He went to the dadan work and returned as a dead body

ଅର୍ଗସ ବ୍ୟୁରୋ: ବନ୍ତଳା ବଜାର ଗାଁର ଅନୁସୂଚିତ ଜାତିର ୧୧ଜଣ ଶ୍ରମିକ ଭଲ ଦୁଇ ପଇସା ରୋଜଗାର କରିବାକୁ ଗତ ୨୨ତାରିଖରେ ଚେନାଇ ଯାଇଥିଲେ। ସେଠାରେ ଏକ ପ୍ଲାଷ୍ଟିକ କାରଖାନାରେ କାମ କରିବାକୁ ନିକଟସ୍ଥ ଗଡ଼ତରାସ ଗାଁର ବିଶ୍ୱନାଥ ନାଏକ ନାମକ ଜଣେ ବ୍ୟକ୍ତି ୧୧ଜଣ ଶ୍ରମିକଙ୍କୁ ସାଙ୍ଗରେ ନେଇଥିଲେ। ୨୩ତାରିଖ ମଧ୍ୟାହ୍ନ ୧୨ଟା ୧୫ରେ ପଣ୍ଡିଚେରୀ ଏକ୍ସପ୍ରେସରେ ସେମାନେ ଚେନ୍ନାଇ ଯାଇଥିଲେ। ହେଲେ ଚେନ୍ନାଇ ଷ୍ଟେସନରେ ପହଞ୍ଚିବା ପୂର୍ବରୁ ଟ୍ରେନ ଭିତରେ ଶ୍ରୀକାନ୍ତ ଗୋଛୟତ ନାମକ ଜଣେ ଶ୍ରମିକ ହଠାତ ମୃତ୍ୟୁ ବରଣ କଲେ। ତାଙ୍କୁ ଅନ୍ୟ ୧୦ଜଣ ଶ୍ରମିକ ଚେନ୍ନାଇ ସେଣ୍ଟ୍ରାଲ ହସ୍ପିଟାଲରେ ଭର୍ତ୍ତି କଲେ। କିନ୍ତୁ ସେତେବେଳକୁ ତାଙ୍କର ମୃତ୍ୟୁ ହୋଇ ସାରିଥିଲା। ସେଠାକାର ରେଳବାଇ ପୋଲିସ ଶବକୁ ବ୍ୟବଚ୍ଛେଦ କରିଛି। କିନ୍ତୁ ଶବକୁ ସେଠାରେ ସତ୍କାର କରିବା କିମ୍ବା ନିଜ ଘରକୁ ଆଣିବା ପାଇଁ ହାତରେ ଟଙ୍କାଟିଏ ନାହିଁ। ଫଳରେ ଶ୍ରମିକ ମାନେ ସହାୟତକୁ ଅପେକ୍ଷା କରି ରହିଛନ୍ତି। ପରିବାର ଲୋକଙ୍କୁ ଫୋନ କରି ଟଙ୍କା ପଠେଇବାକୁ କହୁଛନ୍ତି। ହେଲେ ସମସ୍ତେ ଖଟିଖିଆ ଓ ଦିନ ମଜୁରିଆ ହୋଇ ଥିବାରୁ ଟଙ୍କା ପଠେଇବା ସମ୍ଭବ ହୋଇ ପାରୁ ନାହିଁ। ଅନ୍ୟ ପକ୍ଷରେ ଶ୍ରମିକ ମାନଙ୍କ ପରିବାର ତରଫରୁ ସ୍ଥାନୀୟ ସରପଞ୍ଚ ଓ ଶ୍ରମ ବିଭାଗକୁ ନେହୁରା ହୋଇଛନ୍ତି। ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି। କିଏ ନିଜ ସ୍ୱାମୀ ତ ଆଉ କିଏ ପୁଅକୁ ଫେରିବା ବାଟ ଚାହିଁ ବସିଛନ୍ତି।
ଶ୍ରମିକ ପରିବାର କହିବା କଥା ଏଠାରେ ପର୍ଯ୍ୟାପ୍ତ କାମ ମିଳୁ ନାହିଁ। ଫଳରେ ଯୁବକ ମାନେ ବେକାର ହୋଇ ବୁଲୁଛନ୍ତି। କିଏ ଘର ଖଣ୍ଡେ କଲେ ଆଗକୁ ବିବାହ କରିବାର ସ୍ୱପ୍ନ ଦେଖୁଛି ତ ଆଉ କିଏ ନିଜ ଝିଅ ଓ ଭଉଣୀର ବିବାହ କରାଇବାକୁ ଭାବିଛି। ତେଣୁ ବାହାରକୁ ଯାଇ ଭଲ ଦୁଇ ପଇସା ସଞ୍ଚୟ କରିବାକୁ ଆଶା ବାନ୍ଧି ଯାଇଥିଲେ। ହେଲେ ତାହା ହେବା ପୂର୍ବରୁ ଜଣେ ଆର ପାରିକୁ ଚାଲିଗଲା। ଆଉ ୧୦ଜଣ ଶ୍ରମିକ ଭୋକ ଉପାସରେ ପଡି ରହିଛନ୍ତି। ସ୍ଥାନୀୟ ସରପଞ୍ଚ କହିଛନ୍ତି ଯେ ପ୍ରାୟ ଏକ ବର୍ଷ ହେଲା ପଞ୍ଚାୟତରେ କୌଣସି ଶ୍ରମଭିତ୍ତିକ କାମ ହେଉ ନାହିଁ। ବ୍ଲକ ପ୍ରଶାସନ ଆଦୌ ସହଯୋଗ କରୁନାହିଁ। ଏଠାରେ କାମ ନାହିଁ ତ ଶ୍ରମିକ ମାନଙ୍କୁ କିଭଳି କାମ ଧନ୍ଦା ଯୋଗାଇ ଦିଆ ଯାଇ ପାରିବ ବୋଲି ସରପଞ୍ଚ ଓଲଟା ପ୍ରଶ୍ନ କରିଛନ୍ତି। କିନ୍ତୁ ଫସି ରହିଥିବା ଶ୍ରମିକ ମାନଙ୍କୁ ଉଦ୍ଧାର ପାଇଁ ପ୍ରଶାସନ ସହ ଯୋଗାଯୋଗ କରିଛି। ଅନ୍ୟ ପକ୍ଷରେ ସହକାରୀ ଶ୍ରମ ଅଧିକାରୀ ସୂଚନା ଦେଇଛନ୍ତିଯେ ଶ୍ରମ ବିଭାଗ ତରଫରୁ ସବୁ ବ୍ୟବସ୍ଥା କରାଯାଇଛି। ସେଠାରେ ଶବକୁ ସତ୍କାର କରାଯିବ। ଶ୍ରମିକ ମାନଙ୍କ ଟ୍ରେନ ଟିକେଟ ବ୍ୟବସ୍ଥା କରାଯିବ। ସେମାନଙ୍କୁ ସୁରକ୍ଷିତ ନିଜ ଗାଁକୁ ଅଣାଯିବ।