ଜାତୀୟ ରାଜଧାନୀ ନୂଆଦିଲ୍ଲୀର ଜବାହରଲାଲ ନେହେରୁ ଷ୍ଟାଡିୟମରେ ଆୟୋଜିତ 'ଓଡ଼ିଶା ପର୍ବ୨୦୨୬'ର ଆଜି ତୃତୀୟ ତଥା ଶେଷ ଦିନ । ମୁଖ୍ୟ ଅତିଥି ଭାବେ ଯୋଗଦେଲେ ଓଡ଼ିଶାର ରାଜ୍ୟପାଳ ହରିବାବୁ କମ୍ଭମପାଟି, ସମ୍ମାନିତ ଅତିଥି ଭାବେ ଯୋଗ ଦେଲେ ଦିଲ୍ଲୀ ସରକାରଙ୍କ ଆଇନ, କଳା ଓ ସଂସ୍କୃତି ମନ୍ତ୍ରୀ କପିଲ ମିଶ୍ରା । ଶେଷ ଦିନର ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମରେ ଦେଖିବାକୁ ମିଳିଲା ଓଡ଼ିଶାର କଳା, ସଂସ୍କୃତିର ଝଲକ ।

ଏହି ଅବସରରେ ରାଜ୍ୟପାଳ କହିଥିଲେ ଯେ ୨୦୩୬ ବର୍ଷ କେବଳ ଓଡ଼ିଶାର ଐତିହାସିକ ଯାତ୍ରାର ଏକ ମହତ୍ୱପୂର୍ଣ୍ଣ ଅଧ୍ୟାୟ‌ ନୁହେଁ ବରଂ ରାଜ୍ୟର ଉପଲବ୍ଧିଗୁଡ଼ିକୁ ସ୍ମରଣ କରି ଏହାର ସମୃଦ୍ଧ ସାଂସ୍କୃତିକ ଐତିହ୍ୟକୁ ସୁରକ୍ଷିତ ରଖି ଆହୁରି ଶକ୍ତିଶାଳୀ ଓ ବିକଶିତ ଓଡ଼ିଶା ଗଢ଼ିବା ପାଇଁ ସମସ୍ତଙ୍କୁ ଏକତ୍ରିତ ହୋଇ କାମ କରିବାର ସୁଯୋଗ ମଧ୍ୟ ହେବ ।

ଚଳିତ ବର୍ଷର ବିଷୟବସ୍ତୁ “ସଂସ୍କୃତି ଓ ପ୍ରକୃତି” ବିଷୟରେ ଉଲ୍ଲେଖ କରି ରାଜ୍ୟପାଳ କହିଥିଲେ ଯେ, ଏହା ଓଡ଼ିଶାର ଅନନ୍ୟ ଚରିତ୍ରକୁ ସୁନ୍ଦର ଭାବେ ପ୍ରତିଫଳିତ କରିପାରିଛି ଯେଉଁଠାରେ ସଂସ୍କୃତି ଓ ପ୍ରକୃତିର ସମନ୍ୱୟ ଘଟିଛି । ହସ୍ତଶିଳ୍ପ ଓ ହସ୍ତତନ୍ତ୍ର ପ୍ରଦର୍ଶନୀ, ଶାସ୍ତ୍ରୀୟ ଓ ଲୋକନୃତ୍ୟ ପ୍ରଦର୍ଶନ, ପାରମ୍ପରିକ ସଙ୍ଗୀତ, ଖାଦ୍ୟ ପରମ୍ପରା ଏବଂ ବୁଦ୍ଧିଜୀବୀ ଆଲୋଚନା ମାଧ୍ୟମରେ ଏହି ପର୍ବ ଦର୍ଶକମାନଙ୍କୁ ଓଡ଼ିଶାର ଜୀବନ୍ତ ଜୀବନଧାରା ଓ ସମୃଦ୍ଧ ଐତିହ୍ୟର ଏକ ଦୃଶ୍ୟ ପ୍ରଦାନ କରିପାରିଛି ।

ଓଡ଼ିଶାର ସମୃଦ୍ଧ ସଭ୍ୟତାଗତ ଐତିହ୍ୟକୁ ଉଲ୍ଲେଖ କରି ରାଜ୍ୟପାଳ କହିଥିଲେ ଯେ ରାଜ୍ୟର ପରିଚୟ ମହାପ୍ରଭୁ ଜଗନ୍ନାଥଙ୍କଠାରେ ଗଭୀର ଭାବେ ନିହିତ ଯାହା ସମାନତା, ସମାଵେଶୀ ଓ ବିଶ୍ୱ ଭ୍ରାତୃତ୍ୱର ସନ୍ଦେଶ ଦେଇ ପିଢ଼ି ପରେ ପିଢ଼ିକୁ ପ୍ରେରିତ କରିଆସିଛି । ରାଜ୍ୟର ବୌଦ୍ଧିକ ଓ ସାଂସ୍କୃତିକ ପରିସରକୁ ଗଢ଼ି ତୋଳିବାରେ ଉତ୍କଳ ଗୌରବ ମଧୁସୂଦନ ଦାସ, ଉତ୍କଳମଣି ଗୋପବନ୍ଧୁ ଦାସ, ଫକୀର ମୋହନ ସେନାପତି ଓ ଗଙ୍ଗାଧର ମେହେରଙ୍କ ପରି ପ୍ରସିଦ୍ଧ ବ୍ୟକ୍ତିତ୍ୱମାନଙ୍କର ଅମୂଲ୍ୟ ଅବଦାନକୁ ରାଜ୍ୟପାଳ ନିଜ ଉଦବୋଧନରେ ଅବତାରଣା କରିଥିଲେ ।

