କେନ୍ଦ୍ରାପଡା ବିଧାୟକ ଶଶୀଭୂଷଣ ବେହେରା ବଳଦେବଜୀଉ ପାୱାରଲୁମ୍ର ପୁନଃରୁଦ୍ଧାର ନେଇ ପ୍ରଶ୍ନ କରିଥିଲେ। ବିଭାଗୀୟ ମନ୍ତ୍ରୀ ପଦ୍ମିନୀ ଦିଆନ୍ ଏହାର ଉତ୍ତରରେ କହିଛନ୍ତି ଯେ, ପାୱାରଲୁମ୍ର ସଂପତ୍ତିକୁ ରାଜ୍ୟ ଅର୍ଥ ନିଗମ ଋଣ ଆଦାୟ ପାଇଁ ବିକ୍ରି କରିଦେଇଛନ୍ତି । ମାମଲା ଏବେ କୋର୍ଟରେ ଥିବା ସେ ଉଲ୍ଲେଖ କରିଛନ୍ତି । ତେବେ ପୁନଃରୁଦ୍ଧାର ନେଇ କୌଣସି ଉତ୍ତର ନାହିଁ । ଏବେ କେନ୍ଦ୍ରାପଡାରେ ଶିଳ୍ପକୁ ନେଇ ସରକାର ପ୍ରସ୍ତୁତ କରିନାହାନ୍ତି କୌଣସି ବ୍ଲୁପ୍ରିଣ୍ଟ ।
ଗୋଟିଏ ପଟେ ଦେଖିବାକୁ ଗଲେ ରାଜ୍ୟ ରାଜନୀତିର ପାୱାର ସେଣ୍ଟର କେନ୍ଦ୍ରାପଡା ଜିଲ୍ଲା। ବିଜୁ ପଟ୍ଟନାୟକ, ପ୍ରହ୍ଲାଦ ମଲ୍ଲିକ, ରବି ରାୟ, ବିଜୟ ମହାପାତ୍ର, ବେଦ ପ୍ରକାଶ ଅଗ୍ରୱାଲ, ନଳିନୀ ମହାନ୍ତିଙ୍କ ଭଳି ବହୁ ହେବିୱେଟ୍ କେନ୍ଦ୍ରାପଡାରୁ ପ୍ରତିନିଧିତ୍ବ କରିଛନ୍ତି । ମାଳ ମାଳ ମନ୍ତ୍ରୀ ବି ହୋଇଛନ୍ତି । ହେଲେ ଏଠାରେ ବିକାଶ ଏବେବି ଅପହଞ୍ଚ । ସେପଟେ କେନ୍ଦ୍ରାପଡାର ପାଇପ ମିସ୍ତ୍ରୀଙ୍କ ଚାହିଦା ଦେଶ ବିଦେଶରେ । କେନ୍ଦ୍ରାପଡାର ଅର୍ଥନିତୀ ଏମାନଙ୍କ ଉପରେ ନିର୍ଭର କରେ । ହେଲେ ଏବେ ସୁଦ୍ଧା ଅନ୍ତର୍ଜାତୀୟ ସ୍ତରର ତାଲିମ କେନ୍ଦ୍ରଟିଏ ହୋଇପାରିଲା ନାହିଁ କେନ୍ଦ୍ରାପଡାରେ । ଦିଲ୍ଲୀରୁ ତାଲିମ ନେଉଛନ୍ତି ହେଲେ କେନ୍ଦ୍ରାପଡାରେ ନାହିଁ ।
କେନ୍ଦ୍ରାପଡ଼ାରେ ମାଳମାଳ ନେତା, ମନ୍ତ୍ରୀ । ହେଲେ ମୌଳିକ ସୁବିଧା ପାଇପାରୁନାହାନ୍ତି କେନ୍ଦ୍ରାପଡାବାସୀ । ଏବେ ବି 973 ଗାଁକୁ ପାଇପ ଯୋଗେ ପାନୀୟ ଜଳ ପହଞ୍ଚିପାରିନାହିଁ । ସରକାରୀ ଦସ୍ତାବିଜ୍ କହୁଛି ମାତ୍ର 3ଟି ଗାଁକୁ ନାହିଁ ରାସ୍ତା କିନ୍ତୁ ଗ୍ରାଉଣ୍ଡ ରିପୋର୍ଟରୁ ସାମ୍ନାକୁ ଆସୁଛି କିଛି ଅଲଗା ଚିତ୍ର । ଜିଲ୍ଲାରେ 224 ଡାକ୍ତରଙ୍କ ପାଇଁ ମଂଜୁରୀ ହୋଇଛି, ଅଛନ୍ତି ମାତ୍ର 78 ଡାକ୍ତର, ଖାଲି ପଡିଛି 146 ଡାକ୍ତରୀ ପଦବୀ । ଏବେ ବଡ଼ ପ୍ରଶ୍ନ ଉଠୁଛି ଯେ, ପ୍ରଚୁର ସମ୍ଭାବନା ଥାଇ ମଧ୍ୟ କେନ୍ଦ୍ରାପଡାର ବିକାଶ ଦିଗରେ କାହିଁକି ଧ୍ୟାନ ଦେଉନି ପ୍ରଶାସନ ? ଜିଲ୍ଲାରେ ଉନ୍ନତ ପର୍ଯ୍ୟଟନସ୍ଥଳୀ ମାଳମାଳ, ମାତ୍ର ପର୍ଯ୍ୟଟନର ବିକାଶରେ କାହିଁକି ଧ୍ୟାନ ଦେଉନାହାନ୍ତି ସରକାର ? ନେତା ମାଳ ମାଳ ମାତ୍ର ରୁଗ୍ଣ ନେତୃତ୍ବ କେନ୍ଦ୍ରାପଡାକୁ ପଛରେ ପକାଇଛି କି ?
