ଅର୍ଗସ ବ୍ୟୁରୋ : ଆରମ୍ଭ ହୋଇଛି ନବଗଠିତ ସପ୍ତଦଶ ବିଧାନସଭାର ପ୍ରଥମ ଅଧିବେଶନ । ଅଭିଭାଷଣରେ ନୂଆ, ଆଧୁନିକ ଓ ବିକଶିତ ଓଡିଶାର ଚିତ୍ର ଦେଖାଇଛନ୍ତି ରାଜ୍ୟପାଳ । ଗରିବ, ମହିଳା, କୃଷକ ଓ ଯୁବକଙ୍କ ବିକାଶ ପାଇଁ ଲମ୍ବା ଖସଡା ପ୍ରସ୍ତୁତ କରିଛନ୍ତି ରାଜ୍ୟ ସରକାର । ମହିଳା ଭୂମିହୀନ କୃଷକ ମାନଙ୍କୁ ପ୍ରୋତ୍ସାହିତ କରିବେ ସରକାର । ବଲାଙ୍ଗୀର, କଳାହାଣ୍ଡ, ବରଗଡ଼ ଓ ନୂଆପଡାରେ ୧୦ଟି ଜଳସେଚନ ପ୍ରକଳ୍ପକୁ ସଂପୂର୍ଣ୍ଣ କରାଯିବ । ଭାରତରେ ଓଡିଶା ହେବ ବାଜରା ହବ । ପୁଷ୍ଟିହୀନତା ମୁକାବିଲା ଲାଗି ବାଜରା ଜାତୀୟ ଶସ୍ୟ ଉତ୍ପାଦନ ଓ ବ୍ୟବହାର ବୃଦ୍ଧି ପାଇଁ ନିଆଯିବ ପଦକ୍ଷେପ । ସରକାରୀ କ୍ୟାଣ୍ଟିନ ଓ ବିଦ୍ୟାଳୟରେ ବାଜରା ପ୍ରଚଳନ ପାଇଁ ପଦକ୍ଷେପ ନିଆଯିବ । ୨୦୨୭ ସୁଦ୍ଧା ରାଜ୍ୟରୁ ପୁଷ୍ଟିହୀନତା ହ୍ରାସ କରିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି । ଖୁବଶୀଘ୍ର ଓଡିଶାରେ କାର୍ଯ୍ୟକାରୀ ହେବ ଗ୍ରୀନ ଇଣ୍ଡଷ୍ଟ୍ରିଆଲ ପଲିସି । ବୈଦ୍ୟୁତିକ ଯାନବାହନ ବ୍ୟବହାର ବୃଦ୍ଧି ପ୍ରୋତ୍ସାହନ ପାଇଁ ଚାରି ଓ ଛଅ ଚକିଆ ଯାନରେ ସବସିଡି ଦେବେ ସରକାର ।
ଅଧିକ ପଢନ୍ତୁ : ବିକଶିତ ଓଡ଼ିଶା ଗଠନ ଆମର ଲକ୍ଷ୍ୟ:ରାଜ୍ୟପାଳ
ଉପକୂଳ ଅଞ୍ଚଳରେ ବାତ୍ୟା ପ୍ରଭାବ କମାଇବାକୁ ସରକାର ଆରମ୍ଭ କରିବେ ୪୮୦ କିଲୋମିଟର ସମୁଦ୍ର ଉପକୂଳରେ ବନୀକରଣ କାର୍ଯ୍ୟକ୍ରମ । ଏହାସହ ପ୍ରଧାନମନ୍ତ୍ରୀ ଆବାସ ଯୋଜନାରେ ଗ୍ରାମାଞ୍ଚଳରେ ୧୦ ଲକ୍ଷ, ସହରାଞ୍ଚଳରେ ୫ ଲକ୍ଷ ଘର କରିବାକୁ ଲକ୍ଷ୍ୟ ରଖିଛନ୍ତି ସରକାର । ଅଙ୍ଗନୱାଡି ଗୁଡିକୁ ୨୦୩୦ ସୁଦ୍ଧା ସକ୍ଷମ ଅଙ୍ଗନବାଡିରେ ପରିଣତ କରାଯିବ । ବିଦ୍ୟାଳୟ ସ୍ତରରେ ଶିକ୍ଷାଦାନ ଉଦ୍ଦେଶ୍ୟରେ ଅଙ୍ଗନବାଡି କର୍ମୀ ମାନଙ୍କୁ ଶୈକ୍ଷିକ ସାଧନ ବ୍ୟକ୍ତି ତାଲିମ ଦିଆଯିବ । ଜନଜାତି ଛାତ୍ରଛାତ୍ରୀଙ୍କ ପାଖକରେ ପହଞ୍ଚିବ ପାଠାଗାର । ସେଥିପାଇଁ ଲାଇବ୍ରେରୀ ଅନ ହୁଇଲ କାର୍ଯ୍ୟକ୍ରମ ଆରମ୍ଭ କରିବେ ସରକାର । ଅତ୍ୟାଧୁନିକ ଏବଂ ଉନ୍ନତ ମାନର ଶିକ୍ଷାଦାନ ପାଇଁ ସରକାରୀ ବିଦ୍ୟାଳୟରେ AIର ହେବ ବ୍ୟବହାର ।
ଓଡିଶାବାସୀଙ୍କୁ ମିଳିବ ଉନ୍ନତ ମାନର ସ୍ଵାସ୍ଥ୍ୟ ସେବା । ସାରା ରାଜ୍ୟରେ ୩୦୦୦ ନୂଆ ଡାକ୍ତରଙ୍କୁ ଦିଆଯିବ ନିଯୁକ୍ତି । ଜିଲ୍ଲା ଡାକ୍ତରଖାନାରେ ସ୍ତ୍ରୀ ରୋଗ, ଶିଶୁ ରୋଗ ବିଶେଷଜ୍ଞ ଏବଂ ନର୍ସଙ୍କ ଆବଶ୍ୟକତାକୁ ସୁନିଶ୍ଚିତ କରାଯିବ ।ଉପକେନ୍ଦ୍ର ଓ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରର ନାମ ପରିବର୍ତ୍ତନ କରାଯାଇ ଆରୋଗ୍ୟ ମନ୍ଦିର କରାଯିବ । ପ୍ରତି ସିଏଚସିରେ ଗୋଟିଏ ଲେଖାଏଁ ଭ୍ରାମ୍ୟମଣ ଚିକିତ୍ସା ୟୁନିଟ ରହିବ । ୨୦୩୦ ସୁଦ୍ଧା ଓଡିଶାକୁ ମେଲେରିଆ ମୁକ୍ତ କରିବା ପାଇଁ ଲକ୍ଷ୍ୟ ରଖିଛନ୍ତି ସରକାର । ନୂଆ କ୍ରୀଡାନୀତି ଆସିବ, କ୍ରୀଡ଼ାବିତଙ୍କୁ ପ୍ରଶିକ୍ଷଣ ଦିଆଯିବା ପାଇଁ କ୍ରୀଡା ଏକାଡେମୀ ଓ ନର୍ସରୀ ପ୍ରତିଷ୍ଠା କରାଯିବ । ଧାମରା, ପାରାଦ୍ୱୀପ ଓ ଗୋପାଳପୁର ବନ୍ଦର ଆଖପାଖ ଅଞ୍ଚଳରେ ନୂତନ ଶିଳ୍ପାଞ୍ଚଳର ବିକାଶ ହେବ ।
ଓଡ଼ିଆ ଚଳଚିତ୍ର ଶିଳ୍ପକୁ ଚଳଚଞ୍ଚଳ କରାଯିବ । ଦୁଇ ବର୍ଷ ମଧ୍ୟରେ ୬୫ ହଜାର ସରକାରୀ ପଦବୀ ପୂରଣ କରାଯିବ ।ଓଡିଶା ହସ୍ତଶିଳ୍ପ ଡିଜାଇନ ବ୍ୟାଙ୍କ ପ୍ରତିଷ୍ଠା କରାଯିବ । ହସ୍ତଶିଳ୍ପ ଉତ୍ପାଦକୁ ବ୍ରାଣ୍ଡ ଭାବରେ ପରିଚିତ କରାଯିବ ।ଶିଳ୍ପ କ୍ଷେତ୍ରରେ ୨୦୨୯ ସୁଦ୍ଧା ୩ ଲକ୍ଷ ୫୦ ହଜାରରୁ ଅଧିକ ଯୁବକ ଯୁବତୀଙ୍କୁ ନିଯୁକ୍ତି ଦିଆଯିବା ପାଇଁ ରହିଛି ଲକ୍ଷ୍ୟ ।ଅନୁସୂଚିତ ଅଞ୍ଚଳ ପଞ୍ଚାୟତ ସମ୍ପ୍ରସାରଣ କରିବା ପାଇଁ ପେଶା ଆଇନକୁ କାର୍ଯ୍ୟକାରୀ କରିବେ ସରକାର ।