ଅର୍ଗସ ବ୍ୟୁରୋ: ରାଜ୍ୟ ସରକାର ଚାହୁଁ ନାହାନ୍ତି ଓଡ଼ିଶାରେ ହେଉ ହାଇକୋର୍ଟ ବେଞ୍ଚ । ତା ନ ହୋଇଥିଲେ କେନ୍ଦ୍ର ଆଇନ ମନ୍ତ୍ରୀଙ୍କ ବାରମ୍ବାର ଚିଠି ପରେ ବି ଏଯାଏଁ ସ୍ଥାନ ସ୍ଥିର କରି ଜଣାଉନାହାନ୍ତି ରାଜ୍ୟ ସରକାର । କେନ୍ଦ୍ର ଆଇନ ମନ୍ତ୍ରୀ କିରଣ ରିଜିଜୁ ସଂସଦରେ ଅଣତାରକା ପ୍ରଶ୍ନର ଉତ୍ତରରୁ ଆଜି ଏହା ପୁଣି ଥରେ ସ୍ପଷ୍ଟ ହୋଇଛି । କୋରାପୁଟ ସାଂସଦ ସପ୍ତିଗିରି ଉଲାକା କୋରାପୁଟ ଓ ପଶ୍ଚିମ ଓଡ଼ିଶାରେ ହାଇକୋର୍ଟ ବେଞ୍ଚ ପ୍ରତିଷ୍ଠା ନେଇ କେନ୍ଦ୍ର ସରକାରଙ୍କର କୌଣସି ପ୍ରସ୍ତାବ ଅଛି କି ନାହିଁ ସେନେଇ କେନ୍ଦ୍ର ଆଇନ ମନ୍ତ୍ରୀଙ୍କୁ ପ୍ରଶ୍ନ କରିଥିଲେ। ଯାହାର ଉତ୍ତରରେ ଆଇନ ମନ୍ତ୍ରୀ କିରଣ ରିଜିଜୁ କହିଛନ୍ତି କେନ୍ଦ୍ର ସରକାର ରାଜ୍ୟର କେଉଁ ସ୍ଥାନରେ ବେଞ୍ଚ ସ୍ଥାପନ ହେବ ସେନଇ ସ୍ଥାନ ନିର୍ଦ୍ଧାରିତ କରିବା ସହ ବିଶଦ ଭାବେ ସମସ୍ତ ବିଷୟ କେନ୍ଦ୍ରକୁ ଜଣାଇବା କଥା । କିନ୍ତୁ ଏଯାଏଁ ଏନେଇ ରାଜ୍ୟ ସରକାରଙ୍କ ପକ୍ଷରୁ କୌଣସି ପ୍ରକାର ଜବାବ ମିଳିନାହିଁ ।
ତେଣୁ ରାଜ୍ୟ ସରକାରଙ୍କ ପାଖରୁ ହାଇକୋର୍ଟ ବେଞ୍ଚ ନେଇ ବର୍ତ୍ତମାନ କୌଣସି ପ୍ରସ୍ତାବ ମିଳି ନ ଥିବା ସ୍ପଷ୍ଟ କରିଛନ୍ତି ରିଜିଜୁ । ଏହା ପରେ ହାଇକୋର୍ଟ ବେଞ୍ଚ ନେଇ ରାଜ୍ୟ ସରକାର କେବଳ ଭେଳିକି ଦେଖାଉଥିବା ସ୍ପଷ୍ଟ ହୋଇଛି । ପୂର୍ବରୁ ମଧ୍ୟ ତତ୍କାଳୀନ ଆଇନ ମନ୍ତ୍ରୀ ରବିଶଙ୍କର ପ୍ରସାଦ ଓ ବର୍ତ୍ତମାନର ଆଇନ ମନ୍ତ୍ରୀ କିରଣ ରିଜିଜୁ ଚିଠି ଲେଖି ରାଜ୍ୟ ସରକାରଙ୍କୁ ହାଇକୋର୍ଟ ବେଞ୍ଚ ପାଇଁ ସ୍ଥାନ ନିରୂପଣ ପାଇଁ କହିଥିଲେ । ମାତ୍ର କେନ୍ଦ୍ର ଆଇନ ମନ୍ତ୍ରୀଙ୍କ ଚିଠିର ଏଯାଏଁ କୌଣସି ପ୍ରକାର ଉତ୍ତର ଦେଇ ନାହାନ୍ତି ରାଜ୍ୟ ସରକାର।
ଓଡିଶା ଖବର ଆହୁରି ପଢନ୍ତୁ