ଦିନବେଳା ଶେଷ ଦିନରେ ଦୁଇଟି ଶୀର୍ଷକରେ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ପ୍ରଥମେ ଚାରୁଦତ୍ତ ପାଣିଗ୍ରାହୀଙ୍କ ନେତୃତ୍ୱରେ 'ହସ୍ତଶିଳ୍ପ ଓଡ଼ିଶା' ଶୀର୍ଷକରେ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ଏହି ଅବସରରେ ଚାରୁଦତ୍ତ ପାଣିଗ୍ରାହୀ କହିଥିଲେ, "ଆମେ ଯେପରି ଖଣି ସମ୍ପଦ କଥା ହେଉଛୁ ସେହିପରି କଳା ସମ୍ପଦ କରିବା ଦରକାର । ଆମର ଅତି ଉଚ୍ଚକୋଟୀର ହସ୍ତଶିଳ୍ପ ରହିଛି । ଏହାର ଆହୁରି ପ୍ରଚାର ପ୍ରସାର ହେଉ ।"

ପଢନ୍ତୁ ଏହି ଖବର: 'ଦିଲ୍ଲୀବାସୀଙ୍କ ପାଇଁ ବଡ଼ ସୁଯୋଗ; ଦେଖନ୍ତୁ ଓଡ଼ିଶାର ସମୃଦ୍ଧ କଳା, ସଂସ୍କୃତି, ଐତିହ୍ୟ'

ସେହିପରି ବରଗଡ଼ର ପୂର୍ବତନ ସାଂସଦ ପ୍ରଭାସ ସିଂ କହିଥିଲେ, "ବରଗଡ଼ରେ ସୂତା ମିଲ ଥିଲେ ଆମର ବୁଣାକାର ବାହାରୁ କିଣିବାକୁ ଯାଇ ନଥାନ୍ତେ । ଏଥିପାଇଁ ଆମକୁ ଚିନ୍ତା କରିବାକୁ ପଡ଼ିବ । ଗ୍ଲୋବାଲ ମାର୍କେଟ ସହିତ ଆମର କାରିଗରୀକୁ ପହଞ୍ଚାଇବାକୁ ପଡ଼ିବ । ସେଥିପାଇଁ ଆମକୁ ନୂତନ ପ୍ରଯୁକ୍ତିବିଦ୍ୟାର ସାହାଯ୍ୟ ନେବାକୁ ପଡ଼ିବ ।"

ପଢନ୍ତୁ ଏହି ଖବର: ଓଡ଼ିଶା ପର୍ବରେ 'ବହିଟିଏ ସାଥିଟିଏ'ର ଶୁଭାରମ୍ଭ; ପୁସ୍ତକ ପ୍ରତି ରୁଚି ଫେରାଇ ଆଣିବା ଲକ୍ଷ୍ୟ

ଓଡ଼ିଶା ପର୍ବର ଶେଷ ଅଧିବେଶନ 'ଐତିହ୍ୟ ଓଡ଼ିଶା' ଉପରେ ଆଲୋଚନା ହୋଇଥିଲା । ଏହି ଅଧିବେଶନରେ ଓଡ଼ିଶାର ଅମୂଲ୍ୟ ଐତିହ୍ୟ, ବିବିଧ ନୃତ୍ୟ ସଙ୍ଗୀତ, ପର୍ବପର୍ବାଣି ଏବଂ ସମୃଦ୍ଧ ଆଦିବାସୀ ସଂସ୍କୃତି ନେଇ ଆଲୋଚନା ହୋଇଥିଲା । ଏହାପରେ NBT ପକ୍ଷରୁ ଓଡ଼ିଆ ପୁସ୍ତକ ଗୁଡିକ ନେଇ ଡିଜିଟାଲ କାର୍ଯ୍ୟକ୍ରମ 'ବହିଟିଏ ସାଥିଟିଏ 'ର ଶୁଭାରମ୍ଭ ହୋଇଥିଲା ।

ଓଡ଼ିଶା ପର୍ବର ଅନ୍ତିମ ଦିନରେ 'ପ୍ରତିଭା ଉତ୍ସବ'ରେ ନିଜର ଲୁକାୟିତ କଳା ପ୍ରଦର୍ଶନ କରିଥିବା କଳକାର । ସେମାନଙ୍କୁ ମାନପତ୍ର ଦେଇ ସମ୍ମାନିତ କରାଯାଇଥିଲା । ଆଜି ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମରେ ଅନେକ କଳାକାର ଯୋଗ ଦେଇଛନ୍ତି । ବନ୍ଦେ ମା'ତରମ ୧୫୦ ବର୍ଷ ପୂର୍ତ୍ତିକୁ ନେଇ ଅନନ୍ତ ନାଦର ଅମର ପ୍ରତିଧ୍ୱନି ସାଂସ୍କୃତିକ ନୃତ୍ୟ ପରିବେଷଣ ହୋଇଛି । ଶେଷ ଦିନ ସହିତ ରବିବାର ଛୁଟି ଦିନ ପଡୁଥିବାରୁ ଓଡିଶା ପର୍ବରେ ଆଜି ପ୍ରବଳ ଭିଡ଼ ପରିଲକ୍ଷିତ ହୋଇଛି ।

ଅଧିକ ଖବର ପଢନ୍ତୁ...