Uttarakhand Snowfall Update Today / ଆଦି କୈଳାସ ଠାରେ ଜମିଗଲା ପାର୍ବତୀ କୁଣ୍ଡ; ବରଫରେ ଆଚ୍ଛାଦିତ ହୋଇଗଲା ଓମ୍ ପର୍ବତ

ଚଳିତ ବର୍ଷ ସେପ୍ଟେମ୍ବର ଶେଷ ସପ୍ତାହରୁ ପାହାଡ଼ି ରାଜ୍ୟ ଉତ୍ତରାଖଣ୍ଡରେ ଆରମ୍ଭ ହୋଇଯାଇଛି ପ୍ରବଳ ତୁଷାରପାତ। ଯାହାର ପ୍ରଭାବ ରାଜ୍ୟର ପିଥୋରାଗଡ଼ ଜିଲ୍ଲାର ଆଦି କୈଳାସ ଏବଂ ଓମ୍ ପର୍ବତ ଅଞ୍ଚଳରେ ଦୃଶ୍ୟମାନ ହେଉଛି। ପ୍ରାୟ ୪-୫ ଫୁଟ ତୁଷାରପାତ ପରେ, ସମଗ୍ର ଉଚ୍ଚ ହିମାଳୟ ଅଞ୍ଚଳ ଧଳା ବରଫ ଚାଦରରେ ଆଚ୍ଛାଦିତ ହୋଇଯାଇଛି। ତାପମାତ୍ରା ହ୍ରାସ ପାଇବା ଯୋଗୁଁ ପୌରାଣିକ ପାର୍ବତୀ କୁଣ୍ଡର ପାଣି ସମ୍ପୂର୍ଣ୍ଣ ଭାବରେ ଜମି ​​ଯାଇଛି। ଯେତେବେଳେ ଭୀମ ଖେତି ଅଞ୍ଚଳ ମଧ୍ୟ ବରଫରେ ଆଚ୍ଛାଦିତ ହୋଇଛି। ଯଦିଓ ତୁଷାରପାତ ଯୋଗୁଁ କିଛି ରାସ୍ତା ଅବରୋଧିତ ହୋଇଛି। ହେଲେ ତଥାପି ଏହି ଦୃଶ୍ୟକୁ ଉପଭୋଗ କରିବା ପାଇଁ ଭକ୍ତ ଏବଂ ପର୍ଯ୍ୟଟକ ଆଦି କୈଳାସ ଏବଂ ଓମ୍ ପର୍ବତ ଅଭିମୁଖେ ବହୁ ସଂଖ୍ୟାରେ ଆସୁଛନ୍ତି।

ସେପ୍ଟେମ୍ବର ତୁଷାରପାତ ବଦଳାଇ ଦେଲା ହିମାଳୟର ଦୃଶ୍ୟ
ସେପ୍ଟେମ୍ବର ୨୫ ତାରିଖରୁ ଆରମ୍ଭ ହୋଇଥିବା ତୁଷାରପାତର ପ୍ରଭାବ ଉତ୍ତରାଖଣ୍ଡର ଉଚ୍ଚ ପାର୍ବତ୍ୟାଞ୍ଚଳରେ ଏବେ ମଧ୍ୟ ଦୃଶ୍ୟମାନ ହେଉଛି। ପ୍ରାୟ ୪୦୦୦ ମିଟର ଠାରୁ ଅଧିକ ଅଞ୍ଚଳ ଘନ ବରଫ ଚାଦରରେ ଆଚ୍ଛାଦିତ ହୋଇଯାଇ। ପିଥୋରାଗଡ଼ ଜିଲ୍ଲାର ପ୍ରସିଦ୍ଧ ଧାର୍ମିକ ଏବଂ ପର୍ଯ୍ୟଟନସ୍ଥଳୀ, ଆଦି କୈଳାସ ଏବଂ ଓମ୍ ପର୍ବତ ଅଞ୍ଚଳ ଏହି ତୁଷାରପାତ ଦ୍ୱାରା ସର୍ବାଧିକ ପ୍ରଭାବିତ ହୋଇଛି। ରିପୋର୍ଟ ଅନୁଯାୟୀ, ଆଦି କୈଳାସ ଅଞ୍ଚଳରେ ୪-୫ ଫୁଟ ଉଚ୍ଚତାର ବରଫ ଜମା ହୋଇଛି। ଓମ୍ ପର୍ବତ ଅଞ୍ଚଳରେ ପ୍ରାୟ ୨ ଫୁ ବଫଟ ଜମା ହୋଇଛି। ତୁଷାରପାତ ଯୋଗୁଁ ସମଗ୍ର ଅଞ୍ଚଳ ଧଳା ରଙ୍ଗର ଚାଦରରେ ଆଚ୍ଛାଦିତ ହୋଇଛି। ଯାହା ଏହାର ପ୍ରାକୃତିକ ସୌନ୍ଦର୍ଯ୍ୟକୁ ବୃଦ୍ଧି କରିଛି।

