ବାଲେଶ୍ୱର: ଇଲେକ୍ଟ୍ରୋନିକ୍ସ ଦୋକାନ ଆଗରେ ହୁ ହୁ ହୋଇ ଫ୍ରିଜ ଜଳୁଛି । ଫ୍ରିଜର ପ୍ରତିଟି ପାର୍ଟ ଜଳି ପୋଡି ଯାଉଛି । ଆପଣ ଏହି ଦୃଶ୍ୟ ଦେଖି ଭାବୁଥିବେ ଫ୍ରିଜରେ ବୋଧ ହୁଏ କେମିତି ନିଆଁ ଲାଗିଯାଇଛି । ହେଲେ ନାଁ । ଜଣେ ଗ୍ରାହକ କମ୍ପାନୀ ଉପରେ ରାଗ ସୁଝାଇବାକୁ ଏପରି ନିଆଁ ଲଗାଇଦେଇଛନ୍ତି । ବାଲେଶ୍ୱରରେ ଦେଖିବାକୁ ମିଳିଛି ଏହି ଘଟଣା ।
ଜଣେ ଗ୍ରାହକ କିପରି ଅଭିନବ ଢଙ୍ଗରେ ତାଙ୍କର ରାଗ ଶୁଝାଇଛନ୍ତି । ଏକ ଡିପ ଫ୍ରିଜ 2ବର୍ଷ ତଳୁ ପାତ୍ର ଏଲେକ୍ଟ୍ରୋନିକ୍ସରୁ ସେ କିଣିଥିଲେ । ଯାହାର ୱାରେଣ୍ଟି 5ବର୍ଷ ଥିଲା । ହେଲେ ଫ୍ରିଜଟି ବାରମ୍ବାର ଖରାପ ହେବାରୁ ତାଙ୍କୁ ଅଧିକ ଖର୍ଚ୍ଚାନ୍ତ ହେବାପାଇଁ ପଡିବା ସହିତ ସର୍ଭିସିଂ କ୍ଷେତ୍ରରେ ଅସୁବିଧାର ସମ୍ମୁଖୀନ ହୋଇ ଶେଷରେ ରାସ୍ତା ଉପରେ ନିଜ ଫ୍ରିଜ ଜାଳିଦେଲେ ଗ୍ରାହକ । ସେପଟେ ପାତ୍ର ଇଲେକ୍ଟ୍ରୋନିକ୍ସର ଷ୍ଟୋର ମ୍ୟାନେଜର କମ୍ପାନୀର ଅବହେଳାକୁ ଦାୟୀ କରିଛନ୍ତି ।
ସେପଟେ ଗ୍ରାହକଙ୍କୁ ଏଭଳି ସେବା କିପରି ଦିଆଯାଉଛି, ଏନେଇ ବିଭିନ୍ନ ମହଲରେ ପ୍ରଶ୍ନ ଉଠିଲାଣି ।
ଆହୁରି ପଢନ୍ତୁ ଓଡିଶା ଖବର
ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କ ନିଜ ଜିଲ୍ଲାରେ 24 ବର୍ଷର ସରକାରକୁ ଲାଗିଛି ଶକ୍ତ ଚାପୁଡ଼ା। ଯେଉଁ ଜିଲ୍ଲାରୁ 28 ବର୍ଷ ଧରି ପ୍ରତିନିଧିତ୍ବ କରିଆସୁଛନ୍ତି ନବୀନ ପଟ୍ଟନାୟକ। ଯେଉଁ ଜିଲ୍ଲାରୁ ବାରମ୍ବାର ନିର୍ବାଚନ ଜିତି ମୁଖ୍ୟମନ୍ତ୍ରୀ ହେଉଛନ୍ତି, ସେହି ଜିଲ୍ଲାବାସୀଙ୍କୁ ରୋଜଗାର ତ ଯୋଗାଇ ପାରିଲେନି, ଲୋକଙ୍କୁ ପିଇବା ପାଣି ମୁନ୍ଦେ ବି ଦେଇପାରିଲେନି ନବୀନ। ଏବେ ଦାଦନ ଖଟି ଆଣିଥିବା ଟଙ୍କାରେ ନିଜ ଗାଁ ଲୋକଙ୍କର ପିଇବା ପାଣି ସମସ୍ୟା ଦୂର କରିଛନ୍ତି ଜଣେ ଆଦିବାସୀ ଯୁବକ। ପଥର ମଝି ଦେଇ ଲମ୍ବି ଆସିଛି ପାଇପ୍। ମଝି ମଝିରେ ବସିଛି ପାଣି ଟାଙ୍କି। ଆଉ ସେଠାରୁ ସବା ତଳକୁ ଗାଁ ଲୋକଙ୍କ ପାଖରେ ପହଞ୍ଚୁଛି ପିଇବା ପାଣି । ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ୍ ସୁରଙ୍ଗି ପଞ୍ଚାୟତ ସିନ୍ଧୁପଙ୍କ ଗାଁ। ପିଇବା ପାଣି ପାଇଁ ଦଶକ ଦଶକ ଧରି ସନ୍ତୁଳି ହେଉଥିବା ନିଜ ଗାଁ ଲୋକଙ୍କ କଷ୍ଟ ଦୂର କରିଛନ୍ତି ଏହି ଗାଁର ଯୁବକ ଭୀମ ବେହେରା। କେରଳ ଯାଇ 6 ମାସ ଦାଦନ ଖଟି ଭୀମ ଯେଉଁ ଟଙ୍କା ସଞ୍ଚିଥିଲେ ସେହି ଟଙ୍କାରେ ଗାଁ ଲୋକଙ୍କ ପାଇଁ କରିଛନ୍ତି ପାନୀୟ ଜଳ ବ୍ୟବସ୍ଥା। ପାଣି ପାଇଁ ଛଟପଟ ହେଉଥିବା ଗାଁ ଲୋକେ ଏବେ 24 ଘଣ୍ଟା ପାଉଛନ୍ତି ପିଇବା ପାଣି ।
ଭୀମଙ୍କ ଏ କାମ ରାଜ୍ୟରେ 24 ବର୍ଷ ଧରି ଶାସନ କରୁଥିବା ବିଜେଡି ସରକାର ମୁହଁରେ ଶକ୍ତ ଚାପୁଡ଼ା। ପୁଣି ଇଏ ମୁଖ୍ୟମନ୍ତ୍ରୀଙ୍କ ଜିଲ୍ଲା। ଇଏ ସେହି ଗଞ୍ଜାମ ଯେଉଁ ଜିଲ୍ଲାରୁ 28 ବର୍ଷ ଧରି ପ୍ରତିନିଧିତ୍ବ କରୁଛନ୍ତି ନବୀନ ପଟ୍ଟନାୟକ। 24 ବର୍ଷ ଧରି ମୁଖ୍ୟମନ୍ତ୍ରୀ ରହିଲେଣି କିନ୍ତୁ ଦୁର୍ଭାଗ୍ୟର କଥା ନିଜ ଜିଲ୍ଲାବାସୀଙ୍କ ପାଇଁ ପିଇବା ପାଣି ମୁନ୍ଦେର ବି କରିପାରିନାହାନ୍ତି ବ୍ୟବସ୍ଥା। ଖାଲି ପାନୀୟ ଜଳ ନୁହେଁ ଏହି ସିନ୍ଧୁପଙ୍କ ଗାଁକୁ ନାହିଁ ସବୁଦିନିଆ ରାସ୍ତା । ବିଜୁଳି, ଶିକ୍ଷା, ସ୍ବାସ୍ଥ୍ୟ ସବୁ ମୌଳିକ ସୁବିଧାରୁ ବଞ୍ଚିତ ଏ ଗାଁ ଲୋକେ। ଇଏ ନବୀନଙ୍କ ଶାସନରେ ବିଜେଡିର ବହୁ ପ୍ରଚାରିତ ରୂପାନ୍ତରୀକରଣର ଅସଲ ଚିତ୍ର।
