ପଶ୍ଚିମବଙ୍ଗରେ ୨୯୪ ବିଧାନସଭା ଆସନ ଲାଗି ହୋଇଥିବା ନିର୍ବାଚନର ଫଳାଫଳ ମେ ୪ ତାରିଖରେ ପ୍ରକାଶ ପାଇବ । ଏହା ପୂର୍ବରୁ ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ (TMC)କୁ ଲାଗିଛି ସୁପ୍ରିମ ଝଟକା । ଉଚ୍ଚ ନ୍ୟାୟାଳୟ ଆଜି ଟିଏମସିର ସେହି ଆବେଦନକୁ ଖାରଜ କରିଦେଇଛନ୍ତି, ଯେଉଁଥିରେ ଦଳ କୋଲକାତା ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟଙ୍କ ଦ୍ଵାରସ୍ଥ ହୋଇଥିଲେ । ଏହି ମାମଲା ଭୋଟ ଗଣତି ସମୟରେ କେନ୍ଦ୍ରୀୟ ସରକାର ଓ ପିଏସୟୁ କର୍ମଚାରୀଙ୍କ ନିଯୁକ୍ତି ସହିତ ଜଡ଼ିତ, ଯାହାକୁ ସୁପ୍ରିମକୋର୍ଟ ବେଆଇନ ନୁହେଁ ବୋଲି କହିଛନ୍ତି । ଏହାସହିତ ନିର୍ବାଚନ ଆୟୋଗଙ୍କ କାମରେ ହସ୍ତକ୍ଷେପ ନ କରିବାକୁ ସିଧା ମନା କରିଛନ୍ତି । 

କୋର୍ଟ କହିଛନ୍ତି ଯେ ଭୋଟ ଗଣତି ପାଇଁ କେନ୍ଦ୍ର ସରକାରୀ କର୍ମଚାରୀଙ୍କ ନିଯୁକ୍ତି ନିୟମ ବିରୁଦ୍ଧରେ ନୁହେଁ । ଖଣ୍ଡପୀଠ ସ୍ପଷ୍ଟ କରିଛନ୍ତି ଯେ ଏହି ମାମଲାରେ କୌଣସି ନୂତନ ନିର୍ଦ୍ଦେଶର ଆବଶ୍ୟକତା ନାହିଁ କହି ଏହାକୁ ବନ୍ଦ କରିଛନ୍ତି । ସୁପ୍ରିମକୋର୍ଟ ଆବେଦନ ଉପରେ କୌଣସି ନିର୍ଦ୍ଦିଷ୍ଟ ନିର୍ଦ୍ଦେଶ ଜାରି କରି ନାହାଁନ୍ତି, କହିଛନ୍ତି ଯେ "କୌଣସି ନିର୍ଦ୍ଦେଶର ବି ଆବଶ୍ୟକତା ନାହିଁ, କାରଣ ଏହା ବେଆଇନ ନୁହେଁ ।"

ପଢନ୍ତୁ ଏହି ଖବର: ନିର୍ବାଚନ ଫଳ ପୂର୍ବରୁ TMCକୁ ବଡ଼ ଝଟକା, ଆବେଦନ ଖାରଜ କଲେ କୋଲକାତା ହାଇକୋର୍ଟ

ଉଚ୍ଚତମ ନ୍ୟାୟାଳୟ ନିର୍ବାଚନ କମିଶନ (EC)ଙ୍କ ଏକ ରିପୋର୍ଟକୁ ରେକର୍ଡରେ ଗ୍ରହଣ କରିଥିଲେ, ଯେଉଁଥିରେ କମିଶନ ପ୍ରତିଶ୍ରୁତି ଦେଇଛି ଯେ ସର୍କୁଲାରକୁ ଏହାର ସଠିକ୍ ଅର୍ଥ ଓ ଭାବନା ସହିତ ଲାଗୁ କରାଯିବ । ଶୁଣାଣି ସମୟରେ, ଟିଏମସି ନିଜର ସ୍ଵରକୁ ନରମ କରି କହିଛି ଯେ ସର୍କୁଲାର ଅନୁଯାୟୀ, ସେମାନେ ଏବେ ଚାହୁଁଛନ୍ତି ଯେ ଭୋଟ ଗଣତି ସମୟରେ ଅତି କମରେ ଟେବୁଲରେ ଜଣେ ବ୍ୟକ୍ତି ରାଜ୍ୟ ସରକାରୀ କର୍ମଚାରୀ ରୁହନ୍ତୁ ।

• ସମ୍ପୂର୍ଣ୍ଣ ବିବାଦ କ’ଣ?

