ଜାତୀୟ ରାଜଧାନୀ ନୂଆଦିଲ୍ଲୀରେ ଅଗ୍ରଣୀ ସାମାଜିକ ଓ ସାଂସ୍କୃତିକ ସଂଗଠନ 'ଓଡ଼ିଆ ସମାଜ' ପକ୍ଷରୁ ଓଡ଼ିଶା ପର୍ବ ୨୦୨୬ର ଆୟୋଜିତ କରାଯାଉଛି । ଆଜି ପର୍ବର ତୃତୀୟ ତଥା ଅନ୍ତିମ ଦିବସରେ 'ଜ୍ଞାନ ମଣ୍ଡପ' ନାଁରେ ଏକ ସ୍ଵତନ୍ତ୍ର ଅଧିବେଶନ ଆୟୋଜିତ ହୋଇଥିଲା । ଏହି କାର୍ଯ୍ୟକ୍ରମରେ ନ୍ୟାସନାଲ ବୁକ୍ ଟ୍ରଷ୍ଟ (NBT) ପକ୍ଷରୁ ଓଡ଼ିଆ ପୁସ୍ତକକୁ ନେଇ ଡିଜିଟାଲ କାର୍ଯ୍ୟକ୍ରମ 'ବହିଟିଏ ସାଥିଟିଏ'ର ଶୁଭାରମ୍ଭ ହୋଇଛି । ଏନବିଟି ପକ୍ଷରୁ ଅନେକ ଓଡ଼ିଆ ପୁସ୍ତକ ପ୍ରକାଶିତ ହୋଇଛି । ଏବେ ସେଗୁଡ଼ିକର ଡିଜିଟାଲକରଣ କରାଯାଉଛି ।

ଏହି କାର୍ଯ୍ୟକ୍ରମରେ ଓଡ଼ିଶାର ଅଗ୍ରଣୀ ଗଣମାଧ୍ୟମ ସଂସ୍ଥା ଅର୍ଗସର ସିଇଓ ପ୍ରକାଶ ସାହୁଙ୍କ ସହିତ NBT ଡିରେକ୍ଟର ଲେଫଟନାଣ୍ଟ କର୍ଣ୍ଣେଲ ଯୁବରାଜ ମଲ୍ଲିକ, ପଲ୍ଲୀବାଣୀର ସମ୍ପାଦକ ରାମ ଚନ୍ଦ୍ର ନାଥ ଏବଂ ଓଡ଼ିଆ ଅଭିନେତା ଅଭିଷେକ ରଥ ଉପସ୍ଥିତ ଥିଲେ । ଆଜିର ଦିନରେ ଲୋକଙ୍କ ପାଖରେ ସମୟ କମ ରହିଛି ତେଣୁ ଡିଜିଟାଲ ମାଧ୍ୟମରେ ପୁସ୍ତକଗୁଡ଼ିକ ରଖିଲେ ଆମର ପୁସ୍ତକ ପ୍ରତି ଯୁବବର୍ଗଙ୍କ ମଧ୍ୟରେ ରୁଚି ଅଧିକ ବୁଦ୍ଧି ହେବ ବୋଲି ଅର୍ଗସ ସିଇଓ ପ୍ରକାଶ ସାହୁ କହିଛନ୍ତି । 'ବହିଟିଏ ସାଥିଟିଏ' କାର୍ଯ୍ୟକ୍ରମରେ ପୁସ୍ତକ ଗୁଡିକ କେଉଁ ବିଷୟରେ ରହିଛି ପୁସ୍ତକ ସମ୍ପୂର୍ଣ୍ଣ ତଥ୍ୟ ଏଥିରେ ସିରିଜ ଆକାରରେ ରହିବ ।

