ମନ୍ କି ବାତରେ ଧିରେ ଧିରେ ସ୍ୱାଭାବିକ ହେଉଛି ଦେଶ, ଭାଇରସ ମୁକାବିଲା ଲାଗି ଯୋଗ ପାଇଁ ପରାମର୍ଶ ଓ ଆୟୁଷ୍ମାନ ଭାରତର ଗୁଣଗାନ କଲେ ମୋଦି

ଅର୍ଗସ ବ୍ୟୁରୋ : ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲକଡାଉନର ତୃତୀୟ ମନ କି ବାତ କାର୍ଯ୍ୟକ୍ରମରେ ସମ୍ବୋଧନ କରିଛନ୍ତି। ଏହି ସମୟରେ ସେ କହିଛନ୍ତି ଯେ, ଗତଥର  ଯେତେବେଳେ ମନ କି ବାତ୍‌ କରିଥିଲି ସେତବେଳେ  ଯାତ୍ରୀ ଟ୍ରେନ୍‌ ବନ୍ଦ ଥିଲା, ବିମାନ  ସେବା ବନ୍ଦ ଥିଲା । କିନ୍ତୁ ଏହି ଥର ବହୁତ କିଛି ଖୋଲି ଯାଇଛି । ଶ୍ରମିକ ସ୍ପେଶାଲ ଟ୍ରେନ୍‌ ଚଳାଚଳ କରୁଛି । ଅନ୍ୟ ସ୍ପେଶାଲ ଟ୍ରେନ୍‌ ର ମଧ୍ୟ ଚଳାଚଳ ଆରମ୍ଭ କରିଛି ।  ସମସ୍ତ ସୁବିଧା ସହ  ବିମାନ  ଉଡାଣ ମଧ୍ୟ ଭରିଛି ।  ଧିରେ ଧିରେ ଶିଳ୍ପାନୁଷ୍ଠାନ ମଧ୍ୟ କାର୍ଯ୍ୟକ୍ଷମ ହେଉଛି । ଅର୍ଥାତ୍‌  ଅର୍ଥବ୍ୟବସ୍ଥାର  ଏକ ବଡ଼ ଭାଗ  ବର୍ତ୍ତମାନ  ଖୋଲିବା ଆରମ୍ଭ କରିଛି ।  ଏହି ସମୟରେ ଆମ୍ଭମାନଙ୍କୁ ଅଧିକ ସତର୍କ ରହିବା ଆବଶ୍ୟକ ବୋଲି  ମୋଦି ମନ କି ବାତ୍‌ରେ ଦେଶବାସୀଙ୍କୁ ଜାଗୃତ କରିଛନ୍ତି ।

ମୋଦି କହିଛନ୍ତି ଯେ, ବାସ୍ତବରେ ଏହି ମହାମାରୀ ସମୟରେ ଆମେ ଭାରତବାସୀ ଦେଖାଇଦେଇଛୁ ଯେ, ସେବା ଏବଂ ତ୍ୟାଗର ବିଚାର ଆମ ଆଦର୍ଶ ନୁହେଁ ବରଂ ଭାରତର ଜୀବନ ପଦ୍ଧତି। ସେବା ପରମ ଧର୍ମ। ସେବାରେ ସୁଖ ଅଛି। ସେବାରେ ସନ୍ତୋଷ ଅଛି। ଅନ୍ୟର ସେବାରେ ଲାଗିଥିବା ବ୍ୟକ୍ତିର ଜୀବନରେ ଭରପୁର ଆତ୍ମବିଶ୍ଵାସ, ସକାରାତ୍ମକତା ଏବଂ ଜୀବନ୍ତତା ପ୍ରତିପନ୍ନ ନଜର ଆସିଥାଏ। ଆମ ଡାକ୍ତର, ପୋଲିସକର୍ମୀ, ସଫେଇ କର୍ମୀ, ଓ ମିଡିଆ କର୍ମୀ ଏମାନେ ସବୁ ଯେଉଁ ସେବା କରୁଛନ୍ତି ତାହା ମୁଁ ବହୁ ଥର ଚର୍ଚ୍ଚା କରିଛି ଏପରିକି ମନ କି ବାତରେ ବି ଚର୍ଚ୍ଚା କରୁଛି। ସେବାରେ ନିଜର ସବୁ କିଛି ସମର୍ପିତ କରୁଥିବା ଲୋକଙ୍କ ସଂଖ୍ୟା ଅଗଣିତ ରହିଛି। ଏଭଳି ଜଣେ ବ୍ୟକ୍ତି ହେଉଛନ୍ତି ତାମିଲନାଡ଼ୁର ସି ମୋହନ। ସେ ମଦୁରାଇରେ ଏକ ସେଲୁନ ଚଳାଉଛନ୍ତି। ତାଙ୍କ ଆୟରୁ ସେ ତାଙ୍କ ଝିଅର ପାଠ ପଢା ଖର୍ଚ୍ଚ ପାଇଁ 5 ଲକ୍ଷ ଟଙ୍କା ଜମା କରିଥିଲେ। କିନ୍ତୁ ଏହି ବଦାନ୍ୟ ବ୍ୟକ୍ତି ଦେଶର ଏଭଳି ସଙ୍କଟପୂର୍ଣ୍ଣ ସ୍ଥିତିରେ ଜମା ଥିବା ଏହି ଅର୍ଥ ରାଶିକୁ ଗରିବଙ୍କ ସହାୟତା ପାଇଁ ଖର୍ଚ୍ଚ କରି ଦେଇଛନ୍ତି।

