Who Is Chandranath Rath / କିଏ ଥିଲେ ଶୁଭେନ୍ଦୁଙ୍କ PA ଚନ୍ଦ୍ରନାଥ ରଥ ? ପଶ୍ଚିମବଙ୍ଗରେ ଭୟଙ୍କର ହତ୍ୟା

ପଶ୍ଚିମବଙ୍ଗରେ ନିର୍ବାଚନୀ ପରେ ହିଂସାକାଣ୍ଡ । ବୁଧବାର ରାତିରେ ବିଜେପି ନେତା ଶୁଭେନ୍ଦୁ ଅଧିକାରୀଙ୍କ ବ୍ୟକ୍ତିଗତ ସହାୟକ (PA)ଙ୍କୁ ଗୁଳି କରି ହତ୍ୟା କରାଯାଇଛି । ଏହି ଘଟଣା ପରେ ପୂରା ଦେଶରେ ହଇଚଇ ସୃଷ୍ଟି କରିଛି । ଏହି ଗୁଳିକାଣ୍ଡରେ ଶୁଭେନ୍ଦୁଙ୍କ ରାଇଟ୍ ହ୍ୟାଣ୍ଡ୍ କୁହାଯାଉଥିବା ବ୍ୟକ୍ତିଗତ ସହାୟକ ଚନ୍ଦ୍ରନାଥ ରଥଙ୍କ ମୃତ୍ୟୁ ଘଟିଛି । ବିଜେପି ଏହି ହତ୍ୟାକାଣ୍ଡ ପଛରେ ଟିଏମସିର ହାତ ଥିବା କହିଥିବାବେଳେ ଚନ୍ଦ୍ରନାଥଙ୍କ ମାଆ ମଧ୍ୟ ସମାନ ଅଭିଯୋଗ ଆଣିଛନ୍ତି ।

ପୋଲିସ କହିଛି ଯେ ଉତ୍ତର ୨୪-ପ୍ରଗଣାର ମଧ୍ୟମଗ୍ରାମ ନିକଟରେ ଏହି ହତ୍ୟାକାଣ୍ଡ ଘଟିଛି । କିଛି ଆକ୍ରମଣକାରୀ ବୁଧବାର ରାତିରେ ଚନ୍ଦ୍ରନାଥଙ୍କ ଗାଡ଼ି ନିକଟକୁ ଆସି ତାଙ୍କ ଉପରେ ଗୁଳି ଚାଳନା କରିଥିଲେ । ସେଥିରୁ ୩ଟି ଗୁଳି ଚନ୍ଦ୍ରନାଥଙ୍କ ମୁଣ୍ଡରେ ବାଜିଛି । କୋଲକାତାଠାରୁ ପ୍ରାୟ ୨୨ କିଲୋମିଟର ଦୂରରେ ଅବସ୍ଥିତ ମଧ୍ୟମଗ୍ରାମ । ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ, ହତ୍ୟାକାରୀ ଚନ୍ଦ୍ରନାଥଙ୍କ ଗାଡ଼ିର ପିଛା କରି ପ୍ରାୟ ୧୬ ରାଉଣ୍ଡ ଗୁଳି ଚଲାଇଥିଲେ । ଏହି ହତ୍ୟାକାଣ୍ଡରେ ଚନ୍ଦ୍ରନାଥଙ୍କ ଡ୍ରାଇଭରଙ୍କ ଦେହରେ ମଧ୍ୟ ଗୁଳି ବାଜିଛି । ତେବେ ଚନ୍ଦ୍ରନାଥ ଜଣେ ବାୟୁସେନା ଅଧିକାରୀ ଥିବାବେଳେ ସେ କିପରି ଶୁଭେନ୍ଦୁ ଅଧିକାରୀଙ୍କ ରାଇଟ୍ ହ୍ୟାଣ୍ଡ ସାଜିଥିଲେ ଆସନ୍ତୁ ଜାଣିବା ।

• କିଏ ଥିଲେ ଚନ୍ଦ୍ରନାଥ ରଥ ?