'ବହିଟିଏ ସାଥିଟିଏ'ର ଉଦ୍ଦେଶ୍ୟ କଣ ?
ଆଜିର ଏହି ଡିଜିଟାଲ ଯୁଗରେ ଯୁବପିଢିଙ୍କଠାରୁ ବୟସ୍କ ସମସ୍ତେ ମୋବାଇଲରେ ବ୍ୟସ୍ତ ରହି ଜ୍ଞାନର ଭଣ୍ଡାର ବହିଠାରୁ ଦୂରେଇ ଯାଉଛନ୍ତି । ଲୋକମାନେ କିପରି ବହି ଆଡକୁ ପୁଣି ଫେରିଆସିବେ ଏବଂ ଅଧ୍ୟୟନ ପ୍ରତି ମନ ବଳାଇବେ ସେଥିଲାଗି ଓଡ଼ିଆ ପୁସ୍ତକଗୁଡ଼ିକୁ ସଂଗ୍ରହ କରି ଏହାର ପଡକାଷ୍ଟ କରାଯାଉଛି । ଏ ନେଇ ପଲ୍ଲୀବାଣୀର ସମ୍ପାଦକ ରାମ ଚନ୍ଦ୍ର ନାଥ କହିଛନ୍ତି, "ବିନା ଜ୍ଞାନରେ କେହି କେଉଁଠି କିଛି କରିପାରିବେ ନାହିଁ । ଜ୍ଞାନ ଆମକୁ ପୁସ୍ତକରୁ ମିଳିଥାଏ । ଜ୍ଞାନ ବିନା ଆମର ଗତି ନାହିଁ । ଜ୍ଞାନହୀନ ସମାଜ କେବେ ଅଗ୍ରଗତି କରିପାରିବ ନାହିଁ । ପୁସ୍ତକ ଆମର ପ୍ରକୃତ ବନ୍ଧୁ । ଏହି ଡିଜିଟାଲ କାର୍ଯ୍ୟକ୍ରମ ଦ୍ଵାରା ପୁସ୍ତକ ପ୍ରତି ପୂର୍ବରୁ ଯେପରି ରୁଚି ଥିଲା, ତାହା ଫେରିଆସିବ ବୋଲି ଆମେ କାମନା କରୁଛୁ ।"

ପଢନ୍ତୁ ଏହି ଖବର: ଓଡ଼ିଶା ପର୍ବର ଦ୍ଵିତୀୟ ସନ୍ଧ୍ୟାରେ ଭବ୍ୟ ସାଂସ୍କୃତିକ କାର୍ଯ୍ୟକ୍ରମ; ଯୋଗଦେଲେ ଦିଲ୍ଲୀ ମୁଖ୍ୟମନ୍ତ୍ରୀ

'ବହିଟିଏ ସାଥିଟିଏ'ରେ କେଉଁ ପ୍ରକାରର ପୁସ୍ତକ ରହିବ ?
ଏହି ଡିଜିଟାଲ କାର୍ଯ୍ୟକ୍ରମରେ ସମସ୍ତ ପୁରୁଣା ଏବଂ ନୂଆ ପୁସ୍ତକ ରହିବ । ଏହି କାର୍ଯ୍ୟକ୍ରମରେ ଫକୀର ମୋହନ ସେନାପତିଙ୍କ ପୁସ୍ତକଠାରୁ ଆରମ୍ଭ କରି ବର୍ତ୍ତମାନ ପିଢିର ଲେଖକଙ୍କ ପୁସ୍ତକଗୁଡ଼ିକୁ ମଧ୍ୟ ସ୍ଥାନିତ କରାଯିବ । ଇତିହାସର ପୃଷ୍ଠାରୁ ସଂଗୃହୀତ ଅନେକ ଉପାଦେୟ କଥାବସ୍ତୁକୁ ଏହି ପୁସ୍ତକରେ ସାମିଲ କରାଯିବ । ଡିଜିଟାଲ ମାଧ୍ୟମରେ ଯୁବପିଢିମାନେ ଇତିହାସର ଅନେକ ଗୁରୁତ୍ଵପୂର୍ଣ୍ଣ ପ୍ରସଙ୍ଗକୁ ଜାଣିପାରିବେ ।

ଅଧିକ ଖବର ପଢନ୍ତୁ...