ଶୂନ୍ୟ ତଳକୁ ଖସିଯାଇଛି ତାପମାତ୍ରା; ଜମା ହୋଇଗଲା ପାର୍ବତୀ କୁଣ୍ଡ
ନିରନ୍ତର ତୁଷାରପାତ ଏବଂ ବୃଦ୍ଧି ପାଉଥିବା ଥଣ୍ଡା ଯୋଗୁଁ ଏହି ଅଞ୍ଚଳର ତାପମାତ୍ରା ହ୍ରାସ ପାଇବାରେ ଲାଗିଛି। ଏହା ପୌରାଣିକ ଏବଂ ଧାର୍ମିକ ଗୁରୁତ୍ୱ ଥିବା ପାର୍ବତୀ କୁଣ୍ଡକୁ ମଧ୍ୟ ପ୍ରଭାବିତ କରିଛି। ଆଦି କୈଳାସ ପର୍ବତ ପାଦଦେଶରେ ଅବସ୍ଥିତ ପାର୍ବତୀ କୁଣ୍ଡରେ ପାଣି ସମ୍ପୂର୍ଣ୍ଣ ଭାବରେ ଜମାଟ ବାନ୍ଧିଛି। ଧାର୍ମିକ ଗୁରୁତ୍ୱ ବହନ କରୁଥିବା ଭୀମା ଖେତି ଅଞ୍ଚରେଳ ମଧ୍ୟ କିଛି ଇଞ୍ଚ ଉଚ୍ଚତା ବିଶିଷ୍ଟ ବରଫରେ ଆଚ୍ଛାଦିତ ହୋଇଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ ଏହି ଅଞ୍ଚଳରେ ପ୍ରବଳ ଥଣ୍ଡା ଅନୁଭୂତ ହେଉଛି। ରାତିରେ ତାପମାତ୍ରା ବହୁତ ହ୍ରାସ ପାଇଛି। 

ଏହା ସହ ପଢନ୍ତୁ: ୧୪,୫୦୦ ଫୁଟ ଉଚ୍ଚରେ ଲାଗିଲା ଲମ୍ବା ଟ୍ରାଫିକ୍ ଜାମ୍; ପର୍ଯ୍ୟଟକଙ୍କ ଭିଡ଼ରେ ଲୋକାରଣ୍ୟ ହୋଇଉଠିଲା ବଦ୍ରିନାଥ-କେଦାରନାଥ, ଆଦି କୈଳାସ

ରାସ୍ତାରେ ତୁଷାରପାତ, ଅନେକ ସ୍ଥାନରେ ଯାତାୟାତ ବାଧାପ୍ରାପ୍ତ
ପ୍ରବଳ ତୁଷାରପାତ ମଧ୍ୟ ଏହି ଅଞ୍ଚଳରେ ରାସ୍ତା ସଂଯୋଗକୁ ପ୍ରଭାବିତ କରିଛି। ଆଦି କୈଳାସ ଏବଂ ଓମ୍ ପର୍ବତକୁ ଯାଇଥିବା ଭାରତ-ନେପାଳ ସୀମା ରାସ୍ତାର ଅନେକ ସ୍ଥାନରେ ବରଫ ଜମା ହେବା ଯୋଗୁଁ ଯାତାୟାତ ବ୍ୟବସ୍ଥା ପ୍ରଭାବିତ ହୋଇଛି। ଗୌରୀ କୁଣ୍ଡ ଠାରୁ ଆଗକୁ ୨ କିଲୋମିଟର ଚାଲିବା ରାସ୍ତା ବରଫରେ ଆଚ୍ଛାଦିତ ହୋଇ ରହିଛି। ଲିପୁଲେଖ ଯିବା ପାଇଁ ରାସ୍ତା ମଧ୍ୟ ଅନେକ ଅଞ୍ଚଳରେ ବନ୍ଦ ରହିଥିବା ଜଣାପଡ଼ିଛି। ହେଲେ ତଥାପି ସୀମାନ୍ତ ସଡ଼କ ସଙ୍ଗଠନ (BRO) ଏହି ରାସ୍ତାକୁ ପୁନର୍ବାର ଖୋଲିବା ପାଇଁ ନିରନ୍ତର କାର୍ଯ୍ୟ କରୁଛି। ଅଧିକାରୀଙ୍କ ଅନୁଯାୟୀ, କୁଟି ଠାରୁ ଆଦି କୈଳାସ ପର୍ଯ୍ୟନ୍ତ ରାସ୍ତାରୁ ବହୁ ପରିମାଣର ବରଫ ହଟାଇ ଦିଆଯାଇଛି। ଯାହା ଦ୍ୱାରା ତୀର୍ଥଯାତ୍ରୀ ଏବଂ ସୁରକ୍ଷା ବାହିନୀର ଯାନବାହାନ ଚଳାଚଳ ସହଜ ହୋଇଛି।