ଏହିଭଳି ଅଗରତଲାରେ ଠେଲା ଚଲାଇ ଜିବୀକା ନିର୍ବାହ କରୁଥିବା ଗୌତମ ତାଙ୍କର ପ୍ରତି ଦିନର ଆୟରୁ ଡାଲି ଚାଉଳ କିଣି ଗରୀବଙ୍କୁ ଖାଦ୍ୟ ବାଣ୍ଟୁଛନ୍ତି। ପଞ୍ଜାବର ପଠାଣକୋଟରୁ ବି ଆଉ ଏକ ଉଦାହରଣ ଦେଖିବାକୁ ମିଳିଛି। ଏଠାରେ ଦିବ୍ୟାଙ୍ଗ ଭଇରାଜୁ ଅନ୍ୟମାନଙ୍କ ସାହାଯ୍ୟରେ ଜମା କରିଥିବା ସ୍ଵଳ୍ପ ଜମାପୁଞ୍ଜିରେ 3 ହଜାରୁ ଅଧିକ ମାସ୍କ ତିଆରି କରି ଲୋକମାନଙ୍କୁ ବାଣ୍ଟିଛନ୍ତି। କେବଳ ସେତିକି ନୁହେଁ ସେ ଶହେ ପରିବାରଙ୍କ ପାଇଁ ଖାଦ୍ୟ ମଧ୍ୟ ଯୋଗାଇଛନ୍ତି। ଦେଶର ସମସ୍ତ ଅଞ୍ଚଳର ମହିଳା ସେଲ୍ଫ ହେଲ୍ପ ଗ୍ରୁପର ପରିଶ୍ରମର ମଧ୍ୟ ଅଗଣିତ କାହାଣୀ ସାମ୍ନାକୁ ଆସୁଛି। ଗାଁରେ ଛୋଟ ଛୋଟ ସହରରେ ଆମ ଭଉଣୀ ଝିଅ ହଜାର ହଜାର ସଂଖ୍ୟାରେ ମାସ୍କ ତିଆରି କରୁଛନ୍ତି। ଏଭଳି ବହୁ ଉଦାହରଣ ପ୍ରତିଦିନ ଦେଖୀବାକୁ ଏବଂ ଶୁଣିବାକୁ ମିଳୁଛି। ବହୁ ଲୋକ ନମୋ ଆପ୍ ଏବଂ ଅନ୍ୟ ମାଧ୍ୟମ ଜରିଆରେ ମୋତେ ତାଙ୍କ କାମ ବିଷୟରେ କହୁଛନ୍ତି। ବହୁ ଥର ସ୍ଵଳ୍ପ ସମୟ ପାଇଁ ମୁଁ ବହୁ ଲୋକଙ୍କ, ବହୁ ସଙ୍ଗଠନ ଏବଂ ବହୁ ସଂସ୍ଥାଙ୍କର ନାମ ନେଇ ପାରୁ ନାହିଁ। ସେବା ଭାବରେ ଲୋକଙ୍କ ସାହାଯ୍ୟ କରୁଥିବା ସବୁ ଲୋକଙ୍କୁ ମୁଁ ସମ୍ମାନ କରୁଛି, ଆଦର କରୁଛି। ସେମାନଙ୍କୁ ହୃଦୟରୁ ଧନ୍ୟବାଦ ଜଣାଉଛି।

