Argus News - ଭବାନିପୁରରେ ବିଗିଡ଼ିବ କି ଅଙ୍କ; ଚିନ୍ତାରେ ମମତା, କଟିଛନ୍ତି ୨୫% ଭୋଟର

ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଭବାନିପୁର ବିଧାନସଭା ଆସନରୁ ନିର୍ବାଚନ ଲଢୁଛନ୍ତି । କୋଲକାତାର ଏହି ଆସନଟି ବାହାର ଭୋଟର ଓ ଅବୈଧ ବଙ୍ଗାଳୀ ଭାଷାଭାଷୀ ଭୋଟରଙ୍କ ଲାଗି ବେଶ ଜଣାଶୁଣା । ଏଥର ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଦିଦିଙ୍କୁ ଟକ୍କର ଦେବାକୁ ମଇଦାନରେ ଅଛନ୍ତି ବିଜେପିର ହେଭିୱେଟ୍ ପ୍ରାର୍ଥୀ ଶୁଭେନ୍ଦୁ ଅଧିକାରୀ, ଯିଏକି ୨୦୨୧ ନିର୍ବାଚନରେ ଦିଦିଙ୍କ ଗଡ଼ କୁହାଯାଉଥିବା ନନ୍ଦିଗ୍ରାମରୁ ଦିଦିଙ୍କୁ ହରାଇ ବିଜୟୀ ହୋଇଥିଲେ । ଏଥର ସେ ମଧ୍ୟ ଭବାନିପୁର ଆସନରୁ ଲଢୁଛନ୍ତି, ଯାହାଦ୍ଵାରା ସିଧାସଳଖ ସିଏମ ମମତାଙ୍କୁ ଟକ୍କର ଦେବେ ।

ଏହାରି ମଧ୍ୟରେ ଭବାନିପୁର ବିଧାନସଭା ଆସନରେ ଏସଆଇଆର ବା ସ୍ଵତନ୍ତ୍ର ସଂଶୋଧନ ପ୍ରକ୍ରିୟା ଲାଗୁ ହେବା ପରେ ଏହି ବିଧାନସଭା ନିର୍ବାଚନ ମଣ୍ଡଳୀରେ ପ୍ରାୟ ୨୫ ପ୍ରତିଶତ ମତଦାତାଙ୍କ ସଂଖ୍ୟା ହ୍ରାସ ପାଇଛି । ଏସଆଇଆର ପୂର୍ବରୁ ଏଠାରେ ପ୍ରାୟ ୨ ଲକ୍ଷ ୬ ହଜାର ମତଦାତା ଥିଲେ । ଏମାନଙ୍କ ମଧ୍ୟରୁ ୫୧ ହଜାର ଭୋଟରଙ୍କ ନାମ ହଟାଯାଇଛି । ଏବେ ନିର୍ବାଚନରେ ଚର୍ଚ୍ଚା ହେଉଛି କି ଏସଆଇଆଇର ଦିଦିଙ୍କ ଅଙ୍କ ବିଗାଡ଼ିଦେବ କି ? ଏସଆଇଆଇରର ଫାଇଦା ଏଥର କାହାକୁ ମିଳିବ ? କାହାକୁ ନିଜର ନେତା ବାଛିବ ଭବାନିପୁରବାସୀ ?

• କାହିଁକି SIRରେ ନାଁ କଟିଲା ?

ଏସଆଇଆର ଲାଗୁ ହେବା ପରେ ଭବାନିପୁର ଆସନରେ ଯାହାର ନାମ କଟାଯାଇଛି, ସେମାନଙ୍କ ମଧ୍ୟରୁ ୨୩% ମୁସଲମାନ ଥିଲେ । ଏହାବ୍ୟତୀତ ୭୬% ଅଣ-ମୁସଲମାନ । କୁହାଯାଉଛି ଯେ ପୂର୍ବ ଭୋଟର ତାଲିକାରେ ଥିବା ନାମଗୁଡ଼ିକ ସେହି ଅଞ୍ଚଳର ବାସିନ୍ଦା ନୁହେଁ ଅର୍ଥାତ ସେମାନେ ରୋଜଗାର କିମ୍ବା ଅନ୍ୟ କୌଣସି କାରଣ ପାଇଁ ପଳାୟନ କରିଛନ୍ତି । ଯେତେବେଳେ ନିର୍ବାଚନ ଆୟୋଗଙ୍କ ସମୀକ୍ଷା ବେଳେ କେହି ଯୋଗ୍ୟ ମତାଦାତା ମିଳିନଥିଲେ, ସେତେବେଳେ ସେମାନଙ୍କ ନାମକୁ ହଟାଯାଇଛି । ଏହାରି ମଧ୍ୟରେ ଚର୍ଚ୍ଚା ହେଉଛି ଯେ ଏସଆଇଆରରେ ଏକ ଚତୁର୍ଥାଂଶ ନାମ ହଟିବା ପରେ ଏହାର ଫାଇଦା କାହାକୁ ମିଳିବ ।

ପଢନ୍ତୁ ଏହି ଖବର: ଆଜି ଆସାମ, କେରଳମ୍ ଓ ପୁଡୁଚେରୀରେ ନିର୍ବାଚନ; ରେକର୍ଡ ଅଂଶଗ୍ରହଣ ପାଇଁ ମୋଦିଙ୍କ ଅପିଲ୍

• ଭବାନିପୁରକୁ କୁହାଯାଏ 'ମିନି ଇଣ୍ଡିଆ'

ଭବାନିପୁର ଆସନର ସାମାଜିକ ସମୀକରଣକୁ ବୁଝୁଥିବା ଲୋକେ ଏହାକୁ ମିନି ଇଣ୍ଡିଆ ବୋଲି ମଧ୍ୟ କୁହନ୍ତି । ଏଠାରେ ଅନେକ ରାଜ୍ୟର ଲୋକେ ବାସ କରନ୍ତି । ଏଥିଲାଗି କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏହା ଉପରେ ଫୋକସ୍ କରୁଛନ୍ତି । ଶାହ ନାରା ଦେଇଛନ୍ତି ଯେ 'ଭବାନିପୁରକୁ ଜିତିଲେ, ପୁରା ପଶ୍ଚିମବଙ୍ଗକୁ ଜିତିପାରିବା' । ଏହି ଆସନରେ ୪୨% ବଙ୍ଗାଳୀ ହିନ୍ଦୁ ଥିବାବେଳେ ୩୪% ଅଣବଙ୍ଗାଳୀ ହିନ୍ଦୁ ବାସ କରୁଛନ୍ତି ।

• ଦିଦିଙ୍କୁ ଭାରି ପଡ଼ିପାରେ ବଙ୍ଗଳା କାର୍ଡ

ଭବାନିପୁର ଆସନରୁ ବିଜେପି ବଡ଼ ଆଶା ରଖିଛି । ଏହାର କାରଣ ହେଉଛି ଭବାନିପୁର ନିର୍ବାଚନ ମଣ୍ଡଳୀର ମୋଟ ଜନସଂଖ୍ୟାର ପ୍ରାୟ ୩୫-୪୦% ଅଣବଙ୍ଗାଳୀ । ଏମାନେ ପ୍ରାୟତଃ ଗୁଜୁରାଟୀ, ମାରୱାଡି, ପଞ୍ଜାବୀ ଓ ଶିଖ ହୋଇଥିବାବେଳେ ରୋଜଗାର ପାଇଁ ବହୁ ବର୍ଷ ହେଲାଣି ସେଠାର ସ୍ଥାୟୀ ବାସିନ୍ଦା ହୋଇଛନ୍ତି । ମୁଖ୍ୟମନ୍ତ୍ରୀ ମମତା ବାନାର୍ଜୀ ସର୍ବଦା 'ବଙ୍ଗଳା ପ୍ରାଇଡ୍' କଥା କୁହନ୍ତି । ସେ ଅନେକ ଥର ଅଭିଯୋଗ କରନ୍ତି ଯେ ବିଜେପି ପଶ୍ଚିମବଙ୍ଗରେ ବାହାର ଲୋକଙ୍କୁ ଆଣୁଛି । ଯଦି ଚଳିତ ନିର୍ବାଚନରେ ବଙ୍ଗଳା କାର୍ଡ ଚାଲେ, ତେବେ ମମତାଙ୍କୁ ଏହା ଭାରି ପଡ଼ିପାରେ ।

