ରାଜ୍ୟରେ ବାରମ୍ବାର କୁମାରୀ ମାତୃତ୍ୱ ଭଳି ଘଟଣା ଓଡ଼ିଆଙ୍କୁ ଲଜ୍ଜିତ କରୁଛି: ଧର୍ମେନ୍ଦ୍ର

ଭୁବନେଶ୍ୱର: ସରକାରୀ ଘର ପାଇଁ ପିସି ମାଗୁଛନ୍ତି ବାବୁ । ଏହି ପିସି ଦେଇ ନପାରି ଖୋର୍ଦ୍ଧା ନିରାକାରପୁରର ଜଣେ ଯୁବକ ଆତ୍ମହତ୍ୟା ମଧ୍ୟ କରିଛନ୍ତି । ଅନ୍ୟପଟେ ଗୋଟିଏ ପରେ ଗୋଟିଏ କୁମାରୀ ମାତୃତ୍ୱର ଖବର ସାମ୍ନାକୁ ଆସୁଛି । ଗଣଦୁଷ୍କର୍ମରେ ଶିକାର ହୋଇ ଜୀବନ ହାରିଥିବା ବେବିନା ନ୍ୟାୟ ପାଇ ପାରୁନି । ତେବେ ଏମିତି ତମାମ ଅବ୍ୟବସ୍ଥା ଭିତରେ ପେଶି ହେଉଛନ୍ତି ରାଜ୍ୟବାସୀ । ଏହାକୁ ନେଇ ରାଜ୍ୟ ସରକାରଙ୍କ ଉପରେ ସୋସିଆଲ ମିଡିଆ ମାଧ୍ୟମରେ ଖୁବ ବର୍ଷିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ଅତୀତରେ ଅଞ୍ଜନା ମିଶ୍ର ମାମଲାରେ ରାଜ୍ୟର ଜନମତ ଏପରି ତୀବ୍ର ହୋଇଥିଲା ଯେ ସରକାରରେ ପରିବର୍ତ୍ତନ ଆସିଥିଲା । ଆଜି ବି ରାଜ୍ୟରେ ମହିଳା ଅସୁରକ୍ଷିତ ଓ ଅପମାନିତ  । ସାରା ରାଜ୍ୟରେ ବିଜେଡି ସରକାର ବିରୋଧରେ ଅସନ୍ତୋଷର ନିଆଁ କୁହୁଳୁଛି  । ଏନେଇ ସୋସିଆଲ ମିଡିଆ ମାଧ୍ୟମରେ ରାଜ୍ୟ ସରକାରଙ୍କୁ ଜବାବ ମାଗିଛନ୍ତି ଧର୍ମେନ୍ଦ୍ର ।

ଶ୍ରୀ ପ୍ରଧାନ ଉଲ୍ଲେଖ କରିଛନ୍ତି ଯେ, ଓଡ଼ିଶାର ବିଭିନ୍ନ ସ୍ଥାନ ବୁଲି ଅବ୍ୟବସ୍ଥା ବିଷୟରେ ବୁଝିଛି । ଗତ କିଛି ଦିନ ଭିତର କିଛି ଘଟଣା ରାଜ୍ୟର ଲୋକଙ୍କୁ ଆନ୍ଦୋଳିତ କରୁଛି । ରାଜ୍ୟ ସରକାରଙ୍କ ବିରୋଧରେ ଲୋକମାନଙ୍କ ମନରେ ନିଆଁ କୁହୁଳୁଛି । ପିସି ନଦେଇ ପାରିବାରୁ ଖୋର୍ଦ୍ଧାର ଲକ୍ଷ୍ମୀଧର ବେହେରା ଆତ୍ମହତ୍ୟା କରିଛନ୍ତି । ରାଜ୍ୟରେ ସରକାରୀ ଆବାସିକ ବିଦ୍ୟାଳୟରେ ଝିଅମାନେ ଗର୍ଭବତୀ ହେବା ଓ ସନ୍ତାନ ପ୍ରସବ ଘଟଣା ସାଧାରଣ ଓଡିଆ ମାନଙ୍କ ପରି ମୋତେ ବ୍ୟସ୍ତ ଓ ବିବ୍ରତ କରୁଛି ବୋଲି ପ୍ରକାଶ କରିଛନ୍ତି ଧର୍ମେନ୍ଦ୍ର ପ୍ରଧାନ ।

