ଅର୍ଗସ ବ୍ୟୁରୋ:  ଲଗାଣ ବର୍ଷା ଦେଇଗଲା ଦୁଃଖ। ବଙ୍ଗୋପସାଗରରେ ଅବପାତ ଦୁର୍ବଳ ହେବା ପରେ ବର୍ଷାର ପରିମାଣ କମିଛି । ମାତ୍ର କମିନି ଦୁର୍ଦ୍ଦଶା। ଦୁଇ ଦିନର ଲଗାଣ ବର୍ଷାରେ ଅଧିକ ପ୍ରଭାବିତ ହୋଇଛି ମାଲକାନଗିରି ଜିଲ୍ଲା । ପ୍ରବଳ ବର୍ଷାରେ ଜିଲ୍ଲାର ୧୧୧ ପଞ୍ଚାୟତର ୧ ହଜାର ୪୫ ଗାଁ ପ୍ରଭାବିତ ହୋଇଛି । କୋରୁକୋଣ୍ଡା ବ୍ଲକ ବାୟାପଡା ଘାଟିରେ ପୁନର୍ବାର ଭୁସ୍ଫଳନ ଘଟି 18 ଗାଁ ବାହ୍ୟ ଜଗତରୁ ବିଛିନ୍ନ ହୋଇ ରହିଛି । ବଣ୍ଡା ଘାଟିର ମାଙ୍କଡ଼ ଝଲା  ପାହାଡରୁ ପ୍ରବଳ ବର୍ଷା ପାଣି ପ୍ରବାହିତ ହୋଇ ଭୁସ୍କଳନ ହେବା ଫଳରେ ରାସ୍ତାର ଦୁଇ ପାର୍ଶ୍ବର ମାଟି ଖସି ଏବେ ବିପଦ ସଂକୁଳ ଅବସ୍ଥାରେ ଅଛି । ଫଳରେ ଗାଡ଼ି ମଟର ଯାତାୟାତ ପାଇଁ ଭୟ କରୁଛନ୍ତି । ସେହିପରି ଲଗାଣ ବର୍ଷା ପାଣିରେ ଖଇରପୁଟ ବ୍ଲକ ର ସିନ୍ଧିଗୁଡା ଗାଁ ନିକଟ ପୋଲ ଭାସି ଯାଇଛି ଗୁମ୍ମାଝରଣ ରାସ୍ତାରେ ଥିବା କୋଲଭର୍ଟ ଭୁଶୁଡି ପଡିବାରୁ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଗଜିଅଗୁଡାବାସୀ ଏବେବି ଜଳବନ୍ଦୀ ହୋଇ ରହିଛନ୍ତି ।  ଖଇରପୁଟ ସଦରମହାକୁର କେତେକ ସ୍ଥାନରେ  ଘରେ ଘରେ ପାଣି ପଶିଥିବାର ଦେଖିବାକୁ ମିଳିଛି। ଅନେକ ସ୍ଥାନରେ ଗଛ ପଡି ଘର ଦ୍ବାର ଭାଙ୍ଗି ମାଟିରେ ମିଶି ଯାଇଛି ।

ସମ୍ଭାବ୍ୟ ବନ୍ୟାକୁ ଦୃଷ୍ଟିରେ ରଖି ମାଲକାନଗିରିର ପ୍ରତି ବ୍ଲକରେ କଣ୍ଟ୍ରୋଲ ରୁମ ଖୋଲାଯାଇଛି। ମୋଟୁ ପ୍ରତି  ବିପଦ ଥିବାରୁ ବର୍ତ୍ତମାନ ସୁଦ୍ଧା 121 ପରିବାର କୁ ସ୍ଥାନାନ୍ତରିତ କରାଯାଇଥିବା ବେଳେ ସମସ୍ତଙ୍କୁ ରନ୍ଧା ଖାଦ୍ୟ ପ୍ରଦାନ କରାଯାଉଛି । ମାଲକାନଗିରି ଜିଲ୍ଲାର ଅଧିକାଂଶ ତଳୁଆ ପୋଲରୁ ବନ୍ୟା ଜଳ ଖସିଛି ସତ ମାତ୍ର ଅଧିକାଂଶ ସ୍ଥାନରେ ଯୋଗାଯୋଗ ଏବେବି ବିଛିନ୍ନ ରହିଛି। ବର୍ଷାରେ ଖଇରପୁଟ ର 15 ଟି ଗାଁ , ଗୋବିନ୍ଦାପଲ୍ଲୀ ର 10 ଗାଁ ର 1500 ଲୋକ, କୁସୁମପୁଟ ର 4 ଗାଁ ର 650 ଲୋକ, ମାଡ଼କାପଦର ଗୋଟିଏ ଗାଁ ର 220 ଲୋକ, କୁଡୁମୁଲୁଗୁମ୍ମା ର 5 ହଜାର ଲୋକ ପ୍ରଭାବିତ ହୋଇଛନ୍ତି । ସେଇଭଳି ମାଥିଲି ବ୍ଲକ ର 11 ଟି ପଂଚାୟତ ଓ ଗୋଟିଏ nac ଓ ମୁନିସିପାଳିଟି ର 31 ଟି ୱାର୍ଡ ଲୋକ ପ୍ରଭାବିତ ହୋଇଛନ୍ତି । ପ୍ରାୟ 121 ଲୋକଙ୍କୁ ସ୍ଥାନାନ୍ତରିତ କରି 3 ଟି ରିଲିଫ କ୍ୟାମ୍ପ ଖୋଲାଯାଇଛି ।

ଗୋଦାବରୀ ନଦୀର ଭଦ୍ରାଞ୍ଚଳମ ଠାରେ ଏକ ନମ୍ବର ବିପଦ ସଙ୍କେତ 43 ଫୁଟ ପାର ହୋଇଥିବା ବେଳେ ଏବେ ଏହା ଅତିକ୍ରମ କରି ଦୁଇ ନମ୍ବର ବିପଦ ସଙ୍କେତ ଆଡକୁ ଅଗ୍ରସର ହେଉଛି । ତଳମୁଣ୍ଡରେ ଜଳସ୍ତର ବଢ଼ିବାର ଆଶଙ୍କା ରହିଥିବାବେଳେ ଉଜୁଡ଼ା ପରିବା କ୍ଷେତକୁ ଦେଖି ଚିନ୍ତାରେ ଚାଷୀ ।

ଅଧିକ ପଢ଼ନ୍ତୁ ଓଡ଼ିଶା ଖବର: