ନୂଆଦିଲ୍ଲୀ: ଓଡ଼ିଶା ପର୍ବର ଦ୍ଵିତୀୟ ଦିନରେ ଜ୍ଞାନ ମଣ୍ଡପମରେ 'ନବଚେତନା ଓଡ଼ିଶା' ଶୀର୍ଷକ ଆଲୋଚନା ଚକ୍ର ଅନୁଷ୍ଠିତ ହୋଇଛି । ଓଡ଼ିଶା ପାଖରେ ଥିବା ସମ୍ଭାବନା, ସମ୍ବଳ ଓ ଉତ୍କର୍ଷକୁ ନେଇ ବିସ୍ତୃତ ଆଲୋଚନା ହୋଇଛି । 'ନବଚେତନା ଓଡ଼ିଶା' ଶୀର୍ଷକ ଆଲୋଚନା ଚକ୍ରର ପରିଚାଳନା କରିଥିଲେ CSIR ଲକ୍ଷ୍ନୌର ନିର୍ଦ୍ଦେଶକ ଡ. ଅଜିତ୍ କୁମାର ଶସାନି ।

ସେ କହିଛନ୍ତି, "ଆମ ପାଖେ କୋଣାର୍କ ଅଛି, ପୁରୀ ମନ୍ଦିର ଅଛି, ବାସ୍ତୁ ଶିଳ୍ପ, ହସ୍ତ ଶିଳ୍ପ, ଚିତ୍ରକଳା, ସମ୍ବଲପୁରୀ ଶାଢ଼ୀ ଅଛି । ସମୟ ଥିଲା ଦିନେ ଓଡ଼ିଶା ଦେଶର ସର୍ବାଧିକ ଖାଦ୍ୟ ଶସ୍ୟ ଅମଳକାରୀ ରାଜ୍ୟ ଥିଲା । ଓଡ଼ିଆ ଯେଉଁଠିକୁ ଯାଆନ୍ତି ସେଠି ପରିସ୍ଫୁଟିତ ହୁଅନ୍ତି, ଭାରତ କ୍ଷେତ୍ରରେ ମଧ୍ୟ ସମାନ ଘଟେ । ଓଡ଼ିଶାରେ ଆପଣ ସମସ୍ତ ପ୍ରକାର ପାଣିପାଗ ପାଇବେ । ଓଡ଼ିଶାରେ ୪୦ ପ୍ରତିଶତ ଜମି ହେଉଛି ଚାଷ ଜମି । ଲୋକେ ଚାଷ ଛାଡ଼ି, ଚାକିରି କ୍ଷେତ୍ରକୁ ଆସୁଛନ୍ତି ।"

ଅଭିବୃଦ୍ଧି ପାଇଁ ଚାଷର ଆବଶ୍ୟକତା ରହିଛି । କାରଣ ସବୁ ଶିଳ୍ପ କୃଷି ଉପରେ ନିର୍ଭରଶୀଳ । ଓଡ଼ିଶା କୃଷି ସହ ଖଣିଜଭରା । ଯେତେବେଳେ ଆମେ ସୁଯୋଗ କଥା ଜାଣିବା, ସେତେବେଳେ ଉତ୍କୃଷ୍ଟ କାର୍ଯ୍ୟ ହେବ । ଓଡ଼ିଆ ମାଇଣ୍ଡ ସେଟ୍ ବିଶ୍ଵର ସବୁଠୁ ଶ୍ରେଷ୍ଠ ବୋଲି କହିଛନ୍ତି ଡ. ଅଜିତ୍ କୁମାର ଶସାନି ।

