Argus News - ପତ୍ନୀଙ୍କ ସହ କଥା ହେଉଥିବାବେଳେ ବିସ୍ଫୋରଣ; ଇରାନ ଏୟାରଷ୍ଟ୍ରାଇକରେ ଚାଲିଗଲେ ଭାରତୀୟ

ଉତ୍ତରପ୍ରଦେଶର ସିତାପୁର ଜିଲ୍ଲାର ବାଘେନ ଗ୍ରାମରେ ହଠାତ୍ ଛାଇଯାଇଥିଲା ଦୁଃଖର ଲହରୀ । କାରଣ ମଧ୍ୟପ୍ରାଚ୍ୟର ଯୁଦ୍ଧ ମଧ୍ୟରେ ଚାଲିଯାଇଛି ଗ୍ରାମର ୨୬ ବର୍ଷୀୟ ରବି ଗୋପାଲଙ୍କ ଜୀବନ । ରବି ଇରାନର ଏୟାରଷ୍ଟ୍ରାଇକ୍ ଆକ୍ରମଣରେ ସାଉଦି ଆରବରେ ଜୀବନ ହାରିଛନ୍ତି । ଜୀବନ ତ ଚାଲିଯାଇଛି, ହେଲେ ପରିବାରଙ୍କୁ ମିଳିପାରୁନାହିଁ ରବିଙ୍କ ମରଶରୀର । ପରିବାର ଅନେକ ଚେଷ୍ଟା କରିବା ସତ୍ତ୍ଵେ ସେଠାକାର ପ୍ରଶାସନ ଏତେଟା ଦୃଷ୍ଟି ଦେଉନାହିଁ ବୋଲି ପରିବାର ଅଭିଯୋଗ କରିଛି ।

ଗତ ମାର୍ଚ୍ଚ ୧୮ ତାରିଖରେ ଫ୍ୟାକ୍ଟ୍ରି କାମ ସାରିବା ପରେ ରବି ଫୋନରେ ନିଜ ପତ୍ନୀ ରିତୁଙ୍କ ସହିତ କଥା ହେଉଥିଲେ । ଏହି ସମୟରେ ହଠାତ୍ ଏକ ଭଯଙ୍କର ବିସ୍ଫୋରଣ ହୋଇଥିଲା । ଏହି ସମୟରେ ଫୋନ କଟିଯାଇଥିଲା ଏବଂ କିଛି ସମୟ ପରେ ତାଙ୍କ ଫୋନ ମଧ୍ୟ ଡେଡ୍ ହୋଇଯାଇଥିଲା । ପତ୍ନୀ ରିତୁ କହିଛନ୍ତି ଯେ ସେମାନେ ରାତି ପ୍ରାୟ ୮.୨୦ଟାରେ ଫୋନରେ କଥା ଆରମ୍ଭ କରିଥିଲେ ଏବଂ ୯.୫୩ଟାରେ ବିସ୍ଫୋରଣ ଶବ୍ଦ ଶୁଭିଥିଲା ।

ଏହାପରେ ପରିବାର ଯେତେ ଚେଷ୍ଟା କଲେ ମଧ୍ୟ ଆଉ ରବିଙ୍କ ଫୋନ ଲାଗିନଥିଲା । ପରଦିନ ସକାଳୁ ସାଉଦି ଆରବରୁ ଆସିଥିଲା ଆଉ ଏକ କଲ୍ । ଯେଉଁଥିରେ ଇରାନ ଏୟାରଷ୍ଟ୍ରାଇକରେ ରବିର ମୃତ୍ୟୁ ଘଟିଥିବା ତାଙ୍କର ଏକ ବନ୍ଧୁ କହିଥିଲେ । ତେବେ ସାଉଦି ଆରବ ମଧ୍ୟ ଇରାନର ମିସାଇଲ ମାଡ ସମ୍ପର୍କରେ ସ୍ପଷ୍ଟ କରିଛି । ଇରାନ ରିୟାଦ ସହର ଉପରେ ଆକ୍ରମଣ କରିଥିଲା ଏବଂ ବିସ୍ଫୋରଣରେ କିଛି ଭାରତୀୟଙ୍କ ମୃତ୍ୟୁ ଘଟିଛି ।

ପଢନ୍ତୁ ଏହି ଖବର: ଶିଶୁଙ୍କ ପରିସ୍ରାରେ ଫୁଟୁଛି ଅଣ୍ଡା; ସେହି ଅଣ୍ଡାରୁ ତିଆରି କଫି ପିଉଛନ୍ତି ଚୀନ ବାସୀ

ରବି ପରିବାରର ଏକମାତ୍ର ରୋଜଗାରିଆ ପୁଅ ଥିଲା । ସେ ନିଜ ପିତାାତା, ପତ୍ନୀ ଓ ୪ ବର୍ଷର ପୁଅ ସହିତ ରହୁଥିଲା । ରବି ୨୦୨୦ ସେପ୍ଟେମ୍ବର ମାସରେ ରିତୁକୁ ବିବାହ କରିଥିଲା ଏବଂ ବିବାହ ପରଠାରୁ ସେ ସାଉଦି ଆରବରେ ରହି କାମ କରିଆସୁଛି । ତେବେ ରବିର ମୃତ୍ୟୁ ପରେ ସେଠାକାର ସରକାରଙ୍କ ପକ୍ଷରୁ ପରିବାରକୁ କୌଣସି ଯୋଗାଯୋଗ କରାଯାଇନାହିଁ । ରବିର ପରିବାର ସ୍ଥାନୀୟ ପୋଲିସ ଅଧିକାରୀଙ୍କ ସହିତ କଥାବାର୍ତ୍ତା କରିଥିଲେ ସୁଦ୍ଧା ଏଯାବତ ରବିଙ୍କ ମରଶରୀର ପାଇନଥିବା ଅଭିଯୋଗ କରିଛନ୍ତି ।

ସୂଚନା ଥାଉ କି, ଭାରତୀୟମାନେ ସାଉଦି ଆରବରେ ନିର୍ମାଣ କାର୍ଯ୍ୟଠୁ ଆରମ୍ଭ କରି ସ୍ଵାସ୍ଥ୍ୟକ୍ଷେତ୍ର, ଆତିଥ୍ୟ କାର୍ଯ୍ୟ ଏବଂ ବାଣିଜ୍ୟ କ୍ଷେତ୍ରରେ କାମ କରୁଛନ୍ତି । ତେବେ ମଧ୍ୟପ୍ରାଚ୍ୟରେ ଯୁଦ୍ଧ ଆରମ୍ଭ ହେବା ପରଠାରୁ ସାଉଦି ଆରବରେ ପ୍ରାୟ ୬ ଜଣ ଭାରତୀୟଙ୍କ ମୃତ୍ୟୁ ଘଟିସାରିଛି । ଗତ ମାର୍ଚ୍ଚ ୧୪ ତାରିଖରେ ୨ ଜଣ ଭାରତୀୟଙ୍କ ଡ୍ରୋନ ଷ୍ଟ୍ରାଇକରେ ମୃତ୍ୟୁ ଘଟିଥିଲା । ଏହାର ଗୋଟିଏ ସପ୍ତାହ ପୂର୍ବରୁ ଅଲ୍ ଖର୍ଜଠାରେ ଜଣେ ଭାରତୀୟଙ୍କ ମୃତ୍ୟୁ ଘଟିଥିଲା ।

ଅଧିକ ଖବର ପଢନ୍ତୁ...