Super El Nino 2026 Impact: ଚଳିତ ବର୍ଷ ଦେଶ ପାଣିପାଗକୁ ନେଇ ଏକ ଗମ୍ଭୀର ଚେତାବନୀ ଜାରି କରିଛନ୍ତି ବୈଜ୍ଞାନିକ। ଚଳିତ ବର୍ଷ ଦେଶ ଏକ "ସୁପର ଏଲ୍ ନିନୋ" ର ସାମ୍ମା କରିପାରେ। ଯାହାର ପ୍ରଭାବରେ ପ୍ରଚଣ୍ଡ ଗରମ, ଦୁର୍ବଳ ମୌସୁମୀ ଏବଂ ମରୁଡ଼ି ଭଳି ପରିସ୍ଥିତି ସୃଷ୍ଟି ହେବ। ଶେଷ ଥର ପାଇଁ ଦେଶରେ ଏପରି ଏକ ଶକ୍ତିଶାଳୀ ଜଳବାୟୁ ଘଟଣା ୨୦୧୫-୧୬ ବର୍ଷରେ ଘଟିଥିଲା। ସେହି ସମୟ ମଧ୍ୟରେ ବର୍ଷା ଯଥେଷ୍ଟ ମାତ୍ରାରେ ହ୍ରାସ ପାଇବା ସହ ଫସଲ କ୍ଷତିଗ୍ରସ୍ତ ହୋଇଥିଲା। ଅନେକ ଅଞ୍ଚଳରେ ତାପମାତ୍ରା ଅନେକାଂଶରେ ବୃଦ୍ଧି ପାଇଥିଲା। ବର୍ତ୍ତମାନ ବିଶ୍ୱ ପାଣିପାଗ ସଙ୍ଗଠନ ଏହାକୁ ନେଇ ନୂତନ ଚେତାବନୀ ଜାରି କରିଛି।

ସୁପର ଏଲ୍ ନିନୋ କ'ଣ?
ସୁପର ଏଲ୍ ନିନୋ ମୂଳତଃ ଏଲ୍ ନିନୋ ଜଳବାୟୁ ଘଟଣାର ଏକ ଅଧିକ ତୀବ୍ର ରୂପ। ଏହି ଘଟଣାରେ ପ୍ରଶାନ୍ତ ମହାସାଗରର ପୃଷ୍ଠଭାଗର ତାପମାତ୍ରା ସ୍ୱଭାବିକ ଠାରୁ ଯଥେଷ୍ଟ ମାତ୍ରାରେ ବୃଦ୍ଧି ପାଇଥାଏ। ଏପରିକି ତାପମାତ୍ରା ବୃଦ୍ଧି ୨ ଡିଗ୍ରୀ ସେଲସିୟସ ଠାରୁ ମଧ୍ୟ ଅଧିକ ହୋଇଯାଏ। ଏହି ବର୍ଦ୍ଧିତ ଉତ୍ତାପ ବିଶ୍ୱ ପାଣିପାଗ ବ୍ୟବସ୍ଥାରେ ବିଭ୍ରାଟ ସୃଷ୍ଟି କରିଥାଏ। ସାଧାରଣ ଏଲ୍ ନିନୋ ଘଟଣା ତୁଳନାରେ ସୁପର ଏଲ୍ ନିନୋ ବହୁତ କମ୍ ହୋଇଥାଏ। ଯାହା ଅଧିକ ପରିମାଣରେ ବିନାଶକାରୀ ହୋଇଥାଏ।

ଏହା ସହ ପଢନ୍ତୁ: ଆଗକୁ ଆସିବ ଏଲ୍-ନିନୋ; ବଢିପାରେ ଗରମ-ମରୁଡ଼ି ସମ୍ଭାବନା!