୩-୪ ଦିନ ମଧ୍ୟରେ ଖୋଲିପାରେ ଲିପୁଲେଖ ରାସ୍ତା
BRO ଟିମ୍ ନିରନ୍ତର ବରଫ ହଟାଇବା କାର୍ଯ୍ୟରେ ନିୟୋଜିତ ରହିଛି। କୁଟି ଠାରୁ ଆଦି କୈଳାସ ପର୍ଯ୍ୟନ୍ତ ରାସ୍ତା ପ୍ରାୟତଃ ସଫା କରାଯାଇଛି। ଅଧିକାରୀ ଆଶା କରୁଛନ୍ତି ଯେ ଯଦି ପାଗ ଅନୁକୂଳ ରହେ, ତାହେଲେ ଆଗାମୀ ୩-୪ ଦିନ ମଧ୍ୟରେ ଲିପୁଲେଖ ରାସ୍ତା ମଧ୍ୟ କାର୍ଯ୍ୟକ୍ଷମ ହେବ। ଏହା ଅଞ୍ଚଳରେ ସାଧାରଣ ଯାତାୟାତ ଏବଂ ଯୋଗାଣ ବ୍ୟବସ୍ଥାକୁ ପୁନର୍ବାର ଆରମ୍ଭ କରିବାରେ ସାହାଯ୍ୟ କରିବ।

ଏହା ସହ ପଢନ୍ତୁ:  ସୁରକ୍ଷିତ ମିଳିଲେ କେଦାରନାଥ-ବାସୁକିତାଲ ଟ୍ରେକ୍ ଠାରେ ନିଖୋଜ ହୋଇଥିବା ୫ ଟ୍ରେକର୍ସ

ତୁଷାରପାତ ମଧ୍ୟରେ ଦର୍ଶନ ପରେ ଫେରୁଛନ୍ତି ତୀର୍ଥଯାତ୍ରୀ
ଆଦି କୈଳାସ ଯାତ୍ରାରେ ତୀର୍ଥଯାତ୍ରୀ ଏହି ଋତୁକୁ ସେମାନଙ୍କ ପାଇଁ ଏକ ବିଶେଷ ଅଭିଜ୍ଞତା ଭାବରେ ବର୍ଣ୍ଣନା କରୁଛନ୍ତି। ତୀର୍ଥଯାତ୍ରା ସମାପ୍ତ କରି ଫେରିଥିବା ଦଳ ଆଦି କୈଳାସ, ଓମ୍ ପର୍ବତ, ଶିବ-ପାର୍ବତୀ ମନ୍ଦିର, ପାର୍ବତୀ କୁଣ୍ଡ, ଭୀମ ଖେତି, କଳାପାଣି ମାତା ମନ୍ଦିର ଏବଂ ବ୍ୟାସ ଗୁମ୍ଫା ସମେତ ଅନେକ ଗୁରୁତ୍ୱପୂର୍ଣ୍ଣ ଧାର୍ମିକ ସ୍ଥଳ ପରିଦର୍ଶନ କରିଛନ୍ତି। ସେମାନେ କହିଛନ୍ତି ଯେ ପାର୍ବତୀ କୁଣ୍ଡ ଏବଂ ଭୀମ ଖେତି ଅଞ୍ଚଳରେ ପ୍ରାୟ ୫-୬ ଇଞ୍ଚ ବରଫ ଜମା ହୋଇଛି। ପ୍ରବଳ ତୁଷାରପାତ ଯୋଗୁଁ ସେମାନେ ପାର୍ବତୀ କୁଣ୍ଡ ଠାରେ ସ୍ନାନ କରିପାରିଲେ ନାହିଁ। ହେଲେ ସମଗ୍ର ବରଫ ଆଚ୍ଛାଦିତ ଅଞ୍ଚଳର ଦୃଶ୍ୟ ଚମତ୍କାର ଥିଲା।