ଏଥିସହ ପଢ଼ନ୍ତୁ: ଓଡ଼ିଶା ପରମ୍ପରାକୁ ଦିଲ୍ଲୀ ଦରବାରରେ ପହଞ୍ଚାଇବାକୁ ପ୍ରୟାସ 

'ନବଚେତନା ଓଡ଼ିଶା' ଆଲୋଚନାଚକ୍ରରେ କ୍ରିଏଟିଭ୍ ଟେକ୍ନୋଲୋଜିଷ୍ଟ ସନ୍ଦୀପ ତ୍ରିପାଠୀ ନିଜ ମତ ରଖିଛନ୍ତି । ସେ କହିଛନ୍ତି, "ଆମେ ହେଉଛେ ଏକ ବଡ଼ ଗୋଷ୍ଠୀ, ଯେଉଁମାନେ ଟେକ୍ନୋଲୋଜିର ବ୍ୟବହାର କରୁଛେ । ଆମ ପାଖେ ନୂଆ ଭାବନା ଥାଇ ଟେକ୍ନୋଲୋଜିର ନିର୍ମାତା ହାଇପାରୁନେ । ଆମ ପାଖେ ଦକ୍ଷତା ଅଛି, ନୂଆ କିଛି କରିପାରିବା । ସୋସିଆଲ୍ ମିଡିଆରେ ଆମେ ସ୍କ୍ରଲିଂ ଟାଇମ୍ କମାଇ ନୂଆ କିଛି କଣ୍ଟେଣ୍ଟ ତିଆରି କରିବା ଦରକାର । ଯେଭଳି ଲୋକେ ଆମ କଣ୍ଟେଣ୍ଟକୁ ସେହି ସୋସିଆଲ୍ ମିଡିଆରେ ଦେଖିବେ । "

ଅର୍ଥନୀତିଜ୍ଞ ତଥା ପ୍ରତିରକ୍ଷା ମନ୍ତ୍ରଣାଳୟର ଯୁଗ୍ମ ସଚିବ ଡ. ଇସିତା ଗାଙ୍ଗୁଲି ତ୍ରିପାଠୀ କହିଛନ୍ତି, "ଓଡ଼ିଶାରେ ୨୪ ଲକ୍ଷ ଏଣ୍ଟରପ୍ରାଇଜର୍ସ MSMEରେ ପଞ୍ଜୀକୃତ । ସେଥିରୁ ୨୧ ପ୍ରତିଶତ MSME ଉତ୍ପାଦନ କ୍ଷେତ୍ରରେ ଥିବାବେଳେ ୩୨ ପ୍ରତିଶତ ସେବା କ୍ଷେତ୍ରରେ କାର୍ଯ୍ୟ କରୁଛନ୍ତି । ଓଡ଼ିଶାର MSME ଗୁଡ଼ିକ ଟେକ୍ନୋଲୋଜି, ଅର୍ଥ, ମାର୍କେଟିଂ, କୌଶଳ ଭଳି ସମସ୍ୟାର ସାମ୍ନା କରୁଛନ୍ତି । ଓଡ଼ିଶାରେ MSMEକୁ ନେଇ ସଚେତନତା ଆବଶ୍ୟକ ରହିଛି । ଓଡ଼ିଶାରେ ଛେନାପୋଡ଼ କ୍ଲଷ୍ଟର କରାଯାଇ ପାରିବ । ପର୍ଯ୍ୟଟନ କ୍ଷେତ୍ରରେ ଅପାର ସମ୍ଭାବନା ରହିଛି ।"

ସେହିଭଳି ପ୍ରତିରକ୍ଷା ମନ୍ତ୍ରଣାଳୟର ଯୁଗ୍ମ ସଚିବ ମୀରା ମହାନ୍ତି କହିଛନ୍ତି, "ସ୍ଵଦେଶୀକୁ ଆମେ ସବୁବେଳେ ଗୁରୁତ୍ଵ ଦେଉଛେ । ଓଡ଼ିଶା ଖଣିଜ ସମ୍ପଦରେ ଭରା । ଏବେ ଓଡ଼ିଶା ଇଞ୍ଜିନିୟରିଂ ଉପରେ ଫୋକସ୍ କରୁଛି । ଆମେ ପାଖେ ପ୍ରଚୁର ଖଣିଜ ସମ୍ପଦ ଥିବାରୁ ଆଗକୁ ଆମେ ଏୟାରକ୍ରାଫ୍ଟର ଫ୍ରେମ, ଏୟାରକ୍ରାଫ୍ଟ ଇଞ୍ଜିନ ନିର୍ମାଣ କଥା ଭାବି ପାରିବା । ଆମ ପାଖେ ଖଣି, ରିଫାଇନାରୀ, ମ୍ୟାନୁଫ୍ୟାକଚରିଂ, ଦକ୍ଷ ସମ୍ବଳ ସହ ଲଜିଷ୍ଟିକ୍ ନେଟୱର୍କ ରହିଛି । ଓଡ଼ିଶା ନିଜକୁ ଜାତୀୟ ସ୍ତରରେ ଏରୋ ସ୍ପେସ୍ ଓ ପ୍ରତିରକ୍ଷା କ୍ଷେତ୍ରରେ ପ୍ରତିପାଦିତ କରିପାରିବ ।"

