ଭୁବନେଶ୍ୱର: ଝାରସୁଗୁଡାରେ ଦଶମ ଶ୍ରେଣୀ ଛାତ୍ର ସମର୍ଥ ଅଗ୍ରୱାଲଙ୍କୁ ଅପହରଣ ଓ ହତ୍ୟା ଘଟଣାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ କଡା ପ୍ରତିକ୍ରିୟା। ଟ୍ବିଟ କରି କେନ୍ଦ୍ର ମନ୍ତ୍ରୀ କହିଛନ୍ତି, ଇଏ ହିଁ ବିପର୍ଯ୍ୟସ୍ତ ଆଇନଶୃଙ୍ଖଳାର ବାସ୍ତବତା। କ୍ଷମତା ଥିବା ଲୋକମାନଙ୍କ ଇଏ ପ୍ରକୃଷ୍ଟ ସମୟ ସେମାନେ ରାଜ୍ୟର ଆଇନଶୃଙ୍ଖଳାରେ ଥିବା ତ୍ରୁଟିକୁ ଦେଖିବା ଉଚିତ୍। ସ୍ପଷ୍ଟ ଦିବାଲୋକରେ ମନ୍ତ୍ରୀ ନବ ଦାସଙ୍କୁ ଗୁଳି କରି ହତ୍ୟାର ଠିକ୍ ଦୁଇ ମାସ ପରେ ସମର୍ଥ ଅଗ୍ରୱାଲଙ୍କୁ ଅପହରଣ ପରେ ହତ୍ୟା କରାଯାଇଛି।
ଅଧିକ ପଢନ୍ତୁ :ଅପହରଣ ପରେ ଦଶମ ଶ୍ରେଣୀ ଛାତ୍ରଙ୍କୁ ପୋଡ଼ିକରି ହତ୍ୟା
ଏହା ସରକାର ଦାବି କରୁଥିବା ଆଇନବ୍ୟବସ୍ଥାର ପୋଲ୍ ଖୋଲି ଦେଇଛି। ନା ରାଜ୍ୟର ଜନସାଧାରଣ ନା ଜନପ୍ରତିନିଧି ରାଜ୍ୟରେ କେହି ବି ସୁରକ୍ଷିତ ନୁହଁନ୍ତି। ଏହିଭଳି ଜଘନ୍ୟକାଣ୍ଡ ରାଜ୍ୟରେ ଘଟି ଚାଲିଛି, ବିଶେଷ କରି ଝାରସୁଗୁଡାରେ ଏହି ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ସମର୍ଥଙ୍କ ପରିବାର ପାଇଁ ଯେତେ ପରିମାଣର ଶାନ୍ତ୍ୱନା ଓ ସମବେଦନା ଦେଲେ ବି ଯଥେଷ୍ଟ ନୁହେଁ। ରାଜ୍ୟ ସରକାର ଆଇନଶୃଙ୍ଖଳା ବ୍ୟବସ୍ଥା ସଜାଡିବା ସହ ଜନସାଧାରଣ ସୁରକ୍ଷାକୁ ପ୍ରାଥମିକତା ଦେବାର ଆବଶ୍ୟକତା ଥିବା କହିଛନ୍ତି କେନ୍ଦ୍ରମନ୍ତ୍ରୀ।
ଭୁବନେଶ୍ୱର: ବହୁ ଚର୍ଚ୍ଚିତ ଡିଜେ ଆଜେକ୍ସ ମୃତ୍ୟୁ ମାମଲା। ତଦନ୍ତର ଅଗ୍ରଗତି ନେଇ ରିପୋର୍ଟ ମାଗିଲେ ହାଇକୋର୍ଟ। ପୋଲିସ ନିଷ୍କ୍ରୟତା ନେଇ ହାଇକୋର୍ଟରେ ଦାୟର ମାମଲାର ଶୁଣାଣୀ କରି ତଦନ୍ତର ଅଗ୍ରଗତି ରିପୋର୍ଟ ମାଗିଛନ୍ତି କୋର୍ଟ। ଡିଜେ ଆଜେକ୍ସ ଓରଫ ଅକ୍ଷୟ କୁମାରଙ୍କ ମୃତ୍ୟୁର ତଦନ୍ତର ଅଗ୍ରଗତି ନେଇ ହାଇକୋର୍ଟଙ୍କୁ ଅବଗତ କରାଇବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ।
