Argus News - ମଶା କରୁଥିଲା ଅସ୍ତବ୍ୟସ୍ତ; ଲଗାଇଲେ ମଶାଧୂପ, ଚାଲିଗଲା ଜୀବନ

ଦିଲ୍ଲୀ ବିକାସପୁରୀ ଅଞ୍ଚଳରେ ଅଭାବନୀୟ ଘଟଣା । ଅଚାନକ ଚାଲିଗଲା ଘରୋଇ ବସ୍ କଣ୍ଡକରଙ୍କ ଜୀବନ । ମଶାଧୂପ ଲଗାଇବା ଯୋଗୁଁ ୨୫ ବର୍ଷୀୟ କଣ୍ଡକ୍ଟର ସୁନୀଲଙ୍କ ମୃତ୍ୟୁ ଘଟିଥିବା ପୋଲିସ ସନ୍ଦେହ କରିଛି । ମଶା ଘଉଡ଼ାଇବା ପାଇଁ ସୁନୀଲ ବସ୍ ଭିତରେ ମଶାଧୂପ ଲଗାଇଥିଲେ । ମଶାଧୂପରୁ ନିଆଁ ଲାଗି ସେ ଜିଅନ୍ତା ଜଳିଯାଇଥିବା ପୋଲିସ ପ୍ରାଥମିକ ତଦନ୍ତରୁ ସନ୍ଦେହ କରୁଛି ।

ପୋଲିସର କହିବାନୁସାରେ, ସବୁ ଦିଗରୁ ଘଟଣାର ତଦନ୍ତ କରାଯାଉଛି । ପ୍ରାଥମିକ ଯାଞ୍ଚରୁ ଏହା ମଶାଧୂପ ଯୋଗୁଁ ଅଗ୍ନିକାଣ୍ଡ ଘଟିଥାଇପାରେ ବୋଲି ବିଶ୍ଵାସ କରାଯାଉଛି । ମଶାଧୂପରୁ ଧୀରେ ଧୀରେ ପୁରା ବସ୍‌ରେ ନିଆଁ ବ୍ୟାପିଥାଇପାରେ । ସୁନୀଲନଙ୍କ ନିଦ ଭାଙ୍ଗିବା ବେଳକୁ ନିଆଁ ଏତେ ମାତ୍ରାରେ ବ୍ୟାପିଯାଇଥିଲା, ଯେଉଁଥିପାଇଁ ସେ ବାହାରିପାରିନାହାନ୍ତି ଏବଂ ଜିଅନ୍ତା ଜଳିଯାଇଥାଇପାରନ୍ତି ବୋଲି ପୋଲିସ କହିଛି ।

ପଢ଼ନ୍ତୁ ଏହି ଖବର: କିଏ ଏହି ଶିବମ୍‌ ମିଶ୍ରା ? ଯିଏ ସାଧାରଣ ଲୋକଙ୍କୁ ପୋକ ମାଛି ପରି ମାରିଦେଲା...

