ଜୀବନ ଯନ୍ତ୍ରଣାରେ ଛଟପଟ ହେଉଛନ୍ତି ଶୀତଲ, ସରକାରଙ୍କ ସହାୟତା ସମୂଦ୍ରକୁ ଶଙ୍ଖେ...

ଭଦ୍ରକ: ଭଦ୍ରକର ଟ୍ରକ ଦୁର୍ଘଟଣାରେ ସ୍କୁଲ ଛାତ୍ରଛାତ୍ରୀ ପ୍ରାଣ ହରାଇଥିବା ଘଟଣାକୁ ପୁରିଗଲାଣି 11 ମାସ । ସେ ସମୟରେ ଘଟଣାକୁ ନେଇ ରାଜ୍ୟ ରାଜନୀତିରେ ଯେତିକି ଚର୍ଚ୍ଚା ହେଉଥିଲା ଏବେ ତାହା ସମ୍ପୁର୍ଣ୍ଣ ରୂପେ ଶିଥିଳ ହୋଇଗଲାଣି । ସମସ୍ତେ ଭୁଲି ଗଲେଣି ଜୀବନ ହରାଇଥିବା ସେହି 5 ଜଣ ନିଷ୍ପାପ ଶିଶୁଙ୍କୁ । ଆଉ ତାସହିତ ଆଉ ଜଣେ ଜୀବନ ସହ ସଂଘର୍ଷ କରୁଥିବା କୋମଳ ପିଲାକୁ । ଯିଏ କି ଅସହାୟ ହୋଇ ଶେଷରେ ଇଚ୍ଚାମୃତ୍ୟୁ ପାଇଁ ଅନୁମତି ମାଗୁଛି ।

ଘଟଣାଟି ଥିଲା ଗତ 2018  ଜୁଲାଇ 19 ତାରିଖର । ସ୍କୁଲ ଛୁଟି ହେବାର ସମୟ ମାନେ ଅପରାହ୍ନର ଘଡ଼ି । ସ୍କୁଲରୁ ଫେରିବା ସମୟରେ ମନରେ ସେହି ଗୋଟିଏ ଉତ୍କଣ୍ଠା । ଆଉ ଆଖି ସାମ୍ନାରେ ଗୋଟିଏ ଦୃଶ୍ୟ । ମା’ ବାଢ଼ିଥିବା ଭାତ ଥାଳି । କିନ୍ତୁ ସେଦିନ ଦଇବ ସାଜିଲା ଦାଉ । କେଉଁଠି ଥିଲା ସେ ଦାନବ ଭଳି ଟ୍ରକ । ମାଡ଼ିଗଲା 6ଟି କୁନି କୁନି ଜୀବନ ଉପରେ । ଆଉ ଆଖି ବୁଜିଦେଲେ 5 ଟି ନିଷ୍ପାପ ଶିଶୁ । ଆଉ ଜଣେ ଭାଗ୍ୟବସତଃ ବଞ୍ଚିଯାଇ ଏବେ ବି ଜୀବନ ସହ କରୁଛି ସଂଘର୍ଷ । ଆମେ କହୁଛୁ ସେହି କୁନି ଝିଅ ଶୀତଲର କଥା ।

ରାହାଞ୍ଜା ଗାଁର ଅଖା ବ୍ୟବସାୟୀ ସୁବାଷ ସାହୁଙ୍କ ନବମ ଶ୍ରେଣୀରେ ପଢ଼ୁଥିବା ଝିଅ ଶ୍ୱେତାର ମୃତ୍ୟୁ ହେଲା କିନ୍ତୁ ସାନ ଭଉଣୀ ଶୀତଲ ଗୁରୁତର ଆହାତ ହେଲା । ଶୀତଲର ଦୁଇ ଗୋଡ଼ ସହ ହାତରେ ମଧ୍ୟ ଗଭୀର ଆଘାତ ଲାଗିଥିଲା । ସେ ମସୟରେ ସୁବାଷଙ୍କୁ ସ୍କୁଲ ଓ ଗଣଶିକ୍ଷା ବିଭାଗ ପକ୍ଷରୁ 2ଲକ୍ଷ ଏବଂ ମୁଖ୍ୟମନ୍ତ୍ରୀଙ୍କ ପାଣ୍ଠିରୁ 2ଲକ୍ଷ ଟଙ୍କାର ସହାୟତା ରାଶି ପ୍ରଦାନ କରାଯାଇଥିଲା । କିନ୍ତୁ ତାହା ଶୀତଲର ଚିକିତ୍ସା ପାଇଁ ସମୁଦ୍ରକୁ ଶଙ୍ଖେ ଭଳି । ଶୀତଲର ଚିକିତ୍ସାରେ ସୁବାଷ ସାହୁ ଆଜି ଯାଏଁ 15 ଲକ୍ଷରୁ ଉର୍ଦ୍ଧ୍ୱ ଟଙ୍କା ଖର୍ଚ୍ଚ କରି ସାରିଲେଣି । କିନ୍ତୁ ଅବସ୍ଥା ସୁଧୁରିବା ପରିବର୍ତ୍ତେ ଜଟିଳ ହେବାରେ ଲାଗିଛି । ଶୀତଲର ଗୋଟିଏ ଗୋଡ଼ ନଷ୍ଟ ହୋଇ କଟା ହେବାକୁ ବସିଲାଣି ।

ପରିବାରର ଆର୍ଥିକ ଅବସ୍ଥା ଏବଂ ନିଜର ଯନ୍ତ୍ରଣା ସହି ନପାରି ବାରମ୍ବାର ପରିବାର ଲୋକଙ୍କ ପାଖରେ ଇଚ୍ଛାମୃତ୍ୟୁ ପାଇଁ କାକୁତି ମୀନତି ହେଉଛି ଶୀତଲ । ଏନେଇ ପରିବାର ଲୋକେ ମଧ୍ୟ ଜିଲ୍ଲାପାଳଙ୍କୁ ଭେଟିଛନ୍ତି । ତେବେ ଶୀତଲଙ୍କ ପରିବାର ପକ୍ଷରୁ ସହାୟତା ପାଇଁ କୌଣସି ଦରଖାସ୍ତ ହୋଇନି । ସରକାରଙ୍କ ଗାଇଡ଼ ଲାଇନ ଅନୁଯାୟୀ ସମସ୍ତ ଚିକିତ୍ସା ଯୋଗାଇ ଦିଆଯିବ ବୋଲି ଜିଲ୍ଲାପାଳ ପ୍ରତିଶ୍ରୁତି ଦେଇଥିବା କହିଛନ୍ତି ।