ଏଭଳି ସଙ୍କଟପୂର୍ଣ୍ଣ ସ୍ଥିତିରେ ଇନୋଭେସନ ହେଉଛି। ଗାଁ ରୁ ନେଇ ସହର ଯାଏଁ, ଛୋଟ ବ୍ୟାପାରୀଙ୍କ ଠାରୁ ନେଇ ଷ୍ଟାର୍ଟ ଅପ ଯାଏଁ, ଲ୍ୟାବରୁ ନେଇ କରୋନା ଲଢେଇରେ ନୂଆ ନୂଆ ଇନୋଭେସନ କରୁଛନ୍ତି। ଯେପରି ନାସିକର ରାଜେନ୍ଦ୍ର ଯାଦବ ଜଣେ କୃଷକ। ସେ ନିଜ ଗ୍ରାମକୁ କରୋନା ସଂକ୍ରମଣରୁ ଦୂରେଇ ରଖିବା ପାଇଁ ନିଜ ଟ୍ରାକ୍ଟର ସହ ଯୋଡି ଏକ ସାନିଟାଇଜର ମେସିନ ଫିଟ୍ କରିଛନ୍ତି। ଏହି ମେସିନ ସାହାଯ୍ୟରେ ସେ ଗାଁକୁ ସାନିଟାଇଜ କରୁଛନ୍ତି। ସେହିପରି ସୋସିଆଲ ମିଡିଆରେ ମଧ୍ୟ ବହୁ ଦୋକାନୀ ପାଇପଲାଇନ ଲଗାଇ ସାମାଜିକ ଦୂରତ୍ଵ ରକ୍ଷା କରି ଜିନିଷ ବିକ୍ରି କରୁଥିବା ଦେଖିବାକୁ ମିଳୁଛି।

କରୋନା ଭ୍ୟାକ୍ସିନକୁ ନେଇ ଆମ ଲ୍ୟାବରେ ଯେଉଁ ଇନୋଭେସନ ହେଉଛି ତାହା ଉପରେ ଦୁନିଆର ନଜର ରହିଛି। ଆମର ଆଶା ମଧ୍ୟ ରହିଛି। ଦେଶର ଏହି ଗମ୍ଭୀର ସ୍ଥିତିକୁ ପରିବର୍ତ୍ତନ କରିବାକୁ ଇଚ୍ଛା ଶକ୍ତି ସହ ଇନୋଭେସନ ଆବଶ୍ୟକ। ଏଥିପାଇଁ ମହାମାରୀ ଉପରେ ଜିତ ପାଇଁ ଇନୋଭେସନ ଅତ୍ୟନ୍ତ ଗୁରୁତ୍ଵପୂର୍ଣ୍ଣ। ଏହା ଏଭଳି ଏକ ଯାତ୍ରା ଯେଉଁଥିପାଇଁ ଦୁନିଆ ପାଖରେ କୌଣସି ସମାଧାନ ନାହିଁ କି ଉପାୟ ନାହିଁ। ଆମ ଦେଶରେ କୌଣସି ବର୍ଗ ଏଭଳି ନାହାଁନ୍ତି ଯେଉଁମାନେ କଠିନ ସମୟରେ ନାହାଁନ୍ତି। ଏହି ସଙ୍କଟପୂର୍ଣ୍ଣ ସ୍ଥିତିରେ ଏବୁଠୁ ଅଧିକ ପ୍ରଭାବିତ ହୋଇଛନ୍ତି ପ୍ରବାସୀ ଏବଂ ଶ୍ରମିକମାନେ। ଆମେ ସବୁ ମିଶି ତାଙ୍କର ଏହି ପୀଡା ବାଣ୍ଟିବାକୁ ପ୍ରୟାସ କରୁଛନ୍ତି। ଆମ ରେଲୱେ ସେମାନଙସକର ସାହାଯ୍ୟ ପାଇଁ ନିରନ୍ତର ପ୍ରୟାସ କରୁଛନ୍ତି। ଲକ୍ଷ ଲକ୍ଷ ଶ୍ରମିକଙ୍କୁ ଟ୍ରେନ୍ ଯୋଗେ ସେମାନଙ୍କ ଗନ୍ତବ୍ୟ ସ୍ଥଳକୁ ପହଞ୍ଚାଇବାରେ ସେମାନଙ୍କୁ ଖାଦ୍ୟ ଯୋଗାଇବାରେ, ସମସ୍ତଙ୍କ ପାଇଁ କ୍ଵାରେଣ୍ଟାଇନ ସୁବିଧା କରିବା, ଟେଷ୍ଟ କରିବା ଆଦି କାର୍ଯ୍ୟ ନିରନ୍ତର ଚାଲିଛି। ଆଜି ଆମେ ଶ୍ରମିକଙ୍କ ପୀଡାକୁ ଦେଖି ପୂର୍ବଜଙ୍କ ପୀଡାକୁ ଅଣୁଭବ କରି ପାରୁଛେ। ଏବେ ପ୍ରବାସୀ ଶ୍ରମିକଙ୍କ ପାଇଁ ବହୁ ପଦକ୍ଷେପ ଉଠାଇବା ଜରୁରୀ ହୋଇ ପଡିଛି।

