ଆଜି ରାଜଧାନୀ ଭୁବନେଶ୍ଵର ସ୍ଥିତ ନୟାପଲ୍ଲୀ ଥାନା ପରିସରରେ ଦେଖିବାକୁ ମିଳିଥିଲା ଭାବବିହ୍ଵଳ ପରିସ୍ଥିତି । କାରଣ ଦୀର୍ଘ ୩ ମାସ ପରେ ଭିନ୍ନକ୍ଷମ ନିଖୋଜ ପୁଅକୁ ଖୋଜି ପାଇଥିଲା ମାଆ । ଅର୍ଗସ ଟିଭିରେ ଖବର ବାଜିବା ପରେ ଆକ୍ଟିଭ ମୋଡରେ ପୋଲିସ ମାଆପୁଅଙ୍କୁ ଭେଟ କରିବାରେ ଲାଗିଥିଲା । କିଛି ଦିନ ହେବ ପୁଅକୁ ନ ପାଇ ବୟସ୍କ ମହିଳା ଜଣକ ପାଗେଳି ପରି ରାଜଧାନୀର ଗଳିକନ୍ଦିରେ ବୁଲୁଥିଲେ । ଫଟୋ ଧରି ସମସ୍ତଙ୍କୁ ପୁଅକୁ ଦେଖିଛ ବୋଲି ପଚାରୁଥିଲେ । ଏମିତିକି ପୋଲିସ ଓ ମହିଳା ଜଣକ ମିଶି ରାଜଧାନୀରେ ନିଖୋଜ ଯୁବକଙ୍କୁ ଖୋଜୁଥିବା ଦେଖିବାକୁ ମିଳିଥିଲା ।

• ମାଆ କୋଳକୁ ଫେରିଲା ପୁଅ

ଯୁବକ ଯେହେତୁ ମାନସିକ ଭାବେ ରୋଗାଗ୍ରସ୍ତ ଥିଲେ ସେ ନିଜ ଠିକଣା କହିପାରୁନଥିଲେ । ୨୩ ବର୍ଷର ନିଖୋଜ ଯୁବକ ଆନନ୍ଦ ମହାକୁଡ଼ଙ୍କୁ ଏପଟେ ମହିଳା ଜଣକ ଚିନ୍ତାରେ ଦିନରାତି ଖୋଜୁଥିଲେ । ମହିଳା ଜଣକ ଏକ ଆଧାର କାର୍ଡ ଓ ପୁଅର ଫଟୋ ଧରି ସମସ୍ତ ଦୋକାନୀଙ୍କୁ ଦେଖାଉଥିଲେ । ପୁଅକୁ କେଉଁଠି ଦେଖିଲେ ଜଣାଇବାକୁ କାକୁତି ମିନତି ହୋଇ କହୁଥିଲେ । ରାସ୍ତାରେ ତାଙ୍କୁ ଯିଏ ବି ଦେଖୁଥିଲା କିଛି ସମୟ ରହି ଯାଉଥିଲା ଓ ତାଙ୍କ ପୁଅ ଶୀଘ୍ର ମିଳିଯାଉ ବୋଲି ଭଗବାନଙ୍କ ନିକଟରେ ପ୍ରାର୍ଥନା କରୁଥିଲା ।

• ବାଜିଲା ଖବର, ପଡ଼ିଲା ପ୍ରଭାବ

ମହିଳାଙ୍କ ନିଖୋଜ ପୁଅକୁ ଖୋଜି ଆଣିବା ଲାଗି ଅର୍ଗସ ଟିଭିରେ ଖବର ପ୍ରସାରଣ ହୋଇଥିଲା । ଖବର ବାଜିଲା ପରେ ପୋଲିସକୁ ମିଳିଥିଲା ସୁରାଗ । ଖବର ଆସିଥିଲା ଯେ ଟିଭିରେ ଯେଉଁ ଯୁବକଙ୍କ ଫଟୋ ଦେଖାଯାଉଛି ସେ ଗୋଟେ ହୋଟେଲରେ ଅଛନ୍ତି । ଏହି ଖବର ପାଇବା ମାତ୍ରେ ପୋଲିସ ରାତି ଅଧରେ ଉକ୍ତ ହୋଟେଲରେ ପହଞ୍ଚିଥିଲା । ତାଙ୍କୁ ଉଦ୍ଧାର କରି ନୟାପଲ୍ଲୀ ଥାନାକୁ ଆଣିଥିଲା । ପୋଲିସର କହିବା ମୁତାବକ, ସେ ନିଜ ଠିକଣା କାହାକୁ କହିପାରିନଥିଲେ । ଏଥିଲାଗି ସେଠାରେ ସେ ଥିଲେ । ଦୀର୍ଘ ୩ ମାସ ଧରି ହଜିଯାଇଥିବା ଯୁବକ ଜଣକ ଜଟଣି ଅଞ୍ଚଳର ହୋଟେଲରୁ ଖୋଜି ପାଇଥିଲା ପୋଲିସ ।

ପଢନ୍ତୁ ଏହି ଖବର: ମାସେ ହେଲା ଘରକୁ ଫେରିନି ପୁଅ; ଏ ଗଳି ସେ ଗଳି ବୁଲୁଛି ମାଆ

• ଖୁସିରେ ଆତ୍ମବିଭୋର ମାଆ

ମାଆ ନାଗି ମହାକୁଡ଼ ଏତେ ଦିନ ଖୋଜିବା ପରେ ଭାଙ୍ଗି ପଡ଼ିଥିଲେ । ପୁଅ ଆଉ ମିଳିବନି ବୋଲି ତାଙ୍କ ମନରେ ଆଶଙ୍କା ଆସିଥିଲା । ହେଲେ ରାତି ଅଧରେ ନୟାପଲ୍ଲୀ ଥାନାରୁ କଲ୍ ଯାଇଥିଲା । ହଠାତ ହଜିଲା ପୁଅକୁ ଖୋଜି ପାଇବା ପରେ ମହିଳା ଖୁସିରେ ଆତ୍ମ ବିଭୋର ହୋଇପଡ଼ିଥିଲେ । ଖୁସିରେ ସେ ଥାନା ଅଧିକାରୀଙ୍କୁ କୁଣ୍ଢାଇ ପକାଇଥିଲେ ଓ ବହୁତ ଆଶୀର୍ବାଦ କରିଥିଲେ । ମାଆର ମମତାର ଦେଖି ଥାନା କିଛି କ୍ଷଣ ପାଇଁ ଥାନାରେ ଭାବବିହ୍ଵଳ ପରିସ୍ଥିତି ସୃଷ୍ଟି ହୋଇଥିଲା । ଗୋଟିଏ ପଟେ ମାଆ ଆଖିରେ ଖୁସିର ଲୁହ ଥିଲା , ଆଉ ଗୋଟେପଟେ ଥିଲା ପୋଲିସ ପାଇଁ ବଡ଼ ସଫଳତା ।

ଅଧିକ ଖବର ପଢନ୍ତୁ...