Madrasas in Bihar will now be investigated: ରାଜ୍ୟରେ ଅବସ୍ଥିତ ଥିବା ମଦ୍ରାସା ସମ୍ପର୍କରେ ଏକ ବଡ଼ ନିଷ୍ପତ୍ତି ନେଇଛନ୍ତି ବିହାର ସରକାର। ଏହା ନିଷ୍ପତ୍ତି ଅଧିନରେ ରାଜ୍ୟର ସମସ୍ତ ଅଣ-ସରକାରୀ, ସ୍ୱୀକୃତିପ୍ରାପ୍ତ ଏବଂ ଅନୁଦାନପ୍ରାପ୍ତ ମଦ୍ରାସା ତଦନ୍ତ ପରିସରଭୂକ୍ତ କରାଯିବ। ବିହାର ସରକାରଙ୍କ ଶିକ୍ଷା ବିଭାଗ ଏ ସମ୍ପର୍କରେ ସମସ୍ତ ଜିଲ୍ଲାପାଳଙ୍କୁ ଏକ ନିର୍ଦ୍ଦେଶନାମା ଜାରି କରିଛି। ଯେଉଁଥିରେ ଉଲ୍ଲେଖ ରହିଛି ଯେ ସମସ୍ତ ମଦ୍ରାସାରେ ଶିକ୍ଷା ଏବଂ ଗୁଣବତ୍ତାର ସମୀକ୍ଷା ପ୍ରସ୍ତୁତ କରାଯିବା ସହ ପ୍ରତି ୧୦ ଦିନରେ ସରକାରଙ୍କୁ ଏକ ରିପୋର୍ଟ ପ୍ରଦାନ କରାଯିବା ଆବଶ୍ୟକ। ଏଥିପାଇଁ ଏକ ୩ ସଦସ୍ୟ ବିଶିଷ୍ଟ କମିଟି ଗଠନ କରାଯାଇଛି। ଏହି କମିଟି ସମସ୍ତ ମଦ୍ରାସା ପରିଦର୍ଶନ କରିବା ସହ ଶିକ୍ଷକ ଏବଂ କର୍ମଚାରୀଙ୍କ ନିଯୁକ୍ତି, ଉପସ୍ଥାନ ସହିତ ଶିକ୍ଷା ବ୍ୟବସ୍ଥାକୁ ଯାଞ୍ଚ କରିବ।

ବିହାର ଶିକ୍ଷା ବିଭାଗର ଆଦେଶ
ମଦ୍ରାସାକୁ ତଦନ୍ତ ପରିସରଭୂକ୍ତ କରାଯିବା ସମ୍ପର୍କରେ ଏହି ନିର୍ଦ୍ଦେଶ ବିହାର ସରକାରଙ୍କ ଶିକ୍ଷା ନିର୍ଦ୍ଦେଶାଳୟ ସଚିବ ବିନୋଦ ସିଂହ ଗୁଞ୍ଜ୍ୟାଲ ଜାରି କରିଛନ୍ତି। ଏହି ବିଭାଗୀୟ ଆଦେଶରେ ଉଲ୍ଲେଖ ରହିଛି ଯେ ରାଜ୍ୟର ବିଭିନ୍ନ ଜିଲ୍ଲାରେ ଅଣ-ସରକାରୀ, ସ୍ୱୀକୃତିପ୍ରାପ୍ତ ଏବଂ ଅନୁଦାନପ୍ରାପ୍ତ ମଦ୍ରାସା କାର୍ଯ୍ୟ କରୁଛି। ଏହି ମଦ୍ରାସାରେ ଆନୁଷ୍ଠାନିକ ଭାବରେ ନିଯୁକ୍ତ ଏବଂ କାର୍ଯ୍ୟ କରୁଥିବା କର୍ମଚାରୀଙ୍କୁ ବିହାର ସରକାର ଦରମା ସହ ଅନୁଦାନ ପ୍ରଦାନ କରୁଛନ୍ତି। ଏଠାରେ ଛାତ୍ରଛାତ୍ରୀ ପଢ଼ୁଛନ୍ତି। ସେମାନଙ୍କୁ ଗୁଣାତ୍ମକ ଶିକ୍ଷା ଯୋଗାଇ ଦିଆଯାଉଛି ନା ନାହିଁ ତାହା ନିଶ୍ଚିତ କରିବା ରାଜ୍ୟ ସରକାରଙ୍କ ଦାୟିତ୍ୱ। ଏହାକୁ ଗୁଣାତ୍ମକ ଶିକ୍ଷା ସୁନିଶ୍ଚିତ କରିବା ପାଇଁ ମଦ୍ରାସାକୁ ତଦନ୍ତ ପରିସରଭୂକ୍ତ କରିବାକୁ ନିଷ୍ପତ୍ତି ନିଆଯାଇଛି।

ଏହା ସହ ପଢନ୍ତୁ: ସରକାରୀ ବାସଭବନ ଖାଲି କରିବାକୁ ନେଇ ମୁଖ୍ୟମନ୍ତ୍ରୀ ଦେଲେ ଚେତାବନୀ; କହିଲେ...