ଅନ୍ଧାରରୁ ଆଲୋକ ଆଡକୁ ଗତି କରିବା ମନୁଷ୍ୟର ସ୍ଵଭାବ। ଆତ୍ମନିର୍ଭର ଭାତ ଯୋଜନାକୁ ଏବେ ତାଙ୍କର ଅଭିଯାନ କରିବା ଆରମ୍ଭ କଲେଣି। ଏହି ମିଶନର ନେତୃତ୍ଵ ଦେଶବାସୀ ହାତକୁ ନେଇଛନ୍ତି। ଲୋକମାନେ ଏବେ ଲୋକାଲ ପ୍ରଡକ୍ଟ କିଣୁଛନ୍ତି। ସେମାନେ ଭୋକାଲ ଫର ଲୋକାଲକୁ ପ୍ରମୋଟ କରୁଛନ୍ତି। କରୋନା ସଙ୍କଟର ଏଭଳି ସ୍ଥିତିରେ ବିଶ୍ଵର ଅନେକ ନେତାଙ୍କ ସହ ମୋର ଆଲୋଚନା ହେଉଛି। ଏହି ସମୟରେ ସେମାନେ ଯୋଗ ଏବଂ ଆୟୁର୍ବେଦ ଉପରେ ଧ୍ୟାନ ଦେଉଥିବା ଦେଖୀବାକୁ ମିଳୁଛି। ଏପରିକି ବହୁ ନେତା ମୋତେ ପଚାରୁଛନ୍ତି ଯେ, ଯୋଗ ଏବଂ ଆୟୁର୍ବେଦ ସାହାଯ୍ୟରେ କଣ କରୋନାକୁ ଦୂର କରି ହେବ। ବହୁ ଲୋକ ଅନଲାଇନ ଭିଡିଓ ଦେଖି ଯୋଗ କରୁଛନ୍ତି କିମ୍ବା ଅନଲାଇନ କ୍ଲାସ ଜଏନ କଲେଣି। ଯୋଗ କମ୍ୟୁନିଟି, ଇମ୍ୟୁନିଟି ଏବଂ ୟୁନିଟି ପାଇଁ ଜରୁରୀ।