• ଜଳିଯାଇଥିଲା ପୁରା ବସ୍‌

ପୋଲିସ ଘଟଣାସ୍ଥଳରେ ପହଞ୍ଚିଲା ବେଳକୁ ପୁରା ବସ୍‌ଟି ଜଳିଯାଇଥିଲା । ସୁନୀଲଙ୍କ ଅର୍ଦ୍ଧଦଗ୍ଧ ମୃତଦେହକୁ ଦୀନ ଦୟାଲ ଉପାଧ୍ୟାୟ (ଡିଡିୟୁ)କୁ ପଠାଯାଇଛି, ସେଠାରେ ତାଙ୍କ ଶବ ବ୍ୟବଚ୍ଛେଦ କରାଯିବ । ସେପଟେ ସ୍ଥାନୀୟ ଲୋକଙ୍କ କହିବା କଥା ଯେ ବସ୍‌ରେ ଏତେ ଭୀଷଣ ନିଆଁ ଲାଗିଥିଲା ଯେ ଯେତେବେଳେ ଦମକଳ ବାହିନୀ ଘଟଣାସ୍ଥଳରେ ପହଞ୍ଚିଥିଲା ସେତେବେଳେ ବସ୍‌ଟି ସମ୍ପୂର୍ଣ୍ଣ ଭାବେ ଜଳିଯାଇଥିଲା । ଅନେକ ସମୟ ଧରି ନିଆଁ ଲିଭା କାର୍ଯ୍ୟ ଜାରି ଥିଲା । ବହୁ ସମୟ ପରେ ସମ୍ପୂର୍ଣ୍ଣ ନିଆଁ ଲିଭା ପରେ ସୁନୀଲଙ୍କ ଅର୍ଦ୍ଧଦଗ୍ଧ ମୃତଦେହକୁ ଉଦ୍ଧାର କରାଯାଇଥିଲା ।

• କେତେବେଳେ ଘଟିଥିଲା ଅଗ୍ନିକାଣ୍ଡ ?

ଅଗ୍ନିକାଣ୍ଡ ଘଟିଥିବା ଅଞ୍ଚଳର ଜମେ ବାସିନ୍ଦା ବିଜୟ କହିଛନ୍ତି ଯେ ରବିବାର ପ୍ରାୟ ରାତି ୧୨.୩୦ଟାରେ ବସ୍‌ରେ ନିଆଁ ଲାଗିଥିବା ସେମାନେ ଦେଖିବାକୁ ପାଇଥିଲେ । ଏହାପରେ ସେ ତୁରନ୍ତ ଦମକଳ ବାହିନୀକୁ ଫୋନ କରିଥିଲେ । ଦମକଳ ପ୍ରାୟ ୧୨.୪୫ଟାରେ ବସ୍‌ ନିକଟରେ ପହଞ୍ଚିଥିଲା । ସେମାନେ ପ୍ରଥମେ ବସ୍‌ର କାଚ ଭାଙ୍ଗିଥିଲେ । ସେତେବେଲେ ବସ୍‌ଟି ପ୍ରାୟ ଅଧା ଜଳିଯାଇଥିଲା । ଏହାପରେ ଦମକଳ ବାହିନୀ ଜାଣିବାକୁ ପାଇଥିଲେ ଯେ ବସ୍‌ ଭିତରେ କେହି ବ୍ୟକ୍ତି ଅଛନ୍ତି । ଏହାପରେ ବସ୍‌ ସମ୍ପର୍କରେ ତଥ୍ୟ ସଂଗ୍ରହ କରାଯାଇ ଏହାର ଡ୍ରାଇଭରଙ୍କୁ ଡକାଯାଇଥିଲା ।

ଏଠାରେ ସୂଚନା ଥାଉ କି, ଜଳିଯାଇଥିବା ବସ୍‌ର ମାଲିକ ହେଉଛନ୍ତି ୪୬ ବର୍ଷୀୟ ହରିୟାଣା ବାସିନ୍ଦା ବିଜୟ କୁମାର । ପୋଲିସ ମାଲିକଙ୍କ ସହିତ ଯୋଗାଯୋଗ କରିଛି । ପ୍ରାଥମିକ ତଦନ୍ତରୁ ଏହା ମଶାଧୂପରୁ ଅଗ୍ନିକାଣ୍ଡ ଘଟିଥାଇପାରେ ବୋଲି ପୋଲିସ ସନ୍ଦେହ କରୁଛି । ଅଧିକ ତଦନ୍ତ ଜାରି ରହିଥିବା କହିଛି ପୋଲିସ ।

ଏଥିସହ ପଢନ୍ତୁ: ପଞ୍ଜାବ କ୍ୟାମ୍ପସରେ ଗୁଳିକାଣ୍ଡ; ସହପାଠୀଙ୍କୁ ଗୁଳି କଲେ ଆଇନ ଛାତ୍ର