କ୍ରିକେଟ୍ ନ୍ୟୁଜ୍: ପାକିସ୍ତାନ ଜାଲରେ ଫଶିଗଲା ବାଂଲାଦେଶ । ଆଇସିସି ବିରୋଧରେ ପଡ଼ୋଶୀ ଦେଶକୁ ଉସକାଇଲା, ଆଉ ଶେଷରେ ପାକିସ୍ତାନ ହାତ ଛାଡ଼ିଦେଲା । ଫେବ୍ରୁଆରୀ ୭ରୁ ଆରମ୍ଭ ହୋଇଛି ଟି-୨୦ ବିଶ୍ବକପ୍ । ଚଳିତ ଥର ଭାରତ ଓ ଶ୍ରୀଲଙ୍କା ମିଳିତ ଭାବେ ଏହି ଟୁର୍ଣ୍ଣାମେଣ୍ଟ ଆୟୋଜିତ କରୁଛି । କିନ୍ତୁ ଏହି ବିଶ୍ବକପ୍‌ରେ ଖେଳଠୁ ଅଧିକ ବିବାଦ ଦେଖିବାକୁ ମିଳିଛି । ପ୍ରଥମେ ବାଂଲାଦେଶ ଆଉ ପରେ ପାକିସ୍ତାନ ଏହି ବିବାଦର ମଞ୍ଜି ପକାଇଥିଲା । ଟି-୨୦ ବିଶ୍ବକପ୍ ପୂର୍ବରୁ ପୂର୍ବରୁ ବାଂଲାଦେଶ ଏବଂ ଆଇସିସି ମଧ୍ୟରେ ପ୍ରାୟ ୩ ସପ୍ତାହ ଧରି ଉତ୍ତେଜନା ଲାଗି ରହିଥିଲା । ଶେଷରେ ଆଇସିସି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରି ବାଂଲାଦେଶକୁ ବହିଷ୍କାର କରିଥିଲା, ଯାହା ଫଳରେ ସ୍କଟଲାଣ୍ଡକୁ ବିଶ୍ୱକପରେ ଖେଳିବାର ସୁଯୋଗ ମିଳିଛି ।

କିନ୍ତୁ ଏହି ସମ୍ପୂର୍ଣ୍ଣ ଘଟଣାକୁ ଭଲ ଭାବରେ ଦେଖିଲେ ପାକିସ୍ତାନର ଏକ ଷଡ଼ଯନ୍ତ୍ର ସାମ୍ନାକୁ ଆସୁଛି । ପାକିସ୍ତାନ ଏକମାତ୍ର ଦେଶ ଥିଲା ଯିଏ ବାଂଲାଦେଶକୁ ଆଇସିସି ବିରୋଧରେ ଯିବା ପାଇଁ ଉସୁକାଇଥିଲା ଏବଂ ସେମାନଙ୍କୁ ଆଇସିସି ବିରୁଦ୍ଧରେ ଠିଆ କରିଥିଲା । ପାକିସ୍ତାନ ଅଯଥାରେ ଏହି ପ୍ରସଙ୍ଗକୁ ବଢ଼ାଇ ଦେଇଥିଲା ।
ବିଶ୍ବକପ୍ ବିବାଦ BCCI ଦ୍ବାରା IPL ଦଳ କେକେଆରରୁ ବାଂଲାଦେଶୀ ଦ୍ରୁତ ବୋଲର ମୁସ୍ତାଫିଜୁର ରହମାନଙ୍କୁ ରିଲିଜ୍‌ କରିବା ନିଷ୍ପତ୍ତି ପରେ ଆରମ୍ଭ ହୋଇଥିଲା । ଏହା ପରେ ବାଂଲାଦେଶ କ୍ରିକେଟ୍ ବୋର୍ଡ ICCକୁ ଏକ ଚିଠି ଲେଖି ଭାରତ ବଦଳରେ ସେମାନଙ୍କର ବିଶ୍ବକପ୍ ମ୍ୟାଚ୍ ଶ୍ରୀଲଙ୍କାକୁ ସ୍ଥାନାନ୍ତର କରିବାକୁ ଦାବି କରିଥିଲା ।

ବାଂଲାଦେଶର ଏହି ପଦକ୍ଷେପ ପରେ ଏହି ବିବାଦ ଭିତରକୁ ପଶିଥିଲା ପାକିସ୍ତାନ । ବିବାଦକୁ ସମ୍ପୂର୍ଣ୍ଣ ନ ବୁଝି ପାକିସ୍ତାନ ବାଂଲାଦେଶକୁ ସମର୍ଥନ କରିଥିଲା ଏବଂ ଏହାକୁ ଉସୁକାଇବା ଆରମ୍ଭ କରିଥିଲା । ପାକିସ୍ତାନ କହିଥିଲା ଯେ ସେ ନିଜ ଦେଶରେ ବାଂଲାଦେଶର ଗ୍ରୁପ୍ ମ୍ୟାଚ୍ ଆୟୋଜନ କରିବାକୁ ଇଚ୍ଛୁକ । ଏହାସହ ବାଂଲାଦେଶର ଦାବିକୁ କର୍ଣ୍ଣପାତ କରିବାକୁ ICCକୁ ମଧ୍ୟ ନିବେଦନ କରିଥିଲା ।

କେବଳ ଏତିକି ନୁହେଁ ବାଂଲାଦେଶ ପ୍ରତି ସହାନୁଭୂତି ପ୍ରକାଶ କରିବା ପାଇଁ ପାକିସ୍ତାନ ମୁସ୍ତାଫିଜୁର ରହମାନଙ୍କୁ PSLରେ ଖେଳିବାକୁ ଅନୁମତି ଦେଇଥିଲା । ଏହା ପରେ ପାକିସ୍ତାନ ICC ଏବଂ BCCI ବିରୁଦ୍ଧରେ ନିଜର ବୟାନବାଜିକୁ ତୀବ୍ର କରିଥିଲା । PCB ଅଧ୍ୟକ୍ଷ ମୋହସିନ ନକଭି ମଧ୍ୟ ବିବାଦରେ ଡେଇଁ ପଡ଼ିଥିଲେ ।

ପାକିସ୍ତାନର ଷଡ଼ଯନ୍ତ୍ରକୁ ବୁଝି ନପାରି ବାଂଲାଦେଶ ଏହାର ଫାଶରେ ପଡ଼ିଗଲା। ପାକିସ୍ତାନ ବାରମ୍ବାର ଦୋହରାଇଲା ଯେ ସେ ନିଜ ଦେଶରେ ମ୍ୟାଚ୍ ଆୟୋଜନ କରିବାକୁ ଇଚ୍ଛୁକ ଏବଂ ବାଂଲାଦେଶ ସହିତ ଦୃଢ଼ ଭାବରେ ଠିଆ ହୋଇଛି । ଏହି ସମୟରେ, ବାଂଲାଦେଶ ଖୋଲାଖୋଲି ଭାବରେ ICକୁ ଅବମାନନା କରିଥିଲା ଏବଂ ଏହାର ଦାବିକୁ ମାନିବାକୁ ମନା କରିଥିଲା ।

ପଢ଼ନ୍ତୁ ଏହି ଖବର: ଟି-୨୦ ବିଶ୍ଵକପ୍ ୨୦୨୬; ଖେଳାଳିଙ୍କୁ ପରିବାରଠୁ ଦୂରେଇଲା BCCI

ଏହି ବିବାଦ ବୃଦ୍ଧି ପାଉଥିବା ଦେଖି ICC ଏକ ଚୂଡ଼ାନ୍ତ ବୈଠକ ଡାକିଥିଲା । ଏହି ବୈଠକ ପୂର୍ବରୁ ICC ବାଂଲାଦେଶକୁ ସ୍ପଷ୍ଟ ଭାବରେ କହିଥିଲା ଯେ ସୁରକ୍ଷାକୁ ନେଇ କୌଣସି ବିପଦ ନାହିଁ । ତେଣୁ ବାଂଲାଦେଶକୁ ଭାରତରେ ମ୍ୟାଚ୍ ଖେଳିବାକୁ ପଡିବ ।

କିନ୍ତୁ ଯେତେବେଳେ ବୈଠକ ହୋଇଥିଲା କେବଳ ପାକିସ୍ତାନ ବାଂଲାଦେଶକୁ ସମର୍ଥନ କରିଥିଲା । ବାକି ୧୪ ଭୋଟ ICCର ନିଷ୍ପତ୍ତି ସପକ୍ଷରେ ପଡ଼ିଥିଲା । ଏହା ନିଶ୍ଚିତ କରିଥିଲା ଯେ ବାଂଲାଦେଶ ଆଉ ବିଶ୍ବକପର ଅଂଶ ରହିବ ନାହିଁ ଏବଂ ସ୍କଟଲାଣ୍ଡକୁ ସୁଯୋଗ ଦିଆଯିବ ।