୪୧ ବର୍ଷୀୟ ଚନ୍ଦ୍ରନାଥ ରଥ ପଶ୍ଚିମବଙ୍ଗ ରାଜନୀତିରେ କୌଣସି ବଡ଼ ଚେହେରା ନଥିଲେ, କିନ୍ତୁ ବିଜେପି ଓ ଶୁଭେନ୍ଦୁ ଅଧିକାରୀଙ୍କ ଲାଗି ତାଙ୍କର ସ୍ଥାନ ବଡ଼ ଥିଲା । ସେ ପୂର୍ବ ମେଦିନାପୁରର ଚଣ୍ଡୀପୁର ଅଞ୍ଚଳର ବାସିନ୍ଦା ଥିଲେ । ସେ ବେଶ ମିଷ୍ଟଭାସୀ ଥିବାବେଳେ ବେଶ ଶୃଙ୍ଖଳିତ ମଧ୍ୟ । ଏକ ସମୟ ଥିଲା ଯେତେବେଳେ ସେ ଆଧ୍ୟାତ୍ମିକ ଦୁନିଆରେ ବୁଡି ରହିଥିଲେ, କିନ୍ତୁ ପରବର୍ତ୍ତୀ ସମୟରେ ସେ ଭାରତୀୟ ବାୟୁସେନା (IAF)ରେ ଯୋଗ ଦେଇଥିଲେ ।

• କେମିତି ହେଲେ ଶୁଭେନ୍ଦୁଙ୍କ ରାଇଟ୍ ହ୍ୟାଣ୍ଡ ?

ପ୍ରାୟ ଦୁଇ ଦଶନ୍ଧି ଧରି ବାୟୁସେନାରେ ଦେଶ ସେବା କରିବା ପରେ ସେ VRS ନେଇଥିଲେ । କିଛି ସମୟ କର୍ପୋରେଟ୍ ସେକ୍ଟରରେ କାମ କରିବା ପରେ ଶୁଭେନ୍ଦୁ ଅଧିକାରୀଙ୍କ କୋର୍ ଟିମର ଅଂଶ ହୋଇଥିଲେ । ଚନ୍ଦ୍ରନାଥ ଓ ଶୁଭେନ୍ଦୁ ଅଧିକାରୀଙ୍କ ସମ୍ପର୍କ ବେଶ ପୁରୁଣା । ଚନ୍ଦ୍ରନାଥଙ୍କ ପରିବାର ପୂର୍ବରୁ ତୃଣମୂଳ କଂଗ୍ରେସ (TMC)ର ସମର୍ଥକ ଥିଲା ଓ ତାଙ୍କ ମାଆ ହସି ରଥ ପୂର୍ବ ମେଦିନାପୁରର ପଞ୍ଚାୟତ ସଦସ୍ୟ ଥିଲେ । ୨୦୨୦ରେ ଯେତେବେଳେ ଶୁଭେନ୍ଦୁ ଅଧିକାରୀ ବିଜେପିରେ ସାମିଲ ହୋଇଥିଲେ, ସେତେବେଳେ ତାଙ୍କ ପରିବାର ମଧ୍ୟ ବିଜେପିକୁ ସମର୍ଥନ କରିଥିଲା ।

ପଢନ୍ତୁ ଏହି ଖବର: ଆସିଲା ଚନ୍ଦ୍ରନାଥ ମାଆଙ୍କ ପ୍ରତିକ୍ରିୟା; 'ଯଦି ମୋ ପୁଅ କୌଣସି ଦୁର୍ଘଟଣାରେ ମରିଥାନ୍ତା....

ଚନ୍ଦ୍ରନାଥ ରଥ, ଶୁଭେନ୍ଦୁଙ୍କ ସମସ୍ତ କାର୍ଯ୍ୟ ବୁଝୁଥିଲେ । ନିକଟରେ ହୋଇଥିବା ବିଧାନସଭା ନିର୍ବାଚନରେ ମଧ୍ୟ ଭବାନିପୁରରେ ବିଜେପି କର୍ମକର୍ତ୍ତା ଓ ଲୋକଙ୍କ ସହିତ ଯୋଡ଼ି ହେବାର ଗୁରୁ ଦାୟିତ୍ଵ ତାଙ୍କ କାନ୍ଧରେ ଥିଲା । ଏପରିକି ଚନ୍ଦ୍ରନାଥ ଶୁଭେନ୍ଦୁ ଅଧିକାରୀଙ୍କ ବିଶ୍ଵସ୍ତ ଥିବାବେଳେ ଶୁଭେନ୍ଦୁ ତାଙ୍କ ଉପରେ ଆଖିବୁଜି ବିଶ୍ଵାସ କରୁଥିଲେ । ଚନ୍ଦ୍ରନାଥଙ୍କ ବିୟୋଗ ତାଙ୍କ ପାଇଁ ଏକ ବଡ଼ କ୍ଷତି ବୋଲି ଶୁଭେନ୍ଦୁ କହିଛନ୍ତି ।

ଅଧିକ ଖବର ପଢନ୍ତୁ...