କେବଳ ସିନ୍ଧୁପଙ୍କ ଗାଁ ନୁହେଁ ଖରା ଦିନରେ ସାରା ଓଡ଼ିଶାରେ ପାଣି ପାଇଁ ହାହାକାର ସ୍ଥିତି । ଏ ନେଇ ଲୋକଙ୍କ ଭିତରେ ତୀବ୍ର ଅସନ୍ତୋଷ। ଫଳରେ ନିର୍ବାଚନ ପ୍ରଚାରରେ ଯାଉଥିବା ବିଜେଡିର ବଡ଼ ବଡ଼ ନେତାଙ୍କୁ ଘେରୁଛନ୍ତି ଲୋକେ। ଦିନକ ତଳେ ରେଢ଼ାଖୋଲ ନାକଟି ଦେଉଳରେ ବିଜେଡିର ବରିଷ୍ଠ ଉପସଭାପତି ପ୍ରସନ୍ନ ଆଚାର୍ଯ୍ୟଙ୍କୁ ପାଣି ପ୍ରଶ୍ନ ପଚାରିଥିଲେ ନିଜ ଦଳର କର୍ମୀ। ପାଣି ସମସ୍ୟା ଦୂର ହେଲେ ଭୋଟ ଦେବେ ବୋଲି କହୁଛନ୍ତି ଯୁବକ। କିଛି ଦିନ ତଳେ ବିଜେଡିର ବରିଷ୍ଠ ନେତା ବଦ୍ରି ପାତ୍ରଙ୍କୁ ପାଣି ପାଇଁ ଘେରିଥିଲେ ମହିଳା। ଆନନ୍ଦପୁର ଉପଖଣ୍ଡ କେଶଦୁରାପାଳ ଗାଁର ମହିଳାଙ୍କ ପାଣି ପ୍ରଶ୍ନରେ ଘାଇଲା ହୋଇଥିଲେ ବଦ୍ରି। ଏଠି କୁଶେଇ ନଦୀରେ ଚୁଆ କରି ପାଣି ଆଣି ପିଉଛନ୍ତି ମହିଳା ।
ଆଉ ଇଏ ଖୋଦ୍ ମୁଖ୍ୟମନ୍ତ୍ରୀଙ୍କ ଜିଲ୍ଲାର ଚିତ୍ର । ଗଞ୍ଜାମ ସୋରଡ଼ାରେ ଘର ଆଗରେ ଖାଲି ହାଣ୍ଡି, ମାଠିଆ, ବାଲଟି ରଖି ନେତାଙ୍କୁ ବିରୋଧ କରୁଛନ୍ତି ଜନତା । ହଟହଟା ହୋଇଥିଲେ ପ୍ରଚାର କରିବାକୁ ଯାଇଥିବା ବିଜେଡି ବିଧାୟକ ପୂର୍ଣ୍ଣ ସ୍ବାଇଁ...ଏଥର ପୂର୍ଣ୍ଣଙ୍କ ପତ୍ନୀଙ୍କୁ ମିଳିଛି ବିଜେଡି ଟିକେଟ । ସାରା ରାଜ୍ୟର ସ୍ଥିତି। ଖରା ଦିନରେ ସାରା ଓଡ଼ିଶାରେ ମହିଳାଙ୍କ ମୁଣ୍ଡ ଓ କାଖରେ ଗରା-ମାଠିଆ। ବିଜେଡିର ମହିଳା ସମ୍ମାନ ନାରାର ଉଡୁଛି ଧଜ୍ଜିଆ। ଲୋକଙ୍କୁ ପାଣି ନ ମିଳିବା ପଛରେ ରାଜନୈତିକ ଇଚ୍ଛାଶକ୍ତିର ଅଭାବ। ଏହାକୁ ନେଇ ରାଜ୍ୟର ବିଜେଡି ସରକାରଙ୍କୁ ଉପରେ ବର୍ଷିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ପ୍ରଶ୍ନ କରିଛନ୍ତି ବିଜେଡିର 25 ବର୍ଷ ଶାସନରେ କଣ ଏମିତି ହୋଇଛି ଓଡ଼ିଶାର ରୂପାନ୍ତରୀକରଣ ? ଓଡ଼ିଶାର ପ୍ରତି ଘରକୁ ସ୍ବଚ୍ଛ ପାନୀୟ ଜଳ ପହଞ୍ଚାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି 10,207 କୋଟି ଟଙ୍କା ଦେବା ସତ୍ବେ ରାଜ୍ୟରେ କାହିଁକି ଉତ୍କଟ ପାନୀୟ ଜଳ ସ୍ଥିତି।
