Trisha Krishnan / ଉଦୟନିଧି ଷ୍ଟାଲିନଙ୍କ ଦ୍ଵିଅର୍ଥବୋଧକ ବୟାନରେ ଆସିଲା ତ୍ରିଶା କୃଷ୍ଣନଙ୍କ ପ୍ରଥମ ପ୍ରତିକ୍ରିୟା

ଚେନ୍ନାଇ: ତାମିଲନାଡୁରେ ଗତ କିଛି ଦିନ ପୂର୍ବରୁ ଏକ ବଡ଼ ବିବାଦ ଚାରିଆଡ଼େ ଚର୍ଚ୍ଚାର ବିଷୟ ପାଲଟିଥିଲା । ବିରୋଧୀ ଦଳ ନେତା ଉଦୟନିଧି ଷ୍ଟାଲିନ କାବେରୀ ନଦୀକୁ ନେଇ ମୁଖ୍ୟମନ୍ତ୍ରୀ ବିଜୟ ଥାଲାପତିଙ୍କୁ ଟାର୍ଗେଟ୍ କରିଥିଲେ । ଏହି ସମୟରେ ବିଜୟଙ୍କ ଘନିଷ୍ଠ ବନ୍ଧୁ ତଥା ତାମିଲ ଫିଲ୍ମ ଅଭିନେତ୍ରୀ ତ୍ରିଶା କୃଷ୍ଣନଙ୍କୁ ନେଇ ଅଭଦ୍ର ବା ଆପତ୍ତିଜନକ ବୟାନ ଦେଇଥିଲେ । ଯାହାକୁ ନେଇ ଷ୍ଟାଲିନଙ୍କୁ ରାଜ୍ୟ ପୋଲିସ ଗିରଫ କରିଥିଲା । ଏହି ଘଟଣାରେ ଏବେ ଖୋଦ୍ ଅଭିନେତ୍ରୀ ତ୍ରିଶା ମୁହଁ ଖୋଲିଛନ୍ତି ।

ଉଦୟନିଧିଙ୍କୁ ତାଙ୍କ ବିବାଦୀୟ ବୟାନ ଲାଗି ପୋଲିସ ହେପାଜତକୁ ନେଇଥିଲା । ପରେ ସେ ଜାମିନରେ ଆସିଥିଲେ । ପୋଲିସ ତାଙ୍କୁ ଘରୁ ଉଠାଇନେବାର ପ୍ରାୟ ୪ ଘଣ୍ଟା ପରେ ଘରକୁ ଫେରିଥିଲେ । ଏହି ଘଟଣାକୁ ନେଇ ଅନେକ ଅଭିନେତା ଓ ଅଭିନେତ୍ରୀ ତ୍ରିଶାଙ୍କ ସମର୍ଥନରେ ବାହାରିଥିଲେ । ସୋସିଆଲ ମିଡିଆରେ ମଧ୍ୟ ଉଦୟନିଧିଙ୍କୁ କଡ଼ା ସମାଲୋଚନା କରାଯାଇଥିଲା । ଜଣେ ରାଜନେତା ହୋଇ କିପରି ଏପରି ବିଚାର ରଖିପାରୁଛନ୍ତି ତାହାକୁ ନେଇ ଅନ୍ୟ କଳାକାରମାନେ ପ୍ରଶ୍ନ ଉଠାଇଥିଲେ । ଆଜି ତ୍ରିଶା ଏହି ଘଟଣାକୁ ନେଇ ପରୋକ୍ଷରେ ନିଜର ମତ ରଖିଛନ୍ତି ।

• ମୁହଁ ଖୋଲିଲେ ତ୍ରିଶା କୃଷ୍ଣନ

ତ୍ରିଶା ଏହି ଘଟଣାର କିଛି ଦିନ ପରେ ଇନଷ୍ଟାଗ୍ରାମରେ ଏକ ଷ୍ଟୋରୀ ସେୟାର କରିଛନ୍ତି । ଏହାକୁ ଉଦୟନିଧି ଷ୍ଟାଲିନଙ୍କ ବିବାଦୀୟ ବୟାନର ପରୋକ୍ଷ ଜବାବ ଭାବେ ଦେଖାଯାଉଛି । ତ୍ରିଶା ଏକ କ୍ରିପ୍ଟିକ୍ ପୋଷ୍ଟ ସେୟାର କରିଛନ୍ତି, ଯେଉଁଥିରେ ଲେଖାଯାଇଛି, "ଏହି ବୟସରେ ଡ୍ରାମା ସୃଷ୍ଟି କରିବା ନିହାତି ଲଜ୍ଜାଜନକ । ଯାଆନ୍ତୁ କିଛି ଟଙ୍କା ରୋଜଗାର କରନ୍ତୁ ଓ ନିଜ ଜୀବନରେ ଶାନ୍ତି ଖୋଜନ୍ତୁ ।" ଏହାପରେ ତ୍ରିଶା ଆଉ ଏକ ପୋଷ୍ଟ ସେୟାର କରିଛନ୍ତି, ଯେଉଁଥିରେ ସେ ନଜର ନଲାଗିବା ଇମୋଜି ଲଗାଇଛନ୍ତି । ଏହି ପୋଷ୍ଟରେ ଲେଖାଯାଇଛି, "ଯେଉଁ ଜୀବନ ପାଇଁ କେବେ ଦିନେ ପ୍ରାର୍ଥନା କରିଥିଲ, ଆଜି ସେହି ଜୀବନରେ ଅଭିଭୂତ ହୋଇଯିବା ଏହାଠାରୁ ବଡ଼ ସୌଭାଗ୍ୟ ଆଉ କଣ ହୋଇପାରେ ।"

ପଢନ୍ତୁ ଏହି ଖବର: ମୁକ୍ତ ହେଲେ ଉଦୟନିଧି ଷ୍ଟାଲିନ; ଗିରଫର ୪ଘଣ୍ଟା ଭିତରେ ଛାଡ଼ିଲା ପୋଲିସ

• ମୁଖ୍ୟମନ୍ତ୍ରୀ ବିଜୟଙ୍କ ସହ ସମ୍ପର୍କକୁ ନେଇ ଚର୍ଚ୍ଚା

ତ୍ରିଶା କୃଷ୍ଣନଙ୍କ ସହିତ ମୁଖ୍ୟମନ୍ତ୍ରୀ ବିଜୟ ଥାଲାପତିଙ୍କ ନାମକୁ ଯୋଡ଼ାଯାଏ । ଉଭୟଙ୍କ ମଧ୍ୟରେ ବନ୍ଧୁତାଠାରୁ ଅଧିକ କିଛି ସମ୍ପର୍କ ଅଛି ବୋଲି ଚର୍ଚ୍ଚା ହୁଏ । ତେବେ ଉଭୟ ଏହା ଉପରେ କେବେ ବି କୌଣସି ପ୍ରତିକ୍ରିୟା ଦେଇନାହାନ୍ତି । ଏହି ଗୁଜବ ଲାଗି ଅନେକ ଥର ତାଙ୍କୁ ନେଇ ରାଜନୀତି ହେଉଥିବାର ଦେଖିବାକୁ ମିଳେ । ଉଦୟନିଧି ଷ୍ଟାଲିନଙ୍କ ଯେଉଁ ବୟାନ ଥିଲା ତାହା ସମ୍ପୂର୍ଣ୍ଣ ଭାବରେ ବିଜୟ ଓ ତ୍ରିଶାଙ୍କ ସମ୍ପର୍କକୁ ନେଇ କୁହାଯାଇଥିଲା ।