ବାଂଲାଦେଶ ICC ଠାରୁ ଝଟକା ପାଇବା ପରେ ପାକିସ୍ତାନ ମଧ୍ୟ ICC ଉପରେ କଟାକ୍ଷ କରିଥିଲା । ଏହାସହ ବିଶ୍ବକପ୍ ବର୍ଜନ କରିବାକୁ ମଧ୍ୟ ଧମକ ଦେଇଥିଲା । କିନ୍ତୁ ICC ନିଜ ମତରେ ଅଟଳ ରହିଥିଲା । ICC ସ୍ପଷ୍ଟ ଭାବରେ କହିଥିଲା ଯେ ଯଦି ପାକିସ୍ତାନ ବିଶ୍ବକପ୍ ବର୍ଜନ କରିବାକୁ ସାହସ କରେ, ତେବେ ତା' ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ICC କହିଥିଲା ଯେ ପାକିସ୍ତାନ ଏହାର ଦ୍ବିପାକ୍ଷିତ ସିରିଜ୍‌ ଏବଂ PSL ବିରୋଧରେ କାର୍ଯ୍ୟାନୁଷ୍ଠାନ ସମେତ ଅନେକ ଦଣ୍ଡବିଧାନର ସମ୍ମୁଖୀନ ହେବ । ପାକିସ୍ତାନ ମଧ୍ୟ ଆର୍ଥିକ କ୍ଷତି ସହିବ । ICCର ଚରମବାଣୀର କିଛି ଘଣ୍ଟା ମଧ୍ୟରେ ବର୍ଜନ ଧମକ ଦେଉଥିବା ପାକିସ୍ତାନ ଶେଷରେ ବିଶ୍ବକପ୍ ପାଇଁ ତା'ର ଦଳ ଘୋଷଣା କରିଥିଲା । କିନ୍ତୁ ଏତିକିରେ ପାକିସ୍ତାନର ମନ ଭରିନଥିଲା । ବିଶ୍ବସ୍ତରରେ ଆହୁରି ବେଜ୍ଜିତ ହେବାକୁ ଚାହୁଁଥିଲା ପାକିସ୍ତାନ । ଆଉ ଏତେ ସବୁ ପରେ ପାକିସ୍ତାନ ଶେଷରେ କହିଥିଲା ବିଶ୍ବକପ୍ ଖେଳିବ କିନ୍ତୁ ଫେବ୍ରୁଆର ୧୫ରେ ଭାରତ ବିପକ୍ଷରେ ଖେଳାଯିବାକୁ ଥିବା ମ୍ୟାଚ୍‌ ଖେଳିବନି। ଏମିତିକି ପାକ୍‌ ପ୍ରଧାନମନ୍ତ୍ରୀ ମଧ୍ୟ ଏନେଇ ସୋସିଆଲ ମିଡିଆରେ କହିଥିଲେ । ବାଂଲାଦେଶ ସହ ଠିଆ ହୋଇ ଏହି ନିଷ୍ପତ୍ତି ନିଆଯାଇଛି ବୋଲି ସେତେବେଳେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ୍‌ କହିଥିଲେ । ଆଉ ଏହା ପରେ ଆଇସିସି ପୁଣି ଥରେ ପାକିସ୍ତାନକୁ ଚେତବାନୀ ଦେଇଥିଲା । ଯଦି ଭାରତ ବିପକ୍ଷ ମ୍ୟାଚ୍‌ ନ ଖେଳେ ତେବେ ତାଙ୍କୁ ଆଇସିସି ତରଫରୁ ଦିଆଯାଉଥିବା ମୋଟା ଅଙ୍କର ଟଙ୍କା ଆଉ ମିଳିବନି । ଏଥିସହ ବ୍ରଡକାଷ୍ଟର ପିସିବି ବିରୋଧରେ କୋର୍ଟକୁ ଯିବାକୁ ମଧ୍ୟ କହିଥିଲେ । ଆଉ ଶେଷରେ ପାକିସ୍ତାନ ଆଇସିସି ସାମ୍ନାରେ ମୁଣ୍ଡ ନୁଆଁଇଥିଲା । ଆଉ ଭାରତ ସହ ଫେବ୍ରୁଆରୀ ୧୫ରେ କଲମ୍ବୋରେ ହେବାକୁ ଥିବା ମ୍ୟାଚ୍‌ ଖେଳିବାକୁ ରାଜି ହୋଇଥିଲା ।

ପଢ଼ନ୍ତୁ ଏହି ଖବର: ICCର ଅଲ୍ଟିମେଟମ୍ ପରେ ନଇଁଲା ପାକିସ୍ତାନ, ଭାରତ ସହ ଖେଳିବ ଟି-ଟ୍ଵେଣ୍ଟି ବିଶ୍ଵକପ୍

ବିଶ୍ବକପ୍ ବର୍ଜନ ଏବଂ ICC ଉପରେ ଚାପ ସୃଷ୍ଟି କରିବାରେ ବାଂଲାଦେଶ ସହିତ ରହିବ ବୋଲି ଆଶ୍ବାସନା ଦେଇଥିବା ପାକିସ୍ତାନ ଶେଷରେ ଅକଳରେ ପଡ଼ିଥିଲା । ଆଉ ଶେଷରେ ସେ ବାଂଲାଦେଶର ହାତ ଛାଡ଼ି ଦେଇଥିଲା । ଏହି ବିବାଦରେ ପାକିସ୍ତାନ ଭାରତର ପ୍ରତିଷ୍ଠାକୁ କ୍ଷତି ପହଞ୍ଚାଇବା ଏବଂ ନିଜର ଲାଭ ପାଇବା ପାଇଁ ଯଥାସମ୍ଭବ ଚେଷ୍ଟା କରିଥିଲା । କିନ୍ତୁ ICC ଏହାକୁ ବିଫଳ କରିଥିଲା । ଶେଷରେ ପାକିସ୍ତାନର ପଦକ୍ଷେପ କେବଳ ବାଂଲାଦେଶକୁ କ୍ଷତି ପହଞ୍ଚାଇଥିଲା, ବାଂଲାଦେଶ ଖେଳାଳିଙ୍କ ବିଶ୍ବକପ୍‌ ଖେଳିବା ସ୍ବପ୍ନ ଭାଙ୍ଗି ଯାଇଥିଲା ।