ଭୁବନେଶ୍ଵର: ରାଜ୍ୟରେ ପୌର ନିର୍ବାଚନ ପାଇଁ ଏକପ୍ରକାର ବିଗୁଲ୍ ବାଜି ସାରିଥିବା ବେଳେ ଏହା ପୂର୍ବରୁ ବିରୋଧୀ ଶିବିରରେ ବଡ଼ ଧରଣର ଭୂକମ୍ପ ସୃଷ୍ଟି ହୋଇଛି । ପୌର ଭୋଟ୍ ଆସିବା ଆଗରୁ ଖାଲି ହେବାରେ ଲାଗିଛି ବିରୋଧୀଙ୍କ ପକେଟ୍ ।

ଖଡ଼ିଆଳ, ଗୁଣୁପୁର, କଟକ, ଚୌଦ୍ଵାର, ଯୋଡ଼ା ଏବଂ ବେଲପାହାଡ଼ରେ ଦଳ ଡିଆଁ ରାଜନୀତି ସରଗରମ ହୋଇଥିବା ବେଳେ ବିରୋଧୀ ଶିବିରରେ ତେଜିଛି ଅସନ୍ତୋଷ । ଏହି ନେତା ବଦଳ ପ୍ରକ୍ରିୟା ଦଳ ଉପରେ କୌଣସି ପ୍ରଭାବ ପକାଇବ ନାହିଁ ବୋଲି ବିଜେଡି ଓ କଂଗ୍ରେସ ଯୁକ୍ତି ବାଢୁଥିଲେ ସୁଦ୍ଧା ରାଜ୍ୟ ବିଜେପି ସଭାପତିଙ୍କ ବୟାନ ବିରୋଧୀଙ୍କ ଚିନ୍ତାକୁ ଆହୁରି ବଢ଼ାଇ ଦେଇଛି ।

ଏଥିସହ ପଢ଼ନ୍ତୁ: ଏପ୍ରିଲ କିମ୍ବା ମେ'ରେ ପଞ୍ଚାୟତ ଏବଂ ପୌର ନିର୍ବାଚନ, ମାର୍ଚ୍ଚରେ ହେବ ନୋଟିଫିକେସନ୍ 

୧୭ ଜୁଲାଇ
ହାତ ଛାଡ଼ି ପଦ୍ମ ଧରିଲେ ଖଡ଼ିଆଳ ଏନଏସି ଅଧ୍ୟକ୍ଷ ଉଜ୍ୱଳ ଗୁପ୍ତା । ସାଥିରେ ଆହୁରି ୭ କାଉନସିଲର । ସେହିଦିନ ଗୁଣୁପୁର ମ୍ୟୁନସିପାଲଟି ଅଧ୍ୟକ୍ଷ ମମତା ଗୌଡ଼, ଉପାଧ୍ୟକ୍ଷ ଶିବପ୍ରସାଦ ଗୌଡ଼ଙ୍କ ସହ ୧୦ କାଉନସିଲର ବି ବିଜେପିରେ ସାମିଲ୍ ହୋଇଛନ୍ତି ।

୧୨ ଜୁଲାଇ
ପୂର୍ବତନ ବିଧାୟକ ତଥା ଭେଟେରାନ୍ ନେତା ପ୍ରଭାତ ବିଶ୍ବାଳଙ୍କ ସହ କଟକ ମହାନଗର ଓ ଚୌଦ୍ୱାର ମ୍ୟୁନସିପାଲିଟିର କିଛି କାଉସିଲର ପଦ୍ମ ଧରିଥିଲେ । ସେହିଦିନ ଯୋଡ଼ା ମ୍ୟୁନସିପାଲଟିର ଅଧ୍ୟକ୍ଷ ଜଗଦୀଶ ସାହୁ ଓ ୬ କାଉନସିଲର ମଧ୍ୟ ବିଜେପିରେ ମିଶିଲେ । ସେତିକି ନୁହେଁ ଝାରସୁଗୁଡା ବେଲପାହାଡ଼ର ୧୦ କାଉନସିଲର ବିଜେଡିରୁ ଇସ୍ତଫା ଦେଇଛନ୍ତି । ଚର୍ଚ୍ଚା ହେଉଛି ସମସ୍ତେ ବିଜେପିରେ ମିଶିବେ ।

ପୌର ନିର୍ବାଚନ ପାଇଁ ଏକପ୍ରକାର ବିଗୁଲ୍ ବାଜିଥିବା ବେଳେ ନେତାଙ୍କ ଏଭଳି ଦଳ ଡିଆଁ ବିରୋଧୀ ଶିବିରରେ କମ୍ପନ ସୃଷ୍ଟି କରିଛି । କୌଣସି ପ୍ରଭାବ ପଡ଼ିବ ନାହିଁ ବୋଲି କଂଗ୍ରେସ ଓ ବିଜେଡି ଯୁକ୍ତି ବାଢିଛନ୍ତି । ହେଲେ ରାଜ୍ୟ ବିଜେପି ସଭାପତିଙ୍କ ବୟାନ ବଢାଇ ଦେଇଛି ବିରୋଧୀଙ୍କ ଚିନ୍ତା ।

ଏଥିସହ ପଢ଼ନ୍ତୁ: ଝାରସୁଗୁଡ଼ାରେ BJDକୁ ଝଟ୍‌କା; ନିଲମ୍ବନକୁ ବିରୋଧ କରି ଦଳ ଛାଡ଼ିଲେ ୧୦ କାଉନସିଲର୍ 

ଗତ ପୌର ନିର୍ବାଚନରେ କଟକ, ଭୁବନେଶ୍ଵର ଓ ବ୍ରହ୍ମପୁରରେ ମେୟର ଆସନ ବିଜେଡି ଖାତାକୁ ଯିବା ସହ ସର୍ବାଧିକ ୧୧୬ କର୍ପୋରେଟର ଜିତି ପ୍ରଥମ ସ୍ଥାନରେ ଥିଲା ବିଜେଡି । ଅଧିକାଂଶ ମ୍ୟୁନସିପାଲଟି ଓ ଏନଏସି ଅଧ୍ୟକ୍ଷ ଆସନ ବିଜେଡି ଅକ୍ତିଆର କରିଥିଲା ।

ଢେଙ୍କାନାଳ, ଫୁଲବାଣୀ, ଟିଟିଲାଗଡ଼ ଓ ସୋର ଭଳି ଆସନ ପଦ୍ମ ଖାତାକୁ ଯାଇଥିଲା । ତେବେ ସାଧାରଣ ନିର୍ବାଚନରେ ବିଜେପି ସରକାର ଆସିବା ପରେ ଅନେକ କର୍ପୋରେଟର ଏବେ ପଦ୍ମ କ୍ୟାମ୍ପରେ ସାମିଲ୍ ହୋଇଛନ୍ତି । ଏଭଳି ସ୍ଥିତିରେ ଏବେ ବିରୋଧୀଙ୍କ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ ନିଜ ଦଳରେ ନିଜ ନେତାଙ୍କୁ ବାନ୍ଧି ରଖିବା ।