ଡିଜେ ଆଜେକ୍ସଙ୍କ ମାଁ ଲକ୍ଷ୍ମୀପ୍ରିୟା ମହାରଣାଙ୍କ ପକ୍ଷରୁ ଦାୟର ପୋଲିସ ନିଷ୍କ୍ରିୟତା ମାମଲାର ଶୁଣାଣୀ କରି ବିଚାରପତି ଗୌରୀଶଙ୍କର ଶତପଥୀଙ୍କ ଅବକାଶକାଳୀନ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି। ଡିଜେ ଆଜେକ୍ସଙ୍କ ମୃତ୍ୟୁ ନେଇ ଖାରବେଳନଗର ଥାନାରେ ଏତଲା ଦିଆଯାଇଥିଲା। ଆସନ୍ତା ୧୭ ତାରିଖରେ ମାମଲାର ପରବର୍ତ୍ତୀ ଶୁଣାଣୀ।
ଅଧିକ ପଢନ୍ତୁ ଓଡିଶା ଖବର
କନ୍ଧମାଳ: ଫିରିଙ୍ଗିଆ ପୋଲିସକୁ ବଡ଼ ସଫଳତା । ପୋଲିସ ନାଁରେ ଡକାୟତ କରୁଥିବା ୮ ନକଲି ପୋଲିସ ଗିରଫ । ସେମାନଙ୍କଠାରୁ ୪ଟି ଦେଶୀ ବନ୍ଧୁକ ସହିତ ମାଉଜର, ଗୁଳି, ପୋଲିସ ପୋଷାକ, ୨ଟି ଗାଡ଼ି ଜବତ ହୋଇଛି । କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ପୋଲିସ ହାତରେ ଧରାପଡ଼ିଛନ୍ତି ଏକ ନକଲି ପୋଲିସ ଗ୍ୟାଙ୍ଗ୍ । ଫିରିଙ୍ଗିଆ ଥାନା ପାଙ୍ଗା ଉପରସାହି ପଞ୍ଚାୟତର ବାଲିଗଟା ଅଞ୍ଚଳରେ ଗତ ମଙ୍ଗଳବାର ରାତିରେ ନିଜକୁ ପୋଲିସ ବୋଲି ପରିଚୟ ଦେଇ ଗଞ୍ଜେଇ ଧରିବାକୁ ଆସି ଏହି ଗ୍ୟାଙ୍ଗ୍ ଗାଁର ବିଭିନ୍ନ ଘରେ ପଶି ଟଙ୍କା, ପଇସା, ସୁନାଗହଣା ଲୁଟ୍ କରୁଥିଲେ ।
ଗ୍ରାମବାସୀ ମାନେ ସନ୍ଦେହ କରି ଥାନାକୁ ଫୋନ କରିଥିବା ବେଳେ ଗାଁକୁ ପୋଲିସ ବେଶରେ ଡକାୟତ ଦଳ ଆସିଥିବା ଜାଣି ପାରି ସେମାନଙ୍କୁ କାବୁ କରିବା ବେଳେ ଡକାୟତ ମାନେ ବନ୍ଧୁକ ମାଉଜର ଦେଖାଇ ପାଖ ଜଙ୍ଗଲକୁ ଦୌଡ଼ି ପଳାଇ ଥିଲେ । ୨ ଜଣ ଡକାୟତଙ୍କୁ ଗ୍ରାମବାସୀ ଧରି ପୋଲିସରେ ଜିମା ଦେଇଥିଲେ । ତା ପର ଦିନ ପୋଲିସ ଗାଁ ନିକଟ ଜଙ୍ଗଲରୁ ଆଉ ୬ ଜଣ ଡକାୟତଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ମାନଙ୍କ ନାଁରେ ଜିଲ୍ଲା ସମେତ ଜିଲ୍ଲା ବାହାରେ ମଧ୍ୟ ବିଭିନ୍ନ ଚୋରି ଡକାୟତି ଓ ଅପରାଧିକ ମାମଲା ଥିବା ପୋଲିସ ସୂଚନା ଦେଇଛି ।
ଅଧିକ ପଢନ୍ତୁ ଓଡ଼ିଶା ଖବର
ଭୁବନେଶ୍ୱର: ମାତ୍ର ଅଧଘଣ୍ଟାଏ କାଳ ବୈଶାଖୀ, ହେଲେ ୬-୭ ଘଣ୍ଟା ଧରି ବିଦ୍ୟୁତ୍ କାଟ । ପୁରା ଅନ୍ଧାରରେ ରାଜଧାନୀ । ଏମିତି କି ଆଜି ସକାଳ ଯାଏ ବି ଅନେକ ଅଞ୍ଚଳରେ ଆସିନାହିଁ ବିଦ୍ୟୁତ । ଗତକାଲି ଅପରାହ୍ନରେ ଭୁବନେଶ୍ବରରେ କାଳବୈଶାଖୀ ବର୍ଷା ହୋଇଥିଲା । ସାଙ୍ଗକୁ ପ୍ରବଳ ପବନ ବି ହୋଇଥିଲା । ଅଧଘଣ୍ଟାରେ ଥମିଥିବା କାଳବୈଶାଖୀ, ହେଲେ ବର୍ଷା ଆରମ୍ଭରୁ ବିଦ୍ୟୁତ ଯାଇଥିଲା ଯେ, ରାତି ୧୧ ଯାଏ ଆସିଲା ନାହିଁ । ଫଳରେ ଅପରାହ୍ନ ପରଠୁ ପୁରା ଅନ୍ଧାର ହୋଇଯାଇଥିଲା ରାଜଧାନୀର ପ୍ରାୟ ସମସ୍ତ ଅଞ୍ଚଳ ।
କିଛି ଅଞ୍ଚଳରେ ୩ ଘଣ୍ଟା ପରେ ବି ବିଦ୍ୟୁତ୍ ସରବରାହ ସ୍ବାଭାବିକ ହୋଇଥିବା ବେଳେ ଅଧିକାଂଶ ଅଞ୍ଚଳ ଏବେ ବି ଅନ୍ଧାରରେ ରହିଛି । ଖୋଦ୍ ମୁଖ୍ୟ ଶାସନ ସଚିବ ରାତି ୧୧ଟା ବେଳେ ଏହି ଘଟଣାରେ ହସ୍ତକ୍ଷେପ କରିଥିଲେ । ଟ୍ବିଟ୍ କରି ଭୁବନେଶ୍ବରରେ ବିଦ୍ୟୁତ ପୁନଃସଂଯୋଗ କାର୍ଯ୍ୟ ଧିମା ଗତିରେ ହେଉଛି ବୋଲି ଅସନ୍ତୋଷ ପ୍ରକାଶ କରିଥିଲେ । ଏହାକୁ ସାଧାରଣ ଲୋକ ଗ୍ରହଣ କରିବେ ନାହିଁ । କାଳବୈଶାଖୀରେ ବିଦ୍ୟୁତ୍ ପୁନଃସଂଯୋଗ ଯଦି ଏତେ ଧିମା, ତେବେ ବାତ୍ୟାରେ ପରିସ୍ଥିତି କ’ଣ ହେବ ବୋଲି ପ୍ରଶ୍ନ କରିଥିଲେ ।
ଅଧିକ ପଢନ୍ତୁ ଓଡ଼ିଶା ଖବର