ମୁଖ୍ୟମନ୍ତ୍ରୀଙ୍କ ଘରୁ ମାତ୍ର ୫୦ କିଲୋମିଟର ଦୂରର ବିଏ ପାସ୍ କରି ଚାଷ କରୁଥିବା ଲକ୍ଷ୍ମୀଧର ବେହେରା ଆତ୍ମହତ୍ୟା କରିଛନ୍ତି  । ଆତ୍ମହତ୍ୟା କରିବାର କିଛି ଦିନ ପୂର୍ବରୁ ଲକ୍ଷ୍ମୀଧର ଏକ ଭିଡିଓ ଜାରି କରିଥିଲେ  । ଯେଉଁଥିରେ ସରକାରଙ୍କ ଯୋଜନାରେ ପକ୍କାଘର ଟିଏ ମିଳିବା ପାଇଁ ବ୍ଲକର ଅଧିକାରୀ ମାନେ ୧୫ ରୁ ୨୦ ହଜାର ଟଙ୍କା ଲାଞ୍ଚ ମାଗୁଥିବାର ଅଭିଯୋଗ ଏହି ଭିଡିଓରେ ଥିଲା  । ନବୀନ ସରକାର, ବିଜେଡି ଓ ସ୍ଥାନୀୟ ସରପଞ୍ଚଙ୍କୁ ଗୁହାରି କରିଥିଲେ ମଧ୍ୟ କେହି ତାଙ୍କ କଥା ଶୁଣୁନଥିବା ଏହି ଭାଇରାଲ୍ ଭିଡିଓ ମାଧ୍ୟମରେ  ଲକ୍ଷ୍ମୀଧର କହିଥିଲେ ବୋଲି ଟ୍ୱିଟରରେ ଲେଖିଛନ୍ତି ଶ୍ରୀ ପ୍ରଧାନ ।

ଓଡିଶା ସରକାର ଥ୍ରୀ-ଟିର ବ୍ୟବହାର କେମିତି କରୁଛନ୍ତି ଜଣାନାହିଁ  । ଲକ୍ଷ୍ମୀଧରଙ୍କ ଭିଡିଓ ସରକାରଙ୍କ ନଜରକୁ ଆସିଲା ନାହିଁ  । ମାତ୍ର ତାଙ୍କର ମୃତ୍ୟୁପରେ ପକ୍କାଘରର କାର୍ଯ୍ୟାଦେଶ ଧରି ସରକାରୀ କର୍ମଚାରୀ ମାନେ ଲକ୍ଷ୍ମୀଧରଙ୍କ ଘରେ ପହଁଚିଲେ  । ସରକାରୀ ଯୋଜନାର ଲାଭ ପାଇବା ପାଇଁ କଣ ଓଡିଶାର ସାଧାରଣ ଗରିବ ଲୋକଙ୍କ ପରିବାର ମୁଖିଆଙ୍କ ମୃତ୍ୟୁକୁ ଅପେକ୍ଷା କରିବାକୁ ପଡିବ ବୋଲି ଧର୍ମେନ୍ଦ୍ର ପ୍ରଶ୍ନ କରିଛନ୍ତି  ।

ଓଡିଶା ସରକାର ଥ୍ରୀ-ଟି ର କଣ ବ୍ୟବହାର କରୁଛନ୍ତି ଜଣାନାହିଁ  । ଲକ୍ଷ୍ମୀଧରଙ୍କ ଭିଡିଓ ସରକାରଙ୍କ ନଜରକୁ ଆସିଲା ନାହିଁ  । ମାତ୍ର ତାଙ୍କର ମୃତ୍ୟୁପରେ ପକ୍କାଘରର କାର୍ଯ୍ୟାଦେଶ ଧରି ସରକାରୀ କର୍ମଚାରୀ ମାନେ ଲକ୍ଷ୍ମୀଧରଙ୍କ ଘରେ ପହଁଚିଲେ  ।

— Dharmendra Pradhan (@dpradhanbjp) January 19, 2019

ପିସିରେ ପେଶି ହୋଇ ଜନତା ବହୁ କଷ୍ଟ ଅନୁଭବ କରୁଛନ୍ତି  । ଏଥିରୁ ରାଜ୍ୟ ସରକାର କିଛି  ଶିଖିପାରୁ ନାହାନ୍ତି । ଅପରପକ୍ଷରେ ମୁଖ୍ୟମନ୍ତ୍ରୀଙ୍କ ଅତିଆପଣାର ଖୋର୍ଦ୍ଧାର ବିଧାୟକ କଟା ଘାରେ ଚୂନ ଦେବାପାଇଁ ପଛାଇନାହାନ୍ତି  । ଏହି ପିସି କାରଣରୁ ଆତ୍ମହତ୍ୟାକୁ ସ୍ୱୀକାର କରିବା ବଦଳରେ ଓଡିଶାର ଲକ୍ଷ୍ମୀଧରଙ୍କ ନିଚ୍ଛକ ନିଷ୍ଠୁର ସତ୍ୟକୁ ସାମାଜିକ ଗଣମାଧ୍ୟମରେ ପ୍ରଚାରିତ କରିଥିବା ଲୋକଙ୍କୁ ଡରାଇ ଧମକାଇ ଓ ପୋଲିସ ଲଗାଇ ଦମନ କରିବା ପାଇଁ ଷଡଯନ୍ତ୍ର କରୁଛନ୍ତି ବୋଲି ଅଭିଯୋଗ ଆଣିଛନ୍ତି ଧର୍ମେନ୍ଦ୍ର ପ୍ରଧାନ ।

