Houthi again attack on Saudi Arabia / ହୁଥି ବିଦ୍ରୋହୀଙ୍କ ଆକ୍ରମଣରେ କମ୍ପି ଉଠିଲା ସାଉଦି ଆରବ; ଜଣେ ଭାରତୀୟ ମୃତ

ପୁଣି ଥରେ ହୁଥି ବିଦ୍ରୋହୀଙ୍କ ଆକ୍ରମଣରେ କମ୍ପି ଉଠିଛି ସାଉଦି ଆରବ। ସଦ୍ୟତମ ଖବର ଅନୁସାରେ ରବିବାର (ଅକ୍ଟୋବର ୧୧) ହୋଇଥିବା ଆକ୍ରମଣରେ ଜଣେ ଭାରତୀୟଙ୍କ ମୃତ୍ୟୁ ହୋଇଛି। ଏନେଇ ସାଉଦି ଆରବ ସ୍ଥିତ ଭାରତୀୟ ଦୂତାବାସ କହିଛି ଯେ ରିୟାଦ ବିମାନବନ୍ଦରରେ ହୋଇଥିବା ଆକ୍ରମଣରେ ଆହତ ହୋଇଥିବା ଜଣେ ଭାରତୀୟ ନାଗରିକଙ୍କ ମୃତ୍ୟୁ ହୋଇଛି। ଏକ X ପୋଷ୍ଟ ସେୟାର କରି ଦୂତାବାସ କହିଛି, "ରିୟାଦ ଆକ୍ରମଣରେ ଆହତ ଜଣେ ଭାରତୀୟ ନାଗରିକଙ୍କ ଦୁର୍ଭାଗ୍ୟବଶତଃ ମୃତ୍ୟୁ ହୋଇଥିବାର ଜଣାପଡ଼ିଛି। ଆମେ ମୃତକଙ୍କ ପରିବାର ପ୍ରତି ଆମର ଗଭୀର ସମବେଦନା ପ୍ରକାଶ କରୁଛୁ। ଆମେ ପରିବାର ସହିତ ଯୋଗାଯୋଗରେ ରହିଛୁ। ମୃତ ଶରୀରର ଶୀଘ୍ର ପ୍ରତ୍ୟର୍ପଣ ସୁନିଶ୍ଚିତ କରିବା ପାଇଁ ସମସ୍ତ ପ୍ରକାରର ସହାୟତା ଯୋଗାଇବୁ।"

ସ୍ଥାନୀୟ ଗଣମାଧ୍ୟମ ଆରବ ନ୍ୟୁଜ୍ ଅନୁଯାୟୀ, ରବିବାର ରାଜଧାନୀ ରିୟାଦ ସ୍ଥିତ କିଙ୍ଗ ଖାଲିଦ ଅନ୍ତର୍ଜାତୀୟ ବିମାନବନ୍ଦରରେ ଏକ କ୍ଷେପଣାସ୍ତ୍ର ୪ ନମ୍ବର ଟର୍ମିନାଲ ଠାରେ ମାଡ଼ ହୋଇଥିଲା। ଯାହା ପରେ ଅଗ୍ନିକାଣ୍ଡ ହୋଇଥିଲା। ୟମେନ୍ ଶାସନ ଗାଦିରେ ବସିଥିବା ସାଉଦି ଆରବ ସମର୍ଥିତ ସରକାରକୁ ବଞ୍ଚାଇବା ପାଇଁ ମିଳିତ ସାମରିକ ମେଣ୍ଟ ଏହାର ଜବାବୀ କାର୍ୟ୍ୟାନୁଷ୍ଠାନ ଜାରି ରଖିଛି। ମେଣ୍ଟ ପକ୍ଷରୁ ଏହା ମଧ୍ୟ କହିଛି ଯେ ବାୟୁ ପ୍ରତିରକ୍ଷା ପ୍ରଣାଳୀ ବିମାନବନ୍ଦର ନିକଟରେ ଏକ କ୍ରୁଜ୍ କ୍ଷେପଣାସ୍ତ୍ରକୁ ଅଟକାଇ ଏହାକୁ ନଷ୍ଟ କରି ଦେଇଥିଲା।

