ଭୁବନେଶ୍ଵର: ସହର ଭିତରେ 'ମୋ ବସ୍'ର ବେଗ ୪୦ ଭିତରେ ରହିବ । ସହର ବାହାର ରାଜପଥରେ 'ମୋ ବସ୍' ସ୍ପିଡ୍ ୫୦ରୁ କମ୍ ରହିବ । ଏନେଇ ନିର୍ଦ୍ଦେଶନାମା ରହିଛି । କିନ୍ତୁ କ୍ରୁଟ୍ ଦ୍ଵାରା ପରିଚାଳିତ 'ମୋ ବସ୍' କିଛି ବୋଲ ମାନୁନି । ମାସକରେ ଦୁଇ ଦୁଇଟି ଦୁର୍ଘଟଣା ଘଟାଇଲାଣି 'ମୋ ବସ୍' । ଆଜି ନନ୍ଦନକାନନ ରାସ୍ତାରେ 'ମୋ ବସ୍' ଜଣେ ନାବାଳିକାଙ୍କ ଜୀବନ ନେବା ପରେ 'ମୋ ବସ୍' ଡ୍ରାଇଭରଙ୍କ ବେପରୁଆ ଗାଡ଼ି ଚାଳନା ଉପରେ ପୁଣି ଥରେ ପ୍ରଶ୍ନ ଉଠିଛି ।

ସାଇକେଲ୍‌ରେ ଯାଉଥିବା ଜଣେ ୧୨ ବର୍ଷର ଝିଅକୁ ଚାପି ଦେଇଛି 'ମୋ ବସ୍' । ଝିଅଟି ସାଇକେଲ୍ ଯୋଗେ ନର୍ସରିକୁ ଯାଉଥିବା ବେଳେ ରଘୁନାଥପୁର ନିକଟରେ ଏହି ଦୁର୍ଘଟଣା ଘଟିଛି । ସ୍ଥାନୀୟ ଲୋକ ପଟିଆ-ନନ୍ଦନକାନନ ରାସ୍ତାକୁ ଟାୟାର୍ ଜାଳି, ବାଉଁଶ ପକାଇ ଅବରୋଧ କରିଛନ୍ତି । ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରୁଛି ।

'ମୋ ବସ୍' ଆଉ ଦୁର୍ଘଟଣା

ବାରମ୍ବାର ରାଜଧାନୀ ଭୁବନେଶ୍ଵରରେ 'ମୋ ବସ୍' ଏଭଳି ଦୁର୍ଘଟଣା ଘଟାଉଛି । ଗତ ଜାନୁଆରୀ ୨୩ ତାରିଖରେ ରାଜମହଲରୁ ମାଷ୍ଟରକ୍ୟାଣ୍ଟିନ୍ ଯାଉଥିବା ବେଳେ 'ମୋ ବସ୍' ସିରିଜ୍ ଦୁର୍ଘଟଣା ଘଟାଇଥିଲା । ଯେଉଁଥିରେ ୨ଟି 'ମୋ ବସ୍' ସହ ୨ଟି କାର୍ କ୍ଷତିଗ୍ରସ୍ତ ହୋଇଥିବା ବେଳେ ୪ରୁ ଅଧିକ ଆହତ ହୋଇଥିଲେ ।

୨୦୨୪ ନଭେମ୍ବର ୨ ତାରିଖରେ ଚନ୍ଦ୍ରଶେଖରପୁର ପେଟ୍ରୋଲ୍ ପମ୍ପ ସମ୍ମୁଖରେ ମୋ ବସ୍ ଧକ୍କାରେ ୨ ଜଣ ଗୁରୁତର ଆହତ ହୋଇଥିଲେ । ଜଣେ ଯୁବତୀଙ୍କ ହାତ ଉପରେ 'ମୋ ବସ୍' ଚଢ଼ି ଯାଇଥିବା ବେଳେ ସେ ଏବେ ବି ଅକର୍ମଣ୍ୟ ଅଛନ୍ତି ।

୨୦୨୪ ସେପ୍ଟେମ୍ବର ୨୫ରେ 'ମୋ ବସ୍' ଧକ୍କାରେ ଯାଇଥିଲା ସ୍କୁଟି ଚାଳକଙ୍କ ଜୀବନ । ରଘୁନାଥପୁର ଛକରେ ଜଣେ ସ୍କୁଟି ଆରୋହୀଙ୍କ ଉପରେ 'ମୋ ବସ୍' ଚଢ଼ି ଯାଇଥିଲା ।

ତେବେ ରଘୁନାଥପୁରରେ 'ମୋ ବସ୍' ଏହି ଗୋଟିଏ ଦୁର୍ଘଟଣା ଘଟାଇ ନାହିଁ । ରାଜଧାନୀର ବିଭିନ୍ନ ସ୍ଥାନରେ 'ମୋ ବସ୍' ଏଭଳି ବୋଲ ନ ମାନି ଲୋକଙ୍କ ଜୀବନ ନେଉଛି । କେତେବେଳେ ଓଭର ଟେକିଂ ତ ଆଉ କେବେ ଇଣ୍ଡିକେଟର ନ ଦେଇ ମନ ଇଚ୍ଛା ସାଇଡ୍ ମାରି ମରଣ ମୁହଁକୁ ଠେଲୁଛି । ସହରରେ 'ମୋ ବସ୍' ଚଳାଚଳ ବେଳେ ଏହା ନିତିଦିନିଆ ଘଟଣା ପାଲଟି ଥିବା ବେଳେ ଭାଙ୍ଗୁନି କ୍ରୁଟ୍ କର୍ତ୍ତୃପକ୍ଷଙ୍କ ନିଦ ।

Argus News | argus news | -Argusnews Home: Odisha Latest News, Breaking News, Trending News, Live TV and more