ଯୋଗ ସାହାଯ୍ୟରେ ରେସପିରିଟି ସିଷ୍ଟମ ମଜବୁତ ହୁଏ। ଏଥିପାଇଁ ବହୁ ପ୍ରକାରର ପ୍ରାଣାୟମ ରହିଛି। ଯାହାର ପ୍ରଭାବ ଆମେ ବହୁ ସମୟ ଧରି ଦେଖି ଆସୁଛି। ଆୟୁଷ ମନ୍ତ୍ରାଳୟ ମଧ୍ୟ ମାଇଁ ଲାଇଫ୍ ମାଇଁ ୟୋଗା ନାମରେ ଅନ୍ତରାଷ୍ଟ୍ରୀୟ ଭିଡିଓ ବ୍ଲଗର ଏକ ପ୍ରତିଯୋଗୀତା ଆରମ୍ଭ କରିଛି। ଏଥିରେ ଭାଗ ନେବା ପାଇଁ ଆପଣଙ୍କର ଏକ ତିନି ମିନିଟର ଭିଡ଼ିଓ ଅପଲୋଡ଼ କରିବାକୁ ପଡ଼ିବ। ଦେଢ ବର୍ଷ ପୂର୍ବେ ଆରମ୍ଭ ହୋଇଥିବା ଆୟୁଷ୍ମାନ ଭାରତ ଯୋଜନାରେ ଲାଭାର୍ଥୀଙ୍କ ସଂଖ୍ୟା ଏକ କୋଟି ପାର ହୋଇଛି। ଏହାର ଅର୍ଥ ଏକ କୋଟି ପରିବାର ପାଇଁ ସେବା ଯୋଗାଇବା କାମ ଚାଲିଛି। ଆୟୁଷ୍ମାନ ଭାରତ ଯୋଜନାରେ ଗରୀବଙ୍କ ଅର୍ଥ ଖର୍ଚ୍ଚ ହେବାରୁ ମୁକ୍ତି ପାଉଛନ୍ତି। ଆୟୁଷ୍ମାନ ଭାରତ ଯୋଜନାର ଏକ ବଡ଼ ବିଶେଷତ୍ଵ ହେଉଛି କି, ଏହା ଦେଶକୁ ଏକତା ରଙ୍ଗରେ ରଙ୍ଗୀନ କରିବାକୁ ସହାୟକ ହେଉଛି।

ଏହି ସମୟରେ ମୋଦି ଓଡ଼ିଶା କଥା କହିଛନ୍ତି। ସେ କହିଛନ୍ତି ଯେ, ଗୋଟିଏ ପଟେ ଦେଶ କରୋନା ମହାମାରୀ ସଙ୍କଟ ଦେଇ ଗତି କରୁଥିବା ବେଳେ ଭାରତର କିଛି ଅଂଶର ଲୋକମାନେ ପ୍ରାକୃତିକ ବିପର୍ଯ୍ୟୟ ଦେଇ ଗତି କରିଛି। ଗତ କିଛି ଦିନ ତଳେ ଓଡ଼ିଶାରେ ସୁପର ସାଇକ୍ଲୋନ ଅମ୍ଫାନର ପ୍ରଭାବ ପଡ଼ିଥିଲା। ଝଡ଼ ତୋଫାନରେ ବହୁ ଲୋକଙ୍କ ଘର ନଷ୍ଟ ହୋଇଯାଇଛି। କୃଷକଙ୍କ ଫସଲ ଉଜୁଡି ଯାଇଛି। ପଶ୍ଚିମବଙ୍ଗ ଏବଂ ଓଡ଼ିଶାର ଲୋକ ଯେଉଁ ସାହାସିକତାର ସହ ଏହି କଠିନ ସ୍ଥିତିକୁ ସମ୍ମୁଖୀନ କରିଛନ୍ତି ତାହା ପ୍ରଶଂସନୀୟ।

ଏହି ସମୟରେ ମୋଦି ପଙ୍ଗପାଳ ସମସ୍ୟା ବିଷୟରେ ମଧ୍ୟ କହିଛନ୍ତି। ସେ କହିଛନ୍ତି ଯେ, ଦେଶର ବହୁ ଅଂଶ ପଙ୍ଗପାଳ ଦ୍ଵାରା ପ୍ରଭାବିତ ହୋଇଛନ୍ତି। ଏହା ଆମକୁ ମନେ ପକାଉଛି କି ଛୋଟ ଜୀବ କିପରି କ୍ଷତି କାରକ ହୋଇପାରେ। ସେ ପୁଣି କହିଛନ୍ତି ଯେ, ଜୁନ୍ 5ରେ ବିଶ୍ଵ ପରିବେଶ ଦିବସ ପାଳନ କରିବ। ପ୍ରକୃତିର ସମୃଦ୍ଧ ବିବିଧତା, ଜୈବ ବିବିଧତାକୁ ନିକଟରୁ ଦେଖିବାକୁ ସୁଯୋଗ ମିଳୁଛି।