କେନ୍ଦ୍ରାପଡା : ଦେହରେ ବଳ ଥାଉ କି ନ ଥାଉ, ହେଲେ ସାହାଯ୍ୟ କରିବା ପାଇଁ ମନରେ ଯେଉଁ ଇଚ୍ଛା ଅଛି, ତା ଆଗରେ ଦେହର ବଳ ହାର ମାନିଛି । ବାତ୍ୟାର ତାଣ୍ଡବରୁ ବୃଦ୍ଧ, ବୃଦ୍ଧାଙ୍କୁ ସୁରକ୍ଷିତ ସ୍ଥାନରେ ପହଞ୍ଚାଇବା ପାଇଁ ସେ ଯେମିତି ଏକଦମ ଅଣ୍ଟା ଭିଡିଛନ୍ତି । ଆଉ ପ୍ରମାଣ କରି ଦେଖାଇଛନ୍ତି, ନାରୀ ଅବଳା କି ଦୁର୍ବଳା ନୁହେଁ, ବରଂ ସବୁ ପରିସ୍ଥିତର ମୁକାବିଲା କରିପାରେ ଗୋଟେ ନାରୀ । ଦେଖୁନାହାନ୍ତି, କିପରି ଏତେ କାଦୁଅ ସରସର ରାସ୍ତାରେ ମଧ୍ୟ ପଡିଯିବାର ଭୟକୁ ଖାତିର ନକରି ବୃଦ୍ଧା ମାଆଙ୍କୁ କାନ୍ଧରେ ବସାଇ ନେଇ ଆଣୁଛନ୍ତି । ଖାଲି ଏହି ଭିଡିଓ ନୁହେଁ ଦିନ ତମାମା ସେ ଲାଗିପଡିଛନ୍ତି, ଅସହାୟ ବ୍ୟକ୍ତି ମାନଙ୍କୁ ସୁରକ୍ଷିତ ସ୍ଥାନରେ ପହଞ୍ଚାଇବା ପାଇଁ ।
ଏ ହେଉଛନ୍ତି ରାଜନଗର ଖସାମୁଣ୍ଡା ଗାଁର ଆଶାକର୍ମୀ ଶ୍ରୀମତୀ ଶିବାନୀ ମଣ୍ଡଳ । ଗତକାଲି ବାତ୍ୟା ଦାନା ପାଇଁ ରାଜନଗର ବ୍ଲକ ତାଳଚୁଆ ଗାଁର ବାତ୍ୟା ଆଶ୍ରୟସ୍ଥଳୀ ନିକଟରେ ଲୋକଙ୍କୁ ସ୍ଥାନାନ୍ତରିତ କରିବାରେ ବେଶ ବଡ ଭୂମିକା ନିଭାଇଥିଲେ ଏହି ଆଶାଦିଦି । ଯାହାକୁ ନେଇ ସେଠାକାର ସ୍ଥାନୀୟ ଲୋକଙ୍କ ସହ ମୋହନ ସରକାରଙ୍କ ପକ୍ଷରୁ ମଧ୍ୟ ତାଙ୍କୁ ଖୁବ ପ୍ରଶଂସା କରାଯାଇଛି । ଶୁଣିନିଅନ୍ତୁ, ଆଶା ଦିଦିଙ୍କୁ ନେଇ କଣ କହୁଛନ୍ତି ସେହି ସ୍ଥାନର କିଛି ବୃଦ୍ଧା ମହିଳା ମାନେ । କେବଳ ଏହି ବାତ୍ୟା ନୁହେଁ, ପୂର୍ବରୁ ମଧ୍ୟ ଯେତେ ବାତ୍ୟା ହୋଇଛି, ସବୁ ବାତ୍ୟାରେ ସେ ସାହାଯ୍ୟ କରିବା ପାଇଁ ବେଶ ତତ୍ପର ଥାଆନ୍ତି । ତାଙ୍କୁ ଅନ୍ୟର ସାହାଯ୍ୟ କରିବାକୁ ବେଶ ଭଲଲାଗେ ବୋଲି ସେ କୁହନ୍ତି ।
ଗତକାଲି ବାତ୍ୟାପାଇଁ ଅନେକ ଅସହାୟ ଲୋକଙ୍କୁ ସାହାଯ୍ୟ କରିଥିଲେ ଆଶାଦିଦି । ଅନେକ ଲୋକ ବାତ୍ୟା ଆଶ୍ରୟସ୍ଥଳୀକୁ ଯିବା ପାଇଁ ରାଜି ହେଉନଥିଲେ ମଧ୍ୟ ତାଙ୍କୁ ବୁଝାଇ ବାତ୍ୟା ଆଶ୍ରୟସ୍ଥଳୀକୁ ପଠାଇଥିଲେ ଆଶାଦିଦି । ଯାହାକୁ ନେଇ ସ୍ଥାନୀୟ ଲୋକେ ତାଙ୍କୁ ବେଶ ପ୍ରଶଂସା କରିବା ସହ ମୁଖ୍ୟମନ୍ତ୍ରୀ ମୋହନ ମାଝୀ ତାଙ୍କୁ ଟ୍ବିଟ କରି ଖୁବ ପ୍ରଶଂସା କରିଛନ୍ତି । ଆଶାଦିଦିଙ୍କ ଏହି ଭିଡିଓ ସୋସିଆଳ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।