Breaking News / ଗର୍ଭବତୀଙ୍କୁ ମିଳିଲାନି ଛୁଟି; ଚାଲିଗଲା କୋମଳମତୀ ଶିଶୁର ଜୀବନ

କେବଳ ଗୋଟିଏ 'ହଁ' ପାଇଁ ଚାଲିଯାଇଛି କୋମଳମତୀ ଶିଶୁର ଜୀବନ । ନୂଆ କରି ମାତୃତ୍ଵ ଲାଭ କରିଥିବା ମହିଳା ଜଣକ ଘରୁ କାମ କରିବାକୁ ଅଫିସ ନିକଟରେ ଅନୁରୋଧ କରିଥିଲେ । ହେଲେ ମିଳିନଥିଲା ଅନୁମତି । ମହିଳା ଜଣକ ୩ ଦିନ ଅଫିସ ଯିବା ପରେ ତାଙ୍କ ଶିଶୁଟିର ଜୀବନ ଚାଲିଯାଇଛି । ଏହି ଘଟଣା ଏବେ ଚାରିଆଡେ ଚର୍ଚ୍ଚାର ବିଷୟ ପାଲଟିଛି । କଣ ମାନବିକତାଠାରୁ ଅଧିକ ଗୁରୁତ୍ଵପୂର୍ଣ୍ଣ ଚାକିରି ବୋଲି ସାଧାରଣରେ ବେଶ ଚର୍ଚ୍ଚା ହେଉଛି ।

• କଣ ପୁରା ଘଟଣା ?

ଆମେରିକାର ଓହିୟୋରେ ଘଟିଛି ଏହି ଦୁର୍ଭାଗ୍ୟଜନକ ଘଟଣା, ଯାହାକି କର୍ମଜୀବୀ ମହିଳା ଓ କର୍ମକ୍ଷେତ୍ର ସୁରକ୍ଷା ଉପରେ ଏକ ବଡ଼ ପ୍ରଶ୍ନ ସୃଷ୍ଟି କରିଛି । ଚେଲ୍ସି ୱାଲ୍ସ ନାମକ ଜଣେ ମହିଳା ୨୦୨୧ରେ ଗର୍ଭବତୀ ଥିଲେ ଏବଂ ତାଙ୍କ ଗର୍ଭଧାରଣେ କିଛିଟା ଗମ୍ଭୀର ସମସ୍ୟା ଥିଲା । ଏଥିଲାଗି ଡାକ୍ତର ତାଙ୍କୁ ଆରାମ କରିବାକୁ କହିଥିଲେ । ଯଦି ମହିଳା ଜଣକ କାମ କରିବାକୁ ଚାହାଁନ୍ତି, ତେବେ ଘରେ ରହି କାମ କରିବାକୁ ପରାମର୍ଶ ଦେଇଥିଲା ଡାକ୍ତର । ଯେତେବେଳେ ମହିଳା ଜଣକ ଅଫିସରେ ୱାର୍କ-ଫ୍ରମ-ହୋମ୍ ମାଗିଥିଲେ, ସେତେବେଳେ ଅଫିସ ସିଧା ମନା କରିଦେଇଥିଲା ।

ଅଫିସ ଏହା ମଧ୍ୟ କହିଥିଲା ଯେ ଅଫିସ ଆସ ନହେଲେ, ବିନା ଦରମାରେ ଘରେ ଛୁଟି ନେଇ ରୁହ । ମହିଳା ଜଣକ ବାଧ୍ୟ ହୋଇ ଶେଷରେ ଡାକ୍ତରଙ୍କ ପରାମର୍ଶ ବିରୋଧରେ ଯାଇ ଅଫିସ ଯାଇଥିଲେ । ସେ ଫେବୃଆରୀ ୨୨ରେ କାମ ଆରମ୍ଭ କରିଥିଲେ ଓ ଲଗାତାର ୩ ଦିନ ଅଫିସ ଯାଇଥିଲେ । ତିନି ଦିନ ପରେ ଅର୍ଥାତ ଫେବୃଆରୀ ୨୪ରେ ତାଙ୍କୁ ପ୍ରସବ ପୀଡ଼ା ହୋଇଥିଲା । ସେ ଏକ ଶିଶୁକୁ ଜନ୍ମ ଦେଇଥିଲେ ସତ, କିନ୍ତୁ ଶିଶୁଟି ସଠିକ ସମୟ ପୂର୍ବରୁ ଜନ୍ମ ନେଇଥିବାରୁ କିଛି ସମୟ ପରେ ତାର ମୃତ୍ୟୁ ଘଟିଥିଲା । ଆଶ୍ଚର୍ଯ୍ୟଜନକ କଥା ହେଉଛି, ଯେତେବେଳେ ମହିଳାଙ୍କୁ ପ୍ରସବ ଜନିତ ପୀଡ଼ା ହେଲା, ସେତେବେଳେ କମ୍ପାନୀ ଘରୁ କାମ କରିବାକୁ ଅନୁମତି ଦେଇଥିଲା ।

• କୋର୍ଟରେ ମାମଲା

ଏହି ଘଟଣା ପରେ ପରିବାର କୋର୍ଟଙ୍କ ଦ୍ଵାରସ୍ଥ ହୋଇଥିଲା । ତେବେ କୋର୍ଟ ମଧ୍ୟ କମ୍ପାନୀକୁ ଦୋଷୀ ସାବ୍ୟସ୍ତ କରି ୧୮୦ କୋଟି ଟଙ୍କା ଜୋରିମାନା ଭରିବାକୁ ନିର୍ଦ୍ଦେଶ ଦେଇଛନ୍ତି । ଏହି ମାମଲାଟି ଗର୍ଭଧାରଣ ଅଧିକାର, କର୍ମଚାରୀ ସୁରକ୍ଷା ଏବଂ ମହିଳା ଅଧିକାର ଉପରେ ଏକ ବଡ଼ ବିତର୍କ ସୃଷ୍ଟି କରିଛି । ଏବେ ସୋସିଆଲ ମିଡିଆରେ ଏହି ଖବରଟି ବେଶ ଚର୍ଚ୍ଚାକୁ ଆସୁଛି ଏବଂ ନେଟିଜେନ୍ସ କର୍ମକ୍ଷେତ୍ର ନୀତି ଓ ମହିଳାଙ୍କ ସ୍ଵାସ୍ଥ୍ୟକୁ ନେଇ ପ୍ରଶ୍ନ ଉଠାଇଛନ୍ତି ।

ଅଧିକ ଖବର ପଢନ୍ତୁ:  ୩ ମାସରୁ ଅଧିକ ବୟସର ଛୁଆଙ୍କୁ ପୋଷ୍ୟ ଭାବେ ଗ୍ରହଣ କଲେ ମିଳିବ ମାତୃତ୍ଵ ଛୁଟି