୩ ସଦସ୍ୟଙ୍କ କମିଟି କରିବ ଯାଞ୍ଚ
ଶିକ୍ଷା ବିଭାଗ ପକ୍ଷରୁ ଜାରି ହୋଇଥିବା ନିର୍ଦ୍ଦେଶନାମାରେ କୁହାଯାଇଛି ଯେ ମଦ୍ରାସାକୁ ବ୍ଲକ ସ୍ତରରେ ଯାଞ୍ଚ କରାଯିବ। ଏହି ମଦ୍ରାସା ଯେଉଁ ବ୍ଲକରେ ଅବସ୍ଥିତ ସେଠାରେ ଏକ ତିନି ସଦସ୍ୟ ବିଶିଷ୍ଟ କମିଟି ଗଠନ କରାଯିବ। ଯାହାର ଅଧ୍ୟକ୍ଷତା ସେହି ବ୍ଲକର ବ୍ଲକ ଉନ୍ନୟନ ଅଧିକାରୀ (BDO) କିମ୍ବା ସର୍କଲ୍ ଅଧିକାରୀ (CO) କରିବେ। ସମ୍ପୃକ୍ତ ବ୍ଲକର ବ୍ଲକ ଶିକ୍ଷା ଅଧିକାରୀ (BEO) ଏହି କମିଟି ସଚିବ ହେବେ। ଏହା ସହିତ ସ୍ଥାନୀୟ ଅଞ୍ଚଳର ସରକାରୀ ସ୍କୁଲର ବରିଷ୍ଠ ପ୍ରଧାନ ଶିକ୍ଷକ ମଧ୍ୟ କମିଟି ସଦସ୍ୟ ଭାବେ କାର୍ଯ୍ୟ କରିବେ।

ଏହି କମିଟି ସମ୍ପୃକ୍ତ ଅଞ୍ଚଳର ଜିଲ୍ଲାପାଳଙ୍କ ଦ୍ୱାରା ଗଠିତ ହେବ। ଯିଏ କମିଟି ସଦସ୍ୟଙ୍କୁ ମନୋନୀତ କରିବେ। ବ୍ଲକ ଉନ୍ନୟନ ଅଧିକାରୀଙ୍କ ଅନୁପସ୍ଥିତିରେ, ସର୍କଲ୍ ଅଧିକାରୀଙ୍କୁ ମନୋନୀତ କରାଯିବ। ତୃତୀୟ ସ୍ତରରେ ସରକାରୀ ମାଧ୍ୟମିକ/ଉଚ୍ଚ ମାଧ୍ୟମିକ ବିଦ୍ୟାଳୟର ବରିଷ୍ଠତମ ପ୍ରଧାନ ଶିକ୍ଷକଙ୍କ ନାମର ଏକ ତାଲିକା ପ୍ରସ୍ତୁତ କରାଯିବ। ଜିଲ୍ଲା ଶିକ୍ଷା ଅଧିକାରୀ ବ୍ଲକ ସ୍ତରରେ ତାଲିକା ପ୍ରସ୍ତୁତ କରି ଜିଲ୍ଲାପାଳଙ୍କ ପାଖକୁ ପଠାଇବେ।

ଏହା ସହ ପଢନ୍ତୁ:  ସରକାରୀ ବାସଭବନରେ ଦଳ ବଳ ସହ ପହଞ୍ଚିଲା ପ୍ରଶାସନ; କ'ଣ କହିାଲେ ରାବ୍ରି ଦେବୀ?

ଫଟୋ ସହ ଦେବାକୁ ହେବ ରିପୋର୍ଟ
ଶିକ୍ଷା ବିଭାଗର ନିର୍ଦ୍ଦେଶ ଅନୁଯାୟୀ ଏହି ୩ ଜଣିଆ କମିଟି ସମସ୍ତ ମଦ୍ରାସା ଗସ୍ତ କରି ସେଠାରେ ଯାଞ୍ଚ କରିବ। ଯାଞ୍ଚ ସମୟରେ ମଦ୍ରାସା କୋଠା ଏବଂ ଏହାର ପରିସର, ସେଠାରେ କାର୍ଯ୍ୟରତ ଶିକ୍ଷକ ଏବଂ କର୍ମଚାରୀ ଏବଂ ପରିଚାଳିତ ଶ୍ରେଣୀର ଫଟୋଗ୍ରାଫି କରାଯିବ। ତଦନ୍ତ କମିଟିକୁ ବ୍ୟକ୍ତିଗତ ଭାବରେ ମଦ୍ରାସା ପରିଦର୍ଶନ କରି ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ଯାଞ୍ଚ ସମୟରେ ସ୍ୱଚ୍ଛତା ବଜାୟ ରଖିବା ପାଇଁ, ମଦ୍ରାସା ପରିସର ଏବଂ କାର୍ଯ୍ୟକଳାପର ଲାଇଭ୍ ଫଟୋଗ୍ରାଫି ମଧ୍ୟ କରାଯିବ। ସମୀକ୍ଷା ଏବଂ ଫଟୋଗ୍ରାଫ୍ ସହିତ ରିପୋର୍ଟ ୧୦ ଦିନ ମଧ୍ୟରେ ଶିକ୍ଷା ବିଭାଗ ପାଖରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି।