ଅର୍ଗସ ବ୍ୟୁରୋ: କାମକୁ ତିନି ମାସ ପୁରିନି। ରାସ୍ତା ଫାଟି କରିଛି ଆଁ। ଯନ୍ତ୍ରୀ ଓ ଠିକାଦାରଙ୍କ ମଧୁଚନ୍ଦ୍ରିକାରେ ହଇରାଣ ଜନତା । ନିମ୍ନମାନର
କାମ କରି ଖାଇଗଲେ ଲକ୍ଷ ଲକ୍ଷ ଟଙ୍କା । ରାସ୍ତା ନାଁରେ ଦୁର୍ନୀତିର ଏ ବଡ଼ ଅଭିଯୋଗ ଆସିଛି ମାଲକାନଗିରି ଜିଲ୍ଲା ମାଥିଲି ବ୍ଲକ ଧୁଙ୍ଗିଆପୁଟ ପଞ୍ଚାୟତ ଅଟାଲ ଗୁଡା ଗାଁରୁ । ଏ ରାସ୍ତାର ଅବସ୍ଥା ଦେଖନ୍ତୁ, ଖରା ଦିନେ କଷ୍ଟେମଷ୍ଟେ ଚଳି ଯାଉଥିବାବେଳେ ବର୍ଷା ଦିନେ ବେହାଲ୍ ହୋଇପଡୁଛି ଅବସ୍ଥା । ବାଧ୍ୟ ହୋଇ ଭରା ନଈରେ ଜୀବନକୁ ବାଜି ଲଗାଇ ଯାଆସ କରୁଛନ୍ତି ଗ୍ରାମବାସୀ ।
ବାରମ୍ବାର ଅଭିଯୋଗ ପରେ ଗ୍ରାମ୍ୟ ନିର୍ମାଣ ବିଭାଗ ତରଫରୁ ପୋଲ ସହ ରାସ୍ତା ନିର୍ମାଣ କରାଯାଇଥିଲା । ଧୁଙ୍ଗିଆପୁଟଠୁ ଆଟାଲଗୁଡା ପର୍ଯ୍ୟନ୍ତ ୮୧.୫୪ ଲକ୍ଷର ପୋଲ ଓ ୫୨.୯୨ ହଜାର ଟଙ୍କାର ପ୍ରଧାନମନ୍ତ୍ରୀ ରାସ୍ତା କାମ ନିର୍ମାଣ କରାଗଲା । ହେଲେ କାମ ସରୁ ସରୁ ପିଚୁ ଉଠିଯିବା ସହ ପୋଲର ଦୁଇ ପାର୍ଶ୍ବ ଦବିବାକୁ ବସିଲାଣି । ଦୁର୍ନୀତିଖୋରଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଛନ୍ତି ଗ୍ରାମବାସୀ । ବର୍ଷା ଆରମ୍ଭରୁ ରାସ୍ତାର ଏଭଳି ଅବସ୍ଥା । ଆଗକୁ ବଢିବ ବର୍ଷା । ରାସ୍ତା ଧୋଇଯିବାର ଭୟ ଘାରିଛି ସ୍ଥାନୀୟ ଲୋକଙ୍କୁ । ପ୍ରଶାସନ ଏହାକୁ ଗୁରୁତର ସହ ନେଇ ରାସ୍ତା ମରାମତି ଦିଗରେ ପଦକ୍ଷେପ ନେବାକୁ ଅନୁରୋଧ କରିଛନ୍ତି ଗ୍ରାମବାସୀ ।
ଅଧିକ ପଢ଼ନ୍ତୁ ଓଡିଶା ଖବର: