ଅର୍ଗସ ବ୍ୟୁରୋ: ବିଧାନସଭାରେ ଭଟଲି ବିଜେପି ବିଧାୟକ ଇରାସିସ ଆଚାର୍ଯ୍ୟଙ୍କ ପ୍ରଶ୍ନର ଉତ୍ତର ସାମ୍ନାକୁ ଆଣିଛି ବିଜେଡି ସରକାରଙ୍କ ମିଛ ଶିଳ୍ପାୟନର ସତ। ଶିଳ୍ପ ମନ୍ତ୍ରୀ ସମ୍ପଦ ସ୍ବାଇଁ ଉତ୍ତର ରଖି କହିଛନ୍ତି ଗତ 5 ବର୍ଷ ମଧ୍ୟରେ 512 ବୃହତ ଶିଳ୍ପ ସଂସ୍ଥା ସହ ଏମଓୟୁ ହୋଇଛି। ଏଥିମଧ୍ୟରୁ 30ଟି ବୃହତ୍ତ ପ୍ରକଳ୍ପ ଆଂଶିକ ତଥା ପୂର୍ଣ୍ଣ ଭାବେ କାର୍ଯ୍ୟକ୍ଷମ ହୋଇଛନ୍ତି । ଏହି ସମୟ ମଧ୍ୟରେ 5 ଲକ୍ଷ 7 ହଜାର 303 ନିଯୁକ୍ତି ସୁଯୋଗ ସୃଷ୍ଟିର ଲକ୍ଷ୍ୟ ରଖିଥିଲା ପୂର୍ବ ବିଜେଡି ସରକାର। ହେଲେ ନବୀନ ସରକାରଙ୍କ ଲଲିପପ୍ ଧରାପଡିଯାଇଛି।
ପ୍ରଶ୍ନ ଉଠୁଛି ମେକ ଇନ ଓଡିଶା କାହା ପାଇଁ , କାହିଁକି ଏ ପର୍ଯ୍ୟନ୍ତ ସମସ୍ତ 512 ବୃହତ୍ତ ଶିଳ୍ପ ପ୍ରକଳ୍ପରୁ ମାତ୍ର 30ଟିରେ ପୁଞ୍ଜି ନିବେଶ ହୋଇଛି । ରାଜ୍ୟ ତହବିଲରୁ କୋଟି କୋଟି ଟଙ୍କା ଖର୍ଚ୍ଚ କରି ବିଦେଶ ବୁଲିଥିଲେ ନବୀନ ଓ ପାଣ୍ଡିଆନ । ସରକାର ବିଦେଶୀ ନିବେଶକଙ୍କୁ ଶିଳ୍ପାୟନ ଲାଗି ଆମନ୍ତ୍ରଣ କରିବାକୁ ଦୁବାଇ, ସିଙ୍ଗାପୁର, ଚୀନ, ଜାପାନ, ଇଟାଲୀ, ଜର୍ମାନ ଓ ସାଉଥକୋରିଆ ପରି ବିଭିନ୍ନ ଦେଶରେ ରାଜ୍ୟ ସରକାର ବଡ ବଡ ବୈଠକ, ରୋଡ୍ ସୋ କରିବା ସହ ବଡ ବଡ ବିଜ୍ଞାପନ ବି ଦେଇଥିଲେ । ଏତେ ସବୁ ପରେ ବି ବିଦେଶ ପୁଞ୍ଜିନିବେଶରେ ଏଭଳି ସ୍ଥିତି ହିଁ ବୟାନ କରୁଛି ଏହା କେବଳ ପ୍ରଚାରରେ ସୀମିତ ଥିଲା । ପାଣି ଭଳିଆ ପଇସା ସିନା ଖର୍ଚ୍ଚ ହେଲା କିନ୍ତୁ ପୁଞ୍ଜିନିବେଶ ହେଲା ନାହିଁ ।
କିଛି ମାସ ତଳେ ସଂସଦରେ କେନ୍ଦ୍ର ମନ୍ତ୍ରୀଙ୍କ ଉତ୍ତର ଖୋଲିଦେଇଥିଲା ଓଡ଼ିଶାରେ ବିଦେଶୀ ପୁଞ୍ଜି ନିବେଶର ମିଛ ପ୍ରଚାରର ଗୁମର। ଅକ୍ଟୋବର 2019ରୁ ସେପେଟେମ୍ବର 2023 ପର୍ଯ୍ୟନ୍ତ 4 ବର୍ଷରେ ଓଡ଼ିଶାରେ ହୋଇଥିଲା ମାତ୍ର 1277 କୋଟି ଟଙ୍କାର ବିଦେଶୀ ପୁଞ୍ଜିନିବେଶ।
ଅଧିକ ପଢ଼ନ୍ତୁ ଓଡ଼ିଶା ଖବର