ଏହା ସହ ପଢନ୍ତୁ: ରିୟାଦ ବିମାନବନ୍ଦର ଉପରେ ପୁନର୍ବାର ଆକ୍ରମଣ; ବନ୍ଦ ହୋଇଗଲା ଉଡ଼ାଣ

ଶନିବାର (ଅକ୍ଟୋବର ୧୦) ହୋଇଥିବା କ୍ଷେପଣାସ୍ତ୍ର ଆକ୍ରମଣର ଗୋଟିଏ ଦିନ ପରେ ଏହି ଆକ୍ରମଣ ହୋଇଛି। ଯେଉଁଥିରେ ୧୨ ଜଣଙ୍କ ମୃତ୍ୟୁ ହୋଇଥିବା ବେଳେ ୩ ଶହରୁ ଅଧିକ ଲୋକ ଆହତ ହୋଇଥିଲେ। ପୂର୍ବରୁ ହୁଥି ବିଦ୍ରୋହୀ ସାଉଦି ଆରବ ବିମାନବନ୍ଦରରୁ ଦୂରେଇ ରହିବାକୁ ସାରା ବିଶ୍ୱରେ ସମସ୍ତ ବିମାନ କମ୍ପାନୀ ଏବଂ ଯାତ୍ରୀଙ୍କୁ ଚେତାବନୀ ଦେଇଛନ୍ତି। ସାଉଦି ଅଧିକାରୀ କହିଛନ୍ତି ଯେ ଶନିବାର ରିୟାଦ ବିମାନବନ୍ଦର ଉପରେ ହୋଇଥିବା ଆକ୍ରମଣରେ ପ୍ରାଣ ହରାଇଥିବା ୧୨ ଜଣଙ୍କ ମଧ୍ୟରେ ୪ ଜଣ ସାଉଦି ଆରବ, ୨ ଜଣ ବାଂଲାଦେଶୀ, ୨ ଆମେରିକା, ଜୋର୍ଡାନ, ପାଲେଷ୍ଟାଇନ, ସିରିଆ, ସୁଡାନ ଏବଂ ମିଶର ଆଦି ଦେଶର ୧-୧ ଜଣ ନାଗରିକ ସାମିଲ ଅଛନ୍ତି। ସାଉଦି ଆରବ ବେସାମରିକ ବିମାନ ଚଳାଚଳ କର୍ତ୍ତୃପକ୍ଷ କହିଛନ୍ତି ଯେ କ୍ଷତି ଏବଂ ସୁରକ୍ଷା ମୂଲ୍ୟାଙ୍କନ ପାଇଁ ବିମାନବନ୍ଦର କାର୍ଯ୍ୟକୁ ଅସ୍ଥାୟୀ ଭାବରେ ସ୍ଥଗିତ ରଖାଯାଇଛି। ହେଲେ ରିୟାଦ ବିମାନ ବନ୍ଦରରୁ ପୁନର୍ବାର କେବେ ଉଡ଼ାଣ ଆରମ୍ଭ ହେବ ତାହା ସ୍ପଷ୍ଟ ହୋଇନାହିଁ।