ଅଧିକ ପଢନ୍ତୁ ଓଡ଼ିଶା ଖବର
ଅର୍ଗସ ବ୍ୟୁରୋ: ଇଏ ରାଜ୍ୟର ଅର୍ଥମନ୍ତ୍ରୀ ନିରଞ୍ଜନ ପୂଜାରୀ। ସୁବର୍ଣ୍ଣପୁର ଜିଲ୍ଲାରୁ ଗତ 25 ବର୍ଷ ଧରି ବିଧାନସଭାକୁ ପ୍ରତିନିଧିତ୍ବ କରିଆସୁଛନ୍ତି। ତିନି ତିନି ଥର ନବୀନ ସରକାରରେ ମନ୍ତ୍ରୀ ବନିଛନ୍ତି। 25 ବର୍ଷରେ ନିଜ ଅଞ୍ଚଳରେ ଗୋଟିଏ ହେଲେ ନୂଆ ଶିଳ୍ପତ ପ୍ରତିଷ୍ଠା କରିପାରିଲେନି। ବରଂ ଜିଲ୍ଲାର ଯେଉଁ ଏକମାତ୍ର ଶିଳ୍ପ ସୋନପୁର ସୂତାକଳ ହଜାର ହଜାର ଲୋକଙ୍କୁ ରୋଜଗାର ଦେଉଥିଲା ତାହା ଏହି ମହାଶୟଙ୍କ ଅମଳରେ ବନ୍ଦ ହୋଇଗଲା। ଶହ ଶହ ଶ୍ରମିକ ରୋଜଗାର ହରାଇଲେ। ହଜାର ହଜାର ଚାଷୀ କପା ବିକ୍ରୀ କରି ନପାରି ଅଭାବୀବିକ୍ରୀର ଶିକାର ହେଲେ। କପା ଚାଷୀଙ୍କର ଏହି ସମସ୍ୟା ନେଇ ମନ୍ତ୍ରୀ ମହାଶୟଙ୍କୁ ପଚାରିବାରୁ ଦେଖନ୍ତୁ କିପରି ମୁହଁବୁଲାଇ ପଲାଉଛନ୍ତି।
ଗତ 25 ତାରିଖରେ ସୋନପୁରକୁ ନିର୍ବାଚନ ପ୍ରଚାରରେ ଆସିଥିବା କେନ୍ଦ୍ରଗୃହମନ୍ତ୍ରୀ ଅମିତ ଶାହ ଟେକ୍ସଟାଇଲ ମିଲ ପ୍ରସଙ୍ଗରେ ବିଜେଡି ସରକାରଙ୍କୁ ଘେରିଥିଲେ। ଆଉ ପ୍ରତିଶ୍ରୁତି ଦେଇଥିଲେ ବିଜେପି ଓଡ଼ିଶାରେ ସରକାର ଗଢିଲେ ସୋନପୁରରେ ପ୍ରତିଷ୍ଠାହେବ ଟେକ୍ସଟାଇଲ୍ ମିଲ। ଏହାପରେ ସ୍ଥାନୀୟ ଲୋକଙ୍କ ମଧ୍ୟରେ ନୂଆ ଆଶା ସଂଚାର ହୋଇଛି।
କେବଳ ସୁବର୍ଣ୍ଣପୁର ନୁହେଁ ପଡ଼ୋଶୀ ବଲାଙ୍ଗୀର ଜିଲ୍ଲାର ପାଟଣାଗଡ଼ ଓ କଣ୍ଟାବାଞ୍ଜି ଅଞ୍ଚଳରେ ମଧ୍ୟ ବ୍ୟାପକ କପା ଚାଷ ହେଉଛି। ଏହି ଅଞ୍ଚଳରେ ଉତ୍ପାଦିତ କପାର ଚାହିଦା ବିଶ୍ୱସ୍ତରୀୟ। ସେଥିପାଇଁ ସ୍ଥାନୀୟ ଲୋକେ ଏହାକୁ ଧଳା ସୁନା ବୋଲି କୁହନ୍ତି। ରାଜ୍ୟ ସରକାରଙ୍କ ତଥ୍ୟ ଅନୁଯାୟୀ ସୁବର୍ଣ୍ଣପୁର ଜିଲ୍ଲାରେ 2023 -2024 ବର୍ଷରେ 62 ହଜାର 300 