ପାଟଣାଗଡ଼ ଉପଖଣ୍ଡର ବେଳପଡା ବ୍ଲକ ଅନ୍ତର୍ଗତ ଯୁବା ଗ୍ରାମରେ ରହି ଆସୁଥିବା ଅସହାୟ ବୃଦ୍ଧା ପ୍ରେମ ନାୟକ ଦୀର୍ଘ 5ବର୍ଷ ପୂର୍ବରୁ ସ୍ବାମୀ ଚାଲିଯିବା ପରେ ବହୁ ଅସୁବିଧାରେ ଦିନ କାଟୁଛନ୍ତି। ଯେଉଁ ଘରେ ସେ ରହୁଛନ୍ତି, ସେଥିରୁ ବର୍ଷା ହେଲେ ପାଣି ଗଳୁ ଥିବାବେଳେ ଘର ଭିତରରୁ ସୂର୍ଯ୍ୟ ଚନ୍ଦ୍ର ଦିଶୁଛନ୍ତି। ଏମିତିକି କେହି ରୋଜଗରିଆ ନଥିବାରୁ ଅନ୍ୟ ଉପରେ ସେ ନିର୍ଭର କରୁଛନ୍ତି। ତେବେ ସବୁଠାରୁ ବଡ଼ କଥା ହେଉଛି ଆଜିଯାଏଁ ପ୍ରେମଙ୍କୁ ନା ବାର୍ଦ୍ଧକ୍ୟ ଭତ୍ତା ନା ବିଧବା ଭତ୍ତା କିଛି ବି ମିଳୁନାହିଁ। ଆଉ ଆବାସ ଯୋଜନାରେ ଘର ଖଣ୍ଡେ ତ ତାଙ୍କ ପାଇଁ ସତେ ଯେପରି ସାତ ସପନ ପାଲଟିଛି।
ସେପଟେ ପ୍ରେମ ଆବାସ ଯୋଜନାରେ ଘର ଖଣ୍ଡିଏ ପାଇବା ପାଇଁ ପଞ୍ଚାୟତରେ ଆବେଦନ କରିଥିଲେ ମଧ୍ୟ ଆଜି ପର୍ଯ୍ୟନ୍ତ ପାଇ ନଥିବା ସେ କହିଛନ୍ତି। ଏମିତିକି ସେ ଏନେଇ ବାରମ୍ବାର ସରପଞ୍ଚକୁ ଜଣାଇଥିଲେ ମଧ୍ୟ କେହି ଶୁଣୁ ନଥିବାର କହିଛନ୍ତି। ବୟସର ଅପରାହ୍ଣରେ ବାର ଦୁଆର ଶୁଣ୍ଡିପିଣ୍ଡା ହେଉଛନ୍ତି ପ୍ରେମ। ଆଉ ଏଭଳି ପରିଣତ ବୟସରେ ସାହାଯ୍ୟ କରିବାକୁ ପାଖରେ ସାହା ବୋଲି କେହି ନାହିଁ। ତେଣୁ ଖୁବଶୀଘ୍ର ପ୍ରଶାସନ ପ୍ରେମଙ୍କୁ ସହାୟତା ଯୋଗାଇ ଦେବାର ଆବଶ୍ୟକତା ରହିଛି।
