଇ ରିଆଲିଟି ଶୋ' 'ଇଣ୍ଡିଆନ୍ ଆଇଡଲ ୨'ରୁ ସେ ନିଜର କ୍ୟାରିଅର ଆରମ୍ଭ କରିଥିଲେ । ଏହାପରେ ସେ ଆଉ ପଛକୁ ଫେରି ଚାହିଁନାହାନ୍ତି । ଚଳିତ ବର୍ଷ ଜୁନ ୬ରେ ନେହା ନିଜର ୩୮ତମ ଜନ୍ମଦିନ ପାଳନ କରିଛନ୍ତି ।

• ଭଜନ ଗାଉଥିଲେ ନେହା

ନେହା କକ୍କର ୧୯୮୮ ମସିହା ଜୁନ ୬ ତାରିଖରେ ଉତ୍ତରାଖଣ୍ଡର ଋଷିକେଶରେ ଜନ୍ମଗ୍ରହଣ କରିଥିଲେ । ତାଙ୍କ ପିଲାଦିନ ଅଭାବ ଅନଟନରେ ବିତିଥିଲା, କିନ୍ତୁ ଆଜି ସେ କୋଟି କୋଟି ଟଙ୍କାର ମାଲିକାଣୀ । ଏଥିଲାଗି ନେହା ବହୁ ପରିଶ୍ରମ ମଧ୍ୟ କରିଛନ୍ତି । ସେ ପ୍ରାରମ୍ଭିକ ସମୟରେ ନିଜର ବଡ଼ ଭଉଣୀ ସୋନୁ କକ୍କରଙ୍କ ସହିତ ମାତାରାଣୀଙ୍କ ପୂଜାରେ ଗୀତ ଗାଉଥିଲେ, କିନ୍ତୁ ପରବର୍ତ୍ତୀ ସମୟରେ ସେ ଦିଲ୍ଲୀ ଆସିଥିଲେ । ଦିଲ୍ଲୀରେ ସେ ନିଜ ପାଠପଢା ସହିତ ଗୀତ ଗାଇବା ମଧ୍ୟ ଜାରି ରଖିଥିଲେ।

• ନେହାଙ୍କୁ କେବେ ମିଳିଥିଲା ପ୍ରଥମ ବ୍ରେକ୍ ?

ଯେତେବେଳେ ନେହା ଏକାଦଶ ଶ୍ରେଣୀରେ ପଢୁଥିଲେ, ସେତେବେଳେ ସେ ଇଣ୍ଡିଆନ ଆଇଡଲ୍ ଦ୍ଵିତୀୟ ସିଜିନରେ ପ୍ରତିଯୋଗୀ ଥିଲେ । ସେତେବେଳେ ସେ ସେହି ଶୋ'କୁ ଜିତିପାରିନଥିଲେ ସତ, କିନ୍ତୁ ଆଜି ସେ ସେହି ଶୋ'ର ଜଜ୍ ଅଛନ୍ତି । ସେ ନିଜ ସ୍ଵତନ୍ତ୍ର କଣ୍ଠରେ ଦୀର୍ଘ ସମୟ ଧରି ବଲିଉଡ ସଂଗୀତ ଜଗତରେ ରାଜ୍ କରିଛନ୍ତି ।

• ବିଳାସପୂର୍ଣ୍ଣ ଜୀବନ ବିତାନ୍ତି ନେହା

ନେହା କକ୍କର ଇତିମଧ୍ୟରେ କୋଟିପତି ହୋଇପାରିଛନ୍ତି । ସେ ଏକ ବିଳାସପୂର୍ଣ୍ଣ ଜୀବନ ଅତିବାହିତ କରୁଛନ୍ତି । ନେହାଙ୍କ ନିକଟରେ ମୋଟ ୧୧୨ କୋଟିର ସମ୍ପତ୍ତି ଅଛି । ସେ ପ୍ରତି ମାସରେ ୫୦ ଲକ୍ଷ ଟଙ୍କାରୁ ଅଧିକ ରୋଜଗାର କରନ୍ତି । ଏହାବ୍ୟତୀତ ସେ ବଲିଉଡ ଫିଲ୍ମରେ ଗୀତ ମଧ୍ୟ ଗାଆନ୍ତି । ଗୋଟିଏ ଗୀତ ଗାଇବା ଲାଗି ସେ ୧୫ ଲକ୍ଷ ଟଙ୍କା ଦାବି କରନ୍ତି । ଏହାବ୍ୟତୀତ ନେହା ଅନେକ ଷ୍ଟେଜ ଶୋ' ମଧ୍ୟ କରନ୍ତି ।

• ନେହାଙ୍କ କାର କଲେକ୍ସନ

ମୁମ୍ବାଇରେ ନେହା ଏକ ଆଲିସାନ୍ ଘରେ ରୁହନ୍ତି, ଯାହାର ମୂଲ୍ୟ ୧.୫ କୋଟି ଟଙ୍କା । ଏହାବ୍ୟତୀତ ଋଷିକେଶରେ ନେହାଙ୍କ ଏକ ବିଳାସପୂର୍ଣ୍ଣ କୋଠା ଅଛି । ନେହାଙ୍କ କାର କଲେକ୍ସନ କଥା କହିଲେ, ତାଙ୍କ ନିକଟରେ ଅଡି, ମର୍ସିଡିଜ୍ ଓ BMW ଭଳି ଦାମି ବ୍ରାଣ୍ଡର କାର ଅଛି । ନେହାଙ୍କ ରୋଜଗାରର ଏକ ବଡ଼ ଭାଗ କନର୍ସଟରୁ ଆସିଥାଏ । ସେ ଗୋଟିଏ ଲାଇଭ୍ କନର୍ସଟରୁ ୮୦ ଲକ୍ଷରୁ ୧ କୋଟି ଟଙ୍କା ରୋଜଗାର କରନ୍ତି । ଏହାବ୍ୟତୀତ ବ୍ରାଣ୍ଡ ଏଣ୍ଡୋର୍ସମେଣ୍ଟରୁ ବି ନେହା ଭଲ ରୋଜଗାର କରନ୍ତି ।


ପଢନ୍ତୁ ଏହି ଖବର: କ୍ୟାମେରା ଦେଖି ବେସମେଣ୍ଟରେ ଲୁଚିଲେ ପଲକ ତିୱାରୀ; ଏମିତି କହିଲେ Orry

• ନେହାଙ୍କ ସୁପରହିଟ୍ ଗୀତ

ନେହା ନିଜ କ୍ୟାରିଅର ମଧ୍ୟରେ ଅନେକ ହିଟ୍ ଗୀତ ଗାଇଛନ୍ତି । ଏହି ତାଲିକାରେ 'କାଲା ଚଷମା', 'ଟୁକୁର-ଟୁକୁର', 'ଆଓ ରାଜା', 'କର୍ ଗଇ ଚୁଲ୍', 'ମିଲେ ହୋ ତୁମ ହମକୋ', 'ମାହି ବେ', 'ସନି-ସନି', 'ମେଁ ତେରା ବୟଫ୍ରେଣ୍ଡ', 'ବଦ୍ରି କି ଦୁଲହନିଆଁ' ଓ 'ସେକେଣ୍ଡ ହ୍ୟାଣ୍ଡ ଜୱାନୀ' ଭଳି ସୁପରହିଟ୍ ଗୀତ ସାମିଲ ।