ଏଥିସହ ପଢ଼ନ୍ତୁ: ଦିଲ୍ଲୀରେ ଆରମ୍ଭ ହେଲା 'ଓଡ଼ିଶା ପର୍ବ ୨୦୨୬', ଦୁଇଟି ଥିମରେ ଆଲୋଚନା ଚକ୍ର ଅନୁଷ୍ଠିତ

ବୈଜ୍ଞାନିକ ପ୍ରବୀର ଦାଶ କହିଛନ୍ତି, "ଅକ୍ଷୟ ଶକ୍ତି କ୍ଷେତ୍ରରେ ଭାରତ ଏବେ ଆଗକୁ ବଢ଼ୁଛି । ବିଶ୍ଵରେ ସୋଲାର କ୍ଷେତ୍ରରେ ଭାରତ ତୃତୀୟ ଓ ପବନ ଶକ୍ତି କ୍ଷେତ୍ରରେ ଚତୁର୍ଥ ସ୍ଥାନରେ ଅଛି । ଭାରତ ଆବଶ୍ୟକ କରୁଥିବା ବିଦ୍ୟୁତ୍‌ର ୨୨ ପ୍ରତିଶତ ଏହି ଅକ୍ଷୟ ଶକ୍ତିରୁ ଆସୁଛି । କୋଇଲା ତୁଳନାରେ ଅକ୍ଷୟ ଶକ୍ତି ବହୁତ ଶସ୍ତା । ଓଡ଼ିଶାରେ ଏହାର ଉପଯୋଗ ପାଇଁ ସୁଯୋଗ ରହିଛି । ଚାଷୀ ଡିଜେଲ୍ ପମ୍ପ ପରିବର୍ତ୍ତେ ସୋଲାର୍ ପମ୍ପର ଉପଯୋଗ କଲେ କମ୍ ଖର୍ଚ୍ଚାନ୍ତ ହେବେ ।"

ଅର୍ଥନୀତିଜ୍ଞ ତଥା ଜେଏନୟୁର ଆସୋସିଏଟ୍ ପ୍ରଫେସର ଡ. ରମ୍ୟ ରଞ୍ଜନ ପଟେଲ କହିଛନ୍ତି, "ଦଶନ୍ଧି ଭିତରେ ଓଡ଼ିଶାର ଅର୍ଥନୀତି, ସଂସ୍କୃତି, ପ୍ରଶାସନ, ଭିତ୍ତିଭୂମି ବଦଳିଛି । ଯାହାକି ଓଡ଼ିଶା ଓ ଓଡ଼ିଆଙ୍କ ବିଶ୍ଵାସ ସହ ସମ୍ମାନକୁ ବଢ଼ାଇଛି । ଓଡ଼ିଆ ମାନେ କଠିନ ପରିଶ୍ରମ କରନ୍ତି, ସରଳ, ନିରୀହ, ସତ୍ୟ, ଧାର୍ମିକ ଅଟନ୍ତି । ପୂର୍ବରୁ ଓଡ଼଼ିଶା କଳାହାଣ୍ଡି ଛୁଆ ବିକ୍ରି, ଗରିବୀକୁ ନେଇ ପରିଚିତ ହେଉଥିଲା । ଆଜି ଓଡ଼ିଶା ଅନେକ କ୍ଷେତ୍ରରେ ନିଜର ଉତ୍କୃଷ୍ଟତା ପ୍ରତିପାଦନ କରି ଗୌରବ ଆଣିଛି ।"