Shivraj Singh In Puri / ସକାଳୁ ସକାଳୁ ଶ୍ରୀମନ୍ଦିରରେ କେନ୍ଦ୍ର କୃଷି ମନ୍ତ୍ରୀ; ବିକଶିତ ଭାରତ ପାଇଁ କଲେ ପ୍ରାର୍ଥନା

ଆଜି ସକାଳୁ ସକାଳୁ ଶ୍ରୀମନ୍ଦିରରେ ପହଞ୍ଚିଲେ କେନ୍ଦ୍ର କୃଷି ମନ୍ତ୍ରୀ ଶିବରାଜ ସିଂହ ଚୌହାନ । ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କରି ସାନ୍ନିଧ୍ୟ ଲାଭ କରିଛନ୍ତି । ବୈଭବ ଶାଳୀ, ଶକ୍ତିଶାଳୀ ଓ ଗୌରବଶାଳୀ ଭାରତ ଗଠନ ସହ ଆତ୍ମ ନିର୍ଭର ଓ ବିକଶିତ ଭାରତ ଗଠନ ସହ ସନାତନ ସଂସ୍କୃତିକୁ ଦିଗଦର୍ଶନ ଦେବା ସହ ବିଶ୍ୱରେ ଶାନ୍ତି ବଜାୟ ରଖିବାକୁ ମହାପ୍ରଭୁଙ୍କ ନିକଟରେ ପ୍ରାର୍ଥନା କରିଛି ବୋଲି କହିଛନ୍ତି କୃଷି ମନ୍ତ୍ରୀ ।

• ଆଜି ୫ ରାଜ୍ୟର ଆଞ୍ଚଳିକ କୃଷି ସମ୍ମିଳନୀ

ଆଜି ବିହାର, ଝାଡ଼ଖଣ୍ଡ, ଛତିଶଗଡ଼, ପଶ୍ଚିମବଙ୍ଗ ଓ ଓଡ଼ିଶାକୁ ନେଇ ଆଞ୍ଚଳିକ କୃଷି ସମ୍ମିଳନୀ ଅନୁଷ୍ଠିତ ହେବ । ସାରା ଦେଶରେ ଆହାର ଯେପରି ଅଭାବ ରହିବନି ସେ ନେଇ ଆଲୋଚନା ହେବ । କୃଷକ ହେଉଛନ୍ତି ଜୀବନ ଦାତା । ଖାଦ୍ୟ ସୁରକ୍ଷା ସହ ପୋଷଣ ଯୁକ୍ତ ଖାଦ୍ୟ ସମସ୍ତଙ୍କ ପାଖରେ ପହଞ୍ଚିବା ପ୍ରଥମ ଲକ୍ଷ ରହିବ । ଯେଉଁ କୃଷକମାନଙ୍କ ପାଖରେ କମ ଜମି ଅଛି, ସମନ୍ୱିତ କୃଷି ମାଧ୍ୟମରେ କିପରି କୃଷିକୁ ସଶକ୍ତ କରାଯାଇ ପାରିବ ସେନେଇ ମଧ୍ୟ ଆଲୋଚନା ହେବ ବୋଲି ସେ କହିଛନ୍ତି ।

• ସୋମବାର ଆସିଥିଲେ ନୀତିନ ନବୀନ

ବିଜେପି ରାଷ୍ଟ୍ରୀୟ ସଭାପତି ନିତିନ ନବୀନ, ଦୁଇ ଦିନିଆ ଓଡ଼ିଶା ଗସ୍ତରେ ଆସି ରବିବାର ରାତିରେ ପହଞ୍ଚିଥିଲେ । ସୋମବାର ସକାଳୁ ରାଜ୍ୟ ବିଜେପି କାର୍ଯ୍ୟାଳୟରେ ପହଞ୍ଚିବା ସହ କୋର କମିଟି ବୈଠକରେ ଯୋଗ ଦେଇଥିଲେ । ତୃଣମୂଳ ସ୍ତରରେ ଦଳ କିଭଳି ମଜବୁତ ହେବ ସେନେଇ ଫିଡବ୍ୟାକ ନେଲେ । ସରକାର ଓ ସଙ୍ଗଠନ କିଭଳି ସାମନ୍ତରଲ ଭାବେ ଆଗକୁ ବଢ଼ିବା ତା ପରେ ଗୁରୁତ୍ଵ ଦେଲେ । ସଂଗଠନ ଠାରୁ ଆରମ୍ଭ କରି ଆଗାମୀ ନିର୍ବାଚନ ରଣନୀତି ଏ ସମସ୍ତ ପ୍ରସଙ୍ଗରେ ତନ ତନ କରି ଆଲୋଚନା କରିଥିଲେ, ଯାହାକୁ ନେଇ ରାଜ୍ୟ ବିଜେପିର ନେତା ଓ ନେତୃତ୍ୱ ଆଗାମୀ ଦିନରେ ଆହୁରି କାର୍ଯ୍ୟ କରିବେ ।

ପଢନ୍ତୁ ଏହି ଖବର: ୨୦୩୬ ବିକଶିତ ଓଡ଼ିଶା ଗଠନରେ ରୋଡ୍‌ ମ୍ୟାପ୍‌ ନେଇ ୫ ପରାମର୍ଶ ଦେଲେ ନିତିନ ନବୀନ

ଅନ୍ୟପଟେ ଆଜି ପୁରୀରେ ରତ୍ନଭଣ୍ଡାର ଗଣତି ମଣତି ପାଇଁ ଦିନ ତମାମ ବାହାର କାଠରୁ ଦର୍ଶନ କରିବେ ଶ୍ରଦ୍ଧାଳୁ । ମହାସ୍ନାନ ଭଳି ଅନାବଶ୍ୟକ ପ୍ରତିକୂଳ ପରିସ୍ଥିତି ଏଡ଼ାଇବା ପାଇଁ ଦିନ ତମାମ ଭିତର କାଠ ଦର୍ଶନ ବନ୍ଦ ପାଇଁ ଶ୍ରୀମନ୍ଦିର ପ୍ରଶାସନ ନେଇଛି ନିଷ୍ପତ୍ତି । କେବଳ ରତ୍ନ ଗଣତି ହେଉଥିବା ଦିନ ମାନଙ୍କରେ ବନ୍ଦ ରହିବ ଭିତର କାଠ ଦର୍ଶନ ।