ଅର୍ଗସ ବ୍ୟୁରୋ : ଦୀର୍ଘ ୮ ମାସ ପରେ ନିଜ ପୁରୁଣା ସ୍ଥାନକୁ ଫେରିଛି ଯାଜପୁରର ବିରଜା ଅଗ୍ନେଶ୍ବର ହାଟ। ଏତେ ଦିନ ପରେ ପୁରୁଣା ଜାଗାକୁ ଫେରିଥିବାରୁ ଚାଷୀ, ବ୍ୟବସାୟୀ ଓ ଗ୍ରାହକଙ୍କ ମୁହଁରେ ଖୁସି ସ୍ପଷ୍ଟ ବାରି ହୋଇପଡୁଥିଲା। କାରଣ ୮ ମାସ ଧରି ଏମାନେ ଚକ୍ରାନ୍ତ ଓ ଯାତନାର ଶିକାର ହୋଇଆସିଥିଲେ। ଆନ୍ଦୋଳନ କରିଥିଲେ, ଆତ୍ୟାଚାର ସହିଥିଲେ, ମିଛି କେଶ୍ ବି ଖାଇଥିଲେ। ତଥାପି ଆଶା ଛାଡ଼ିନଥିଲେ। ଶେଷରେ ମାଆ ବିରଜାଙ୍କ ମନ୍ଦିର ପାଖକୁ ହାଟ ଫେରିବା ସହ ସମସ୍ତେ ହୋଇଛନ୍ତି ଆଶ୍ବସ୍ତ। ପୂର୍ବଭଳି ଏଠାରେ ଚାଷୀ ଓ ବ୍ୟବସୀୟୀଙ୍କୁ ସବୁ ସୁବିଧା ଯୋଗାଇ ଦିଆଯିବ ବୋଲି ଆରଏମସି ପକ୍ଷରୁ କୁହାଯାଇଛି। 

 ଉନବିଂଶ ଶତାବ୍ଦୀରୁ ମା ବିରଜାଙ୍କ ମନ୍ଦିର ନିକଟରେ ବସି ଆସୁଥିଲା ବିରଜା ଅଗ୍ନେଶ୍ବର ହାଟ। ଶହ ଶହ ଚାଷୀ ଓ ବ୍ୟବସାୟୀଙ୍କର ପରିବାର ପୋଷଣର ଏହା ଥିଲା ମାଧ୍ୟମ କିନ୍ତୁ ଯାଜପୁରର ଗୋଟିଏ ପରିବାରର ଅହଂକାର ଯୋଗୁଁ ରାଜ୍ୟର ଅନ୍ୟତମ ସର୍ବପୂରାତନ ହାଟକୁ ଗତ ଜାନୁଆରୀ ୨୪ତାରିଖରେ ଏଠାରେ ବେଦଖଲ କରିଦିଆଯାଇଥିଲା। ଏଠାରେ ହାଇଟେକ୍ ହାଟ ନିର୍ମାଣ କରାଯିବ ବୋଲି ମିଛ ପ୍ରତିଶ୍ରୁତି ଦେଇ ପ୍ରାୟ ଅଢେଇ କିଲୋମିଟର ଦୂର ସନ୍ଥମାଧବ ନଗରକୁ  ।

ହାଟ ସ୍ଥାନାନ୍ତର କରିଦିଆଗଲା। ଏ ନିଷ୍ପତ୍ତି ଚାଷୀ, ବ୍ୟବସାୟୀ ଏପରିକି ଯାଜପୁର ଜନସାଧାରଣଙ୍କ ପାଇଁ ଜମାରୁ ଗ୍ରହଣୀୟ ନଥିଲା। ଏହାପରେ ଜୀବନ ଜୀବିକା ବଞ୍ଚାଇବା ପାଇଁ ଚାଷୀ ଓ ବ୍ୟବସାୟୀ ଆନ୍ଦୋଳନକୁ ଓହ୍ଲାଇଥିଲେ, ଜିଲ୍ଲାପାଳଙ୍କ ଅଫିସ ଆଗରେ ଧାରଣା ଦେଇଥିଲେ। ହେଲେ ସେତେବେଳେର ସରକାର ଆଉ ସ୍ଥାନୀୟ ଜନ ପ୍ରତିନିଧି ଚାଷୀଙ୍କ ଦୁଃଖ ବୁଝିବା ବଦଳରେ ଚାଷୀଙ୍କ ଉପରେ ଜୁଲମ କରିଥିଲେ। ପ୍ରଶାସନକୁ ଲଗାଇ ଚାଷୀଙ୍କ ବିରୋଧରେ କେଶ କରାଗଲା। ହେଲେ ସରକାର ବଦଳିବା ପରେ ଚାଷୀଙ୍କ ଦାବି ମାନିଲା ପ୍ରଶାସନ। ହାଟ ଖୋଳିବା ପାଇଁ ପ୍ରଶାସନ ପରୋକ୍ଷରେ ଅନୁମତି ପ୍ରଦାନ କଲା।  ହେଲେ ବ୍ୟବସାୟୀଙ୍କୁ ଜୋର ଜବରଦସ୍ତ ବଳ ପ୍ରୟୋଗ କରି ତଡ଼ି ଦେଲେ ବିଜେଡିର ପାୱାରଫୁର ନେତା ବବି ଦାସଙ୍କ ପରିବାର। ବବିଙ୍କ ଭାଇ ବଳଭଦ୍ର ଚାଷୀଙ୍କୁ ହତ୍ୟା ଧମକ ଦେଉଥିବାର ଭିଡିଓ ମଧ୍ୟ ସାମ୍ନାକୁ ଆସିଥିଲା। ଏବେ ପୁରୁଣା ସ୍ଥାନକୁ ହାଟ ଫେରିବା ପରେ ଚାଷୀ ଓ ଯାଜପୁରବାସୀଙ୍କ ପାଇଁ ଆଣିଦେଇଛି ଅପାର ଖୁସି। 

କ୍ଷମତାରୁ ବେଦଖଲ ହେବା ପରେ ବି ଭାଙ୍ଗିନଥିଲା ବବିଙ୍କ ପରିବାରର ଅହଂକାର। ବିରଜା ପ୍ରକଳ୍ପକୁ ଢାଲ କରି ହାଟକୁ ସବୁଦିନ ପାଇଁ ହଟାଇବା ଚକ୍ରାନ୍ତରେ ବିଫଳ ହେବା ପରେ ପ୍ରଶାସନ ଉପରେ ଚାପ ପକାଇବାକୁ ବୁଢା ବ୍ରିଜ ନିକଟରେ ବବିଙ୍କ ସମର୍ଥକ ତଥା ବିଜେଡିର ନେତା ଆଉ କର୍ମୀ ରାସ୍ତା ରୋକ କରିଥିଲେ।  କିନ୍ତୁ ମା ବିରଜାଙ୍କ ଇଚ୍ଛା ଆଗରେ ଅହଂକାର ଓ ଅତ୍ୟାଚାରର ଜୋର ଚାଲିଲା ନାହିଁ। ପୁରୁଣା ସ୍ଥାନକୁ ଫେରିଲା ବିରଜା ଅଗ୍ନେଶ୍ବର ହାଟ।