ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ ବିଧାନସଭା ନିର୍ବାଚନରେ ଆଜି ୧୫୨ଟି ଆସନରେ ପଡୁଛି ଭୋଟ୍ । ମତଦାନ ସମୟରେ ଭିନ୍ନ ଭିନ୍ନ ସ୍ଥାନରେ ବ୍ୟାପକ ହିଂସାକାଣ୍ଡ ଦେଖିବାକୁ ମିଳିଛି । ମୁର୍ଶିଦାବାଦରେ ଆମ ଜନତା ଉନ୍ନୟନ ପାର୍ଟି (ଏଜେୟୁପି) ହୁମାୟୁନ କବୀରଙ୍କ ଉପରେ ଆକ୍ରମଣ ହୋଇଛି । ମାଲଦାରେ ନିର୍ବାଚନ ଅଧିକାରୀଙ୍କ ସହିତ ଧସ୍ତାଧସ୍ତି ଓ ଜାମୁଡିଆରେ ଏକ ଗାଡ଼ିରେ ଇଭିଏମ ମିଳିଥିବା ଖବର ସାମ୍ନାକୁ ଆସିଛି । ସେହିପରି ଶାସକ ଦଳ ତୃଣମୂଳ କଂଗ୍ରେସ (ଟିଏମସି) ଗୁଣ୍ଡା ବିଜେପି ପ୍ରାର୍ଥୀ ଶୁଭେନ୍ଦୁ ସରକାରଙ୍କୁ ଗୋଡ଼ାଇ ଗୋଡ଼ାଇ ପିଟିଥିବା ଅଭିଯୋଗ ହୋଇଛି ।

ନିର୍ବାଚନ ବେଳେ ପଶ୍ଚିମବଙ୍ଗରେ ହିଂସା ଘଟିବା ଏବେ ଯେପରି ଏକ ସାଧାରଣ ଘଟଣା ପରି ମନେ ହେଉଛି । ପ୍ରତି ଥର ପଡ଼ୋଶୀ ରାଜ୍ୟରେ ନିର୍ବାଚନୀ ହିଂସା ଦେଖିବାକୁ ମିଳେ । ମୁର୍ଶିଦାବାଦ, କୁଚବିହାର, ସିଲିଗୁଡ଼ି ଓ ମାଲଦାରେ ଗଣ୍ଡଗୋଳ ସ୍ଥିତି ଉପୁଜିଛି । ମୁର୍ଶିଦାବାଦରେ ବୋମା ଫୁଟିଥିବାବେଳେ କିଛି ଲୋକ ଟିଏମସିରୁ ଅଲଗା ହୋଇଥିବା ହୁମାୟୁନ କବୀରଙ୍କ କାର ଉପରେ ଢେଲାପଥର ମାଡ଼ କରିଥିଲେ । ବୋମା ଫୁଟିବା ପରେ ସେ ଉକ୍ତ ଅଞ୍ଚଳ ପରିଦର୍ଶନ କରିଥିବାବେଳେ ତାଙ୍କ ଉପରେ ଆକ୍ରମଣ ହୋଇଛି ।

• କୁମାରଗଞ୍ଜରେ ବିଜେପି ପ୍ରାର୍ଥୀଙ୍କୁ ଆକ୍ରମଣ

ଦକ୍ଷିଣ ଦିନାଜପୁରର କୁମାରଗଞ୍ଜ ବିଧାନସଭା ମଣ୍ଡଳୀରେ ଏକ ବିଚଳିତ କରିବା ପରି ଖବର ଆସିଛି । ଏଠାରେ ବିଜେପି ପ୍ରାର୍ଥୀ ଶୁଭେନ୍ଦୁ ସରକାରଙ୍କୁ ଟିଏମସି ସମର୍ଥକମାନେ ଆକ୍ରମଣ କରିଥିବା ଅଭିଯୋଗ ହୋଇଛି । ବିଜେପି ପ୍ରାର୍ଥୀ ଶୁଭେନ୍ଦୁ ସରକାରଙ୍କୁ ସୂଚନା ମିଳିଥିଲା ଯେ ଏକ ବୁଥରେ 'ବୁଥ୍ ଜାମିଙ୍ଗ' ଉଦ୍ୟମର ଯୋଜନା ରହିଛି । ଯେତେବେଳେ ସେ ନିଜ ଟିମ ସହ ସେଠାରେ ପହଞ୍ଚିଥିଲେ, ଏହାପରେ ହଠାତ୍ କିଛି ବ୍ୟକ୍ତି ତାଙ୍କ ଉପରେ ଆକ୍ରମଣ କରିଥିଲେ । ଏପରିକି ପୋଲିସ ସେହି ସ୍ଥାନରେ ଉପସ୍ଥିତ ଥିବା ସମୟରେ ଉକ୍ତ ବ୍ୟକ୍ତିମାନେ ଆକ୍ରମଣ କରିଥିବା ଶୁଭେନ୍ଦୁ ସରକାର ଅଭିଯୋଗ କରିଛନ୍ତି ।