ଶେଷ ଥର କେବେ ଏପରି ଘଟଣାର ସାମ୍ନା କରିଥିଲା ଦେଶ?
ଦେଶ ଶେଷ ଥର ପାଇଁ ଗତ ୨୦୧୫-୧୬ ବର୍ଷରେ ଏକ ବଡ଼ ଧରଣର ସୁପର ଏଲ୍ ନିନୋ ଅନୁଭବ କରିଥିଲା। ଯାହା ଆଧୁନିକ ଇତିହାସର ସବୁଠାରୁ ଶକ୍ତିଶାଳୀ ଘଟଣା ମଧ୍ୟରୁ ଅନ୍ୟତମ। ସେହି ବର୍ଷ ବର୍ଷା ସ୍ୱାଭାବିକ ଠାରୁ ଯଥେଷ୍ଟ କମ୍ ହୋଇଥିଲା। ଯାହା ଜଳସମ୍ପଦ ଉପରେ ଚାପ ବଢାଇଥିଲା। ଏହା ଦ୍ୱାରା ଦେଶର ଅନେକ ରାଜ୍ୟରେ କୃଷି କାର୍ଯ୍ୟ ଗୁରୁତର ଭାବରେ ପ୍ରଭାବିତ ହୋଇଥିଲା। ପୂର୍ବରୁ ମଧ୍ୟ ୧୯୯୭-୧୯୯୮ ମସିହାର ଘଟଣା ସାରା ବିଶ୍ୱରେ ମୌସୁମୀକୁ ପ୍ରଭାବିତ କରିଥିଲା। ସେହିପରି ୧୮୭୭-୭୮ ମସିହାର ସୁପର ଏଲ୍ ନିନୋ ସେତେବେଳର ଭାରତ ବର୍ଷରେ ଏକ ଭୟଙ୍କର ଦୁର୍ଭିକ୍ଷ ସୃଷ୍ଟି କରିଥିଲା। ଯାହା ଲକ୍ଷ ଲକ୍ଷ ଲୋକଙ୍କ ଜୀବନ ନେଇଥିଲା। ଯାହା ଇତିହାସର ସବୁଠାରୁ ଖରାପ ଜଳବାୟୁ ବିପର୍ଯ୍ୟୟ ଘଟଣା ମଧ୍ୟରୁ ଅନ୍ୟତମ।

କ'ଣ ହେବ ଚଳିତ ବର୍ଷର ସ୍ଥିତି?
କୁହାଯଉଛି ଯେ ଚଳିତ ବର୍ଷ ମେ-ଜୁଲାଇ ମାସରେ ଏଲ୍ ନିନୋ ଭଳି ପରିସ୍ଥିତି ସୃଷ୍ଟି ହେବାର ପ୍ରାୟ ୬୦ ପ୍ରତିଶତରୁ ୮୦% ସମ୍ଭାବନା ରହିଛି। ଯାହା ଦ୍ୱାରା ବର୍ଷା ହ୍ରାସ ହୋଇପାରେ। ଏପରିକି ଏହାର ସାଧାରଣ ସ୍ତରରୁ ପ୍ରାୟ ୯୨% ପର୍ଯ୍ୟନ୍ତ କମ୍ ହୋଇପାରେ। ଯଦିଓ ଏହି ହ୍ରାସ ଛୋଟ ମନେ ହୋଇଥାଏ, ହେଲେ ଏହାର ବାସ୍ତବ ଜୀବନରେ ଏକ ଗୁରୁତ୍ୱପୂର୍ଣ୍ଣ ଏବଂ ଗମ୍ଭୀର ପରିଣାମ ଭୋଗିବାକୁ ପଡ଼ିପାରେ।\

ଏହା ସହ ପଢନ୍ତୁ: ପଶ୍ଚିମ ବିକ୍ଷୋଭ କ'ଣ? ଯାହା ପାଇଁ ବାରମ୍ବାର ବଦଳିଥାଏ ପାଣିପାଗ

କାହିଁକି ଏହି ଘଟଣା ଏତେ ବିପଜ୍ଜନକ?
ସୁପର ଏଲ୍ ନିନୋକୁ ନେଇ ରହିଥିବା ସବୁଠାରୁ ବଡ଼ ଚିନ୍ତା ହେଉଛି ଏହାର ଶୃଙ୍ଖଳିତ ପ୍ରତିକ୍ରିୟା। ଏହା କେବଳ ତାପମାତ୍ରା ବଢାଏ ନାହିଁ ବରଂ ବର୍ଷାର ପରିମାଣକୁ ମଧ୍ୟ ହ୍ରାସ କରିଥାଏ। ଯାହାର ଫଳସ୍ୱରୂପ ଫସଲ ଉତ୍ପାଦନ ହ୍ରାସ ପାଇବା ସହ ଜଳସମ୍ପଦ ଉପରେ ଚାପ ବଢିଥାଏ। ଐତିହାସିକ ରୂପରେ ଏହା ଅତି ଚରମ ଅବସ୍ଥାରେ ଦୁର୍ଭିକ୍ଷ ଭଳି ପରିସ୍ଥିତି ମଧ୍ୟ ସୃଷ୍ଟି କରିପାରେ।