Argus News - ମହେନ୍ଦ୍ରଗିରି ବୁଲିବାକୁ ଯାଇ ଫସିଲେ ୩୦ରୁ ଅଧିକ ପର୍ଯ୍ୟଟକ, ଉଦ୍ଧାର ପାଇଁ ଉଦ୍ୟମ ଜାରି

ପାରଳାଖେମୁଣ୍ଡି: ଅବପାତ ବର୍ଷା ଓ ଭୂସ୍ଖଳନକୁ ନେଇ ବେହାଲ୍ ଗଜପତି ଜିଲ୍ଲା । ଜିଲ୍ଲା ସାରା ପ୍ରକୃତିର ତାଣ୍ଡବ ଦେଖିବାକୁ ମିଳିଛି । ରାୟଗଡ଼ ବ୍ଲକ ପେକଟରେ ହୋଇଥିବା ଭୂସ୍ଖଳରେ ବାପପୁଅ ଚାପି ହୋଇ ରହିଥିବା ବେଳେ ମହେନ୍ଦ୍ରଗିରିରେ ଫସିଛନ୍ତି ୩୦ରୁ ଅଧିକ ପର୍ଯ୍ୟଟକ ।

ସୂଚନା ଅନୁସାରେ, କଟକ ଓ ଭୁବନେଶ୍ଵର ଅଞ୍ଚଳର ୩୦ରୁ ଅଧିକ ପର୍ଯ୍ୟକ ମହେନ୍ଦ୍ରଗିରି ବୁଲିବାକୁ ଆସିଥିଲେ । ପର୍ଯ୍ୟଟକ ମହେନ୍ଦ୍ରଗିରି ପହଞ୍ଚିବା ସମୟରେ ବୁରୁଖତ ନିକଟସ୍ଥ ଏକ ବୁଲାଣିରେ ଭୂସ୍ଖଳନ ହୋଇ ମାଟି ଅତଡ଼ା ଧସିଥିଲା । ଫଳରେ ଉକ୍ତ ରାସ୍ତାରେ ଯାତାୟାତ ଠପ୍ ହୋଇ ପଡ଼ିଛି ।

ଏଥିସହ ପଢ଼ନ୍ତୁ: ଭୂସ୍ଖଳନ ପରେ ମାଟି ତଳେ ବାପପୁଅ ଚାପି ହୋଇ ରହିଥିବା ସନ୍ଦେହ

ଫଳରେ ପ୍ରବଳ ବର୍ଷା ଲାଗି ରହିଥିବା ବେଳେ ପର୍ଯ୍ୟଟକ ସେଠାରୁ ଆଗକୁ ବଢ଼ି ପାରୁନାହାନ୍ତି । ଘଟଣାସ୍ଥଳରେ ଗାରାବନ୍ଧ ପୋଲିସ ପହଞ୍ଚି ରାସ୍ତା ସଫା କରି ପର୍ଯ୍ୟଟକଙ୍କୁ ଉଦ୍ଧାର ପାଇଁ ପ୍ରୟାସ କରୁଛି । ଫସି ରହିଥିବା ପର୍ଯ୍ୟଟକଙ୍କୁ ପୋଲିସ ଶୁଖିଲା ଖାଦ୍ୟ ପ୍ରଦାନ କରିଛି ।

ମିଳିଥିବା ସୂଚନା ଅନୁସାରେ, ଫସିଥିବା ପର୍ଯ୍ୟଟକଙ୍କୁ ପ୍ରଶାସନ ମହେନ୍ଦ୍ରଗିରିରେ ଥିବା ବନ ବିଭାଗର ୱାଚ୍ ଟାୱାର ଓ କଟେଜରେ ଆଶ୍ରୟ ଦେଇଛି । ରାସ୍ତା ସଫା ହେବା ପରେ ପର୍ଯ୍ୟଟକ ଫେରି ପାରିବେ ।

ଏଥିସହ ପଢ଼ନ୍ତୁ: ସ୍ଥଳଭାଗ ଛୁଇଁଲା ଗଭୀର ଅବପାତ, ଦକ୍ଷିଣରୁ ନେଇ ଉତ୍ତର ଓଡ଼ିଶାରେ ରାତି ସାରା ବର୍ଷିବ

ସେପଟେ ରାୟଗଡ଼ ବ୍ଲକ ପେକଟ ନିକଟରେ ଭୂସ୍ଖଳନ ହୋଇଛି । ଭୂସ୍ଖଳନ ପରେ ମାଟି ତଳେ ବାପପୁଅ ଚାପି ହୋଇ ରହିଥିବା ଆଶଙ୍କା କରାଯାଉଛି । ପେକଟ ଗାଁର ୭୦ ବର୍ଷୀୟ କାର୍ତ୍ତିକ ଶବର ଓ ପୁଅ ରାଜିକ ଶବର ଚାଷଜମିକୁ ଯାଇଥିଲେ । ଆଉ ଜମିରୁ ଘରକୁ ଫେରିବା ସମୟରେ ବର୍ଷା ହେଉଥିବା ବେଳେ ଗଛ ତଳେ ସାହାରା ନେଇଥିଲେ । ସେହି ସମୟରେ ଭୂସ୍ଖଳନ ହୋଇଥିଲା ।

ଭୂସ୍ଖଳନ ପରେ ବାପପୁଅ ଚାପି ହୋଇ ରହିଥିବା ଖବର ପ୍ରଚାରିତ ହେବା ପରେ ଅଗ୍ନିଶମ ବାହିନୀ ପହଞ୍ଚି ଉଦ୍ଧାର ପାଇଁ ପ୍ରୟାସ କରୁଛି । ସନ୍ଧ୍ୟା ହୋଇ ଯାଇଥିବାରୁ ଉଦ୍ଧାର କାର୍ଯ୍ୟରେ ବାଧା ଉପୁଜିଛି । ଭୂସ୍ଖଳନ ଯୋଗୁଁ ରାୟଗଡ଼ ଠାରୁ ନୂଆଗଡ଼ ଓ ରା.ଊଦୟଗିରି ବ୍ଲକ ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇ ଯାଇଛି ।

ଏଥିସହ ପଢ଼ନ୍ତୁ: ଦଶହରାରେ ରକ୍ତମୁଖା ହେଲା ABDO ସ୍ଵାମୀ, ଦା'ରେ କାଟି ଦେଲା ସ୍ତ୍ରୀର ବେକ

ସେପଟେ ଗଜପତି ଜିଲ୍ଲାକୁ ଲାଗି ରହିଥିବା ରାୟଗଡ଼ା ଜିଲ୍ଲାରେ ବି ସମାନ ସ୍ଥିତି ଦେଖିବାକୁ ମିଳିଛି । ଲଗାଣ ଭାଲୁମୁଷ୍କା ଓ ଲେଲିଗୁମ୍ମା ରେଳ ଟ୍ରାକ ଉପରେ ପାଣି ସୁଅ ଚାଲୁଥିବା ବେଳେ ଗଛ ପଡ଼ିଛି । ଫଳରେ କୋରାପୁଟକୁ ବାଧାପ୍ରାପ୍ତ ହୋଇଛି ଟ୍ରେନ୍ ଚଳାଚଳ । ପ୍ରବଳ ବର୍ଷା ଲାଗି ରହିଥିବାରୁ ପୁନରୁଦ୍ଧାର କାର୍ଯ୍ୟ ବାଧାପ୍ରାପ୍ତ ହେଉଛି ।