ଶନିବାର ହୋଇଥିବା ଆକ୍ରମଣ ପରେ, ୟମେନ ହୁଥି ବିଦ୍ରୋହୀ ରବିବାର ସମଗ୍ର ବିଶ୍ୱରେ ବିମାନ ସେବା ପ୍ରଦାନକାରୀ ସଂସ୍ଥା, ଯାତ୍ରୀ ଏବଂ ବିମାନବନ୍ଦର କର୍ମଚାରୀଙ୍କୁ ସାଉଦି ଆରବ ବିମାନବନ୍ଦରରୁ ଦୂରେଇ ରହିବାକୁ ଚେତାବନୀ ଦେଇଛନ୍ତି। ରିୟାଦ ଅନ୍ତର୍ଜାତୀୟ ବିମାନବନ୍ଦର ଉପରେ ହୋଇଥିବା ଆକ୍ରମଣର ଦିନକ ପରେ ହୁଥି ବିଦ୍ରୋହୀ ଏହି ଚେତାବନୀ ଦେଇଛନ୍ତି। ଯାହା ଦଶନ୍ଧିରୁ ଅଧିକ ସମୟ ମଧ୍ୟରେ ସାଉଦି ଆରବ ଉପରେ ହୋଇଥିବା ସବୁଠାରୁ ଭୟଙ୍କର ଆକ୍ରମଣ ଥିଲା। ଇରାନ-ସମର୍ଥିତ ହୁଥି ବିଦ୍ରୋହୀ ଏବଂ ସାଉଦି ଆରବ ସମର୍ଥିତ ୟମେନ ସରକାରଙ୍କ ସରକାରୀ ବାହିନୀ ମଧ୍ୟରେ ବୃଦ୍ଧି ପାଉଥିବା ସଂଘର୍ଷ ମଧ୍ୟରେ ଏହି ଆକ୍ରମଣ ହୋଇଥିଲା।

ଏହା ସହ ପଢନ୍ତୁ: ସାଉଦି ଆରବ ବିମାନ ବନ୍ଦର ଉପରେ ହୁଥି ବିଦ୍ରୋହୀଙ୍କ ଆକ୍ରମଣ; ୩ ମୃତ, ୩୬ ନିହତ

ସମଗ୍ର ବିଶ୍ୱ ସମୁଦାୟକୁ ଚେତାବନୀ ଦେଇ ହୁଥି ବିଦ୍ରୋହୀ କହିଛନ୍ତି "ଆମେ ସମସ୍ତ ଏୟାରଲାଇନ୍ସ, ବିଶେଷଜ୍ଞ, କର୍ମଚାରୀ, କର୍ମଚାରୀ ଏବଂ ଯାତ୍ରୀଙ୍କୁ ଜଣାଇ ଦେବାକୁ ଚାହୁଁଛୁ ଯେ ସେମାନେ ସାଉଦି ବିମାନବନ୍ଦର ଏବଂ ଆକାଶ ସୀମା ବ୍ୟବହାର କରିବାକୁ ଦୂରେଇ ରୁହନ୍ତୁ। କାରଣ ସେଠାରେ ଆକ୍ରମଣ ହେବାର ସମ୍ଭାବନା ଅଧିକ ରହିଛି। ହେଲେ ତଥାପି ମକ୍କା ଏବଂ ମଦିନା (ପବିତ୍ର ସହର) ବିମାନବନ୍ଦର ଏଥିରେ ଅନ୍ତର୍ଭୁକ୍ତ ନାହିଣ। ଆମେ ସମସ୍ତଙ୍କୁ ଆମର ଚେତାବନୀକୁ ଗମ୍ଭୀରତାର ସହ ନେବାକୁ ଅନୁରୋଧ କରୁଛୁ। କୌଣସି ଆକ୍ରମଣକୁ ରୋକିବା ଯଦି ବିଫଳ ହୁଏ, ତାହେଲେ ଏଥିପାଇଁ କେବଳ ସାଉଦି ଆରବ ଦାୟୀ ରହିବ। ହୁଥି ବିଦ୍ରୋହୀ ସୋସିଆଲ ମିଡିଆ ପ୍ଲାଟଫର୍ମ 'X' ରେ ଏକ ପୋଷ୍ଟ ସେୟାର ସେମାନଙ୍କ ଚେତାବନୀ ସମ୍ପର୍କରେ ବିଶ୍ୱକୁ ଜଣାଇ ଦେଇଛନ୍ତି।