Argus News - ସାବଧାନ ! କେବଳ ଗୋଟିଏ ଭୁଲ ଖୋଲିଦେବ ଆପଣଙ୍କ ହ୍ଵାଟ୍ସଆପ୍ ଚାଟ୍

ମେଟାର ଲୋକପ୍ରିୟ ଇନଷ୍ଟାଣ୍ଟ ମେସେଜିଂ ପ୍ଲାଟଫର୍ମ ହ୍ଵାଟ୍ସଆପ୍‌ ଏବେ ଏକ ପ୍ରମୁଖ ମେସେଜିଂ ଟୁଲ୍ ପାଲଟିଛି । ବ୍ୟକ୍ତିଗତ ବାର୍ତ୍ତାଳାପ ହେଉ ଅବା ଅଫିସ କାମ, ଯୋଗାଯୋଗ ଲାଗି ଏବେ ଅଧିକାଂଶ ସୋସିଆଲ ମିଡିଆ ୟୁଜର ହ୍ଵାଟ୍ସଆପ୍ ଉପରେ ନିର୍ଭର କରୁଛନ୍ତି । ଫଟୋଠୁ ଆରମ୍ଭ କରି ଭିଡିଓ, ଡକ୍ୟୁମେଣ୍ଟ ସବୁକିଛି ୟୁଜର ଏଥିରେ ସେୟାର କରୁଛନ୍ତି । ଏଥିରେ ୟୁଜରଙ୍କ ଅନେକ ଜରୁରୀ ତଥ୍ୟ ମଧ୍ୟ ରହୁଛି । ଏଣୁ ହ୍ଵାଟ୍ସଆପ୍ ବ୍ୟବହାର କରିବା ସମୟରେ ସର୍ବଦା ସତର୍କ ରହିବା ଆବଶ୍ୟକ । ନଚେତ ଆପଣଙ୍କ ଗୋପନୀୟତା ଉପରେ ଆଞ୍ଚ ଆସିପାରେ । ଆପଣଙ୍କ ବ୍ୟକ୍ତିଗତ ତଥ୍ୟକୁ ଚୋରି କରିପାରନ୍ତି ହ୍ୟାକର୍ସ ।

• ଆପଣଙ୍କ ଚାଟ୍ କେହି ପଢୁନାହାନ୍ତି ତ ?

ଆଜିକାଲି ସାଇବର ଠକମାନେ ସ୍ମାର୍ଟ ଉପାୟରେ ମୋବାଇଲକୁ ହ୍ୟାକ୍ କରୁଛନ୍ତି । ସାଧାରଣ ଲୋକଟିଏ ଯେତେ ସଜାଗ ରହିଲେ ମଧ୍ୟ ନିଜ ଅଜାଣତା ବା ଅସାବଧାନତା ଯୋଗୁଁ ସାଇବର ଠକଙ୍କ ଜାଲରେ ପଡୁଥିବା ନଜିର ରହିଛି । ଏଭଳି ସ୍ଥିତିରେ ମନକୁ ପ୍ରଶ୍ନ ଆସେ ଯେ ଆମ ବ୍ୟକ୍ତିଗତ ହ୍ଵାଟ୍ସଆପ୍ ଚାଟ୍ କେହି ପଢୁନାହାନ୍ତି ତ ? ବେଳେବେଳେ ଫୋନ ବିନା କାରଣରେ ଧୀର ହୋଇଯାଏ । ଆଉ କେତେବେଳେ ବ୍ୟାଟେରୀ ଦ୍ରୁତ ଗତିରେ ସରିଯାଏ । ଏପରି ସ୍ଥିତିରେ ବ୍ୟବହାରକାରୀଙ୍କ ମନରେ ପ୍ରଶ୍ନ ଆସେ ଯେ ଆମ ଫୋନ ହ୍ୟାକ୍ ହୋଇଯାଇନି ତ ? ଏଥିଲାଗି ସାବଧାନ ରହିବା ଉଚିତ ।

ପଢନ୍ତୁ ଏହି ଖବର: ମାଗଣା ୱାଇ-ଫାଇ ଲୋଭ ହୋଇପାରେ ଘାତକ; ଫୋନରେ ଖୋଲିଯିବ ଏହିସବୁ

ସର୍ବପ୍ରଥମେ ଏହା ବୁଝିବା ଆବଶ୍ୟକ ଯେ ହ୍ଵାଟ୍ସଆପ୍‌ରେ ଏଣ୍ଡ-ଟୁ-ଏଣ୍ଡ ଏନକ୍ରିପସନ (E2EE) ରହିଛି । ଏହାର ଅର୍ଥ ହେଉଛି ଯେ ଆପଣଙ୍କ ମେସେଜ ମଧ୍ୟରେ କେହି ତୃତୀୟ ବ୍ୟକ୍ତି ଆସିପାରିବ ନାହିଁ । ଚାଟ୍ ଆପଣ ଓ ରିସିଭରଙ୍କ ଭିତରେ ରହିବ । କିନ୍ତୁ ଏହାର ଅର୍ଥ ନୁହେଁ ଯେ ସର୍ବଦା ଆପଣଙ୍କ ଚାଟ୍ ସୁରକ୍ଷିତ । ଯଦି ଆପଣ ହ୍ଵାଟ୍ସଆପ୍ ୱେବ୍ ବା ଡେସ୍କଟପ୍‌ରେ ହ୍ଵାଟ୍ସଆପ୍ ବ୍ୟବହାର କରୁଛନ୍ତି ଏବଂ ଲଗ୍ ଆଉଟ୍ କରୁନାହାନ୍ତି ତେବେ ତାହା ବଡ଼ ବିପଦ ହୋଇପାରେ । ଆପଣଙ୍କ ଆକାଉଣ୍ଟକୁ ଯାଇ କେହି ଅନ୍ୟ ବ୍ୟକ୍ତି ଆପଣଙ୍କ ଚାଟ୍‌କୁ ପଢିପାରିବ । ଏଣୁ ଅନ୍ୟ ଡିଭାଇସରେ ହ୍ଵାଟ୍ସଆପ୍‌ ଖୋଲୁଥିଲେ ଏହାକୁ ଲଗ୍ ଆଉଟ୍ କରିବାକୁ ଆଦୌ ଭୁଲନ୍ତୁ ନାହିଁ । ନଚେତ୍ ଆପଣଙ୍କ ବ୍ୟକ୍ତିଗତ ଚାଟ୍ ଚୋରି ହୋଇପାରେ ।