• ଏପ୍ରିଲ ୨୩ରେ ପଶ୍ଚିମବଙ୍ଗ ଭୋଟ୍

୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଏପ୍ରିଲ ୨୩ ଓ ୨୯ ତାରିଖ ଦୁଇଟି ପର୍ଯ୍ୟାୟରେ ମତଦାନ ହେବ । ମୋଟ ୨୯୪ଟି ଆସନ ପାଇଁ ପଡ଼ିବ ଭୋଟ୍ । ରାଜ୍ୟରେ ୨୦୧୧ ମସିହାଠାରୁ ମମତାଙ୍କ ଦଳ ତୃଣମୂଳ କଂଗ୍ରେସ (TMC) କ୍ଷମତାରେ ଅଛି । ଏଥର ନିର୍ବାଚନ ଜିତି ମୁଖ୍ୟମନ୍ତ୍ରୀ ମମତା ବାନାର୍ଜୀ ଚତୁର୍ଥ ଥର ପାଇଁ ଶାସନ କ୍ଷମତା ହାତେଇବାକୁ ଉଦ୍ୟମ କରୁଛନ୍ତି । ତେବେ ବିଜେପି ପାଇଁ ଏହି ନିର୍ବାଚନ ବେଶ ଗୁରୁତ୍ଵପୂର୍ଣ୍ଣ କାରଣ ବିଜେପି ଦ୍ଵାରା ଶାସିତ ହୋଇନଥିବା ରାଜ୍ୟମାନଙ୍କ ମଧ୍ୟରୁ ପଶ୍ଚିମବଙ୍ଗ ଗୋଟିଏ । ବିଜେପି ପଶ୍ଚିମବଙ୍ଗରେ ଅନେକ ରାଜନୈତିକ ସଫଳତା ହାସଲ କରିଥିଲେ ସୁଦ୍ଧା ରାଜ୍ୟ ଶାସନଭାରକୁ ହାତକୁ ନେଇନାହିଁ ।

ପଢନ୍ତୁ ଏହି ଖବର: ପଶ୍ଚିମବଙ୍ଗ ଭୋଟ୍ ପୂର୍ବରୁ ବଡ଼ ଝଟକା ! ତାଲିକାରୁ ବାଦ୍‌ ପଡ଼ିଲେ ୯୦ ଲକ୍ଷ ଭୋଟର

ନିର୍ବାଚନ ପୂର୍ବରୁ SIRକୁ ମମତା ପ୍ରବଳ ବିରୋଧ କରିଥିଲେ । ମମତା ଅଭିଯୋଗ କରିଥିଲେ ଯେ ବିଜେପି ଏସଆଇଆର ଲାଗୁ କରି ଭୋଟରଙ୍କୁ ଜାଣିଶୁଣି ଭୋଟଦାନରୁ ବଞ୍ଚିତ କରି ଭୋଟ ଜନସଂଖ୍ୟାକୁ ନିଜ ସପକ୍ଷରେ ନେବାକୁ ଚେଷ୍ଟା କରୁଛି । ସେପଟେ ବିଜେପି ପ୍ରତି ଅଭିଯୋଗ କରିଥିଲା ଯେ ଏସଆଇଆରକୁ ବିରୋଧ କରିବା ପଛରେ ଟିଏମସିର ଉଦ୍ଦେଶ୍ୟ ହେଉଛି ରାଜନୈତିକ ପୁଞ୍ଜି ପାଇଁ ଅବୈଧ ପ୍ରବାସୀମାନଙ୍କୁ ବ୍ୟବହାର କରିବା । ତେବେ ଦେଖିବାକୁ ବାକି ରହିଲା ଭବାନିପୁରରେ ଏଥର ଏସଆଇଆଇ କାହାକୁ ଫାଇଦା ଦେଉଛି ।