Argus News - ଶେଖ ହସିନାଙ୍କ ଭାଗ୍ୟ ଏବେ କାହା ହାତରେ ? ଫେରିଯିବେ କି ବାଂଲାଦେଶ ?

ବାଂଲାଦେଶରେ ତାରିକ ରହମାନଙ୍କ ନେତୃତ୍ୱରେ ନୂତନ ସରକାର ଗଠନ ହେବା ପରଠାରୁ ଭାରତ ସହିତ ବାଂଲାଦେଶର ସମ୍ପର୍କରେ ଉନ୍ନତି ଆସିଛି । ମାତ୍ର ପୂର୍ବତନ ବାଂଲାଦେଶୀ ପ୍ରଧାନମନ୍ତ୍ରୀ ଶେଖ ହସିନାଙ୍କ ପ୍ରତ୍ୟାର୍ପଣ ପ୍ରସଙ୍ଗ ଦୁଇ ଦେଶ ପାଇଁ ଏକ କଣ୍ଟା ହୋଇ ରହିଛି । ହସିନାଙ୍କୁ ସ୍ଵଦେଶ ପଠାଇବାକୁ ବାରମ୍ବାର ବାଂଲାଦେଶ ଦାବି କରୁଛି । ଏପରିକି ନିକଟରେ ବାଂଲାଦେଶ ବୈଦେଶିକ ମନ୍ତ୍ରୀ ଖଲିଲୁର ରହମାନ ଦିଲ୍ଲୀ ଗସ୍ତ ସମୟରେ ସମାନ ପ୍ରସଙ୍ଗ ଉଠାଇଥିଲେ । ଶେଷରେ ଏହା ଉପରେ ପ୍ରତିକ୍ରିୟା ରଖିଛି ଭାରତ ।

ଭାରତ ସ୍ପଷ୍ଟ କରିଛି ଯେ ଢାକାର ଅନୁରୋଧ ବର୍ତ୍ତମାନ ନ୍ୟାୟିକ ଏବଂ ଆଇନଗତ ପ୍ରକ୍ରିୟା ମାଧ୍ୟମରେ ବିଚାର କରାଯାଉଛି । ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି, "ଶେଖ ହସିନାଙ୍କ ପ୍ରତ୍ୟାର୍ପଣ ନେଇ ଆମ ନିକଟରେ ଏକ ଅନୁରୋଧ ପତ୍ର ପହଞ୍ଚିଛି । ଏହି ମାମଲା ବର୍ତ୍ତମାନ ସମୀକ୍ଷାାଧୀନ ଏବଂ ଭାରତ ଏହି ପ୍ରସଙ୍ଗରେ ସମସ୍ତ ପକ୍ଷଙ୍କ ସହିତ ଗଠନମୂଳକ ଭାବରେ ଯୋଗାଯୋଗ ଜାରି ରଖିବ ।"

#WATCH | Delhi | On the former Bangladesh Prime Minister Sheikh Hasina, MEA spokesperson Randhir Jaiswal says, "There is a request being examined as part of ongoing judicial and internal legal processes. We will continue to engage constructively on the issue with all the… pic.twitter.com/uTrGStkFtJ

— ANI (@ANI) April 17, 2026

ଏଠାରେ କହିରଖୁଛୁ କି, ଅଗଷ୍ଟ ୨୦୨୪ରେ ଶେଖ ହସିନାଙ୍କ ସରକାରର ପତନ ପରେ ୭୮ ବର୍ଷୀୟା ହସିନା ଢାକାରୁ ଭାରତ ପଳାଇ ଆସିଥିଲେ । ସେହି ସମୟରେ ସାରା ଦେଶରେ ବ୍ୟାପକ ସରକାର ବିରୋଧୀ ପ୍ରତିବାଦ ଦେଖିବାକୁ ମିଳିଥିଲା, ଯାହା ତାଙ୍କୁ ଦେଶ ଛାଡିବାକୁ ବାଧ୍ୟ କରିଥିଲା । ନିକଟରେ ବାଂଲାଦେଶର ବୈଦେଶିକ ମନ୍ତ୍ରୀ ଖଲିଲୁର ରହମାନ ନୂଆଦିଲ୍ଲୀ ଗସ୍ତ ସମୟରେ ବୈଦେଶିକ ମନ୍ତ୍ରୀ ଏସ. ଜୟଶଙ୍କରଙ୍କ ସହ ଏକ ବୈଠକରେ ହସିନାଙ୍କ ପ୍ରତ୍ୟାର୍ପଣ ପ୍ରସଙ୍ଗ ଉଠାଇଥିଲେ ।

• ୟୁନୁସ୍ ସରକାର ବି କରିଥିଲେ ଦାବି

ବାଂଲାଦେଶରେ ତାରିକ ରହମାନ ସରକାରଙ୍କ ପୂର୍ବରୁ ଥିବା ମହମ୍ମଦ ୟୁନୁସଙ୍କ ନେତୃତ୍ଵାଧୀନ ସରକାର ମଧ୍ୟ ଭାରତକୁ ବ୍ୟବସ୍ଥିତ ଢଙ୍ଗରେ ହସିନାଙ୍କ ପ୍ରତ୍ୟାର୍ପଣ ପାଇଁ ଅନୁରୋଧ କରିଥିଲା । ହସିନାଙ୍କ ବିରୋଧରେ ୨୦୨୪ରେ ଛାତ୍ର-ନେତୃତ୍ଵାଧୀନ ବିରୋଧ ପ୍ରଦର୍ଶନ ସମୟରେ 'ମାନବତା ବିରୋଧୀ ଅପରାଧ' କରିଥିବା ଅଭିଯୋଗ ହୋଇଥିଲା । ଏପରିକି ବାଂଲାଦେଶ ଅନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ୍ ହସିନା ଓ ତତ୍କାଳୀନ ଗୃହମନ୍ତ୍ରୀ ଅସଦୁଜ୍ଜମାନ ଖାନଙ୍କୁ ଦୋଷୀ ସାବ୍ୟସ୍ତ କରି ମୃତ୍ୟୁଦଣ୍ଡ ଦେଇଥିଲେ । ଏହାପରେ ହସିନା ନିଜ ଦେଶ ଛାଡ଼ି ଭାରତରେ ଆଶ୍ରୟ ନେଇଥିଲେ । ଏହି ଘଟଣା ପରଠାରୁ ଭାରତ ଓ ବାଂଲାଦେଶ ସମ୍ପର୍କ ମଧ୍ୟରେ ତିକ୍ତତା ଆସିଥିଲା । ଏବେ ଭାରତୀୟ ବୈଦେଶିକ ମନ୍ତ୍ରଣାଳୟ ଅନୁସାରେ ଦୁଇ ଦେଶ ମଧ୍ୟରେ ସମ୍ପର୍କରେ ସୁଧାର ଆଣିବା ଲାଗି ଦ୍ଵିପାକ୍ଷିକ ବାର୍ତ୍ତାଳାପ ଜାରି ଅଛି ।

ପଢନ୍ତୁ ଏହି ଖବର: ଅପରାଧ ସଂଖ୍ୟା ୧-୨-୩ ର କାହାଣୀ, ଯେଉଁଥିପାଇଁ ହସିନାଙ୍କୁ ଫାଶୀ ଦଣ୍ଡାଦେଶ

• ଏବେ ହସିନାଙ୍କ ନିକଟରେ କଣ ବିକଳ୍ପ ?

ବଢୁଥିବା ଆଇନଗତ ଚାପ ଓ ପ୍ରତ୍ୟାର୍ପଣ ଦାବି ମଧ୍ୟରେ ଏବେ ପ୍ରଶ୍ନ ଉଠୁଛି ଯେ ହସିନା କଣ କରିବେ ? ଯଦି ଭାରତ ତାଙ୍କୁ ବାଂଲାଦେଶ ପଠାଇଦିଏ, ସେ କେଉଁଠାକୁ ଯିବେ ? ଅନ୍ତର୍ଜାତୀୟ ଆଇନ ଅନୁସାରେ, ହସିନା ଏବେ ଅନ୍ୟ କେଉଁ ଦେଶରେ ଶରଣ ନେବାକୁ ଉଦ୍ୟମ କରିପାରନ୍ତି, ଯେଉଁଠି ତାଙ୍କୁ ରାଜନୈତିକ ଶରଣାର୍ଥୀ ମାନ୍ୟତା ଦିଆଯାଇପାରିବ । କିନ୍ତୁ ଏହି ପ୍ରକ୍ରିୟା ସହଜ ନୁହେଁ, ଏହାଦ୍ଵାରା ସମ୍ପୃକ୍ତ ଦେଶର ନୀତି, ଦ୍ଵିପାକ୍ଷିକ ସମ୍ପର୍କ ପ୍ରଭାବିତ ହୋଇପାରେ । ବର୍ତ୍ତମାନ ଭାରତରେ ରହୁଥିବା ହସିନାଙ୍କ ଭାଗ୍ୟ ଭାରତର ଆଇନଗତ ନିଷ୍ପତ୍ତି ଓ କୂଟନୈତିକ ସନ୍ତୁଳନ ଉପରେ ନିର୍ଭର କରିବ ।

ଅଧିକ ଖବର ପଢନ୍ତୁ...