ଅର୍ଗସ ବ୍ୟୁରୋ : ୧୪ ଦିନ ପରେ ଗାଁକୁ ଫେରିଲା ମୃତଦେହ । ଦାଦନ ଖଟିବାକୁ ଯାଇ ବିଦେଶରେ ଜୀବନ ହାରିଥିବା ଗଞ୍ଜାମ ଜିଲ୍ଲାର ଖଲ୍ଲିକୋଟ ବ୍ଲକ ଅନ୍ତର୍ଗତ ବାଗଲପୁର ଗ୍ରାମର କାର୍ତିକ ପ୍ରଧାନଙ୍କ ଏକ ମାତ୍ର ରୋଜଗାରିଆ ପୁଅ ସାଗର ପ୍ରଧାନଙ୍କ ଶବ ଭିଟା ମାଟିକୁ ଫେରିଛି । ତାର ମୃତ ଦେହକୁ ଭିଟାମାଟିକୁ ଫେରାଇ ଆଣିବା ପାଇଁ ଅର୍ଗସରେ ପ୍ରଥମେ ଓ ବାରମ୍ବାର ଖବର ପ୍ରସାରଣ କରାଯାଇଥିଲା । ଦୀର୍ଘ ୧୪ ଦିନ ପରେ ଗାଁରେ ଆସି ପହଞ୍ଚିଲା ମୃତ ଶରୀର । ଆଉ ମୃତଦେହ ଗାଁରେ ପହଁଞ୍ଚିବା ପରେ ବାଗଲପୁର ଶ୍ମଶାନରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଥିଲା । କାନ୍ଦ ବୋବାଳିରେ ଫାଟି ପଡୁଥିଲା ଗାଁ ଶ୍ମଶାନ।
ଏ ତ କେବଳ ମୁଖ୍ୟମନ୍ତ୍ରୀଙ୍କ ନିଜ ଜିଲ୍ଲା ଗଞ୍ଜାମର କଥା । ଉପକୂଳ ଜିଲ୍ଲା କେନ୍ଦ୍ରାପଡାର ମହାକାଳପଡା ନିର୍ବାଚନ ମଣ୍ଡଳୀର କଥା । ଆଉ ଏଠି ଦାଦନ ଖଟିବାକୁ ଯାଇ ସୁରଟରେ ପଡ଼ି ରହିଛି ସ୍ୱାମୀର ମୃତ ଦେହ । ଆଉ ମୃତ ଶରୀରକୁ ଫେରାଇ ଆଣିବାକୁ ସ୍ତ୍ରୀର ଆକୁଳ ନିବେଦନ । ମୃତକ ହେଲେ କେନ୍ଦ୍ରାପଡା ଜିଲ୍ଲା ମହାକାଳପଡ଼ା ବ୍ଲକ ବଡକୁଳ ପଞ୍ଚାୟତର ବେନୁପାଳ ଗାଁର, ସ୍ୱର୍ଗତ ବଟ ସ୍ୱାଇଁଙ୍କ ଏକ ମାତ୍ର ପୁଅ ସଞ୍ଜୟ ସ୍ୱାଇଁ । ଦାଦନ ଖଟିବାକୁ ସୁଦୂର ଗୁଜୁରାଟର ସୁରାଟର ଏକ ସୁତା ମିଲରେ କାମ କରି ପରିବାର ପ୍ରତି ପୋଷଣ କରୁଥଲେ । ଆଉ ସଞ୍ଜୟର ମୃତ୍ୟ ପରେ ତାଙ୍କ ଶବ ଫେରାଇ ଆଣିବା ଆକୁଳ ନିବେଦନ କରିଛନ୍ତି ପରିବାର ଲୋକେ ।
ଅଧିକ ପଢନ୍ତୁ ଓଡ଼ିଶା ଖବର
ସେପଟେ ଗାଁ ଗାଁରେ କରାଯାଉଛି ମୁଖ୍ୟମନ୍ତ୍ରୀଙ୍କ ପ୍ରାର୍ଥୀଙ୍କୁ ବିରୋଧ । ଗଞ୍ଜାମରୁ ଆସିଛି ବଦଳୁଥିବା ଓଡିଶାର ରାଜନୀତି ଚିତ୍ର । ପୁଣି ହଟ୍ଟହଟ୍ଟା ହୋଇଛନ୍ତି ଖଲ୍ଲିକୋଟ ବିଧାୟିକା ସୂର୍ଯ୍ୟମଣି ବୈଦ୍ୟ । ଖଲ୍ଲିକୋଟ ନିର୍ବାଚନ ମଣ୍ଡଳୀରେ ବିଜେଡିରୁ ପୁଣି ପ୍ରାର୍ଥୀ ହୋଇଥିବା ସୂର୍ଯ୍ୟମଣି ବୈଦ୍ୟଙ୍କୁ ପାଣି ପାଇଁ କରାଯାଇଛି ବିରୋଧ । ଖଲ୍ଲିକୋଟ ନିର୍ବାଚନୀ ମଣ୍ଡଳୀର ପୁରୁଷୋତ୍ତମପୁର ବ୍ଲକ ଅନ୍ତର୍ଗତ ଭାଟକୁମରଡ଼ା ଗ୍ରାମକୁ ପ୍ରଚାର ନିମନ୍ତେ ଯାଇଥିଲେ ବିଧାୟିକା ପ୍ରାର୍ଥିନୀ । ହେଲେ ଗ୍ରାମର ବହୁ ମହିଳା ଓ ପୁରୁଷ ମାନେ ରାସ୍ତାରେ ମାଠିଆ ବାଲ୍ଟି ରଖି ପ୍ରତିବାଦ କରିଥିଲେ । ଗ୍ରାମର କୁମ୍ଭାର ସାହି ଛକ ଓ ବଡ଼ ସାହି ଛକ ନିକଟରେ ଏପରି ପ୍ରତିବାଦ କରିଥିବା ଦେଖିବାକୁ ମିଳିଛି। ବିଧାୟିକାଙ୍କୁ ଲୋକେ କରିଥିଲେ ପ୍ରଶ୍ନ ।