• WhatsApp ଚାଟ୍‌ର କ୍ଲାଉଡ୍ ବ୍ୟାକଅପ୍‌

ଆଉ ଏକ ବଡ଼ ବିପଦ ହେଉଛି କ୍ଲାଉଡ୍‌ ବ୍ୟାକଅପ୍ । ଅନେକ ଲୋକ ନିଜ ହ୍ଵାଟ୍ସଆପ୍‌ ଚାଟ୍‌ର ବ୍ୟାକଅପ୍‌କୁ Google Drive ବା iCloudରେ ରଖିଥାନ୍ତି । ଯଦି ଆପଣଙ୍କ ଇମେଲ୍ ଆକାଉଣ୍ଟ ବା କ୍ଲାଉଡ୍‌ ଆକାଉଣ୍ଟ ହ୍ୟାକ୍ ହୋଇଯାଉଛି, ତେବେ ଆପଣଙ୍କ ଚାଟ୍‌ର ବ୍ୟାକଅପ୍‌ ବି ସାଇବର ଠକଙ୍କ ହାତକୁ ଚାଲିଯାଇପାରେ । ଏହା ସିଧାସଳଖ ଆପଣଙ୍କ ହ୍ଵାଟ୍ସଆପ୍‌ ହ୍ୟାକ୍‌ ହୋଇଛି ବୋଲି ଆମେ କହିପାରିବା ନାହିଁ, କିନ୍ତୁ ପରିଶେଷରେ ଆପଣଙ୍କ ବ୍ୟକ୍ତିଗତ ଚାଟ୍‌ ଲିକ୍‌ ହୋଇପାରେ । ଏଥିଲାଗି କେବଳ ହ୍ଵାଟ୍ସଆପ୍‌କୁ ସୁରକ୍ଷିତ ରଖିବା ବଦଳରେ ଆପଣଙ୍କ ଇମେଲ୍‌ ଓ କ୍ଲାଉଡ୍‌ ଆକାଉଣ୍ଟକୁ ବି ସୁରକ୍ଷିତ ରଖିବା ଉପରେ ଧ୍ୟାନ ଦିଅନ୍ତୁ । ହ୍ଵାଟ୍ସଆପ୍‌ କ୍ଲାଉଡ୍‌ ବ୍ୟାକଅପ୍‌ ଲାଗି ମଧ୍ୟ ଏଣ୍ଡ-ଟୁ-ଏଣ୍ଡ ଏନକ୍ରିପସନ ଅପସନ ରହିଥାଏ ।

• କେମିତି ରହିବେ ସୁରକ୍ଷିତ ?

ଅନେକ ସମୟରେ ଆପଣଙ୍କ ମୋବାଇଲରେ ତଥ୍ୟ ଚୋରି କରୁଥିବା ସଫ୍ଟୱେର ଇନଷ୍ଟଲ୍ ହୋଇଯାଏ । ଏହା କୌଣସି ଥାର୍ଡପାର୍ଟି ୱେବସାଇଟ୍‌ ଖୋଲିବା ବେଳେ ହୋଇପାରେ । ଯଦି ଆପଣଙ୍କ ଫୋନ ହଠାତ୍ ଅଧିକ ଗରମ ହୋଇଯାଉଛି ବା ବିନା ବ୍ୟବହାର କରି ବ୍ୟାଟେରୀ ସରିଯାଉଛି, ତେବେ ଏହାକୁ ଭୁଲରେ ଅଣଦେଖା କରନ୍ତୁ ନାହିଁ । କେହି ଆପଣଙ୍କ ଅଜାଣତରେ ଆପଣଙ୍କ ତଥ୍ୟକୁ ଚୋରି କରିଥାଇପାରେ । ତୁରନ୍ତ ଉକ୍ତ ମାଲୱେରକୁ ହଟାଇବା ଲାଗି ଫୋନରେ ସୁରକ୍ଷା ସ୍କାନ୍ କରନ୍ତୁ ।

ଏଥିସହ ପଢନ୍ତୁ: ଅନଲାଇନରେ ନକଲି ଶାଢୀ ଚିହ୍ନିବ 'ଧରୋହର'; QR କୋଡ୍ କହିବ ପ୍ରଡକ୍ଟର ମାନ