• କୁଚବିହାରରେ କେନ୍ଦ୍ରୀୟ ବଳର ଆକ୍ସନ

ତୁଫାନଗଞ୍ଜ ଅଞ୍ଚଳରେ ମତଦାନ ସମୟରେ ହଠାତ୍ ଭିଡ଼ ଜମିଥିଲା, ଯାହାଦ୍ଵାରା ସ୍ଥିତି ଅଣାୟତ୍ତ ହୋଇଥିଲା । ଗଣ୍ଡଗୋଳ ସ୍ଥିତିକୁ ନିୟନ୍ତ୍ରଣରେ ଆଣିବାକୁ କେନ୍ଦ୍ରୀୟ ସଶସ୍ତ୍ର ପୋଲିସ ବଳ (CAPF)ର ଯବାନମାନେ ଆକ୍ସନ ମୋଡକୁ ଆସିଥିଲେ । ସୁରକ୍ଷାବଳ ଲାଠି ଚାର୍ଜ କରିବା ସହ ଲୋକଙ୍କୁ ହଟାଇ ଭିଡ଼ ନିୟନ୍ତ୍ରଣ କରିଥିଲେ । ଅଭିଯୋଗ ହେଉଛି କିଛି ଅସାମାଜିକ ବ୍ୟକ୍ତି ବୁଥ୍ ନିକଟରେ ପହଞ୍ଚି ମତଦାତାମାନଙ୍କୁ ଡରାଇ ଧମକାଉଥିଲେ ।

ପଢନ୍ତୁ ଏହି ଖବର: ପଶ୍ଚିମବଙ୍ଗ ନିର୍ବାଚନରେ ହିଂସା; ଫୁଟିଲା ବୋମା, TMC ଓ AUJP କର୍ମୀ ଧସ୍ତାଧସ୍ତି

• ଗାଡ଼ିରେ ମିଳିଲା EVM

ଜାମୁଡିଆ ବିଧାନସଭା ମଣ୍ଡଳୀରେ ଇଭିଏମକୁ ନେଇ ବିବାଦ ଦେଖାଦେଇଥିଲା । ଶ୍ରୀପୁର ଅଞ୍ଚଳରେ ଏକ ରାସ୍ତା କଡ଼ରେ ଠିଆ ହୋଇଥିବା ଏକ ଗାଡ଼ିରେ ଇଭିଏମ ମିଳିଥିବା ଅଭିଯୋଗ ହୋଇଛି । ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ଏକ 'ଅନ୍ ଇଲେକ୍ସନ ଡ୍ୟୁଟି-ଜାମୁଡିଆ AC 279' ଲେଖା ହୋଇଥିବା ଗାଡ଼ିରେ ଅନେକ ରିଜର୍ଭ ଇଭିଏମ ରଖାଯାଇଥିଲା, ହେଲେ ସେଠାରେ କୌଣସି ସୁରକ୍ଷାକର୍ମୀ ନଥିବା ଅଭିଯୋଗ ହୋଇଛି ।

• AJUP ମୁଖ୍ୟଙ୍କୁ ମାଡ଼

ବଙ୍ଗଳାର ମୁର୍ଶିଦାବାଦ ଜିଲ୍ଲାରେ ବୋମା ବିସ୍ଫୋରଣ ଘଟଣା ଘଟିବା ପରେ, ଏୟୁଜେପିର ହୁମାୟୁନ କବୀର ଘଟଣାସ୍ଥଳ ପରିଦର୍ଶନ କରିଥିଲେ । କିନ୍ତୁ ତାଙ୍କ ଗସ୍ତ ଫଳରେ ଟିଏମସି କର୍ମୀ ଏବଂ ପୋଲିସ ମଧ୍ୟରେ ସଂଘର୍ଷ ହୋଇଥିଲା । ମତଦାନ ପ୍ରକ୍ରିୟା ସମୟରେ ଦଳୀୟ କର୍ମୀ ଏବଂ ପୋଲିସ ମଧ୍ୟରେ ଉତ୍ତେଜନା ବୃଦ୍ଧି ପାଇବାରୁ ପରିସ୍ଥିତି ନିୟନ୍ତ୍ରଣ ପାଇଁ ସୁରକ୍ଷା କର୍ମୀଙ୍କୁ ନିୟୋଜିତ କରାଯାଇଥିଲା । କିଛି ଲୋକଙ୍କୁ ହଟାଇବା ପାଇଁ ପୋଲିସକୁ ହାଲୁକା ଲାଠିଚାର୍ଜ ମଧ୍ୟ କରିଛି ।

ଅଧିକ ଖବର ପଢନ୍ତୁ...