ହେକ୍ଟର ଜମିରେ କପା ଚାଷ ପାଇଁ ଟାର୍ଗେଟ ଥିବା ବେଳେ 71 ହଜାର ହେକ୍ଟରରେ ଚାଷ ହୋଇଥିଲା। ଅମଳ ହୋଇଥିଲା 8 ଲକ୍ଷ 15 ହଜାର କୁଇଣ୍ଟାଲ କପା। ତେବେ ଏହାର ପରିମାଣ ବେସରକାରୀ ଭାବେ ଢେର ଅଧିକ। କିନ୍ତୁ ଜିଲ୍ଲାରେ କୌଣସି ଶିଳ୍ପ ନଥିବାରୁ ଚାଷୀ ହେଉଛି ଅଭାବୀ ବିକ୍ରିର ଶିକାର। ସୋନପୁରରେ ଟେକ୍ସଟାଇଲ ଶିଳ୍ପର ଆବଶ୍ୟକତା ଥିବା ବେଳେ ରାଜ୍ୟ ସରକାର ଅନ୍ୟ ଜିଲ୍ଲାରେ ଶିଳ୍ପ ପ୍ରତିଷ୍ଠା କରୁଛନ୍ତି। ଏନେଇ ଗତ ଜାନୁଆରୀ 3 ତାରିଖ ଲୋୟାର ସୁକତେଲ ପ୍ରକଳ୍ପ ଉଦଘାଟନ ସମାରୋହରେ ବିଜେପି ବିଧାୟକ ମୁକେଶ ମହାଲିଙ୍ଗ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ପ୍ରଶ୍ନ ଉଠାଇଥିଲେ।
ସୋନପୁର ବିଧାନସଭା ଆସୁଛି ବଲାଙ୍ଗିର ଲୋକସଭା କ୍ଷେତ୍ର ମଧ୍ୟରେ। ଆଉ ସେହି ବଲାଙ୍ଗିର ଲୋକସଭା କ୍ଷେତ୍ର ଅନ୍ତର୍ଗତ ଆଉ ଏକ ବିଧାନସଭା ଆସନ କଣ୍ଟାବାଞ୍ଜିରୁ ଏଥ ନିର୍ବାଚନ ଲଢିବେ ମୁଖ୍ୟମନ୍ତ୍ରୀ। କପା ଚାଷୀଙ୍କ ସମସ୍ୟା ସମାଧାନରେ ବିଫଳ 25 ବର୍ଷର ସରକାରକୁ ଜବାବ ଦେବକୁ ପ୍ରସ୍ତୁତ ଏହି ଅଞ୍ଚଳର କପାଚାଷୀ।
ଦାଦନ ପ୍ରବଣ ବଲାଙ୍ଗିର ଲୋକସଭା କ୍ଷେତ୍ରର ଲକ୍ଷ ଲକ୍ଷ ଲୋକ ସୁରଟର ଟେକ୍ସଟାଇଲ ମିଲରେ କାମ କରୁଛନ୍ତି। ସେମାନଙ୍କ ପରିଶ୍ରମ ବଳରେ ସମୃଦ୍ଧ ସୁରଟର ବୟନ ଶିଳ୍ପ। ଅର୍ଥତ ଅପାରଗ ଓଡ଼ିଶା ସରକାର 25 ବର୍ଷ କ୍ଷମତାରେ ରହିବା ସତ୍ତ୍ବେ ନିଜ ମାନବ ସମ୍ବଳକୁ ବ୍ୟବହାର କରି ରୋଜଗାର ଭିତ୍ତିକ ଶିଳ୍ପ ପ୍ରତିଷ୍ଠାରେ ବିଫଳ ହୋଇଛନ୍ତି। ଏବେ ସୋନପୁରରେ ଟେକ୍ସଟାଇଲ ମିଲ ସ୍ଥାପନ ନେଇ ଗୃହମନ୍ତ୍ରୀ ଶାହାଙ୍କ ପ୍ରତିଶ୍ରୁତି ପରେ ଏହି ଅଞ୍ଚଳର ଲୋକଙ୍କ ମନରେ ଜାଗିଛି ନୂଆ ଆଶା। ଆଉ 25 ବର୍ଷର ପ୍ରତାରଣାର ଜବାବ ଦେବାକ ସେମାନେ ମନସ୍ଥ କରିସାରିଛନ୍ତି।