<

ଗତ କିଛିଦିନ ଧରି ଓଡିଶାର ବିଭିନ୍ନ ସ୍ଥାନ ବୁଲୁଛି ଓ ଜନସାଧାରଣଙ୍କ ସହ ସିଧାସିଧା କଥା ହେଉଛି  । ଗତ କିଛି ଦିନ ଭିତରର କିଛି ଘଟଣା ରାଜ୍ୟର ଜନମାନସକୁ ଆନ୍ଦୋଳିତ କରୁଛି  । ରାଜ୍ୟ ସରକାରଙ୍କ ବିରୋଧରେ ଲୋକମାନଙ୍କ ମନରେ ନିଆଁ କୁହୁଳିବା ପରି ଜନବିରୋଧ ତୀବ୍ର ହେଉଛି  ।

— Dharmendra Pradhan (@dpradhanbjp) January 19, 2019

ଶ୍ରୀ ପ୍ରଧାନ ଉଲ୍ଲେଖ କରିଛନ୍ତି ବେବିନାକୁ ନ୍ୟାୟ ମିଳିଲାନାହିଁ  । ସେତେବେଳର ମନ୍ତ୍ରୀ ପ୍ରଦୀପ ମହାରଥୀ ବେବିନା ମାମଲାରେ ୨-୨ ଥର ଇସ୍ତଫା ଦେଲେ  । ଥରେ ୨୦୧୨ ମସିହାରେ ଇସ୍ତଫା ଦେବାପରେ ୨୦୧୪ ମସିହା ନିର୍ବାଚନରେ ବିଧାୟକ ଟିକେଟ୍ ମିଳିଲା ଓ ନବୀନ ବାବୁଙ୍କ ମହିଳା ସମ୍ମାନରେ ଦୋମୁହାଁ ନୀତି ଯୋଗୁଁ ପୁଣି ସସମ୍ମାନେ ମନ୍ତ୍ରୀ ପଦ ମିଳିଲା  । ଲୋକଙ୍କ କ୍ରୋଧକୁ ସାମ୍ନା କରି ନ ପାରି ୨୦୧୯ ମସିହାରେ ପୁଣି ବେବିନା ମାମଲାରେ ମହାରଥୀଙ୍କୁ ଇସ୍ତଫା ଦେବାପାଇଁ ବାଧ୍ୟ କରାଗଲା  ।

ଶ୍ରୀ ପ୍ରଧାନ ଉଲ୍ଲେଖ କରିଛନ୍ତି ରାଜ୍ୟରେ ଗତ କିଛିବର୍ଷ ଧରି ମହିଳା ବିଶେଷ ଭାବରେ କମ୍ ବୟସର ଝିଅ ମାନଙ୍କ ଉପରେ ଦୁଷ୍କର୍ମ ଘଟଣା ବଢି ଚାଲିଛି  । ସରକାରୀ ଆବାସିକ ଆଦିବାସୀ ଆଶ୍ରମ ବିଦ୍ୟାଳୟରେ ଝିଅମାନେ ଗର୍ଭବତୀ ହେବା ଓ ପ୍ରସବ କରିବା ଭଳି ବାରମ୍ୱାର ଘଟଣା ଓଡିଆ ମାନଙ୍କୁ ଲଜ୍ଜିତ ଓ ଅପମାନିତ କରୁଛି  । ମହିଳାଙ୍କ ପ୍ରତି ଏହା କି ପ୍ରକାର ସମ୍ମାନ ? ମହିଳାଙ୍କ ପ୍ରତି ରାଜ୍ୟର ବିଜେଡି ସରକାର ଏତେମାତ୍ରାରେ ସମ୍ବେଦନହୀନ କଣ ପାଇଁ  ବୋଲି ପ୍ରଶ୍ନ କରିଛନ୍ତି  କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।