ଏପ୍ରିଲ ୩୦ ତାରିଖରେ, ନିର୍ବାଚନ କମିଶନ ଏକ ନିର୍ଦ୍ଦେଶନାମା ଜାରି କରିଥିଲେ ଯେ ପ୍ରତ୍ୟେକ ଗଣନା ଟେବୁଲରେ ଅତି କମରେ ଜଣେ ପର୍ଯ୍ୟବେକ୍ଷକ କିମ୍ବା କେନ୍ଦ୍ର ସରକାରଙ୍କ ଜଣେ ସହାୟକ କିମ୍ବା ଜଣେ ସରକାରୀ କର୍ମଚାରୀ ରହିବେ । ଟିଏମସି ଅଭିଯୋଗ କରିଛି ଯେ କେନ୍ଦ୍ର ସରକାରୀ କର୍ମଚାରୀମାନେ ବିଜେପି ନେତୃତ୍ଵାଧୀନ କେନ୍ଦ୍ର ସରକାରଙ୍କ ଦ୍ଵାରା ପ୍ରଭାବିତ ହୋଇପାରନ୍ତି । କିନ୍ତୁ ପୂର୍ବରୁ କୋଲକାତା ହାଇକୋର୍ଟ ଟିଏମସିର ଏହି ଦାବିକୁ ଖାରଜ କରି କମିଶନଙ୍କ ନିଷ୍ପତ୍ତିକୁ ସମର୍ଥନ କରିଥିଲେ ।

• କଣ କହିଥିଲେ ହାଇକୋର୍ଟ ?

ହାଇକୋର୍ଟ ନିଜର ଆଦେଶରେ କହିଥିଲେ, "କାଉଣ୍ଟିଂ ସୁପରଭାଇଜର ଓ କାଉଣ୍ଟିଂ ଆସିଷ୍ଟାଣ୍ଟର ନିଯୁକ୍ତି ରାଜ୍ୟ ସରକାର ଓ କେନ୍ଦ୍ର ସରକାରଙ୍କ କର୍ମଚାରୀଙ୍କ ମଧ୍ୟରୁ ଯାହାକୁ ବି ନିଯୁକ୍ତ କରାଯିବାର ନିୟମ ରହିଛି, ଏହା ନିର୍ବାଚନ ଆୟୋଗଙ୍କ ସ୍ଵତନ୍ତ୍ର ଅଧିକାର । ରାଜ୍ୟ ସରକାରଙ୍କ କର୍ମଚାରୀଙ୍କ ବଦଳରେ କେନ୍ଦ୍ର ସରକାର ଓ କେନ୍ଦ୍ରୀୟ ପିଏସୟୁ କର୍ମଚାରୀଙ୍କ ନିଯୁକ୍ତି ବେଆଇନ ନୁହେଁ ।" 

ଏଠାରେ କହିରଖୁଛୁ କି, ଏହି ଆବେଦନର ତ୍ଵରିତ ଶୁଣାଣି ପାଇଁ ଟିଏମସି ସୁପ୍ରିମକୋର୍ଟଙ୍କୁ ଅନୁରୋଧ କରିଥିଲା । ରାଜ୍ୟରେ ବିଧାନସଭା ନିର୍ବାଚନର ଫଳ ମେ ୪ ତାରିଖରେ ପ୍ରକାଶ ପାଇବାକୁ ଥିବାରୁ ତ୍ଵରିତ ଶୁଣାଣି ପାଇଁ ଅନୁରୋଧ କରାଯାଇଥିଲା ।  ପଶ୍ଚିମବଙ୍ଗର ୨୯୪ ବିଧାନସଭା ଆସନ ଲାଗି ଦୁଇଟି ପର୍ଯ୍ୟାୟରେ ମତଦାନ ହୋଇଥିଲା । ୨୩ ଏପ୍ରିଲରେ ପ୍ରଥମ ପର୍ଯ୍ୟାୟ ମତଦାନ ହୋଇଥିବାବେଳେ ଏପ୍ରିଲ ୨୯ରେ ଦ୍ଵିତୀୟ ତଥା ଶେଷ ପର୍ଯ୍ୟାୟ ମତଦାନ ସରିଛି । ବେଙ୍ଗଲରେ ମୋଟ ୯୦ ପ୍ରତିଶତ ଭୋଟିଂ ରେକର୍ଡ କରାଯାଇଛି । ଭୋଟ ଗଣତି ମେ ୪ ତାରିଖରେ ହେବାକୁ ଥିବାବେଳେ ହାୱଡାରେ ଥିବା ଷ୍ଟ୍ରଙ୍ଗରୁମରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।

ଅଧିକ ଖବର ପଢନ୍ତୁ...