ଅଧିକ ପଢ଼ନ୍ତୁ ଓଡିଶା ଖବର:
ନୂଆଦିଲ୍ଲୀ/ଭୁବନେଶ୍ୱର: ଆଉ ପାଞ୍ଚ ଦିନ ପରେ ଓଡ଼ିଶା ଆସୁଛନ୍ତି ପ୍ରଧାନମନ୍ତ୍ରୀ। ମେ 6 ତାରିଖରେ ଦକ୍ଷିଣ ଓଡ଼ିଶାରେ ମୋଦି କରିବେ ପ୍ରଚାର। ବ୍ରହ୍ମପୁର ଓ ନବରଙ୍ଗପୁରରେ ଜନସମାବେଶକୁ କରିବେ ସମ୍ବୋଧନ। ମଇଦାନକୁ ଆସିବା ପୂର୍ବରୁ ମୋଦି ସେଟ୍ କରିସାରିଛନ୍ତି ଏଜେଣ୍ଡା। ଓଡ଼ିଆ ଅସ୍ମିତା ପ୍ରସଙ୍ଗରେ ହେବ ଆଟାକ୍ । ବିଜେଡି ଉପରେ କରିବେ ଜୋରଦାର ଆକ୍ରମଣ। ଅମାପ ସମ୍ପଦ ସତ୍ତ୍ବେ ଓଡ଼ିଶା କାହିଁକି ହୋଇ ରହିଛି ଗରିବଙ୍କ ରାଜ୍ୟ, ସେ ନେଇ ଚିନ୍ତା ପ୍ରକଟ କରିଛନ୍ତି ପ୍ରଧାନମନ୍ତ୍ରୀ । ଏଥର କେବଳ 4 ଶହ ପାର ନୁହେଁ, ଓଡ଼ିଶାରେ ସତ୍ତା ପରିବର୍ତ୍ତନର ଆହ୍ବାନ ଦେବେ ପିଏମ୍ ମୋଦି।
24 ମହାଲଢେଇ ପାଇଁ ଏଜେଣ୍ଡା ସେଟ୍ କରିବା ପରେ ପ୍ରଚାର ପାଇଁ ଓଡ଼ିଶା ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଆସନ୍ତା 6 ତାରିଖରେ ବ୍ରହ୍ମପୁରରେ ଦିନ ୧୦ରେ ଜନସଭାକୁ କରିବେ ସମ୍ବୋଧନ। ପରେ ୧୨ଟା ୩୦ରେ ନବରଙ୍ଗପୁରରେ ସାଧାରଣ ସଭାରେ ଯୋଗ ଦେବେ ପ୍ରଧାନମନ୍ତ୍ରୀ । କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଓ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଗସ୍ତ ପରେ ଆସୁଛନ୍ତି PM ମୋଦି । ମୋଦିଙ୍କ ଓଡ଼ିଶା ଗସ୍ତ ନେଇ ସୂଚନା ଦେଇଛନ୍ତି ରାଜ୍ୟ ବିଜେପି ଉପସଭାପତି ଗୋଲକ ମହାପାତ୍ର । ପୂର୍ବରୁ ଜାତୀୟ ଗଣମାଧ୍ୟମରେ ସାକ୍ଷାତକାର ବେଳେ ଓଡ଼ିଶା ଲଢେଇ ନେଇ ଏଜେଣ୍ଡା ସ୍ପଷ୍ଟ କରିଥିଲେ ମୋଦି । ଓଡ଼ିଶାର ଭାଷା, ସ୍ବାଭିମାନ, ଗୌରବ ନେଇ ପ୍ରଧାନମନ୍ତ୍ରୀ ଦେଇଥିଲେ ବଡ଼ ବୟାନ। କହିଥିଲେ ସଂକଟରେ ଓଡ଼ିଶାର ଅସ୍ମିତା, ବିପଦରେ ଓଡ଼ିଆ ଭାଷା । ତା ସହିତ ଓଡ଼ିଶାର ଓଡ଼ିଶାର ଦୁଃସ୍ଥିତି ନେଇ ପିଏମ ଚିନ୍ତା ପ୍କକଟ କରିଥିଲେ। ପୂର୍ବରୁ ନପୁର ସଭାରେ ନବୀନ ସରକାରକୁ ଓପାଡି ଫିଙ୍ଗିବାକୁ ଆହ୍ବାନ କରିଥିଲେ ଶାହା।
ବ୍ରହ୍ମପୁର ଆସନ ହେଉଛି ନବୀନ ଓ ପାଣ୍ଡିଆନଙ୍କ ପାଇଁ ସମ୍ମାନର ପ୍ରଶ୍ନ। ଏ ଆସନରୁ ବିଜେପି ପ୍ରାର୍ଥୀ କରିଛି ପ୍ରଦୀପ ପାଣିଗ୍ରାହୀଙ୍କୁ । ପ୍ରଦୀପ ପାଣିଗ୍ରାହୀ ଥିଲେ ମୁଖ୍ୟମନ୍ତ୍ରୀଙ୍କ ପ୍ରତିନିଧି । ଜନବିରୋଧୀ କହି ତାଙ୍କୁ ବିଜେଡି ବହିଷ୍କାର କଲା । ହେଲେ ଭୈରବ କେ ପାଣ୍ଡିଆନଙ୍କୁ କାର୍ତ୍ତିକ କାର୍ତ୍ତିକ ସମ୍ବୋଧନ କରିବାରୁ ପ୍ରଦୀପଙ୍କୁ ଦଳରୁ ବାହାର କରାଯାଇଥିବା ଚର୍ଚ୍ଚା ହୁଏ । ଏବେ ନବୀନଙ୍କ ପାଇଁ ଯେତିକି ନୁହେଁ ତାଠାରୁ ବେଶୀ ପାଣ୍ଡିଆନଙ୍କ ପାଇଁ ବ୍ରହ୍ମପୁର ବେଶୀ ଗୁରୁତ୍ବପୂର୍ଣ୍ଣ। ବ୍ରହ୍ମପୁରରୁ ହିଁ ମୋଦି ଫୁଙ୍କିବେ ବିଜୟର ମନ୍ତ୍ର।
2019 ନିର୍ବାଚନରେ ବିଜେଡିକୁ କଡା ଟକ୍କର ଦେଇଥିଲା ବିଜେପି। ଲୋକସଭାରେ ବିଜେଡି 12 ଆସନ ଜିତିଥିବା ବେଳେ ବିଜେପି ଜିତିଥିଲା 8 ଆସନ। ତେବେ ଭୋଟ ବ୍ୟବଧାନ ଥିଲା ମାତ୍ର 10 ଲକ୍ଷ। ବିଜେଡି 42 ପ୍ରତିଶତ ଭୋଟ ପାଇଥିବା ବେଳେ ବିଜେପି ପାଇଥିଲା 38 ପ୍ରତିଶତ ଭୋଟ, କଂଗ୍ରେସ ହାତକୁ ଯାଇଥିଲା 13.4 ପ୍ରତିଶତ ଭୋଟ । 2024ରେ କଂଗ୍ରେସର ଭୋଟ ପ୍ରତିଶତ କମିପାରେ, ଯାହାର ଫାଇଦା ନେଇପାରେ ବିଜେପି। ଗୋଟେ ପଟେ ମୋଦି ସୁନାମୀ, ଆଉ ସେପଟେ ନବୀନଙ୍କ କମୁଥିବା ଲୋକପ୍ରିୟତା, ତା ଭିତରେ ଦଳର ଅନ୍ତକନ୍ଦଳ, ଯାହା ବିଜେଡିର ଚିନ୍ତା ବଢାଇଛି । ନବୀନଙ୍କ ସରକାର ଓ ଦଳ ଉପରୁ ନିୟନ୍ତ୍ରଣ ଖସୁଥିୁବା ବେଳେ ରିମୋଟ୍ ପାଣ୍ଡିଆନଙ୍କ ହାତରେ।
ଅଧିକ ପଢନ୍ତୁ ଓଡ଼ିଶା ଖବର
